តើព្រះកំពុងដាក់ទណ្ឌកម្មយើងឬ?
តើព្រះកំពុងដាក់ទណ្ឌកម្មយើងឬ?
ក្រោយពីមានការរញ្ជួយដីកម្លាំង៩.០រិច្ឆទ័រនិងរលកយក្សស៊ូណាមីក្នុងខែមីនា ឆ្នាំ២០១១ អ្នកនយោបាយដ៏ល្បីម្នាក់ក្នុងប្រទេសជប៉ុនបាននិយាយថា៖ «ទោះជាខ្ញុំអាណិតមនុស្សដែលរងគ្រោះដោយសារមហន្តរាយធម្មជាតិក្ដី ខ្ញុំគិតថា[វា]ជាតេមបាត់ស៊ុ (ឬទណ្ឌកម្មមកពីព្រះ)»។
ពេលមនុស្សច្រើនជាង២២០.០០០នាក់បានស្លាប់ក្នុងការរញ្ជួយដីនៅប្រទេសហៃទីក្នុងខែមករា ឆ្នាំ២០១០ អ្នកផ្សព្វផ្សាយសាសនាតាមទូរទស្សន៍ដ៏ល្បីម្នាក់បានប្រកាសថា នេះគឺដោយសារពួកគេ«បានប្រគល់ខ្លួនធ្វើជាខ្ញុំបម្រើរបស់មេកំណាច»ដែលជាទេវតាអាក្រក់ដែលប្រឆាំងព្រះ ហើយពួកគេត្រូវតែ«ត្រឡប់មករកព្រះវិញ»។
«ព្រះចង់ឲ្យយើងភ្ញាក់ខ្លួននិងចេះដឹងខុសត្រូវ» នេះជាពាក្យប្រកាសរបស់បូជាចារ្យនៃសាសនាកាតូលិក ពេលដែលមានមនុស្ស៧៩នាក់ស្លាប់ដោយសារការរត់ជាន់គ្នានៅទីក្រុងម៉ានីល ប្រទេសភីលីពីន។ សារព័ត៌មានមួយក្នុងប្រទេសនោះបានសរសេរថា៖ «មនុស្សពេញវ័យចំនួន២១ភាគរយជឿថាព្រះកំពុងតែបញ្ចេញកំហឹងរបស់លោកដោយបណ្ដាលឲ្យមានការរអិលបាក់ដី ខ្យល់ព្យុះកំបុតត្បូង និងគ្រោះមហន្តរាយធម្មជាតិឯទៀត» ដែលញាំញីប្រទេសនោះជាញឹកញាប់។
ការជឿថាព្រះជាអ្នកបណ្ដាលឲ្យមានគ្រោះមហន្តរាយធម្មជាតិដើម្បីដាក់ទណ្ឌកម្មមនុស្សអាក្រក់ គឺមិនមែនទើបតែមាននោះទេ។ ក្នុងឆ្នាំ១៧៥៥ ក្រោយពីមនុស្សប្រហែល៦០.០០០នាក់បានបាត់បង់ជីវិតដោយសាររញ្ជួយដី ភ្លើងឆេះ និងរលកយក្សស៊ូណាមីនៅទីក្រុងលីស្បោន ប្រទេសព័រទុយហ្គាល់ នោះលោកវ៉ុលទែរ ដែលជាទស្សនវិទូដ៏ល្បីល្បាញម្នាក់បានចោទសួរថា៖ «តើអំពើអបាយមុខដែលនៅទីក្រុងលីស្បោនមានច្រើនជាងនៅទីក្រុងប៉ារីស ជាទីក្រុងដែលពោរពេញដោយការភ្លើតភ្លើនឬ?»។ ពិតមែនហើយ មនុស្សរាប់លាននាក់បានឆ្ងល់ថា តើព្រះកំពុងប្រើគ្រោះមហន្តរាយធម្មជាតិដើម្បីដាក់ទណ្ឌកម្មមនុស្សជាតិឬ? នៅប្រទេសជាច្រើន មនុស្សហៅគ្រោះមហន្តរាយធម្មជាតិបែបនេះថាជាស្នាដៃរបស់ព្រះ។
អាស្រ័យហេតុនេះ យើងត្រូវតែឆ្ងល់ថា តើព្រះពិតជាបានប្រើគ្រោះមហន្តរាយធម្មជាតិដើម្បីដាក់ទណ្ឌកម្មមនុស្សជាតិមែនឬ? តើគ្រោះមហន្តរាយធម្មជាតិដែលបានកើតឡើងផ្ទួនៗគ្នានៅពេលថ្មីៗនេះជាទណ្ឌកម្មដែលមកពីព្រះឬ?
ដើម្បីទម្លាក់កំហុសទៅលើព្រះ ពួកគេបានលើកឡើងនូវកំណត់ហេតុខ្លះក្នុងគម្ពីរដែលបញ្ជាក់ថាព្រះបានប្រើអំណាចធម្មជាតិដើម្បីសម្លាប់មនុស្ស។ (លោកុប្បត្តិ ៧:១៧-២២; ១៨:២០; ១៩:២៤, ២៥; ជនគណនា ១៦:៣១-៣៥) ក៏ប៉ុន្តែ ពេលពិនិត្យមើលកំណត់ហេតុទាំងនេះ យើងឃើញថាក្នុងករណីនីមួយៗ ព្រឹត្ដិការណ៍ក្នុងគម្ពីរនិងគ្រោះមហន្តរាយធម្មជាតិគឺខុសគ្នា។ មានមូលហេតុសំខាន់បីយ៉ាង: ទី១ មុនព្រះប្រើអំណាចធម្មជាតិព្រះបានព្រមានទុកជាមុន។ ទី២ គ្រោះមហន្តរាយធម្មជាតិនៅសព្វថ្ងៃនេះ សម្លាប់ទាំងមនុស្សល្អទាំងមនុស្សអាក្រក់ ប៉ុន្តែ ពេលព្រះបំផ្លាញមនុស្ស លោកបំផ្លាញតែមនុស្សអាក្រក់ដែលកែលែងឡើងឬពួកអ្នកដែលមិនព្រមស្ដាប់ការព្រមានប៉ុណ្ណោះ។ ទី៣ ព្រះបានជួយសង្គ្រោះជីវិតរបស់មនុស្សស្លូតត្រង់។—លោកុប្បត្តិ ៧:១, ២៣; ១៩:១៥-១៧; ជនគណនា ១៦:២៣-២៧
គ្មានទីសំអាងណាដែលថាព្រះជាអ្នកបណ្ដាលឲ្យមានគ្រោះមហន្តរាយធម្មជាតិយ៉ាងច្រើនរាប់មិនអស់ដែលបានធ្វើឲ្យមនុស្សរាប់លាននាក់នៅសព្វថ្ងៃនេះវេទនានោះទេ។ បើដូច្នេះ តើអ្វីជាមូលហេតុដែលនាំឲ្យមានគ្រោះមហន្តរាយធម្មជាតិកើតឡើងកាន់តែច្រើន? ហើយតើនឹងមានពេលមួយដែលលែងមានគ្រោះមហន្តរាយធម្មជាតិទៀតឬទេ? លោកអ្នកនឹងឃើញចម្លើយនៅក្នុងអត្ថបទបន្ទាប់។
