ហេតុអ្វីសាក្សីព្រះយេហូវ៉ាមិនធ្វើសង្គ្រាម?
មូលហេតុដែលសាក្សីព្រះយេហូវ៉ាមិនធ្វើសង្គ្រាម មានដូចតទៅ៖
១. ស្ដាប់បង្គាប់ព្រះ។ គម្ពីរចែងថាអ្នកបម្រើព្រះគួរ«យកដាវរបស់ខ្លួនដំធ្វើជាផាលនង្គ័ល» ហើយមិន«ហាត់រៀនធ្វើសឹកសង្គ្រាមទៀតដែរ»។—អេសាយ ២:៤
២. ស្ដាប់បង្គាប់លោកយេស៊ូ។ លោកយេស៊ូបានប្រាប់សាវ័កពេត្រុសថា៖«ចូរស៊កដាវរបស់អ្នកទៅក្នុងស្រោមវិញ ព្រោះអស់អ្នកដែលប្រើដាវក៏នឹងស្លាប់ដោយដាវដែរ»។ (ម៉ាថាយ ២៦:៥២) លោកយេស៊ូបានបង្ហាញថា អ្នកកាន់តាមលោកមិនត្រូវកាន់អាវុធធ្វើសង្គ្រាមទេ។
អ្នកកាន់តាមលោកយេស៊ូស្ដាប់បង្គាប់លោក ដោយ«មិនរួមចំណែកក្នុងពិភពលោក»ពោលគឺរក្សាអព្យាក្រឹតដាច់ខាតក្នុងរឿងនយោបាយ។ (យ៉ូហាន ១៧:១៦) ពួកគាត់មិនជំទាស់តវ៉ានឹងសកម្មភាពសង្គ្រាម ឬបង្អាក់ដល់អស់អ្នកដែលសម្រេចចិត្តចូលធ្វើជាកងទ័ពឡើយ។
៣. ស្រឡាញ់អ្នកឯទៀត។ លោកយេស៊ូបង្គាប់អ្នកកាន់តាមលោកឲ្យ«ស្រឡាញ់គ្នាទៅវិញទៅមក»។ (យ៉ូហាន ១៣:៣៤, ៣៥) ហេតុនេះហើយ ពួកគាត់ជាបងប្អូនរួមជំនឿនៅទូទាំងពិភពលោក ហើយមិនព្រមធ្វើសង្គ្រាមទាស់នឹងបងប្អូនរបស់ខ្លួនទេ។—យ៉ូហានទី១ ៣:១០-១២
៤. គំរូរបស់គ្រិស្តសាសនិកនៅសម័យដើម។ សព្វវចនាធិប្បាយមួយស្ដីអំពីសាសនានិងសង្គ្រាម បានចែងថា៖«អ្នកកាន់តាមដំបូងរបស់លោកយេស៊ូមិនចូលរួមធ្វើសង្គ្រាម និងមិនព្រមបំពេញកាតព្វកិច្ចយោធាទេ» ហើយពួកគាត់ទទួលស្គាល់ការប្រព្រឹត្តទាំងនោះគឺ«មិនស្របគ្នានឹងគោលការណ៍នៃសេចក្ដីស្រឡាញ់របស់លោកយេស៊ូ និងបង្គាប់របស់លោកដែលឲ្យស្រឡាញ់សត្រូវរបស់ខ្លួនឡើយ» (Encyclopedia of Religion and War)។ ហេតុនេះហើយ សាសនវិទូជនជាតិអាល្លឺម៉ង់ឈ្មោះភីធើ មេនហូលបាននិយាយអំពីអ្នកកាន់តាមលោកយេស៊ូនៅសម័យដើមថា៖«ពួកគេមិនអាចធ្វើជាគ្រិស្តសាសនិកផង ហើយធ្វើជាទាហានផងបានឡើយ»។
ជួយសហគមន៍
សាក្សីព្រះយេហូវ៉ាជាសមាជិកដែលផ្ដល់ប្រយោជន៍ដល់សង្គម ហើយមិនគំរាមកំហែងដល់សុវត្ថិភាពនៃប្រទេសដែលពួកគាត់រស់នៅឡើយ។ យើងគោរពរដ្ឋអំណាចស្របទៅតាមសេចក្ដីបង្គាប់ទាំងនេះដែលមានក្នុងគម្ពីរ៖
«ចុះចូលនឹងពួកអាជ្ញាធរ»។—រ៉ូម ១៣:១
«បើដូច្នេះ អ្វីដែលជារបស់សេសារ ចូរសងសេសារវិញ តែអ្វីដែលជារបស់ព្រះ ចូរសងព្រះវិញ»។—ម៉ាថាយ ២២:២១
ដូច្នេះ យើងគោរពច្បាប់ បង់ពន្ធដារ ហើយសហការជាមួយរដ្ឋាភិបាលក្នុងការខំប្រឹងប្រែងដើម្បីឲ្យសង្គមមនុស្សមានស្ថានភាពល្អជាង។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ារក្សាអព្យាក្រឹតភាពក្នុងរឿងនយោបាយ?
តើពួកគេរំខានដល់សន្ដិសុខជាតិឬទេ?
