Juudarsi 1:1-25
1 Juudarsimit, Jiisusip Kristusip inussiaataanit Jaakulli qatanngutaanit, qaaqqusanut Guutimit Ataatamit asaneqartunut Jiisusilu Kristusi pillugu sernigineqartunut:
2 Guutimit nallittorneqarnermik, eqqissinermik asanninnermillu suli annerusumik tunineqarnissassinnik kissaappassi.
3 Asasakka, aniguisitaaneq tamatta iluaqutigisarput allaatigerusungaaraluarlugu upperneq, ataasiaammik illernartunut tunniunneqartoq, pillugu tamaviaarlusi sorsunnissamik kajumissaarniarlusi allaffiginissarsi pisariaqarsoraara.
4 Allaffigaassi inuit ilaat, Allakkanit Illernartunit qangarsuarli pillagassatut eqqartuunneqartut, isertorlutik ilissinnut akuliussimammata. Guutiitsut taakkua Guutitta ajunngisaangaarnera kannguttaatsuliornissamut* utoqqatsissutitut atortarpaat, aamma piginnittutuarput Naalagatuarpullu, Jiisusi Kristusi, aalajaaffiginngilaat.
5 Tamakku ilisimalluinnaraluarisi eqqaasikkusuppassi Jehovap* innuttani Egyptenimit aniguisereerlugit uppertuunngitsut suujunnaarsimmagit.
6 Inngilillu inissisimaffimminnik aalajangiusimanninnatik najukkaminnik qimatsisut ullussarsuarmi eqqartuussiffissap tungaanut taarnersuarmi qilersorsimajuartippai.
7 Tamatumunnga assingusumik Soodomami Gomooramilu illoqarfinnilu taakkua eqqaanni najugaqartut maajunnartumik atoqatigiinnikkut eqqunngitsuliortalerlutillu* pilerissusipiluit pissusissamisuunngitsut malillugit iliuuseqartalerput. Taakku innermik ikumajuartumik pillarneqartussatut eqqartuunneqarnermikkut uagutsinnut mianersoqqussutinngorput.
8 Taamaakkaluartoq inuit taakku ajortunik takorluuiuarput, timimik mingutsitsisarput, oqartussaasunik nikaginnittarput Guutimillu ataqqineqartunik asissuisarlutik.
9 Inngiliunerulli Mikaalip Diaavulu isumaqatigiinngissuteqarfigigamiuk Moorsisillu timaa pillugu assortoramiuk sapiiserluni asissorlugu eqqartuutinngilaa, oqarfigiinnarpaali: “Jehovap naqqikkilisit.”
10 Inuilli taakkua iluamik paasinngisatik tamaasa asissortarpaat. Uumasutullu sianiitsutut illutik iluamik eqqarsaqqaaratik paasisatik tamaasa atorlugit imminut aserorsartarput.
11 Kainip aqqutaa atuaramikku akissarsiumallutillu Biilearmip toraagaa eqqunngitsoq ornipallakkamikku ajorluinnartumik pineqassapput, Koratullu pikitsitsisutut oqalukkamik suujunnaarsitaapput!
12 Qatanngutigiittut nalliuttorsiornissinni taakku ikkarluttut tarrisimalaaginnartutut ittarput, savanik paarsisuupput imminuinnaq eqqarsaatigisut, nuiaapput sialussaqanngitsut anorimit tamanut tamaanga nassataritittut, orpiupput ukiap naalernerani inerititaqanngitsoortut, marloriarlutik toqusimapput* sorlaarneqarlutillu nusunneqarsimallutik.
13 Malissuupput kanngusuutissaraluaminnik qappiortut ulloriaallutillu aalajangersimasumik ingerlaarfeqanngitsut taarnerpaamiittuartussat.
14 Aap, Adamimit kinguaariissoqatigiit arfineq-aappaata, Enokip, taakku ima siulittuutigai: “Takuuk! Jehova illernartuni tituusintilikkuutaat* ilagalugit tikiutilerpoq
15 kikkut tamaasa eqqartuukkumallugit guutiitsullu pisuunerat uppernarsarumallugu. Taamaaliussaaq assigiinngitsorpassuartigut ajortuliortarmata asissortarmannilu.”
16 Inuit taakku isornartorsiuisuupput, inuunermi atukkatik pillugit naammagittaalliortarput, pilerissusipilutik malillugit inuupput, oqarataangaartarput iluanaarniaannarlutillu iluareqqusaartarlutik.*
17 Ilissili asasakka, Naalakkatta Jiisusip Kristusip apustiliisa oqaaserisarsimasaat* eqqaamassavasi.
18 Ima oqarfigisarpaasi: “Ulluni kingullerni inuit illaruaatiginnittarlutillu guutiitsutut pilerissusipilutik malillugit inuussapput.”
19 Inuit taakku avissaartuutsitsisuupput, Guutip anersaavanit siulersortinnatik* uumasutut pissuseqarput.
20 Ilissili asasakka, uppernersi illernartoq iluaqutigalugu imminut ineriartortillusilu anersaamit illernartumit siulersortillusi qinusaritsi
21 Naalakkatta Jiisusip Kristusip naassaanngitsumik inuuneqalersitsisumik nallittuinissaata utaqqinerani Guutip asanninneraniittuaqqullusi.
22 Aamma qulartut nallittortuarsigit.
23 Innermit anisillugit nusunnerisigut annaassigit. Allat aamma mianersorlusi nallittussavasi. Allaallu pissusii* ajortuliaannit mingutsinneqarsimasut uumigissavasi.
24 Guutip naakkiuteqqunasi sernigisinnaallusilu alutornassutsimi saavani* ajoquteqanngitsutut napatissinnaallusilu nuannaangaartissinnaavaasi.
25 Guutituaasoq – Naalagarput Jiisusi Kristusi aqqutigalugu Aniguisitsiserput – qangarsuaaniit maannamut qaqugorsuarmullu unnersiutigineqartuarli, ataqqinarsisinneqangaartuarli, pissaaneqartuarli oqartussaassuseqartuarlilu. Amen.
Ilanngussat
^ Imalt.: “ataqqinninngitsuliornissamut”. Grækerisut: aselgeia. Nassuiaatit takukkit.
^ Nassuiaatit takukkit.
^ Nassuiaatit takukkit.
^ Imalt.: “toqulluinnarsimapput”.
^ Imalt.: “ujameriattut”.
^ Imalt.: “tusaamasanik nuannaartorinnittarlutik”.
^ Imalt.: “siulittuutigisarsimasaat”.
^ Nutsiinn.: “anersaaqarnatik”.
^ Nutsiinn.: “atisaat”.
^ Imalt.: “alutornartumik najuunnermini”.
