ដំបូងរឹងចចេស តែទីបំផុតស្ដាប់បង្គាប់
ចូរបង្រៀនកូនរបស់អ្នក
ដំបូងរឹងចចេស តែទីបំផុតស្ដាប់បង្គាប់
តើអ្នកធ្លាប់រឹងចចេស ហើយមិនចង់ស្ដាប់បង្គាប់ឬទេ?— * ប្រហែលអ្នកបានមើលកម្មវិធីទូរទស្សន៍ដែលឪពុកម្ដាយប្រាប់អ្នកថាមិនគួរមើល។ អ្នកប្រហែលជាបានគិតឡើងវិញ ហើយស្ដាយដែលអ្នកមិនបានស្ដាប់តាមពួកគាត់។ មានបុរសម្នាក់ដែលមុនដំបូងគាត់មិនចង់ស្ដាប់បង្គាប់ដែរ គឺណាម៉ាន។ សូមពិនិត្យមើលជាមួយគ្នាអំពីអ្វីដែលបានជួយគាត់ឲ្យឈប់រឹងចចេសទៀត។
សូមស្រមៃគិតថា យើងកំពុងរស់នៅជាង៣.០០០ឆ្នាំមុន។ ណាម៉ានជាមេទ័ពដ៏សំខាន់ម្នាក់របស់ប្រទេសស៊ីរី។ គាត់ធ្លាប់តែបង្គាប់បញ្ជាពួកទាហាន ហើយពួកគេស្ដាប់តាមគាត់។ ប៉ុន្តែ ណាម៉ានមានជំងឺដ៏អាក្រក់មួយដែលហៅថា ជំងឺឃ្លង់។ ជំងឺនេះធ្វើឲ្យស្បែកគាត់អាក្រក់មើល ហើយក៏ប្រហែលជាធ្វើឲ្យគាត់ឈឺខ្លាំងទៀតផង។
ប្រពន្ធរបស់ណាម៉ានមានក្មេងស្រីបម្រើម្នាក់ដែលជាជនជាតិអ៊ីស្រាអែល។ នៅថ្ងៃមួយ ក្មេងស្រីនោះបានប្រាប់ចៅហ្វាយស្រីអំពីបុរសម្នាក់ឈ្មោះអេលីសេដែលរស់នៅប្រទេសអ៊ីស្រាអែល។ នាងនិយាយថាអេលីសេអាចធ្វើឲ្យណាម៉ានជាសះស្បើយ។ ពេលណាម៉ានឮអំពីរឿងនេះ គាត់ចង់ទៅជួបអេលីសេភ្លាម។ គាត់បានយកអំណោយយ៉ាងច្រើន ហើយធ្វើដំណើរជាមួយនឹងទាហានរបស់គាត់ទៅប្រទេសអ៊ីស្រាអែល។ គាត់បានទៅជួបស្តេចនៃប្រទេសអ៊ីស្រាអែលដើម្បីជម្រាបអំពីមូលហេតុដែលគាត់បានមកដល់ប្រទេសនោះ។
អេលីសេបានឮអំពីរឿងនេះ ហើយគាត់បានជម្រាបស្តេចឲ្យនាំណាម៉ានមកជួបគាត់។ ពេលណាម៉ានមកដល់នោះអេលីសេចាត់អ្នកនាំពាក្យរបស់គាត់ឲ្យប្រាប់ណាម៉ានថា សូមទៅងូតទឹកក្នុងទន្លេយ៉ូដាន់៧ដង ហើយថាការធ្វើដូច្នេះនឹងធ្វើឲ្យណាម៉ានជាសះស្បើយ។ តើអ្នកគិតថាណាម៉ានមានអារម្មណ៍យ៉ាងណាចំពោះរឿងនេះ?—
គាត់បានខឹង។ ដូច្នេះគាត់ចាប់ផ្ដើមរឹងចចេស ហើយមិនព្រមស្ដាប់តាមអ្នកប្រកាសទំនាយរបស់ព្រះទេ។ គាត់ប្រាប់ទៅកូនទាហានរបស់គាត់ថា៖ ‹ទន្លេនៅប្រទេសខ្ញុំស្អាតជាង›។ ណាម៉ានចាប់ផ្ដើមចាកចេញទៅ។ ប៉ុន្តែអ្នកដឹងទេថា តើកូនទាហានរបស់គាត់និយាយអ្វី?— កូនទាហាននោះនិយាយថា៖ ‹បើអ្នកប្រកាសទំនាយនោះឲ្យលោកធ្វើអ្វីដែលពិបាកនោះ តើលោកមិនធ្វើតាមទេឬអី? ដូច្នេះ បើគាត់គ្រាន់តែឲ្យធ្វើអ្វីដែលស្រួលប៉ុណ្ណោះ លោកគួរតែធ្វើតាម មែនទេ?›។
ណាម៉ានបានស្ដាប់តាម ហើយធ្វើតាមអ្វីដែលកូនទាហានរបស់គាត់និយាយ។ គាត់ចុះទៅងូតទឹកក្នុងទន្លេនោះ៦ដង ហើយងើបឡើងមកវិញ។ នៅពេលដែលគាត់ងើបឡើងពីទឹកនៅលើកទី៧ ណាម៉ានបានភ្ញាក់ផ្អើលយ៉ាងខ្លាំង គឺជំងឺរបស់គាត់បានជាសះស្បើយ! គាត់មានសុខភាពល្អឡើងវិញហើយ! ភ្លាមៗនោះ គាត់បានធ្វើដំណើរទៅផ្ទះអេលីសេដែលមានចម្ងាយជាង៤៨គីឡូម៉ែត្រពីទន្លេនោះដើម្បីអរគុណគាត់។ គាត់ចង់ឲ្យអំណោយដ៏មានតម្លៃដល់អេលីសេ ប៉ុន្តែអ្នកប្រកាសទំនាយនេះមិនព្រមទទួលទេ។
ដូច្នេះ ណាម៉ានបានសុំអ្វីមួយពីអេលីសេ។ តើអ្នកដឹងថាជាអ្វីទេ?— គាត់បាននិយាយថា៖ ‹ខ្ញុំសុំដីដែលអាចដាក់លើសត្វលាពីរក្បាលដើម្បីយកទៅផ្ទះវិញ›។ អ្នកដឹងទេថា ហេតុអ្វីគាត់ចង់បានដីដូច្នេះ?— ណាម៉ានបាននិយាយថា គាត់ចង់ជូនគ្រឿងបូជាទៅព្រះនៅលើដីដែលយកមកពីប្រទេសអ៊ីស្រាអែល។ បន្ទាប់មក ណាម៉ានសន្យាថា គាត់នឹងមិនគោរពបូជាព្រះឯណាទៀតក្រៅពីព្រះយេហូវ៉ាឡើយ! គាត់មិនរឹងចចេសទៀតទេ តែគាត់ស្ម័គ្រចិត្តគោរពប្រណិប័តន៍ព្រះដ៏ពិតវិញ។
អ្នកអាចកត់សម្គាល់ឃើញទេថា តើអ្នកអាចដូចណាម៉ានយ៉ាងដូចម្ដេច?— បើអ្នកធ្លាប់រឹងចចេសដូចគាត់ អ្នកអាចផ្លាស់ប្ដូរបាន។ អ្នកអាចទទួលជំនួយដើម្បីឈប់រឹងចចេសទៀត។
សូមអានពីគម្ពីររបស់អ្នក
[កំណត់សម្គាល់]
^ វគ្គ 3 បើអ្នកអានជាមួយកូនតូច ហើយឃើញថាមានអូសបន្ទាត់ នេះជួយរំលឹកអ្នកឲ្យផ្អាក និងលើកទឹកចិត្តកូនឲ្យឆ្លើយ។