KI TU bhindamena ima iavulu phala kukala ku muenhu. Mu kifika, etu ki tu bhindamena kudia, izuatu, ni dibhata. Maji o hanji ietu ia kumesena ima, ki iala ni disukilu. Athu avulu, kejiia kuila o ima ia mesena, mu kidi ka i bhindamena.

2. Ima iebhi ia mesena o athu?

² O ima i mesena o muthu ua tungu mu ixi iezala ni uadiama, ki i difu ni ima i mesena o muthu ua tungu mu ixi ia jimvuama. Saí jixi, o athu a mesena ngó kukala ni mutelembe ua kafuetele, dinhunhu, mba kibhela phala kutunga inzo. Mu jixi ja mukuá, o athu a sota kukala ni izuatu ia te kiavulu, inzo ia dikota, ni makalu a te kalu iavulu. Maji kikale se tua tungu mu ixi ia jimvuama mba ia jingadiama, kikale se tuala ni kitadi kiavulu mba kana, tu tena kumesena ima iavulu, né muene se ki tu i  bhindamena, mba ki tuala ni kitadi kia soko phala ku i sumba.

3. Ihi ilombolola kuzola o jimbongo?

³ Ihi ilombolola kuzola o jimbongo? Kulombolola kuthandanganha dingi ni jimbote, o ukamba uetu ni Nzambi ndenge. O muthu ua zolo o jimbongo, ka sanguluka ni ima iala na-iu, maji u mesena dingi jimbongo. Katé muene ni athu kala ni kitadi kiavulu, mba ka sumbu ima ia te kalu iavulu, a tena kuzola o jimbongo. Nange ene a lémbua ku ta o Utuminu ua Nzambi ku pholo.—Jihebeleu 13:5.

4. Kiebhi Satanaji kia nganala o athu bhu kaxi ka ‘luímbi lua mesu?’

⁴ Satanaji ua mesena ku tu bhangesa kuxikina kuila, tua-nda zediua ngó ku muenhu, se tu kala ni jimbongo javulu. Mu kiki, bhu kaxi ka mundu uê, ni ‘luimbi lua mesu,’ muéne u tu bhangesa kumesena dingi ima iéngi. (1 Nzuá 2:15-17; Dimatekenu 3:6; Jisabhu 27:20) Tuene mu mona ni kuívua jingolokela ji tu suínisa kusumba ima ia ubhe. O kuila eie ua sumbile kiá kima, mukonda ua monene kuila kia iukile, mba mukonda dia ngolokela i ua mono mu mutelembe? Se kiene, nange mu kubhita kithangana, eie ua mono kuila, ku bhindamene o kima kieniókio. Se tu suluka ni kusumba ima iavulu ki tu i bhindamena, tua-nda ta o muenhu uetu mu kiluezu. O ima íii, i tena ku tu landukisa mu sidivisu ia Jihova. Mu kifika, tu tena kukala sé kithangana kia soko phala kutanga o Bibidia, ku pelepalala o iônge, kuia mu iônge, ni ku boka izuua ioso. Lembalala o kitendelesu kia poxolo Nzuá. Muéne uambe: ‘O mundu-phe u bhuila, ni ima iê ioso iene mu kuinda athu.’

5. Ihi i tena kubhita ni athu a kalakala kiavulu, phala kukala ni jimbongo javulu?

⁵ Satanaji ua mesena kuila, tu kalakala ni kusuína kuoso phala kukala ni jimbongo javulu, mu veji dia kubhana o nguzu ietu ioso mu sidivisu ia Jihova. (Matesu 6:24) Maji se tu sota jimbongo javulu, ki tua-nda sanguluka ku muenhu. Nange tua-nda thandanganha kiavulu, mba tu tena kukala ni makongo avulu. Mba nange ki tua-nda dielela dingi kua Jihova ni ku Utuminu uê. (1 Timote 6:9, 10; Dijingunuinu 3:17) Jezú uambe kuila, o ‘luímbi lua ima iéngi,’ lua difu ni minha i fidisa o mbutu ku kula kiambote, ni kubhana ibundu.—Marku 4:14, 18, 19.

6. Disá diebhi di tu tena ku di longa mu phangu ia Mbaluke?

⁶ Xinganeka hanji mu musoso ua Mbaluke, uexile seketa ia polofeta Jelemiia. Kioso Mbaluke kia mateka “kusota maunéne,” Jihova ua mu lembalesa kuila, kua kambele ngó, o mbanza ia Jeluzaleme eji i buika. Maji muéne ua kanene Mbaluke kuila, ueji bhulula o muenhu uê. (Jelemiia 45:1-5) Mbaluke ka tokalele kusota dingi ima iéngi. Jihova keji bhulula o ima ia kexile na-iu o athu, kana. (Jelemiia 20:5) Lelu, etu tuala kiá ku disukilu dia mundu iú ua Satanaji. Mukonda dia kiki, ki kithangana kia kusota ima iavulu. Ki tu tokala kukingila kuila, o ima i tuala na-iu lelu, ia-nda bhuluka ku hadi ia dikota, né muene se o ima íii, iala ni valolo iavulu phala etu.—Jisabhu 11:4; Matesu 24:21, 22; Luka 12:15.

7. Ihi i tua-nda di longa, ni mukonda diahi?

⁷ Kiebhi ki tu tena kusuua o ibhindamu ietu ni ia muiji uetu, ni kulanga kiambote o ukamba uetu ni Nzambi? Kiebhi ki tu tena kudilanga phala ki tu zole o jimbongo? Ihi i tena ku tu kuatekesa, phala ki tu thandanganhe kiavulu ni ima i tua bhindamena? Mu diskursu dia bhangele Jezú ku Mulundu ua Midiva, muéne ua tu bhana itendelesu ia katunda. (Matesu 6:19-21) Tu di longe kiambote o divulu dia Matesu 6:25-34. O milongi íii, ia-nda tu kuatekesa kuxikina ni kidi kioso kuila, tua tokala kudianga kusota o Utuminu ua Nzambi, mu veji dia kusota o jimbongo.—Luka 12:31.

8, 9. (a) Mukonda diahi ki tu tokala kuthandanganha kiavulu ni ima i tu bhindamena? (b) Ihi iejidile Jezú ia lungu ni athu, ni ibhindamu iâ?

⁸ Tanga Matesu 6:25. Jezú uejidile kuila, o maxibulu mê a thandanganhele ni ima ieji kudia, kúnua ni kuzuata. Mukonda dia kiki, mu diskursu dia bhangele ku Mulundu ua Midiva, muéne ua a tangela: “Kana kuvula hele ia muenhu uenu.” Jezú ua mesenene kua kuatekesa kutendela kiambote, se mukonda diahi ka bhingile kuthandanganha ni ima íii. Muéne uejidile kuila, se a thandanganhele kiavulu ni ima ia bhindamene, ene keji bhana valolo ku ima ia beta-o-kota ku muenhu. Jezú ua zolele kiavulu o maxibulu mê. Mukonda dia kiki, mu diskursu didi, muéne ua a dimuna dingi ku kiluezu kiki mu veji jiuana.—Matesu 6:27, 28, 31, 34.

⁹ Maji mukonda diahi Jezú u tu dimuna, phala ki tu thandanganhe ni ima i tua-nda kudia, kúnua, mba kuzuata? O kuila ki tu bhindamena kudia ni izuatu? Mu kidi, tua bhindamena o ima íii! Se ki tuala ni kitadi kia soko phala kusumba o ima íii, nange tu thandanganha. Jezú uejidile o kidi kiki. Muéne uejidile o ima ia bhindamene o athu. Muéne uejidile kuila, “mu izuua isukidila-ku,” o akaiedi’ê eji kala mu jithembu jabhonzo. (2 Timote 3:1) Mu kidi, kuene athu avulu a mu sota salu. O imbamba mu itanda ia bande. Mu jixi javulu, o jingadiama kala ni kudia kua soko, a mukuá kala ni kima kia kúdia. Maji Jezú uejidile kuila, o muenhu ua athu ua beta-o-kota, o kúdia ndenge, ni kuila, o mukutu kota, o izuatu ndenge.

10. Kioso Jezú kia kuatekesa o maxibulu mê kusamba, ihi iambe muéne ia tokalele kuta ku pholo?

¹⁰ Ku dimatekenu, Jezú ua longele o maxibulu mê kuila, mu kusamba, a tokalele kubhinga kua Tata iâ ia diulu, o ima ia bhindamene. Ene a tokalele kusamba kiki: “Kúdia kuetu kua nzala ia kizuua ni kizuua, tu bhane-ku lelu.” (Matesu 6:11) Mu kithangana kia mukuá, muéne ua tangela phala kusamba kiki: “Tu bhane o kúdia kuetu kua kizuua ni kizuua ku tua bhindamena.” (Luka 11:3) Maji kiki ki kilombolola kuila, tua tokala kuxinganeka ngó se kiebhi ki tu tena kusuua o ibhindamu ietu. Mu kidi, Jezú ua tangela o maxibulu mê kuila, o kusamba phala o Utuminu ua Nzambi, kua beta-o-kota, o kubhinga o ima ia bhindamene, ndenge.  (Matesu 6:10; Luka 11:2) Phala kukuatekesa o maxibulu mê kutolola o hele, Jezú ua a lembalesa se kiebhi Jihova kia langa o ibhangelu iê ioso.

11, 12. O ukexilu ua Jihova ua kulanga o jinjila, u tu longa ihi? (Tala o foto ia dianga.)

¹¹ Tanga Matesu 6:26. Tua tokala kutala o “jinjila ji bhita bhulu.” Sumbala o jinjila ja tolo, maji ji dia kiavulu. Mu kidi, se o jinjila ja sokele ni athu, jene jeji dia dingi, o athu ndenge. O jinjila ji dia jimbutu, ibundu ni tu ibamba. Maji jene ki ja bhingi ku kuna, mba kusonzola o kudia kuâ. Jihova u bhana o ima ioso ia bhindamena. (Jisálamu 147:9) Mu kidi, muéne kene mu ta o kudia mu kanu diâ! Jene ja tokala kusota o kudia. Maji saí kudia kua soko phala o jinjila.

¹² Jezú uejidile ni kidi kioso kuila, se Tat’ê u dikila o jinjila, muéne ua-nda dikila ué o ibhindamu ia athu. ^[1] (Tala ku disukilu dia milongi.) (1 Phetele 5:6, 7) Kála o jinjila, etu ki tu tokala kukala tu imonha. Tua tokala kudima phala ni tu kale ni kudia kuetu, mba kukalakala phala kunganhala kitadi kia kusumba o kudia. Jihova u tena kubesoala o nguzu ioso i tu bhanga. Né se ki tuala ni kudia mba kitadi kia soko, muéne u tena kudikila o ibhindamu ietu. Mu kifika, nange o athu a mukuá a tena ku tu bhana ima. Jihova u bhana kididi phala o jinjila kutunga-mu. Muéne ua a bhana o uhete ua kutunga o inzo iâ mba ikalanga. Muéne ua bhange o ima ioso ia bhingi phala kutunga o ikalanga iâ. Jihova u tena ku tu kuatekesa ué kusanga kididi kia fuama phala etu ni muiji uetu.

13. Ihi ilondekesa kuila, etu tuala dingi ni valolo, o jinjila ndenge?

¹³ Kioso Jezú kia zubha kutangela o maxibulu mê kuila, Jihova u disa o jinjila, muéne ua ebhula: “Ni enu-phe ni jinjila, kífua enu ki mu kot’èlele?” (Sokesa ni Luka 12:6, 7.) Kioso Jezú kia zuela o maka iá, nange muéne ua xinganeka mu sata ieji bhana phala kubhulula o athu oso. Mu kidi, Jezú kafu phala kubhulula o jinjila, mba kiama kiéngi. Muéne uafu phala ku tu bhulula, ni tu kale ni muenhu ua kalela-ku.—Matesu 20:28.

14. O muthu u kala ni hele iavulu, ka tena kubhanga ihi?

¹⁴ Tanga Matesu 6:27. Ihi ia mesenene kuzuela Jezú, kioso kiambe kuila, o ku kukala ni hele, ki ku tu bhangesa kubandekesa né ngó kizuua kimoxi ku muenhu uetu? Muéne ua mesenene kuzuela kuila, o kukala ni hele ia ima i tua bhindamena, ki ku tu bhangesa ku nangenena dingi ku muenhu, kana. Mu kidi, se tu thandanganha kiavulu, tu tena kukuata uhaxi mba kufuá.

15, 16. (a) Ihi i tua di longo mu ukexilu ua Jihova kulanga o ithulu ku mukau? (Tala o foto ia dianga.) (b) Ibhuidisu iebhi i tua tokala o kubhanga ni mukonda diahi?

¹⁵ Tanga Matesu 6:28-30. Tu sanguluka kiavulu kioso ki tu ta izuatu ia fuama, benge benge se tua múia mu sidivisu ia kuboka, mu iônge ietu, mba mu iônge ia makota. Maji o kuila tua bhingi ‘kukala ni hele ia ima i tua-nda zuata?’ Jezú ua lembalesa dingi o maxibulu mê, o ukexilu ua Jihova kulanga o ibhangelu iê. Jezú ua zuela ia lungu ni “itulu ku mukáu.” Nange muéne ua zuela ia lungu ni “itulu” ia iuka. O ithulu ki iene mu bhanga  izuatu. Maji iene ia iuka kiavulu. Mukonda dia kiki, Jezú uambe: “Né Solomá ni kijingu kiê kioso, ka kembele kala kia kembe kakitulu kamoxi-ku.”

¹⁶ Xinganeka mu izuelu ia Jezú ia kaiela: “Ngana Nzambi phe kia zuika kiki o iangu ku mukáu . . . kífua ki ki mu kala kot’èlele o ku mi zuika enu, enu mua tolo o kuxikana?” Mu kidi, muéne ua-nda ki bhanga! Maji o maxibulu a Jezú a bhingile dingi kixikanu. (Matesu 8:26; 14:31; 16:8; 17:20) Ene a tokalele kudielela ni kidi kioso kuila, Jihova ueji kua langa. Ihi i tuamba ia lungu n’etu? O kuila tu xikina ni kidi kioso kuila, Jihova ua-nda dikila o ibhindamu ietu?

17. Ihi i tena kuzanga o ukamba uetu ni Jihova?

¹⁷ Tanga Matesu 6:31, 32. Athu avulu kejiia Jihova, a sota ngó kukala ni jimbote ni kitadi kiavulu. Maji se tu bhanga ué kiki, tu tena kuzanga o ukamba uetu ni muéne. Etu tuejiia kuila, Jihova muéne Tat’etu, ni kuila, muéne ua tu zolo. Etu tuala ni kidielelu kia kuila, se tu mu belesela ni ku ta o Utuminu uê ku pholo, muéne ua-nda tu bhana o ima i tua bhindamena, ni ima ia mukuá dingi. Tuejiia ué kuila, o kukala ni ukamba uambote ni Jihova, kuene ku tu bhekela o kuzediua kua kidi ku muenhu. Mukonda dia kiki, tu sanguluka mu kukala ngó ni “kudia,” ni ‘izuatu’ i tua bhindamena.—1 Timote 6:6-8.

18. Ima iahi iejiia Jihova ia lungu n’etu, ni ihi ia-nda bhanga muéne?

¹⁸ Tanga Matesu 6:33. Se tu sota ku ta o Utuminu ua Nzambi ku pholo, Jihova ua-nda tu bhana o ima ioso i tua bhindamena. Jezú ua jimbulula kiambote se mukonda diahi tu tena kudielela mu kikanenu kiki. Muéne uambe: “O Tata ienu ia diulu ua kijiié kuma im’iii mua i bhindamena.” Jihova uejiia o ima i ua bhindamena, ande dia eie kuijiia kuila, ua bhindamena kima. (Filipe 4:19) Muéne uejiia kiambote o kithangana ki tua-nda bhindamena izuatu iéngi. Nzambi uejiia ué se kudia kuahi ku ua bhindamena dingi. Muéne uejiia kuila, eie ni muiji ué, mua bhindamena kididi phala kukala-mu. Jihova ua-nda bhanga ioso phala ku kubhana o ima i ua bhindamena.

19. Mukonda diahi ki tu tokala kukala ni hele ia ima ia-nda bhita ku hádia?

¹⁹ Tanga Matesu 6:34. Jezú ua tangela dingi o maxibulu mê: ‘Ki mu kale ni hele.’ Jihova ua-nda tu bhana o ima i tua bhindamena izuua ioso. Mu kiki, ki tu tokala kukala ni hele ia ima ia-nda bhita ku hádia. Se tu kala ni hele iavulu, tua-nda dielela mu nguzu ietu. Kiki, ki tena kuzanga o ukamba uetu ni Jihova. Mu veji dia kubhanga kiki, tua tokala ku mu dielela ni muxima uoso.—Jisabhu 3:5, 6; Filipe 4:6, 7.

20. (a) Mbambe iebhi i u tena kusuua mu sidivisu ia Jihova? (b) Ihi i u tena o kubhanga phala kusosolola o ukexilu ua muenhu ué?

²⁰ Mu kidi, kima kia iibha kuzanga o nguzu ietu mu kubhanga ikalakalu iavulu phala kunganhala kitadi kiavulu, anga tu kala sé nguzu ia soko phala kubhanga o sidivisu ia Jihova ni muxima uoso. Mu veji dia kiki, tua tokala ku sidivila Jihova ni nguzu ietu ioso.  Mu kifika, o kuila u tena ku di bhakula phala kusidivila mu kilunga kiéngi mua bhingi dingi aboki? O kuila u tena kusidivila kala muboki ua thembu ioso? Se u muboki kiá ua thembu ioso, o kuila ua xinganeka kiá ku di soneka phala kubhanga o Xikola ia Akunji a Utuminu? O kuila u tena kukatula izuua mu semana, phala kukuatekesa ku Betele, mba kibuka kia kulungulula o madivulu? Mba nange u tena kukuatekesa kuiudika o Ididi Ietu ia Ubhezelu mu komputadolo, mba kukatula izuua phala kukuatekesa kibuka kia kutunga o Ididi ia Ubhezelu. Xinganeka mu ima i u tena kubhanga phala kusosolola o ukexilu ua muenhu ué, phala kukala dingi ni kithangana kia kubhanga o ikalakalu ia Utuminu ua Nzambi. O kaxa “ Kiebhi ki u Tena Kusosolola o Ukexilu ua Muenhu Uê,” i bhana jindunge jambote. Samba kua Jihova phala ku kuatekesa kubhanga o kima kia tokala. Mu kusuluka, lungulula o ima i ua tokala kulungulula.

21. Ihi ia-nda tu kuatekesa kuzukama kua Jihova?

 ²¹ Jezú ua tu suínisa ku ta o Utuminu ua Nzambi ku pholo. Se tu bhanga kiki, ki tua-nda thandanganha kiavulu ni ima i tua bhindamena. Tua-nda zukama kua Jihova, mukonda tuejiia kuila, muéne ua-nda tu langa. Tua-nda dilanga, mu veji dia kusumba o ima ioso i tua mesena, mba o ima ioso i moneka, né muene se tu kala ni kitadi phala ku i sumba. Se tu sosolola o ukexilu ua muenhu uetu lelu, tua-nda kolokota mu ufiiele uetu kua Jihova, ni ku nganhala o “muenhu ua kidi” ua tu kanena muéne.—1 Timote 6:19.