Kyoso dikamba dyé kyamudibhana ni uhaxi wa kikote ku muxima, sayi ithangana kitwijiya kyebhi kitutena kumukwatekesa. Maji kyoso kitumukwatekesa kudibhana ni uhaxi wê, tulondekesa kwila twamuzolo. Kyebhi kitutena kubhanga kiki?

“Athu oso alenguluke mu kwívwa.”—TIYAKU 1:19.

Ukexilu umoxi wa kukwatekesa kamba dyetu, o kumwivwa ni muxima woso kyoso kyamesena kuzwela. Kana kubanza kwila, watokala kutambwijila yoso yamuzwela mwene. Londekesa kwila wamumwivwa kyambote ni kwila wamuzolo. Sota kumutendela, kana kumubatula kyoso kyamuzwela, kana we kumufundisa. Lembalala kwila mwene utena kuzwela ima sé kubanza, hádya udyela mukonda dya ima yazwela.—Jobe 6:2, 3.

‘Kolokotesa yó ala ni kikote ku muxima.’—1 TESALONIKA 5:14.

Nange dikamba dyé wala ni hele, mba wadimona kwila kala ni valolo. Nange kiwejiya se ihi iwandazwela, maji utena kumuswinisa ni kumukonda o malamba mu kumutangela kwila wamuzolo kyavulu.

“Dikamba u zola mu thembu joso.”—JISABHU 17:17.

Dibhakule phala kukwatekesa kamba dyé. Mu veji dya kubanza kwila eye wejiya kyá kyebhi ki utena kumukwatekesa, eye utena  kumubhanga ibhwidisu. Se kamba dyé kwamubhonzo ku kutangela o ima yabhindamena, mubhane ndunge ya kubhanga kumoxi o ima, kala o kwenda kumoxi. Mba utena kudibhakula phala kumusumbila o ima mu kitanda, kumukwatekesa kuzelesa o inzo mba kubhanga kima kyengi.—Ngalásya 6:2.

“Londekesenu mwanyu.”—1 TESALONIKA 5:14.

Kana kubanza kwila o dikamba dyé mu ithangana yoso wandamesena kuzwela. Muxikinise kwila kyoso kyandamesena kuzwela, eye wandakala polondo phala kumwivwa. Mukonda dya uhaxi, dikamba dyé utena kuzwela mba kubhanga ima yanda kuluwalesa. Né mwene mwabakana kubhanga kima, kupholo dya kwenda mwene utena kuzwela kwila kamesena dingi. Mba utena ku kuthathamesa. Kyoso ki uya ni kumukwatekesa, kala u mukwa mwanyu.—Jisabhu 18:24.

“Ngibhanga yoso ni yoso phala kamba dyami namone kwila, ngala jinga polondo phala kumwivwa. Kingejiya kyebhi kingitena kubatula o maka mê, maji mu ithangana yoso ngisota kumwivwa. Sayi bhabha wamesena ngó muthu umwivwa ni muxima woso, kiki kimubhangesa kudivwa kyambote.”—Xika, a kamba dyé wala ni uhaxi umubhangesa kudya kyavulu, ni uhaxi wa kuvula o hele ni wa kikote ku muxima.

“Ngala ni kamba dyami, mukwa henda wene mungiswinisa kyavulu. Wangixana kubhata dyê phala kudya kudya kwawabha. Wangikwatela henda yavulu, mukonda dya kiki ngadivu kyambote phala kumutangela kyebhi kingexile mudivwa. Kiki kya ngiswinisa kyavulu!”—Ana, wala ni uhaxi wa kikote ku muxima.

“Kima kyambote kukala ni mwanyu. Kyoso muhatu wami kyabhanga kima kingiluwalesa, ngilembalala kwila mwene wabhange kiki mukonda dya uhaxi wê. Mu kiki, kingimukwatela njinda, maji ngimuzola dingi kyavulu.”—Jakobo, o muhatu wê wala ni uhaxi wa kikote ku muxima.

“Manyi se ihi yejibhita n’eme se muhatu wami keji ngikwatekesa. Kyoso o jihele jingivula, kangijijidika kubhanga o ima kingimesena kubhanga. Kiki kilombolola kwila, sayi bhabha kabhanga o ima yamesena. Ngamuzolo mwene kyavulu mukonda wala ni ukexilu wakubhana, uta we kupholo o ibhindamu yami.”—Maniku, wala ni uhaxi wa kuvula o hele.