សៀវភៅម៉ាថាយ ១៩:១-៣០
១៩ ពេលដែលលោកយេស៊ូបានពោលពាក្យទាំងនេះចប់ហើយ លោកបានចាកចេញពីស្រុកកាលីឡេ ហើយឆ្លងទន្លេយ៉ូដាន់ រួចទៅដល់ព្រំប្រទល់តំបន់យូឌា។+
២ ម្យ៉ាងទៀត មនុស្សមួយក្រុមយ៉ាងធំបានទៅតាមលោក ហើយលោកបានធ្វើឲ្យពួកគេជាសះស្បើយនៅទីនោះ។
៣ ក្រោយមក ពួកផារិស៊ីបានមកឯលោកក្នុងបំណងល្បងលលោក ដោយសួរថា៖ «តើមានច្បាប់ឲ្យបុរសលែងលះប្រពន្ធ ដោយមូលហេតុអ្វីក៏ដោយឬទេ?»។+
៤ លោកតបឆ្លើយថា៖ «តើអ្នករាល់គ្នាមិនធ្លាប់អានទេថា ព្រះដែលបានបង្កើតមនុស្សជាតិដំបូង បានបង្កើតពួកគេជាប្រុសជាស្រី+
៥ ហើយមានប្រសាសន៍ថា៖ ‹ហេតុនេះហើយបានជាបុរសនឹងចាកចេញពីឪពុកម្ដាយខ្លួន ហើយនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ›នោះ?+
៦ ដូច្នេះ ពួកគេលែងជាពីរទៀតហើយ ប៉ុន្តែជាសាច់ឈាមតែមួយវិញ។ ម្ល៉ោះហើយ កុំឲ្យអ្នកណាពង្រាត់គូដែលព្រះបានផ្សំផ្គុំ*ឡើយ»។+
៧ ពួកគេសួរលោកថា៖ «បើដូច្នេះ ហេតុអ្វីបានជាម៉ូសេបង្គាប់ឲ្យប្រគល់សំបុត្រលែងលះទៅនាង ហើយឲ្យនាងចុះចេញ?»។+
៨ លោកមានប្រសាសន៍ទៅពួកគេថា៖ «ម៉ូសេបានអនុញ្ញាតឲ្យអ្នករាល់គ្នាលែងលះប្រពន្ធ ដោយសារអ្នករាល់គ្នាមានចិត្តរឹង។+ ក៏ប៉ុន្តែ នៅដើមដំបូង មិនមែនដូច្នេះទេ។+
៩ ខ្ញុំប្រាប់អ្នករាល់គ្នាថា អ្នកណាដែលលែងលះប្រពន្ធដែលមិនបានប្រព្រឹត្តអំពើប្រាសចាកសីលធម៌ខាងផ្លូវភេទ* រួចរៀបការជាមួយនឹងស្ត្រីម្នាក់ទៀត អ្នកនោះជាអ្នកផិតក្បត់»។+
១០ អ្នកកាន់តាមលោកបានជម្រាបលោកថា៖ «ប្រសិនបើប្ដីប្រពន្ធគឺដូច្នោះមែន មិនរៀបការល្អជាង»។
១១ លោកមានប្រសាសន៍ទៅពួកគាត់ថា៖ «មិនមែនមនុស្សទាំងអស់ធ្វើដូច្នេះឡើយ មានតែអ្នកដែលបានទទួលអំណោយទាននេះប៉ុណ្ណោះដែលអាចធ្វើដូច្នេះ។+
១២ មានអ្នកខ្លះជាជនគម្រៀវពីកំណើត ហើយមានអ្នកខ្លះទៀតបានត្រូវគេគ្រៀវ រីឯអ្នកខ្លះមិនរៀបការព្រោះតែរាជាណាចក្រស្ថានសួគ៌។ អ្នកណាដែលអាចទទួលយកអ្វីបែបនេះបាន ចូរទទួលយកចុះ»។+
១៣ រួចមក មានគេនាំកូនក្មេងមកឯលោក ដើម្បីឲ្យលោកដាក់ដៃលើ* ហើយអធិដ្ឋានឲ្យពួកគេ។ ប៉ុន្តែ អ្នកកាន់តាមលោកបានស្ដីបន្ទោសមនុស្សទាំងនោះ។+
១៤ ក៏ប៉ុន្តែ លោកយេស៊ូមានប្រសាសន៍ថា៖ «ឲ្យកូនក្មេងទាំងនោះមកឯខ្ញុំចុះ កុំឃាត់ពួកគេឡើយ ពីព្រោះរាជាណាចក្រស្ថានសួគ៌ជារបស់អ្នកដែលមានលក្ខណៈដូចកូនក្មេងទាំងនោះ»។+
១៥ ក្រោយមក លោកដាក់ដៃលើពួកគេ រួចចាកចេញពីកន្លែងនោះ។
១៦ មើល! មនុស្សម្នាក់បានមកឯលោក ហើយសួរថា៖ «លោកគ្រូ តើខ្ញុំត្រូវធ្វើអំពើល្អអ្វីដើម្បីទទួលជីវិតដែលគ្មានទីបញ្ចប់?»។+
១៧ លោកមានប្រសាសន៍ទៅគាត់ថា៖ «ហេតុអ្វីអ្នកសួរខ្ញុំដើម្បីដឹងអំពីអ្វីដែលល្អដូច្នេះ? មានបុគ្គលតែម្នាក់ប៉ុណ្ណោះដែលល្អ។*+ ប៉ុន្តែ ប្រសិនបើអ្នកចង់ទទួលជីវិត ចូរប្រព្រឹត្តតាមបញ្ញត្ដិទាំងប៉ុន្មានជាដរាបចុះ»។+
១៨ គាត់សួរលោកថា៖ «តើបញ្ញត្ដិអ្វីខ្លះលោក?»។ លោកយេស៊ូមានប្រសាសន៍ថា៖ «អ្នកមិនត្រូវធ្វើឃាតកម្ម+ អ្នកមិនត្រូវផិតក្បត់+ អ្នកមិនត្រូវលួច+ អ្នកមិនត្រូវធ្វើជាសាក្សីក្លែងក្លាយ+
១៩ ចូរគោរពឪពុកម្ដាយរបស់អ្នក+ ហើយត្រូវស្រឡាញ់អ្នកជិតខាងដូចស្រឡាញ់ខ្លួនអ្នក»។+
២០ យុវជននោះបានជម្រាបលោកថា៖ «ខ្ញុំបានធ្វើតាមបញ្ញត្ដិទាំងអស់នេះហើយ តើខ្ញុំនៅខ្វះអ្វីទៀត?»។
២១ លោកយេស៊ូមានប្រសាសន៍ទៅគាត់ថា៖ «ប្រសិនបើអ្នកចង់មានលក្ខណៈល្អឥតខ្ចោះ ចូរទៅលក់អ្វីដែលអ្នកមាន ហើយឲ្យដល់អ្នកក្រ នោះអ្នកនឹងមានទ្រព្យវិសេសនៅស្ថានសួគ៌+ រួចចូរមកតាមខ្ញុំ»។+
២២ ពេលដែលយុវជននោះឮលោកមានប្រសាសន៍ដូច្នេះ គាត់បានចេញទៅទាំងកើតទុក្ខ ព្រោះគាត់មានទ្រព្យសម្បត្តិជាច្រើន។+
២៣ រួចមក លោកយេស៊ូមានប្រសាសន៍ទៅអ្នកកាន់តាមលោកថា៖ «ខ្ញុំប្រាប់អ្នករាល់គ្នាការពិតថា អ្នកមាននឹងពិបាកចូលក្នុងរាជាណាចក្រស្ថានសួគ៌ណាស់។+
២៤ ខ្ញុំប្រាប់អ្នករាល់គ្នាទៀតថា សត្វអូដ្ឋអាចចូលតាមរន្ធម្ជុលបានងាយជាងអ្នកមានចូលក្នុងរាជាណាចក្ររបស់ព្រះទៅទៀត»។+
២៥ ឮដូច្នេះ អ្នកកាន់តាមលោកបានភ្ញាក់ផ្អើលយ៉ាងខ្លាំង ក៏បានសួរថា៖ «តើអ្នកណាទៅអាចទទួលសេចក្ដីសង្គ្រោះបាន?»។+
២៦ លោកយេស៊ូមើលចំមុខពួកគាត់ រួចមានប្រសាសន៍ថា៖ «មនុស្សមិនអាចសម្រេចការនេះបានឡើយ ប៉ុន្តែព្រះអាចសម្រេចគ្រប់ការទាំងអស់បាន»។+
២៧ នោះពេត្រុសជម្រាបលោកថា៖ «មើល! យើងខ្ញុំបានចាកចេញពីអ្វីៗទាំងអស់ ហើយមកតាមលោក តើយើងខ្ញុំនឹងបានអ្វី?»។+
២៨ លោកយេស៊ូមានប្រសាសន៍ទៅពួកគាត់ថា៖ «ខ្ញុំប្រាប់អ្នករាល់គ្នាការពិតថា ក្នុងគ្រាបង្កើតសាជាថ្មី ពេលដែលកូនមនុស្សអង្គុយលើបល្ល័ង្ករុងរឿងរបស់លោក នោះអ្នករាល់គ្នាដែលបានកាន់តាមខ្ញុំ នឹងអង្គុយលើបល្ល័ង្ក១២ ហើយវិនិច្ឆ័យក្ដីកុលសម្ព័ន្ធអ៊ីស្រាអែលទាំង១២+
២៩ ហើយអ្នកណាដែលបានចាកចេញពីផ្ទះ ឬបងប្អូនប្រុសស្រី ឬឪពុក ឬម្ដាយ ឬកូន ឬស្រែចម្ការ ព្រោះតែនាមរបស់ខ្ញុំ អ្នកនោះនឹងទទួលអ្វីៗទាំងនោះ១ជា១០០ ក៏នឹងទទួលជីវិតដែលគ្មានទីបញ្ចប់ជាមត៌កដែរ។+
៣០ «ក៏ប៉ុន្តែ មនុស្សជាច្រើនដែលជាអ្នកមុនគេ នឹងទៅជាអ្នកក្រោយគេវិញ ហើយអ្នកដែលក្រោយគេ នឹងទៅជាអ្នកមុនគេវិញ។+
កំណត់សម្គាល់
^ ន័យត្រង់«បានទឹមនឹមជាមួយគ្នា»
^ ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
^ នេះសំដៅលើការឲ្យពរ
^ សំដៅលើអ្នកដែលមានសិទ្ធិសម្រេចអំពីអ្វីដែលល្អ
