EYE wevwile kyá ndolo ya ku bhangesa kuzwela kwila kota se wa fwé? Se kyene, eye wejiya kyoso kya mu divwa Adriana. Mwene wa kexile ni uhaxi wa kukala ni hele yavulu, ka sangulukile, ka kexile ni kidyelelu. Adriana a mu tangela kwala asaki kwila mwene wala ni uhaxi wa kuluwala ni kudivwa ubheka.

Tala we o musoso wa diyala mukwa Japão, a mwixina Kaoru, wa lange o jitata jé a kuka kyá, a katele. Mwene wambe: “Sayi bhabha kwexile mu ngi bhonza kyavulu mukonda dya salu, Sayi ithangana ki ngexile ni vondadi ya kudya, ki ngexile mu kwata kilu. Eme ngexile mu banza kwila, se ngi fwa, maka oso a-nda batuka.”

Sayi diyala mukwa Nigéria a mwixana Ojebode wambe:“Eme nga luwalele kyavulu, nga mesenene kudila, mu kiki nga soto ndunge phala kukatula o mwenyu wami.” Né kiki, Ojebode, Kaoru, ni Adriana ka dijibha mukonda dya malamba. Maji mivu yoso athu avulu ene mu dijibha.

Ku athu oso ene mu dijibha, mayala éne avulu-ku dingi, a kala ni jisonyi ja kubhinga kikwatekesu. Jezú wambe kwila o athu a kate a bhindamena musaki. (Luka 5:31) Se eye wa mu dibhana ni maka yá, twa kudyondo kana kukala ni jisonyi, bhinga kikwatekesu. Athu avulu ala ni uhaxi wa kuluwala kyavulu mba kudivwa ubhka ene mu tambula milongo yene mu a kwatekesa kudisanza. Ojebode, Kaoru, ni Adriana, enoso a tambula kikwatekesu kya jidotolo, kindala a mu divwa kya kyambote.

O jidotolo a tena kubhana milongo mba kuzwela ni haxi phala kusaka o uhaxi wa kudivwa ubheka. Oso yó a mu dibhana ni uhaxi yú a bhingi kwila o jindandu jâ ni makamba a a langa, a a kwatekesa ni ku a evwa. Jihova Nzambi mwéne o dikamba dyetu dya beta-o-kota, Mwene u bhana kikwatekesu kya soko bhu kaxi ka maka mê, o Bibidya.

O athu ala ni uhaxi wa kuluwala kyavulu mba wa kudivwa ubheka a bhingi kikwatekesu mu mivu yavulu, a bhingi we kulungulula o ukexilu wa mwenyu wâ. Maji se eye wa mu dibhana ni uhaxi yú, u tena kukala ni kidyelelu kya kwila ku hádya wa-nda sanguluka, kala kya bhange Ojebode. Mwene wambe: “nga mu kingila ni hanji yoso kumona o dikumbidilu dya izwelu mu divulu dya Izaya 33:24, di tanga o kithangana ki bhwa-nda kala dingi athu amba kwila ‘Nga kata.’” Kala Ojebode, xinganeka mu ikanenu ya Nzambi ya lungu ni ‘oxi yòbhe,’ ki mwa-nda kala dingi “kukata”. (Dijingunwinu 21:1, 4) O kikanenu kiki kya lungu ni kuzubha o jindolo joso ni kukata, kikale mu xitu mba mu kilunji. O jindolo ji wene mu kwivwa ja-nda bhwa katé ku hádya ni hádya. Nuka dingi wa-da kwivwa ndolo mukonda “o ima ya bhiti kyá ki bhu kala dingi ku i banza, né ngó kwiza mu kilunji, lémbwa.”—Izaya 65:17.