Timuutiusimut 2. 3:1-17
3 Nalussanngilalli ulluni kingullerni pissutsit anigoruminaallutillu erloqinassasut.
2 Inuimmi tassaalerumaarput namminissarsiortut, aningaaserituut,* oqarataartartut, qaffassimaartut, Guutimik mitaatilliisut, angajoqqaanut naalanngitsut, qujasuitsut, ilumoorfiginninngitsut,
3 asanninngitsut,* saammartitassaanngitsut, nikassaallutik salluliuutiginnittartut, imminut aqussinnaanngitsut, saassussiumatuut, ajunngitsumik nuannarisaqanngitsut,
4 akeqqanut pisitsisut, uteriitsut, pingaakujullutik makitasuut Guutimillu asanninnatik nuannaarniutinik pingaartitsisut.*
5 Guutimut tunniusimasuusaartarput uffa tunniusimanerup pissaaneranit sunnertikkumaneq ajorlutik. Taamaattut tunussavatit.
6 Tamakkunannga saqqummertarput angutit malunnaarsaarlutik illunut isertartut arnanillu sanngiitsunik, ajortuliatik pissutigalugit nanertisimasunik pilerissutsinillu assigiinngitsunit aqunneqartunik, tigusarinnittartut.
7 Arnat taamaattut ilinniartuaraluarlutik ilumoortoq pillugu eqqoqqissaartumik paasisimasaqalersinnaanngisaannarput.
8 Jannesip Jambresillu Moorsisimik akerlilersuinerattut inuit taamaattut ilumoortoq akerlilersortuarpaat. Isumakkut mingutsinneqarluinnarsimallutillu uppernermut tunngatillugu Guutimit iluarisaanngillat.
9 Qanorli sianiitsiginerat tamanit takuneqarsinnaammat ingerlalluartuarnavianngillat, soorlu angutinut taakkununnga marlunnut tunngatillugu taama pisoqartoq.
10 Illilli ilinniartitsissutiga, inooriaasera, siunertara, uppernera, naammagittarnera, asanninnera pinertusaarneralu maleqqissaarpatit.
11 Aamma Antiokiami, Ikonionnimi Lystramilu malersorneqarnera naalliunneralu nalunngilatit. Malersorneqarnernilu taakkunani pinertusaarpunga, Naalakkallu tamanit aniguisippaanga.
12 Aap, Guutimut tunniusimallutik Kristusimillu Jiisusimik ataasioqateqarlutik inuujumasut tamarmik aamma malersorneqassapput.
13 Inuilli ajortut peqquserluttullu ajorsigaluttuinnassapput. Salloqittaallutillu salloqittarneqassapput.
14 Illilli ilinniarsimasatit qulariunnaarsimasatillu maleruartuassavatit. Nalunngilat kikkunnit ilinniarsimallugit
15 aamma naalungiarsuuninniilli Allakkat Illernartut, Kristusimut Jiisusimut uppernikkut aniguisitaanermik kinguneqartumik ilinnik ilisimassuseqalersitsisinnaasut, pillugit ilinniartinneqarsimallutit.
16 Allakkat Illernartut tamarmik Guutimit isumassarsiarititaallutillu ilinniartitsinermut, oqaaqqissaarinermut, naqqiinermut naapertuilluartumillu perorsaatissiinermut iluaqutaapput
17 Guutip kiffaa sutigut tamatigut ajunngitsuliornissamut piareersimalluinnaqqullugu piukkunnarluinnaqqullugulu.
Ilanngussat
^ Nutsiinn.: “aningaasanik asannittut”.
^ Imalt.: “ilaquttaminnut tunniusimanngitsut”.
^ Nutsiinn.: “asannittut”.
