Juulimi 1879-imi Napasuliaq Alapernaarsuiffik tuluttooq siulleq saqqummersinneqarpoq. Taamanimiilli pissutsit allanngorsimapput — aamma atuagassiaatitsinni allannguisoqarsimavoq. (Assit qulaaniittut takukkit). Napasuliaq Alapernaarsuiffik-mi maannamiit allannguisoqaqqissaaq. Allannguinerit suut maluginiarsinnaavigit?

Nunarpassuarni inuit internetikkut paasissutissarsiornermik nuannarisaqartut amerliartuinnarput. Paasissutissat taamaallaat internetikkut takuneqarsinnaasut alakkariaannaavaat. Atuagarpassuit, atuagassiarpassuit aviiserpassuillu internetikkut atuarneqarsinnaapput.

Internetikkut atuartartorpassuaqarmat nittartagarput — www.ps8318.com — soqutiginarnerulersillugu atoruminarsarlugulu nutarteqqammerparput. Nittartakkatsinnik alakkaasut atuagassiat atuakkallu oqaatsini 430-nit amerlanerusuni saqqummersinneqarsimasut atuarsinnaavaat. Ukioq manna januaari aallarnerlugu ilanngutassiat ilaat atuagassiaatitsinni naqiterneqartaraluartut nittartakkatsinni taamaallaat alakkarneqarsinnaalissapput.

Allaaserisanik amerlanerusunik internetikkuinnaq saqqummersitsisalertussaagatta Napasuliaq Alapernaarsuiffik tamanoortoq siornatigut 32-nik qupperneqartoq maannamiit 16-inik qupperneqalissaaq. Napasuliaq Alapernaarsuiffik maannakkut oqaatsini 204-ni saqqummersinneqartarpoq. Atuagassiap qupperneri ikilisussaagamik imaassinnaavoq oqaatsinut amerlanerusunut nutserneqartalersoq. *

Taamatut allanngortitsigatta neriuutigaarput inuit amerlanerusut tusarliussamik Biibilimeersumik annassutaasinnaasumik soqutiginninnerulernissaat. Paasissutissarpassuarnik soqutiginartunik — naqitertakkatsinni nittartakkatsinnilu — atuartartorpassuatta Biibilimik ataqqinnillutillu paasinnerusuttut iluaqutigisassaannik saqqummiiuarnissarput aalajangiusimavarput.

Aaqqissuisut