SAMMISAQ PINGAARNEQ | TOQU KIKKUT TAMARMIK NAGGATISSARAAT?
Toqu kikkut tamarmik naggatissarinngilaat!
Betania illoqarfeeraavoq Jerusalemimit stadienik 15-inik (3 kilometerisut) ungasitsigisumiittoq. (Johannesi 11:18) Jiisusip toqunissaa sapaatit-akunnialui sioqqutitsiarlugit alianartorujussuarmik pisoqarpoq. Lazarusi, Jiisusip ikinngutigilluagaasa ilaat, toqussutigisassaminik napparsimaleriataarpoq.
Jiisusip tamanna tusaramiuk ajoqersukkani oqarfigai Lazarusi sinimmat itersariartorniarlugu. (Johannesi 11:11) Jiisusilli ajoqersukkami paasinngimmanni ima oqarfigilluaannarpai: “Lazarusi toquvoq.” — Johannesi 11:14.
Ilisinerup kingorna ullut sisamat qaangiummata Jiisusi Martha, toqusup qatanngutaasa ilaat, tuppallersarniarlugu Betaniamukarpoq. Martha ima oqarpoq: “Maaniissimagaluaruit qatanngutiga toqusimassanngikkaluarpoq.” (Johannesi 11:17, 21) Jiisusip ima akivaa: “Uanga makissutaallungalu inuussutaavunga; uannut uppertoq toqugaluaruniluunniit inuuinnassaaq.” — Johannesi 11:25.
“Lazarusi, maanga anigit!”
Neriorsuutip tamatuma ilumoornera ersersinniarlugu Jiisusi ilivermukarpoq imalu suaarluni: “Lazarusi, maanga anigit!” (Johannesi 11:43) Inuillu najuuttut tupaallaatigeqisaattut angut toqusimasoq anillappoq.
Jiisusip siornatigut ikinnerpaamik inuit marluk toqusunit makitissimavai. Taakkua ilaat niviarsiaraavoq Jairusip pania. Jiisusip niviarsiaraq makitinngitsiarlugu aamma sininnerarpaa. — Lukasi 8:52.
Maluginiaruk Jiisusip Lazarusimut Jairusillu panianut tunngatillugu toqu sininnermut assersuummagu. Tamanna assersuutaavoq tulluartoq. Sooq? Sininnermi sunnguamilluunniit ilisimasaqartoqarneq ajorami aamma sininneq anniarnermit naalliunnermillu qasuersernermik eqqarsaatiginnilersitsisarami. (Oqaluussisartup oqaasii 9:5; takuuk ungalusaq “Toqu itisuumik sininnertut ippoq”). Jiisusip ajoqersugaasa siulliit toqunerup kingorna qanoq pisoqartarnera paasilluinnarpaat. Ujarlerfissiami (Encyclopedia of Religion and Ethics-imi) allassimavoq ‘Jiisusip ajoqersugaasa toqu sininnertut upperlutillu toqusimasunut ilivertut qasuerserfittut isigigaat’.
Toqusimasut ilivermi naalliunnatik sininnerannik ilisimanninnerput tuppallersaatigaarput. Taamaalilluni toqumut tunngatillugu paasissaanngitsoq qulaarneqarmat toqu ersigisariaqanngilarput.
“TOQUSOQ UUMMAQQISSINNAANERPA?”
Unnuakkut sinilluarneq iluartaraluartoq arlaannarpulluunniit naassaanngitsumik sinikkusunnavianngilaq. Ilivermi sinittut Lazarusitut Jairusillu paniatut makinnissaannut neriuutissaqarpa?
Ataataanerpaaq Jobi toqungajalersutut misigigami tamannarpiaq pillugu ima aperivoq: “Toqusoq uummaqqissinnaanerpa?” — Jobi 14:14, 1990.
Jobip Guutimut Ajugaqanngitsumut saaffiginninnermini apeqqutini nammineq ima akivaa: ‘Qaaqqusissasutit, uangalu akissagikkit, assavit piliaat taava kajungerilissagit.’ (Jobi 14:15, 1900) Jobip qularinngilluinnarpaa Jehovap ulloq kiffaminik aalajaatsumik makititsinissani qilanaarigaa. Jobi kissaatigisani maliinnarlugit isumaliorpa? Naamerluinnaq.
Jiisusip toqusimasunik makititsisinnaanera Guutimit toqumut pissaanilerneqarsimaneranut uppernarsaataalluarpoq. Biibilimimi allassimavoq Jiisusip ‘toqumut matuersaatit’ pigigai. (Saqqummersitat 1:18) Jiisusi Lazarusimik makititsinissamut oqartussaassuseqarnermisut siunissami inuppassuarnik allanik makititsinissaminut oqartussaassuseqassaaq.
Makititsinissamik neriorsuut Biibilimi arlaleriarluni allassimavoq. Inngili pruffiitimut Danielimut ima neriorsuivoq: “Nallarlutit qasuersaarniarit. Makikkumaarputit ullut naggatissaanni pissarsiassat pissarsiarissallugu!” (Danieli 12:13) Jiisusip saddukiiarit, juutit siuttui makititsisoqarumaarneranik upperinninngitsut, ima oqarfigai: “Tammartajaarpusi Allakkat Guutilluunniit pissaanera nalugassigit.” (Matthæusi 22:23, 29) Aamma apustili Paulusi ima oqarpoq: “Guutimut [neriugisaqarpunga], tassa toqusut makikkumaartut — iluartut iluaatsullu.” — Apustilit Suliaat 24:15.
QAQUGU TOQUSIMASUT MAKISSAPPAT?
Qaqugu iluartunik iluaatsunillu makititsisoqassava? Inngilip Danieli naapertuilluartuutitaasoq oqarfigaa “ullut naggatissaanni” makikkumaartoq. Marthap qatanngummi, Lazarusip, “ullut naggatissaanni toqusut makiffissaanni” makikkumaarnera upperaa. — Johannesi 11:24.
Biibilimi ‘ullut naggatissaat’ Kristusip naalagaaffiata naalakkersuineranut atassuserneqarpoq. Paulusi ima allappoq: “[Kristusi] kunngiussaaq akerartuisut tamarmik Guutimit taassuma isigaasa ataannut pisinneqarserlugit. Akeqqani kingullersaalluni toqu suujunnaarsitaajumaarpoq.” (1 Korinthimiut 15:25, 26) Guutip naalagaaffiata tikiunnissaa Guutillu piumasaa nunami pinissaa pillugu qinusarnissatsinnut pissutissaqarluarpugut. *
Soorlu Jobip nalunngikkaa Guutip toqusut makitinneqarnissaat piumasaraa. Taamanikkussamut toqu suujunnaarsinneqassallunilu ima apereqqittoqanngisaannassaaq: ‘Toqu kikkut tamarmik naggatissaraat?’
^ par. 18 Guutip naalagaaffia pillugu paasissutissat amerlanerusut atuakkami Biibilimi sorpiaat ajoqersuutigineqarpat?-mi kapitali 8-mi, Jehovap Nalunaajaasuinit saqqummersinneqartumi, atuarsinnaavatit. Atuagaq aamma www.ps8318.com-imi atuarneqarsinnaavoq.