“Kuma o ujitu uambote u tu tambula, ni uhete uauabha, u tunda ku diulu. Ima ioso íii i tuluka kua Nzambi, Tata ua bhanga o mikengeji ia diulu.” (Tiiaku 1:17) O izuelu íii ia Bibidia ilondekesa o ukexilu ua kubhana ua Tata ietu ia diulu, Jihova Nzambi. Maji ku maujitu moso a tu bhana Nzambi, sai-ku ujitu umoxi ua beta dingi kota a mukuá ndenge. Ujitu uebhi? O izuelu ia Jezú i tu sanga mu divulu dia Nzuá 3:16, iamba: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”

O ujitu ua Mona umoxie-lele ua Nzambi​—uene o ujitu ua beta dingi kota u tueji tambula kua Nzambi, mbata mukonda dia ujitu iú u tena ku tu kula ku ubhika ua ituxi, kukuka ni kufua. (Jisálamu 51:5; Nzuá 8:34) Né muene se tu bhanga nguzu, etu ki tu tena kudibhulula ku ubhika iú. Maji mu henda iê ia dikota, Nzambi ua bhange kima phala ku tu bhulula. Mu kubhana Mon’ê umoxielele, Jezú Kristu kala sata ia kukula, Jihova Nzambi ua bhana ku athu a belesela o kidielelu kia kukala ni muenhu ua kalela-ku. Maji o kukula kulombolola ihi? Mukonda diahi kua bhingi ku tu kula? Ni kiebhi ki tu tena kukatula mbote mu kukula?

O kukula, kua difuangana ni kitadi ki futa muthu phala kusumba dingi kima kia jimbila mba phala kubhulula muthu mu kaleia mba ku ubhika. O Bibidia ijimbulula kuila o jitata jetu ja dianga, a a bhange sé kituxi, akexile ni kidielelu kia kukala ni muenhu ua kalekala-ku mu palaizu mu ixi kumoxi ni muiji uâ. (Dimatekenu 1:26-28) Maji ene a texi o kuzediua kuos’oko kioso kia solo kuxibhaka Nzambi—mukonda dia kiki a kituka ati a ituxi. Ihi ia bhiti ni ene? O Bibidia i tambuijila: “Mukuâ ni kia bokona o ituxi mu ngongo ku muthu umoxi, o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.” (Loma 5:12) Mu veji dia kubhitisa muenhu uambote ku muiji uê, Adá ua a bhitisa o kituxi ni kufua.

Ku mbandu ia kukula, o kima kio fute kia tokala kusoka ni kima kia texika. Kioso Adá mu vondadi iê, ua bhukumukina Nzambi, muene ua te kituxi, mukonda dia kiki ua texi o muenhu uê uambote. O Bibidia i tu tangela kuila, o kubhukumuka kua Adá kua bhangesa o muiji uê kukituka abhika a ituxi ni a kufua. Mu kiki, phala kukula o muenhu kua bhingile kubhana muenhu uengi ua iuka, ua kambe kituxi—o muenhu ua Jezú. (Loma 5:19; Efezo 1:7) Kiki kia bhiti ngó mukonda Nzambi ni henda ioso ua solo kukula o mundu ni ku tu bhana o kidielelu kia kukala ni muenhu uambote ua kexile nau Adá ande dia kuta kituxi​—o muenhu ua kalela-ku mu palaizu mu ixi.​—Dijingunuinu 21:3-5.

Mu kumona o mbote ijila mu kukula, sé phata tu tena kuzuela kuila o ujitu ua Nzambi ua kukula, u tu bhana o kidielelu kia kukala ni muenhu ua kalela-ku, uéne o ujitu ua beta dingi o kota ua tu bhana Nzambi. Phala kusakidila o “ujitu iú ua beta o kuiuka” tu mone kiebhi o ujitu iú u tu kuatekesa kubhana maujitu ambote kua akuetu kala ki tua dilongo mu mbandu ia bhiti.

O kukula ku tu kuatekesa kukumbidila o vondadi ietu. Etu tuala ni vondadi ia kunangenena ku muenhu. (Ndongixi 3:11) Né muene mudietu ki tu tena kubandekesa o izuua ia muenhu uetu, maji mukonda dia kukula tu tena kukala ni muenhu ua  kalela-ku. O Bibidia iamba: “Kuma o futu ia ituxi kufua. Maji o ujitu-phe ua Nzambi muenhu ki uabhua, mua Kristu Jezú, Ngana ietu.”​—Loma 6:23.

O kukula ku tu kuatekesa mu ibhindamu ietu. O athu keji tena kudikula, lémbua. O Bibidia ijimbuilula: “O kukula, o muenhu ua muthu, kuate kiavulu, jimbongo né ji tena-bhu, kuma jene ji dianga kúbhua.” (Jisálamu 49:8) Mu kienhiki, tua bhindamene o kikuatekesu kia Nzambi phala ku tu bhulula ku kituxi ni kalunga. Maji ‘mukonda dia Jezú Kristu u tena ku tu bhulula’ Nzambi ua tu bhana o kima ki tua bhindamene.​—Loma 3:23, 24.

Mu kithangana kia tokala. O Bibidia iamba: “Kioso ki tua kexile hanji tu akua ituxi, kiene kia tu fuila Kristu bhu kididi.” (Loma 5:8) Kuma a tu kulu “kioso ki tua kexile hanji tu akua ituxi,” kiki kilondekesa kuila Nzambi ua tu zolo kiavulu né muene tu akua ituxi. Kiki ki tu suinisa ue kukala ni kidielelu kia dikota ku hadia, né muene se kua bhingi kukolokota mu kubhânga ni ibhidi ia ituxi.

Nzambi ua tu kulu mukonda ua tu zolo. O Bibidia i tu tangela se mukonda diahi Nzambi ua tu bhana Mon’ê phala ku tu kula: “Muene mua tu tukuluila Nzambi o henda iê ia tu kuatela, Nzambi kia katula Mon’ê umoxi-èlele, anga u mu tumikisa mungongo, phala etu ni tu mone muenhu kua muène. Muenhumu mua kala o henda, mu kuila: Etu ki etu tua zola Nzambi, maji muène-ku ua tu zola, iú ua tumikisa Mon’ê mu kukala kiluuluilu kia ku tu lolokesa o ituxi ietu.”​—1 Nzuá 4:9, 10

Kiebhi ki u tena kulondekesa kuila ua sakidila o ujitu ua beta dingi o kota? Lembalala kuila o izuelu ia Jezú mu divulu dia Nzuá 3:16 iamba kuila “uoso u mu xikana” ua-nda bhuluka. O Bibidia iamba kuila o kuxikana “ku ijidisa ima i tua dielela.” (Jihebeleu 11:1) Phala kukala ni kudielela kuku, tua tokala kukala ni kuijiia kua kidi. Mukonda dia kiki, kala ni kithangana phala kudilonga ia lungu ni Jihova Nzambi, o Mubhani ua “ujitu iú ua beta o kuiuka,” dilonge ue ihi i ua tokala o kubhanga phala kutambula o muenhu ua kalela-ku, u tua-nda tambula mukonda dia sata ia kukula ia Jezú.

U tena kuijiia o ima ioso íii mu kudilonga o milongi ia Bibidia u tu sanga mu www.ps8318.com. O Jimbangi ja Jihova a-nda sanguluka mu ku kuatekesa. Tua dielela kuila kioso ki ua-ndaia ni kudilonga ni kuivua o jimbote jijila mukonda dia ujitu iú, eie ua-nda zuela kiki: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!”​—Loma 7:25.