O kuila saí muthu ua ku tangele kiá kikutu?— * O Bibidia i tanga kikutu kia katunda, a ki ixana “kikutu kikôla.” O kikutu kiki ki kôla, mukonda kikutu kia Nzambi. A kixana kikutu, mukonda o athu ka kijidile. Katé muene ni ji anju ja mesenene kuijiia dingi ia lungu ni kikutu kiki. Eie ua mesena kuijiia o kikutu kiki?—

Mivu iavulu ku dima, Nzambi ua bhange o diiala dia dianga ni muhatu. O majina mâ exile Adá ni Eva. Nzambi ua a bhanene o dibhata dia uabha, a di exana jaludim ia Edene. Se Adá ni Eva a belesele Nzambi, ene ni an’ê eji bhangesa o ixi ku kala palaízu, kála o jaludim ienioió. Ene eji tunga mu Palaízu, ku hádia ni hádia. Maji eie uejiia ihi ia bhangele Adá ni Eva?—

Adá ni Eva a bhukumukine Nzambi, mukonda dia kiki, etu ki tuala mu palaízu lelu. Maji Nzambi uambe kuila, muéne ueji iukisa o ixi ioso, ni kuila, o athu oso eji kala ni muenhu ua kalelaku, katé ku hádia ni hádia, ni ku zediua. Kiebhi kieji bhanga kiki? Kua bhitile ithangana iavulu, o athu ka kijidile. Kiexile kikutu.

Kioso kiéza Jezú mu ixi, muéne ua longo o athu ia lungu ni kikutu kiki. Muéne uambe kuila, o kikutu kiki, kia lungile ni Utuminu ua Nzambi. Jezú uambela o athu kuila, a tokelele ku bhinga mu musambu, phala o Utuminu iú uíze. Kiki kia-nda bhangesa kuila, o ixi i kala palaízu ia iuka.

O kuila ua mesena kuijiia o kikutu kiki?— Lembalala kuila, o athu a belesela Jihova, ene ngó a-nda kala mu Palaízu. O Bibidia i tu tangela misoso iavulu, ia lungu ni maiala ni ahatu, a belesele Jihova. O kuila eie ua mesena ku a ejiia?— Tu di longe o majina mâ, ni kiebhi ki tu tena ku kala kála ene.