Kala Kyasoneka Nzwá 15:1-27
15 “Éme ngi muxi wa kidi wa muvidi, o Tata yami mwéne o kidimakaji.
2 Mwene ubatula kokwami o jithangu joso kijibhana ibundu. O jithangu jibhana ibundu, mwene ujizelesa, phala jene jibhane dingi ibundu.
3 Enu mwazele kyá mukonda dya maka u nga mi tangela.
4 Kalenu kumoxi n’eme, ni ngikale we kumoxi ni enu. Kala o luthangu kilutena kubhana ibundu ubheka wê, se ki lu dikwatenena ku muxi wa muvidi, enu wenu kimutena kubhana ibundu ubheka wenu, se kimukala kumoxi n’eme.
5 Éme ngi muxi wa muvidi, énu mu jithangu. Woso ukala kumoxi n’eme, mwenyú ubhana ibundu yavulu, mukonda se mu sanduka kokwami, kimutena kubhanga kima.
6 Se muthu kakala kumoxi ni eme, a mu takula bhu kanga kala luthangu, anga lu kukuta. O jithangu jiji a jibhongolola, a jitakula mu túbhya, anga a jijokotesa.
7 Se enu mu kala kumoxi n’eme, o maka mami axalela momwenu. Bhingenu yoso i mwa mesena, yéne anga a mi bhana-yu.
8 O kima kijingisa o Tata yami kyenyiki: Mu suluka mu kwima ibundu ni kulondekesa kwila, mu maxibulu mami.
9 Kala kya ngizolo Tata, eme wami nga mizolo, kyenyiki, kalenu mu henda yami.
10 Se mu belesela o itumu yami, mwanda kala mu henda yami. Kala ki ngene mu belesela o itumu ya Tata yami, éme ngala mu henda yê.
11 “Nga myambela o ima yiyi, phala mu sanguluke kala ki nga sanguluka eme, anga o kusanguluka kwenu kutenene.
12 Kiki kyene o kitumu kyami: Dizolyenu mudyenu, kala ki ngamizolo eme.
13 Sé-ku muthu wala ni henda ya betakota kala yiyi, ya kwila, muthu ubhana o mwenyu wê, phala kubhulula o makamba mê.
14 Enu mu makamba mami, se mubhanga o ima i ngi mituma.
15 Eme ki ngi mixana dingi mu abhika, mukonda o mubhika kejiya o ima ibhanga o ngana yê. Maji ngi mixana mu makamba mami, mukonda nga mi londekesa o ima yoso i ngevu kwa Tata.
16 K’enu mwa ngi solo, maji éme nga mi solo, phala mu suluke ni kubhana ibundu, ibundu inangenena. Phala ima yoso i mu bhinga kwa Tata mudijina dyami, mwene u mi bhana-yu.
17 “Nga mi tendelesa o ima yiyi, phala mudizole mudyenu.
18 Se o mundu wa mizembe, ijiyenu-kyu kwila, wadyangela ku ngi zemba eme.
19 Se mwa bhangele mbandu ya mundu, o mundu weji ku mizola mukonda mwa mutokala. Kuma ki mutokala ku mundu, maji nga mi solo ku mundu, kyene o mundu kya mi zembe.
20 Lembalalenu o kima ki nga mi tangela: O mubhika katúndu ngana yê. Se a ngi zukutisa, enu wenu anda mi zukutisa, se abelesela o maka mami, ene anda belesela we o maka m’enu.
21 Maji anda mi bhanga o ima yoso yiyi, mukonda dya dijina dyami, kuma kejiya Yó wa ngi tumikisa.
22 Se ki ngejile mu zwela nawu, keji kala ni kikuma kya ituxi. Maji kindala, ene katena kudituna dingi o ituxi yâ.
23 Woso wa ngi zembe, wazembe we o Tata yami.
24 Se ki nga bhangele mwaxaxi kâ o madiwanu ka abhangele dingi ku muthu wengi, ene keji kala ni kikuma kya ituxi. Maji ene a ngi mono,* né kiki a ngi zembe eme ni Tata yami.
25 O ima yiyi yabhiti, phala kudikumbidila o kima kyosoneke mu Kijila kyâ: ‘Ene a ngi zembe sé kikuma.’
26 Kyoso ki nganda mi tumikisa o mukwatekexi, o nzumbi yakidi itunda kwa Tata, yene yanda bhana umbangi walungu n’eme,
27 enu wenu mwanda bhana umbangi walungu n’eme, mukonda mwakexile kumoxi n’eme, tundé kudimatekenu.
Footnotes
^ Mba, “o madiwanu mami.”
