Harmagedoni — Inuit ilaasa suusorigaat?

“Katersorpaalu najukkamut hebræerisut Harmagedonimik taaneqartumut.” — SAQQUMMERSITAT 16:16.

OQAASEQ Harmagedoni tusaraangakku suna eqqarsaatigisarpiuk? Ajunaarnersuaq? Oqaaseq Biibilimi ataasiaannarluni eqqaaneqarpoq, nunarpassuarnili nutaarsiassaqartitsivinnit upperisarsiornikkullu siuttunit atukulaneqartarpoq.

Harmagedoni pillugu isummat nalinginnaasut Biibilimi allassimasunut naapertuuppat? Akissutaa ilisimassallugu pitsaassaaq. Sooq? Harmagedoni pillugu ilumoortoq paasigukku annilaangasariaarussinnaagavit, siunissamut isumalluarnerulersinnaagavit Guutilu pillugu isumannut sunniuteqarsinnaammat.

Apeqqutit uku pingasut isumaliutigikkit, Harmagedonillu suuneranik isummat nalinginnaasut Biibilimi ajoqersuutigineqartunut sanilliutikkit.

  1. HARMAGEDONI AJUNAARNERSUUA INUNNIT PILERSINNEQARTOQ?

Ilaannikkut tusartarparput tusagassiortut ilisimatuullu oqaaseq “Harmagedoni” imaluunniit “Armageddon” ajunaarnersuit inunnit pilersinneqartut pillugit atoraat. Assersuutigalugu sorsunnersuaq siulleq aappaalu Harmagedonitut eqqartorneqartarput. Sorsunnersuup aappaata kingorna USA-p Sovjetunionillu atomimik sakkussiaatitik atorlugit imminnut sorsuutilernissaat inuit annilaanngatigaat, tusagassiuutinilu sorsuutilersinnaaneq tamanna “Harmagedonitut atomimik sakkussianit pilersinneqartutut” eqqartorneqarpoq. Ullumikkut ilisimatuut mingutsitsinerup silap pissusaanik allannguisitserujussuarnissaa annilaanngatigaat “silallu pissusaatigut Harmagedoneqarsinnaaneq” eqqartorpaat.

Taakkua isumaat qanoruna paasisariaqartoq: Inuit nunarsuup uumassusillillu tassaniittut tamarmik siunissaannut aalajangiisuusinnaapput. Naalakkersuisut silatuumik iliuuseqanngippata nunarsuaq ataavartumik ajoquserneqassaaq.

Biibilimi ajoqersuutigineqartoq: Inuit nunarsuarmik aseruinissaat Guutip akuerinavianngilaa. Biibilimi neriorsoqqissaarneqarpugut Jehovap * nunarsuaq ‘soqanngitsussanngortissanngikkaa, kisianni najugaqarfissanngortillugu pinngortikkaa’. (Esaja 45:18) Inuit nunarsuarmik aseruilluinnarnissaat Guutip akuerinngisaannassavaa. ‘Nunarsuarmik aseruisut aserussavai.’ — Saqqummersitat 11:18

2. HARMAGEDONI PINNGORTITAMI AJUNAARNERSUUA?

Tusagassiortut Harmagedoni pinngortitami ajunaarnersuarujussuaqarnermut taaguutitut ilaannikkooriarlutik atortarpaat. Assersuutigalugu “Haitimi ‘Harmagedoni’” 2010-mi nutaarsiassani ilaatigut atuarneqarsinnaavoq. Tassani allaaserineqarput nunap sajorujussuarnera pissutigalugu naalliuutit, aseruinerit ajunaartullu. Tusagassiortut filmiliortitsisullu oqaaseq Harmagedoni pisut pereersimasut pillugit taamaallaat atortanngilaat, aammali siunissami pisussat aarlerigisatik pillugit atortarpaat. Assersuutigalugu oqaaseq Harmagedoni atorsimavaat asteroidep nunarsuaq eqqussagaluarpagu sunniutaassasorisartik pillugu.

Taakkua isumaat qanoruna paasisariaqartoq: Harmagedoni ajunaarnersuuvoq siumut oqaatigereerneqarsinnaanngitsoq, nalaatsornikkut eqquisussaq inunnillu pisuussuteqanngitsunik toqoraasussaq. Imminut illersorniarluni iliuuseqartoqarsinnaanngingajalluinnarpoq.

Biibilimi ajoqersuutigineqartoq: Harmagedonimit inuit nalaatsornerinnakkut eqqorneqassanngillat. Inuit ajortuinnaat Harmagedonimi nungutinneqassapput. Biibilimi ima neriorsuuteqarpoq: “Iluanngitsoq erniinnaq peeruttussaavoq, inaani takuniaraluarukku peerutereersimassaaq.” — Tussiaat 37:10.

3. GUUTIP NUNARSUAQ HARMAGEDONIMI PIUNEERUTISSAVAA?

Inuppassuit uppertut isumaqarput nunarsuaq aserussasoq ajunngitsoq ajortorlu inaarutaasumik akersuutilerpata. USA-mi Princeton Survey Research Associates-ip misissuinerani paasineqarpoq inersimasut 40 procentii isumaqartut nunarsuaq “Harmagedonimi sorsunnermi” aserussasoq.

Taakkua isumaat qanoruna paasisariaqartoq: Inuit nunarsuarmi naassaanngitsumik inuunissaat siunertaanngisaannarsimavoq, aamma  nunarsuaq naassaanngitsumik atasussanngorlugu pinngortinneqanngilaq. Guutip inuit pinngortippai tamaasa toqusussanngortillugit.

Biibilimi ajoqersuutigineqartoq: Biibilimi allassimavoq Guutip ‘nuna aalajaatsumik tunngavilersimagaa naassaanngitsumik patajaallisillugu’. (Tussiaat 104:5) Nunarsuarmi najugallit pillugit Biibilimi allassimavoq: “Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29.

Erseqqilluinnarpoq Harmagedonip suuneranik paasinnittaaserpassuit nalinginnaasut Biibilimi akerlilerneqartut. Sunami ilumoortuua?

[Quppernerup ataani ilanngussaq]