Kala Kyasoneka Matesu 15:1-39
15 Sayi Jifalizewu ni jimesene ja kulonga o Kitumu atundu mu Jeluzaleme, azukama kwa Jezú anga a mwambela, exi:
2 “Mukonda dyahi o maxibulu mé abhukumukina o kijila kya jikuku jetu? Mu kifika, ene kene mu sukula* o maku mu kithangana kya kudya.”
3 Mwene wa avutwila, wixi: “Phala-hi mu bhukumukina o kitumu kya Nzambi mukonda dya ijila yenu?
4 Mu kifika, Nzambi wambe, wixi: ‘Xila tat’enu ni mam’enu; woso uxinga* tat’â mba many’â, atokala ku mu jibha.
5 Maji enu mu zwela, mwixi: ‘Woso wambela tat’â mba many’â, wixi: “Yoso ingala nayu yeji tena ku kukwatekesa, nga ibhakula kwa Nzambi,”
6 muthu yú kabhingi kuxila tat’â.’ Mu kubhanga kiki, enu mwa ditunu o mak’â Nzambi, mukonda dya ijila yenu.
7 Mu akwa mangonya! Polofeta Izaya wazwela o kidi kya lungu ni enu kyoso kyambe, wixi:
8 ‘O mundu yú u ngi bheza ngó ni dikanu, maji mixima yâ-phe ya ngi kala dikanga.
9 Ene a ngi bheza mu kingoho, mukonda alonga o ijila ya athu kala itumu.’”
10 Kyenyiki mwene wexana o athu, anga wa ambela, wixi: “Ivwenu, tongololenu o maka enyá:
11 O kixidisa o muthu, ko kima kibokona mu dikanu dyê, maji o kima kitunda mu dikanu dyê, kyene ki mu xidisa.”
12 O maxibulu mê a mu zukama anga a mwibhwidisa, exi: “Eye wejiya kwila o Jifalizewu adivu kyayibha mu kwivwa o ima i wa zwela?”
13 Mwene-phe wa a vutwila, wixi: “Kidima kyoso ka ki kunu kwa Tata yami ya dyulu, anda ki vuza.
14 Kyenyiki, ki mu tandanganye ni ene! Ene ala ifofo, maji alondekesa o njila ku akwâ. Mu kyenyiki, se kifofo kyendesa kifofo ni mukwâ, kiyadi kyâ anda bwa mu dikungu.”
15 Phetele wa mu tambwijila, wixi: “Tu jimbulwile o kifika.”
16 Mwene wa atangela, wixi: “Enu wenu mwakambe hanji kutendela?
17 Ki mwejiya kwila yoso ibokona mu dikanu ibhita mu mala, anga itundila bhoxi?
18 Maji yoso izwela o dikanu, itunda ku muxima, ima yiyi yéne ixidisa o muthu.
19 Mu kifika, mu muxima mwéne mu tunda ixinganeku yayibha, ujibhangânga, jiphánda, maundumbu,* wiyi, umbangi wa makutu, ni malebhu.
20 Yiyi yene o ima ixidisa o muthu, maji o kudya sé kusukula o maku, ki kuxidisa o muthu.”
21 Mu kutunda bhu kididi kyenyókyo, Jezú anga uya mu jimbanza ja Tilu ni Sidónya.
22 Sayi muhatu mukwa Fenixa watungile kwenyóko, wa mu zukama anga udikola, wixi: “Ngana, Mon’a Davidi ngi kwatele henda. Mon’ami wa muhatu a mu mu zukutisa ku dimonyo.”
23 Maji mwene ka mu tangela kima. O maxibulu mê eza, ya a mu tangela, exi: “Mu kayé, mukonda mwene wa jiji ni ku dikola ku dima dyetu.”
24 Mwene wa a tambwijila: “Eme a ngitumu ngó ku jimbudi ja jimbidila ja dibhata dya Izalayele.”
25 O muhatu wa mu zukama yu wa mu fukamena, anga uzwela, wixi: “Ngana, ngi kwatekese!”
26 Jezú wa mu vutwila: “Ki ki fwamé kukatula o mbolo ya ana, phala ku ibhana ku twana twa jimbwa.”
27 O muhatu-phe, wixi: “Kyene Ngana, maji o twana twa jimbwa, tudya o jisesekenya jibwa ku meza a jingana jâ.”
28 Jezú wa mu tambwijila, wixi: “Muhatu, o kixikanu kyé kyadikota! Kibhite kála ki wamesena.” Mu kithangana kyenyókyo, mon’ê wa muhatu wadisanze.
29 Jezú anga utunda kwenyóko, uya bhwa zukama o Kalunga ka Ngalileya hé ubanda ku mulundu anga uxikama kwenyóko.
30 Mu kiki, mundu wavulu u mu zukama anga u mu bhekela atenguna, inema, ifofo, mabubu ni jihaxi ja mukwá dingi, anga a mu tudila na-wu bhu inama yê. Mwene anga u asaka ene oso.
31 O mundu anga udiwana mu kumona kwila, o mabubu a mu zwela, o inema a mu kwenda, o atenguna a mu disanza, o ifofo a mu mona. O mundu anga uximana o Nzambi ya Izalayele.
32 Jezú wexana o maxibulu mê yu wa atangela, wixi: “O mundu nga ukwatela henda, mukonda ala kyá izuwa itatu n’eme. Ene kala ni kima kya kudya, ki nga mesena kwasula ni nzala, kuma atena kufwa mu ikoka.”
33 Mu kiki-phe, o maxibulu a mu tambwijila, exi: “Etu twala mu mukáwu, kwebhi ku twanda sanga jimbolo ja soko phala kudisa o mundu woso yú?”
34 Kyenyiki, Jezú wa a ebhwidisa, wixi: “Mbolo jikuxi jimwala naju?” Ene a mu tambwijila, exi: “Sambwadi dya jimbolo, ni tumbiji twofele.”
35 Mu kusuluka, mwene watumu o mundu kuxikama bhoxi,
36 mwene anga ukwata sambwadi dya jimbolo ni tumbiji, anga usakidila Nzambi, hé ubukujula o jimbolo, ujibhana ku maxibulu, o maxibulu-phe a jiwanena o mundu.
37 O mundu woso wadi, wekuta, anga abhongolola sambwadi dya inda yamakota yezala ni ibhasu ya subhuka.
38 O athu adi exile midi jiwana ja mala, o ahatu ni anandenge ka atange.
39 Kyazubha kulekela o mundu, mwene wadilôngo mu ulungu, anga ubhixila mu mbanza ya Mangadana.
Footnotes
^ O Jifalizewu ni Jijudé ja ka mukwá, akexile mu sukula o maku, kala kyakexile mu tuma o ijila yâ.
^ Mba, “u loka; u lokalala.”
^ Mu Ngeleku, por·nei′a. Tala o Dilombolwelu.
