Athu avulu amba kwila, a xikina Nzambi. Maji se u a ebhwidisa se Nzambi nanyi, wa-nda kwívwa itambwijilu yavulu. Kwala yá, amba kwila Nzambi mufundixi wa yibha, wa mesena ngó kukaxtikala o athu mukonda dya ibhangelu yâ yayibha. Amukwá amba kwila mwene mukwá henda, mukwá kuloloka, né mwene se ene a bhanga ima yayibha. Amukwá hanji, a xikina kwila Nzambi wala dikanga, mwene ka tu suwu. Mukonda dya ima yavulu yene mu zwela o athu, mundu wavulu amba kwila, sé-ku muthu u tena kwijiya se Nzambi nanyi.

O kwila kima kyambote kwijiya se Nzambi nanyi? Xé, kima kyambote. O kwijiya kyambote Nzambi, ku tena ku ku kwatekesa kumona o valolo ya mwenyu. (Ikalakalu 17:26-28) Kyoso ki uya ni kuzukama dingi kwa Nzambi, mwene wa-nda ku zola dingi ni ku ku kwatekesa. (Tiyaku 4:8) O kya mukwá, o kwijiya kyambote Nzambi, kutena ku tu bhangesa kukala ni mwenyu ki wa kà bhwa.—Nzwá 17:3.

Kyebhi ki u tena kwijiya Nzambi? Xinganeka muthu wa mwijiya kyambote, mu kifika kamba dyé. Kyebhi o ukamba wenu ki wa mateka? Nange eye wa mateka mu kwijiya o dijina dyê, o ifwa yê ni ima ya wabhela ni ya ibhila. Wejiya we o ima ya bhange mwene mba ya mu xinganeka o kubhanga, ni ima ya mukwá dingi. O ima yiyi yene ya ku bhangesa ku mu zukama — kya dyanga eye weza mu ku mwijiya.

Kyene we kimoxi, tu tena kwijiya Nzambi, mu kudilonga o ima yiyi:

• DIJINA DYA NZAMBI NANYI?

• IDIFWA YEBHI YALA NA-YU NZAMBI?

• IHI YA BHANGE NZAMBI?

• IHI YA-NDA BHANGA NZAMBI?

• O KWIJIYA NZAMBI KULOMBOLOLA IHI PHALA EYE?

O kadivulu kaka, a ka bhange phala kutambwijila o ibhwidisu yiyi ya Bibidya. O jimbandu joso ja-nda ku kwatekesa kwijiya se Nzambi nanyi, ni mbote yahi i u tena kukatula mu kukala ni ukamba ni mwene.