អត្ថបទអំពីក្របទស្សនាវដ្ដី | ហេតុអ្វីគួរប្រព្រឹត្ដទៀងត្រង់?
តើភាពមិនទៀងត្រង់នាំឲ្យលោកអ្នកមានផលវិបាកអ្វីខ្លះ?
«តែងតែមានបញ្ហាខ្លះដែលអាចដោះស្រាយបាន បើសុខចិត្ដប្រព្រឹត្ដមិនទៀងត្រង់បន្ដិចបន្ដួច» (ពីសឺមែនថឺនៅប្រទេសអាហ្វ្រិកខាងត្បូង)។
តើលោកអ្នកយល់ស្របនឹងគំនិតខាងលើនេះឬទេ? ដូចសឺមែនថឺដែរ នៅពេលខ្លះយើងទាំងអស់គ្នាជួបនឹងស្ថានភាពពិបាក។ ជាទូទៅយើងចង់ប្រព្រឹត្ដទៀងត្រង់ ប៉ុន្ដែស្ថានភាពខ្លះនាំឲ្យយើងចង់ប្រព្រឹត្ដមិនទៀងត្រង់។ ម៉្លោះហើយ ការប្រព្រឹត្ដរបស់យើងនៅពេលនោះ សឲ្យឃើញនូវចិត្ដគំនិតរបស់យើង។ ជាឧទាហរណ៍ បើយើងខ្លាចបាក់មុខ យើងទំនងជាចាត់ទុកការប្រព្រឹត្ដមិនទៀងត្រង់ជាវិធីមួយដើម្បីជួយយើងឲ្យយករួចខ្លួន។ ប៉ុន្ដែពេលអ្នកឯទៀតដឹងការពិត ទង្វើមិនទៀងត្រង់ច្រើនតែនាំឲ្យទទួលលទ្ធផលអាក្រក់ជាង។ សូមពិចារណាអំពីលទ្ធផលដូចតទៅ។
ការប្រព្រឹត្ដមិនទៀងត្រង់ធ្វើឲ្យលែងមានការទុកចិត្ដ
ចំណងមិត្ដភាពផ្ដើមឡើងពីការទុកចិត្ដគ្នា។ ពេលមនុស្សពីរនាក់ទុកចិត្ដគ្នា ពួកគេមានអារម្មណ៍សុខសាន្ដនិងមានសុវត្ថិភាព។ ប៉ុន្ដែ ការទុកចិត្ដមិនអាចមានភ្លាមៗបានឡើយ។ មនុស្សកាន់តែទុកចិត្ដគ្នា ពេលដែលពួកគេចំណាយពេលជាមួយគ្នា និយាយគ្នាដោយឥតលាក់លៀម និងប្រព្រឹត្ដដោយមិនគិតតែពីប្រយោជន៍ខ្លួន។ ប៉ុន្ដែ ការទុកចិត្ដទាំងប៉ុន្មានដែលពួកគេធ្លាប់មាននឹងរលាយបាត់ បើម្នាក់ទៀតប្រព្រឹត្ដមិនទៀងត្រង់សូម្បីតែម្ដងក៏ដោយ។ បន្ថែមទៅទៀត បើលែងមានការទុកចិត្ដគ្នាហើយ គឺពិបាកឲ្យមានការទុកចិត្ដគ្នាឡើងវិញណាស់។
តើធ្លាប់មានបុគ្គលណាម្នាក់ដែលលោកអ្នកចាត់ទុកជាមិត្ដល្អ តែក្រោយមកបោកបញ្ឆោតលោកអ្នកឬទេ? បើធ្លាប់មែន តើលោកអ្នកមានអារម្មណ៍យ៉ាងណានៅពេលនោះ? លោកអ្នកទំនងជាឈឺចិត្ដណាស់ ហើយមានអារម្មណ៍ថាត្រូវគេក្បត់ទៀតផង។ ជាការធម្មតាដែលមានអារម្មណ៍បែបនេះ។ ដូច្នេះ នេះបញ្ជាក់ថាការប្រព្រឹត្ដមិនទៀងត្រង់អាចបំផ្លាញចំណងមិត្ដភាពដ៏មានតម្លៃ។
ការប្រព្រឹត្ដមិនទៀងត្រង់គឺប្រៀបដូចជាជំងឺឆ្លង
នៅសកលវិទ្យាល័យនៅរដ្ឋកាលីហ្វ័រញ៉ា សាស្ត្រាចារ្យផ្នែកសេដ្ឋកិច្ចឈ្មោះរ៉ូបឺត អ៊ីនណេស បានសិក្សាស្រាវជ្រាវឃើញថា«ការប្រព្រឹត្ដមិនទៀងត្រង់គឺប្រៀបដូចជាជំងឺឆ្លងមែន»។ ហេតុនេះ ការប្រព្រឹត្ដមិនទៀងត្រង់អាចប្រដូចទៅនឹងមេរោគ។ បើលោកអ្នកកាន់តែជិតស្និទ្ធជាមួយនឹងមនុស្សដែលមិនទៀងត្រង់ លោកអ្នកនឹងងាយ«ឆ្លង»ឬប្រព្រឹត្ដមិនទៀងត្រង់ដូចពួកគេដែរ។
តើលោកអ្នកអាចការពារខ្លួនយ៉ាងណា ដើម្បីកុំឲ្យធ្លាក់ទៅក្នុងការប្រព្រឹត្ដមិនទៀងត្រង់? គម្ពីរអាចជួយលោកអ្នកបាន។ សូមពិចារណាគោលការណ៍គម្ពីរមួយចំនួន។
