XINGANEKA: Eie uai mu nhunga mu muzeu, uezala ni iteka ni iselekete iokulu. Sai ima ia kubujuka kiá, ki iale dingi kiambote. Sai iteka iala ngó ni mbandu imoxi. Maji u sanga-mu hanji kiteka kimoxi kiambote; eie u tena kumona kuila o kiteka kiki kia tenena hanji. Eie uibhuidisa o muthu ua mu kulondekesa o ima; “O kuila kiki kia ubhe?” Muene u tambuijila; “Kana, kiene kiokulu kiá, o ia mukua ndenge, nuka tua ki iudikile dingi.” Eie uibhuidisa dingi; “O kuila muene mu ki langa?” O muthu ua mu kulondekesa u tambuijila, “kana, mu kidi kiené kia nangenena né muene ni mvula ni kitembu kia nguzu, ni isuéia iavulu a mesenene kuzanga o kiteka kiki.” Nange ni kudiuana ueji kuibhuidisa, ‘Kiki a ki bhange ni ima iahi?’

Kiene kimoxi ue, o Bibidia ia difu ni kiteka kiki. Diene divulu dio-kulu o madivulu a mukuá ndenge. Mu kidi, kuene madivulu a mukuá okulu. Maji kala kia bhiti ni iteka iokulu, mikanda iavulu iokulu ia zanganha mukonda dia kubhita thembu iavulu. Mu kifika, o ima iene mu zuela o jingijiie, ni lusolo luoso i lunguluka kioso ki ku moneka milongi ia ubhe. O itendelesu iâ ia lungu ni mauhaxi, mu veji dia kukuatekesa sai bhabha i bhekela dingi hadi. Mikanda iavulu iokulu ki iala ni valolo lelu; jimbandu javulu ja texika kiá, ja mukua ja zanganha.

Maji-phe o Bibidia ki i difu ni mikanda íii. O isoneku ia Bibidia ia mateka 35 a jihama kudima, maji né kiki iene ia nangenena. Athu avulu ka kexile mu xila o Bibidia, mesenene ku i buikisa mu túbhia, ka mesenene kuila athu a i tanga. Maji o izuelu ia Bibidia ia nangenena. Mu veji dia kukala iokulu mukonda dia milongi ia ubhe mu izuua ietu, o ima i zuela o Bibidia i bhangesa kudiuana. Tala o kaxa “O Kuila o Milongi ia Bibidia ki Ialé Dingi ni Valolo?”

Nange u dibhuidisa, ‘o kuila o milongi ia Bibidia iala hanji ni valolo mu izuua ietu?’ Phala ku tambuijila dibhuidise: ‘Ibhidi iebhi ia bhonzo iene mu dibhana na-iu o athu mu izuua ietu? Iebhi ia bhonzo dingi?’ Nange eie u banza mu ita, mu ima iene mu bhanga o athu i zanga o ixi, ujibhangânga mba ku kamba kuiuka. Mu kiki dilonge o ijila i longa o Bibidia. Kioso ki uia ni kutanga, dibhuidise, ‘o kuila o ixi ieji kala kididi kiambote se o athu a kaiele o itendelesu íii ia Bibidia?’

KUZOLA O KUTULULUKA

‘A zediua akua kutululuka, a buisa jimvunda, ene a exana an’a Nzambi.’ (Matesu 5:9) “Se mua ki tena, kalenu ku paze ni athu oso; mvunda ki i tunde ko kuenu.”—Loma 12:18.

HENDA NI KULOLOKA

“A zediua akua henda, ene ue Nzambi u a kuatela henda.” (Matesu 5:7) “Mu di lendukile ni kudikuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kala kioso Nzambi * kia mi loloka enu, kiene ue ki mu bhanga jinga.”—Kolose 3:13.

KUKALA KUMOXI SÉ KATOMBO

Nzambi “akua jixi joso mu ngongo ua a bhange ku mbutu ia muthu umoxi, phala kutunga k’ulu dia mundu.” (Ikalakalu 17:26) “Nzambi kene ni kathombo ka athu, maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ikalakalu 10:34, 35.

KULANGA KIAMBOTE O IXI

“Jihova Nzambi anga u kuata o muthu, u mu ta mu díbhia dia Edene phala ku di dima ni ku di tambula konda.” (Dimatekenu 2:15) Nzambi ua-nda ‘kubuikisa ió a zanga oxi.’—Dijingunuinu 11:18.

KUZEMBA O LUIMBI NI MAUFUSA

“Alukenu, mu di lange ku luímbi, mukonda o muenhu ua muthu ki u tundu mu umvuama uê ua kuvula o jimbongo.” (Luka 12:15) “O undumbu-phe, ni ufusa uoso, ni hanji jaiibha, ka j’ivue né ku ji ta ngó maka mu’axaxe kenu, kala kia fuama akua Ngana.”—Efezo 5:3.

KUKALA MUTHU UA KIDI NI MUKALAKADI UA SUÍNA

“Tua mesena kubhanga mu kidi o ima ioso.” (Jihebeleu 13:18) “Uoso ua nhanéne, ka nhane dingi; inda a mateke kukalakala.”—Efezo 4:28.

O VALOLO IA KUKUATEKESA OSO A BHINDAMA

“Suinisenu oso a toloka mixima, kuatekesenu oso a bhuila mu kuxikana, athu a lendukidienu ene oso.” (1 Tesalonika 5:14) ‘Bindumunenu jihukunhu ni atudi a ahatu mu ibhidi iâ.’—Tiiaku 1:27.

O Bibidia ki izuela ngó ihi i tua tokala o kubhanga, maji iene i tu londekesa ue kiebhi ki tua tokala o kubhanga. Se athu avulu a xikinine o milongi íii o kuila ki ieji sosolola o ibhidi ia bhonzo mu ngongo? Mu kidi, o milongi ia Bibidia iala dingi ni valolo iavulu! kiebhi-phe o milongi ia Bibidia i tena ku ku kuatekesa kindala?

O diiala ua beta kota mu unjimu uambe: ‘O unjimu-phe a u tongolola mu ibhangelu.’ (Matesu 11:19) Ku  xikina mu izuelu íii? O unjimu ua kidi a u mona mu mbote ijila mu kukaiela o unjimu iú. Nange eie u banza, se mu kidi o Bibidia i tu kuatekesa, ki ieji ngi bhekela mbote ku muenhu uami? Kiebhi iene i tena ku ngi kuatekesa mu ibhidi iami kindala?’ Tala o kifika kiki.

Fina, * uexile ni ikalakalu iavulu ku muenhu uê ua sangulukile. Maji mu kithangana kimoxi, muene ua bhiti mu ibhidi iavulu. O mon’ê ua kilumba uafu. Ua disenge ni muadi uê. Kitadi kia kexile na-kiu kiabhu. Muene u lembalala: “Eme ki ngi dijidile dingi se me nanhi, mukonda ki ngexile dingi ni mona, diiala, né inzo. Nga divuile sé valolo, sé nguzu, né kidielelu kia lungu ni hádia.”

Fina nuka ua monene o kidi kia izuelu íii : “Izuua ia mivu ietu makuinhi sambuadi, amoxi kia kala ni nguzu, a bhixilu bhu makuinhi nake; hanji-phe kujiza kuâ kua hadi ngó ni mukôndo; ki i nange kubhita, kindala tu tuka.”—Jisálamu 90:10.

Mu ithangana ia bhonzo Fina ua soto o kikuatekesu mu Bibidia. O kikuatekesu kia tambula mu Bibidia kikuatekesu kia dikota. Kala ki tua-nda mona mu milongi ia-nda kaiela, athu avulu, a mono kuila o Bibidia ia a kuatekesa kioso kia kaiela o itendelesu ia sange mu Bibidia, mu ku dibhana ni ibhidi ku muenhu uâ. Ene a divu kuila o Bibidia iedi kala o kiteka  kiambote kia kexile ku muzeu ki tua tange ku dimatekenu dia milongi. Iene ki i difu ni milongi ia madivulu a mukua, kioso ki bhita thembu ki i kala dingi ni valolo. O kuila kiki ki bhita mukonda o Bibidia a isoneka mu ukexilu uengi? O kuila iene iala ni ibanzelu ia Nzambi mba o ibanzelu ia athu?—1 Tesalonika 2:13.

Nange eie uene mu mona kuila o muenhu ki u nange kubhita, uezala ue ni ibhidi. Kioso ki u dibhana ni ibhidi, kuebhi ku u tena kusanga o ku kondama, kikuatekesu ni itendelesu i ku suínisa?

Tua-nda dilonga mbandu jitatu ji londekesa kuila o Bibidia i tena ku ku kuatekesa. O Bibidia i tena ku ku kuatekesa mu:

1. kubhanga ioso phala kulenga o ibhidi.

2. kubatula o maka kioso kia moneka.

3. kudibhana kiambote ni maka ki u tena kua batula.

O milongi ia-nda kaiela-ku ia-nda zuela o maka enhá.