តើមានអ្នកគ្រោងបង្កើតឬទេ?
វិធីសាស្ត្រនៃការពងរបស់ត្រីក្រាញៀន
ត្រីតូចម្យ៉ាងដែលគេហៅថាក្រាញៀនកាលីហ្វ័រញ៉ា បានពងនៅក្នុងឆ្នេរមហាសមុទ្រប៉ាស៊ីហ្វិក នៅរដ្ឋកាលីហ្វ័រញ៉ា សហរដ្ឋអាម៉េរិក និងបាហា កាលីហ្វ័រញ៉ា ម៉ិកស៊ិក។ ត្រីទាំងនេះដឹងថ្ងៃនិងពេលវេលាជាក់លាក់ដែលពួកវាគួរពង ដើម្បីឲ្យកូនៗរបស់វារួចជីវិត។
សូមពិចារណា៖ ត្រីក្រាញៀនពងក្នុងអំឡុងបីឬបួនយប់ក្រោយទឹកជោរខ្ពស់បំផុតជាពេលខែពេញបូរមី។ បើពួកវាពងនៅប៉ុន្មានយប់មុនខែពេញបូរមី នោះពងរបស់វានឹងរសាត់ទៅតាមទឹកសមុទ្រពេលទឹកជោរធ្វើឲ្យរលកបក់បោកខ្សាច់ចេញពីឆ្នេរ។ ពេលទឹកជោរខ្ពស់បំផុតហើយ មិនយូរប៉ុន្មានពួកវាក៏ចាប់ផ្ដើមពងក្នុងខ្សាច់។ បន្ទាប់មកទឹកក៏នាចទៅវិញ ហើយរលកបក់បោកនាំយកខ្សាច់មកបន្ថែមលើឆ្នេរកាន់តែក្រាស់ឡើងៗ។ ខ្សាច់នោះក៏គ្របលើពងរបស់ពួកវា ហេតុនេះហើយ ពងវាមានសុវត្ថិភាពក្រោមស្រទាប់ខ្សាច់។
Wally Skalij/Los Angeles Times via Getty Images
រដូវត្រីក្រាញៀនពង គឺនៅរដូវផ្ការីកនិងរដូវក្ដៅ។ ជាទូទៅ កម្ពស់ទឹកជោរនៅពេលយប់ខ្ពស់ជាងទឹកជោរនៅពេលថ្ងៃ នេះបើកឱកាសឲ្យពួកវាហែលឡើងទៅឆ្នេរឆ្ងាយជាង ហើយពងរបស់វាអាចមានសុវត្ថិភាពពេលដែលមានទឹកជោរម្ដងទៀត។
ដើម្បីពង ត្រីក្រាញៀនត្រូវរង់ចាំរហូតដល់ពេលមានរលកធំដើម្បីរុញច្រានពួកវាទៅដល់ឆ្នេរ ហើយពួកវាបន្តហែលទៅឲ្យបានឆ្ងាយរហូតដល់ឆ្នេរខ្សាច់ខ្ពស់។ នៅពេលដែលទឹកស្រក ត្រីញីរុលខ្លួនទៅក្នុងដីខ្សាច់សើមដើម្បីកប់កន្ទុយរបស់វា។ ពេលវារុលបានជម្រៅ៥ដល់៨សង់ទីម៉ែត្រ វាក៏បញ្ចេញពង។ ក្រោយនោះ ត្រីឈ្មោលបញ្ចេញមេជីវិតទៅលើពងទាំងនោះ។ បន្ទាប់មក ពួកវាធ្វើដំណើរត្រឡប់ទៅវិញតាមរលកសមុទ្រ។
ទោះជាពងទាំងនោះលូតលាស់នៅក្នុងខ្សាច់សើមក៏ដោយ តែវាត្រូវការចលនាទឹករលកដើម្បីបញ្ជឿនការញាស់។ ដូច្នេះ ប្រហែលពីរសប្តាហ៍ក្រោយមកនៅពេលទឹកជោរម្ដងទៀត កូនត្រីក្រាញៀនក៏ញាស់ ជួនកាលត្រូវរង់ចាំអស់បួនសប្តាហ៍ទម្រាំដល់ទឹកជោរខ្ពស់បំផុតម្ដងទៀត។
តើអ្នកគិតយ៉ាងណា?៖ តើសមត្ថភាពដឹងពេលវេលានិងវិធីសាស្ត្រពងរបស់ត្រីក្រាញៀន ជាការវិវត្តន៍ឬមានអ្នកគ្រោងបង្កើត?
លោកអ្នកក៏ប្រហែលជាចូលចិត្តដែរ
តើមានអ្នកគ្រោងបង្កើតឬទេ?
កន្ទុយសេះសមុទ្រ
សេះសមុទ្រជាមច្ឆាម្យ៉ាងដែលមានកន្ទុយខុសប្លែកពីគេ ដែលនឹងជួយដល់ការបង្កើតម៉ាស៊ីនយន្តឲ្យកាន់តែប្រសើរ។
សេចក្ដីបង្រៀនសំខាន់ៗពីគម្ពីរ
តើសកលលោកនេះមានអ្នកបង្កើតឬទេ?
មនុស្សជាច្រើនយល់ច្រឡំអំពីអ្វីដែលគម្ពីរបរិសុទ្ធរៀបរាប់ស្ដីអំពីដើមកំណើតសកលលោកនេះ ឬក៏គិតថានោះជារឿងព្រេងវិញ។ តើយើងពិតជាអាចជឿអ្វីដែលគម្ពីរបរិសុទ្ធរៀបរាប់អំពីដើមកំណើតសកលលោកឬ?
សៀវភៅផ្សេងៗ
តើជីវិតទាំងឡាយមានអ្នកបង្កើតឬទេ?
អ្វីដែលអ្នកជឿអំពីរបៀបដែលជីវិតបានត្រូវបង្កើតមកពិតជាសំខាន់។