Mukanda ku Akwa Kolose 3:1-25
3 Mu kyenyiki, se a mi fukununa kumoxi ni Kidistu, kolokotenu mu kusota o ima ya dyulu kwala Kidistu, yó waxikama kukadilu ka Nzambi.
2 Kolokotenu mu kuxinganeka mu ima yala ku dyulu, kana mu ima yala mu ngongo.
3 Mukonda enu mwafu kyá, o mwenyu wenu wosweke kumoxi ni Kidistu, kwa Nzambi.
4 Kyoso Kidistu o mwenyu wetu kyanda tukuluka, enu wenu mwanda tukuluka kumoxi ni mwene ni fuma.
5 Mu kyenyiki, jibhenu o jihânji ja mukutu wenu ja lungu ni undumbu,* ufusa, jihânji jayibha, jivondadi jabolo ni lwimbi, mukonda o lwimbi lwa soko ni kubheza o iteka.
6 O njinda ya Nzambi ijila mukonda dya ima yiyi.
7 Yú wene wexile o wendelu* wenu wokulu.
8 Kindala enu mwatokala kweha o ima yoso yiyi: O kutema, o njinda ni kuxinga. Mu kanu dyenu ki mutunde we jindaka jabolo.
9 Kanenu kuditanga makutu mudyenu. Zulenu o ukexilu* wokulu ni ifwa yê yoso.
10 Zwatenu o ukexilu wa ubhe watubhana Nzambi. O ukexilu yú wa ubhe a ubhange mu kidifwanganu kya Nzambi. Kuma Nzambi mwa mwijiya kyambote, kolokotenu mu kukala mu athu a ubhe.
11 Ku ukexilu yú wa ubhe kikwala Ngeleku, Judé, muthu a musaye, mba akambe ku musaya, mukwa ixi yengi, muthu kadilongo kyavulu,* mubhika mba muthu wala ni ufôlo. Maji Kidistu mwéne wala kuthandu dya ima yoso, mwéne wala we mwa enyoso.
12 Kuma amisolo kwa Nzambi kala mu athu akôla, amizolo, kalenu ni henda ni kubhanga o mbote, ni kulenduka,* ni kubatâma ni mwanyu.
13 Kolokotenu mu kudilendukila mudyenu ni kudiloloka ni muxima woso, né mwene se bhwala muthu wadikwata ni mukwa. Kala Jihova kya miloloka ni muxima woso, enu wenu mwatokala kudiloloka mudyenu.
14 Mu ima yoso kalenu ni henda, kuma o henda yene o dijikita dibhangesa o athu kukala bhwamoxi.
15 Mu kyenyiki, o kutululuka kwa Kidistu kukale kumixima yenu,* mukonda enu am’ixana phala mukale mu kutululuka kwenyuku, mu mukutu umoxi. Sakidilenu jinga.
16 O ulongelu wa Kidistu ukale momwenu ni unjimu woso. Sulukenu ni kulonga, kudiswinisa* mudyenu ni jisálamu, ni mimbu ya kuximana Nzambi, ni mimbu ya kubheza ya kuximana nayu Nzambi. Kolokotenu mu kwimbila Jihova ni muxima woso.
17 Yoso imubhanga, kikale mu izwelu yenu ni mu ibhangelu yenu, mu ibhanga mudijina dya Ngana Jezú, ni kusakidila Nzambi o Tata, bhukaxi ka Jezú.
18 Enu mu ahatu, tumakenu o anumi enu, kala kya fwama mwa Ngana.
19 Enu mu anumi, kolokotenu kuzola ahatu enu, kanenu kwa kwatela njinda.
20 Enu mu ana, tumakenu o jitata mu ima yoso, mukonda kiki kyene kisangulukisa Ngana.
21 Enu mu jitata kanenu kuthathamesa o twana twenu phala ene ka luwale.*
22 Enu mu abhika tumakenu o jingana jenu ja ngongo, ki mwa tumake ngó kyoso kya mimona ku athu phala kwa sangulukisa, maji mukibhanga ni muxima woso mukuxila Jihova.
23 Mu yoso i mubhanga kalakalenu ni muxima woso kala mwa mu kalakela Jihova kana o athu,
24 mukonda mwejiya kwila Jihova mwéne wanda mibhana o undundu kala kikôwe. Kalakalenu kala mu abhika a Ngana Kidistu.
25 Mu kyenyiki, woso ubhanga o ima yayibha wanda tambula o futu yê mukonda dya ima yayibha, kuma Nzambi wanda fundisa o athu sé katombo.
Footnotes
^ Mu Ngeleku, por·nei′a. Tala o Dilombolwelu.
^ Mba, “mwenyu.”
^ Mu Ngel.: “muthu.”
^ Mu Ngel.: “Kabinji.” M’ukulu o athu yá akexile mwa sebhulula mukonda dya wendelu wâ ni ukexilu wâ.
^ Mba, “kulenduka kwa muxima.”
^ Mba, “kulange o mixima yenu.”
^ Mba, “kuditendelesa.”
^ Mba, “phala ene ka toloke o mixima.”
