Jehovap Nalunaajaasuisa meeqqatik pinngitsaalillugit Jehovamik Nalunaajaasunngortittarpaat?
Naamik, inuummi nammineq aalajangertussaavaa Guuti pallorfigerusunnerlugu. (Romamiut 14:12) Jehovap Nalunaajaasuisa meeqqatik Biibilimi najoqqutassianik ilinniartittarpaat, meeqqalli perorunik tamarmik immikkut Jehovamik Nalunaajaasunngorusunnerlutik aalajangertariaqarpaat. – Romamiut 12:2; Galatiamiut 6:5.
Jehovap Nalunaajaasuisa angajoqqaarpassuit allat assigalugit meeqqatik ajunnginnerpaamik kissaattarpaat. Meeqqatik iluaqutaasorisaminnik – piginnaasanik, ileqqorissaarneq pillugu najoqqutassianik upperisaminnillu – ilinniartittarpaat. Jehovap Nalunaajaasui isumaqarput inooriaaseq pitsaanerpaaq Biibilimi ajoqersuutigineqartoq, taamaattumik Biibilimik atuaqqissaaqatigisarnerisigut kristumiullu ataatsimiinnerini peqatigisarnerisigut naleqartitatik Biibilimeersut meeqqaminnut ingerlateqqittarpaat. (5 Mosesi 6:6, 7) Meeraq peroruni angajoqqaamisut upperisaqarniarnerluni paasissutissanik tunngaveqarluartumik aalajangersinnaavoq.
Jehovap Nalunaajaasui naalungiarsunnik kuisitsisarpat?
Naamik. Naalungiarsunnik kuisitsisarneq Biibilimi taperserneqanngilaq. Assersuutigalugu allassimavoq kristumiut siulliit kuisinnginnerminni tusarliussaq tusaraat, nuannaarlutik ‘ilassigaat’ peqqissimisullu. (Apustilit Suliaat 2:14, 22, 38, 41) Taamaattumik kuisikkusuttut Biibilimi ajoqersuutigineqartut paasisinnaasariaqarpaat, upperisinnaasariaqarpaat maleruarniarlugillu aalajangersinnaasariaqarlutik. Naalungiarsuk taamaaliorsinnaanngilaq.
Meeqqat perorunik imaassinnaavoq kuisinniarlutik aalajangertut. Pisussaaffeqalernissartilli paaseqqaartariaqarpaat.
Jehovap Nalunaajaasuisa meeqqatik kuisikkusunngitsut ilagiumaneq ajorpaat?
Naamik. Angajoqqaat Nalunaajaasut meeqqamik immissut upperisaqarniarnatik aalajangernerat aliasuutigisarpaat. Meeqqatilli suli asavaat, aamma Nalunaajaasunngorusunnginnerat pissutigiinnarlugu attavigiunnaarnavianngilaat.
Inuup, qassinik ukioqarnini apeqqutaatinnagu, kuisinniarnerluni kuisinniannginnerluniluunniit nammineq aalajangertariaqarpaa
Sooq Jehovap Nalunaajaasuisa meeqqatik oqaluusseqatigisarpaat?
Arlalinnik peqquteqarluta meeqqavut oqaluusseqatigisarpavut. a
Angajoqqaat Biibilimi peqquneqarput meeqqatik anersaakkut, Guutimik pallorfiginninnermik, ilinniartissagaat. (Efesosimiut 6:4) Upperisap tamanut nassuerutiginera pallorfiginninnermut ilaammat oqaluussineq meeqqap anersaakkut ilinniartinneqarneranut ilaavoq pingaarutilik. – Romamiut 10:9, 10; Hebræerit 13:15.
Biibilimi paatsuugassaanngitsumik inuusuttut ‘Naalakkap aqqanik unnersiutiginneqqullugit’ kajumissaarneqarput. (Tussiaat 148:12, 13) Guuti pillugu inoqatinik oqaloqateqarneq taassuminga unnersiutiginninnermut ilaavoq pingaarutilik. b
Meeqqat angajoqqaaminnik oqaluusseqateqarnertik iluaqutigisarpaat. Assersuutigalugu inunnik tamalaanik attaveqaqateqarnissaq ilinniartarpaat. Aamma pissuserinnissaq, soorlu misiginneqataanissaq, inussiarnersuunissaq, ataqqinninnissaq namminissarsiunnginnissarlu, ilinniartarpaat. Tamatuma saniatigut upperisaminnut Biibilimi tunngaviusut ilisimalluarnerulertarpaat.
Jehovap Nalunaajaasui nalliuttuni nalliuttorsiornerniluunniit allani peqataasarpat?
Jehovap Nalunaajaasuisa nalliuttut upperisarsiornermut tunngasut nalliuttorsiornerilluunniit allat Guutimit iluarisaanngitsut peqataaffigineq ajorpaat. c (2 Korinthimiut 6:14-17; Efesosimiut 5:10) Assersuutigalugu inuuissiornerni juullisiornerniluunniit, kristumiuunngitsunit aallaaveqartuni, nalliuttorsioqataaneq ajorpugut.
Taamaakkaluartorli ilaquttavut peqatigissallugit meeqqavullu tukkorluta tunissuteqarfigissallugit nuannarisarparput. Qaammatisiutit ilaqutariittut peqatigiittarnissamut tunissuteqartarnissamullu aalajangiisuutinnagit ukiup ingerlanerani katerisimaaqatigiittarlutalu tunissuteqartarpugut.
Kristumiut angajoqqaat meeqqaminnut tunissuteqartut
a Nalunaajaasut meeraat ataatsimut isigalugit angajoqqaajusoq inersimasorluunniit alla akisussaasoq ilaanngikkaangat oqaluusseqatigineq ajorpavut.
b Meeqqat arlallit upperisartik pillugu allanik oqaloqateqarnermikkut Guutimit iluarisaasut Biibilimi eqqaaneqarput. – 2 Kunngit 5:1-3; Matthæusi 21:15, 16; Lukasi 2:42, 46, 47.
c Takuuk allaaserisaq “Sooq Jehovap Nalunaajaasuisa nalliuttut aalajangersimasut peqataaffigineq ajorpaat?”
d Atit ilaat allanngortitaapput.