ការឈឺចាប់ដែលមកពីសេចក្ដីស្លាប់
អត្ថបទអំពីក្របទស្សនាវដ្ដី | តើសេចក្ដីស្លាប់ជាទីបញ្ចប់នៃអ្វីៗទាំងអស់ឬ?
ការឈឺចាប់ដែលមកពីសេចក្ដីស្លាប់
សេចក្ដីស្លាប់ជារឿងមួយដែលមិនស្រួលនិយាយទេ។ មនុស្សជាច្រើនមិនចូលចិត្តនិយាយអំពីរឿងនោះឡើយ។ ប៉ុន្តែ មិនយូរមិនឆាប់ យើងទាំងអស់គ្នានឹងប្រឈមមុខរឿងនោះ ហើយពេលនោះច្បាស់ជាធ្វើឲ្យយើងឈឺចាប់ខ្លាំងណាស់។
ការពិតមានអ្វីកើតឡើងជាច្រើនដែលយើងអាចត្រៀមចិត្តជាមុនបាន តែការស្លាប់ឪពុកម្ដាយ គូអាពាហ៍ពិពាហ៍ឬកូន នោះយើងមិនអាចត្រៀមចិត្តបានទេ។ រឿងខ្លោចផ្សានេះអាចកើតឡើងភ្លាមៗដោយមិនដឹងទុកជាមុន ឬរឿងខ្លោចផ្សានោះអាចអាក្រក់ទៅៗអស់រយៈពេលជាយូរ។ ដូច្នេះ មិនថាក្នុងករណីណាក៏ដោយ ការឈឺចាប់ដែលមកពីសេចក្ដីស្លាប់គឺមិនអាចគេចរួចបានទេ ហើយនៅទីបំផុតធ្វើឲ្យយើងមានចិត្តខ្ទេចខ្ទាំ។
បុរសម្នាក់ឈ្មោះអានតូនយូ មានឪពុកស្លាប់ដោយគ្រោះថ្នាក់ចរាចរណ៍។ គាត់ពន្យល់ថា៖ «នេះប្រៀបដូចជាអ្នកណាម្នាក់បិទទ្វារចាក់សោផ្ទះរបស់អ្នក ហើយយកសោទៅបាត់។ អ្នកមិនអាចចូលផ្ទះបានទេ សូម្បីតែមួយភ្លែតក៏ដោយ។ ចំពោះអ្នកគឺមានតែការនឹកចាំល្អៗអំពីការរស់នៅក្នុងផ្ទះនោះប៉ុណ្ណោះ។ ប៉ុន្តែ នេះជាជីវិតពិតប្រាកដរបស់អ្នកឥឡូវនេះ។ ដោយសាររឿងនោះហាក់ដូចជាមិនយុត្ដិធម៌សោះ អ្នកមិនចង់ទទួលស្គាល់ទេ។ ទោះជាយ៉ាងនោះក្ដី អ្នកមិនអាចធ្វើអ្វីបានទាំងអស់»។
ស្ត្រីម្នាក់ឈ្មោះដ័ររ៉ឺធី ក៏បានជួបនឹងរឿងស្រដៀងនេះដែរ។ គាត់បានក្លាយជាស្ត្រីមេម៉ាយនៅអាយុ៤៧ឆ្នាំ។ គាត់បានតាំងចិត្តស្វែងរកចម្លើយចំពោះសំណួរសំខាន់ៗទាក់ទងនឹងសេចក្ដីស្លាប់។ ដោយសារគាត់ជាគ្រូបង្រៀននៅវិហារ គាត់មិនដែលគិតថាសេចក្ដីស្លាប់ជាទីបញ្ចប់នៃអ្វីៗទាំងអស់នោះទេ។ ប៉ុន្តែគាត់មិនដឹងចម្លើយច្បាស់ទេ។ គាត់បានសួរគ្រូគង្វាលរបស់គាត់ថា៖ «តើមានអ្វីកើតឡើងពេលយើងស្លាប់?»។ គ្រូគង្វាលបានឆ្លើយថា៖ «គ្មានអ្នកណាដឹងច្បាស់ទេ។ យើងគ្រាន់តែចាំមើលប៉ុណ្ណោះ»។
តើយើងត្រូវតែទ្រាំ«ចាំមើល»ប៉ុណ្ណោះឬ? តើមានវិធីមួយណាដែលយើងអាចដឹងប្រាកដថា សេចក្ដីស្លាប់ជាទីបញ្ចប់នៃអ្វីៗទាំងអស់មែនឬមិនមែន?
