Mukanda wa Dyanga ku Akwa Kolindu 8:1-13
8 Kyenyiki, yalungu ni kudya kwosatele o iteka, etu enyoso twejiya o maka enyá. O kwijiya kubhangesa o muthu kudizangeleka, maji o henda iswinisa.
2 Se muthu ubanza kwila wejiya kima, mwene ka kijiya luwa kyambote.
3 Maji woso wazolo Nzambi, mwene a mwijiya kwa Nzambi.
4 Yalungu ni kudya kwosatele o iteka, mu kidi etu twejiya kwila o iteka ki jinzambi kana, maji kwene ngó Nzambi imoxi.
5 Sumbala kwene yó a exana jinzambi, kikale mu dyulu mba mu ixi, kwene we “jinzambi” javulu ni “jingana” javulu.
6 Maji phala etu, kwene ngó Nzambi imoxi, o Tata, wabhange o ima yoso, etu twala ku mwenyu mukonda dya mwene. Kwene we ngó Ngana imoxi, Jezú Kidistu. Ima yoso a ibhange bhukaxi ka mwene, etu twala ku mwenyu mukonda dya mwene.
7 Maji k’o athu oso ejiya o maka enyá. Sayi athu exile mubheza o iteka m’ukulu, amona o kudya kuku kála kima kyosatele o iteka. Kuma o kitongolwelu kyâ ki kya kolo luwa, kya afundisa.*
8 Maji o kudya ki kwanda tuzukamesa kwa Nzambi. Mukonda se tukamba kudya, ki twanda kala tu athu ayibha, se tudya, ki twanda betakota.
9 Mu kyenyiki, dilangyenu phala o ufôlo wenu wa kusola, ki udibhange ditadi dya kudibhukana phala yó kakolo luwa mu kixikanu.
10 Mukonda se muthu ukumona eye wala ni kwijiya, kudya mu tembulu ya iteka, o kwila o kitongolwelu kya muthu kakolo luwa mu kixikanu, ki kyanda mu bhangesa kudya we o kúdya kwosatele o iteka?
11 Kyenyiki, mukonda dya kwijiya ku wala naku, eye wa mu jimbidisa yó kakolo luwa mu kixikanu, phang’yé a mu fwila kwa Kidistu.
12 Kyoso ki muta ituxi ku jiphange jenu, mwa mu abhangesa kubhanga o ima yanda bhangesa o kitongolwelu kyâ ki kyakolo luwa kwa fundisa. Kyenyiki, mwa muta kituxi kwa Kidistu.
13 Mukonda dya kiki, se mu kudya o xitu nga mu zozesa o kixikanu kya phang’yami, kinganda dya dingi xitu, phala ki ngi zozese o kixikanu kya phang’yami.
Footnotes
^ Mu Ngel.: “ki xila.”
