1. Kidi kyahi kyasoneka Sobha Solomá mu divulu dya Ndongixi 7:20?

 SOBHA Solomá wasoneka: “Mu ngongo kana-mu muthu wayuka, ubhanga ngó mbote mu mbote anga ukamba kuta kituxi.” (Ndo. 7:20) Kiki kidi mwene! Etu enyoso tu akwa ituxi. (1 Nz. 1:8) Kyenyiki, twabhindamena o muloloki wa Nzambi ni wa akwetu.

2. Kyebhi ki udivwa kyoso kamba dyé dyakazola kyakuloloka?

² Sé phata eye ulembalala hanji o kithangana ki waluwalesa kamba dyé dya kazola. Eye wamesenene kwila o ukamba wenu ukala kyambote, mukonda dya kiki eye wamubhingi muloloki ni muxima woso. Kyebhi ki wadivu kyoso kamba dyé kyakuloloka ni kidi kyoso? O kwila wadivu kyambote? Kyene, eye wasangulukile we!

3. Ihi itwandadilonga mu milongi yiyi?

³ Etu twamesena kwila Jihova ukala Kamba dyetu dyabetakota, maji sayi ithangana, twandazwela mba kubhanga ima imuluwalesa. Mukonda dyahi tutena kudyelela kwila Jihova wamesena mwene kutuloloka? Mu maukexilu ebhi o muloloki wa Jihova kiwadifu ni muloloki wa athu? Mukusukaku, nanyi utena kutambula o muloloki wa Nzambi?

4. Mukonda dyahi tutena kudyelela kwila Jihova wala polondo phala ku tuloloka?

⁴ O Mak’â Nzambi atuxikinisa kwila Jihova wala polondo  phala ku tuloloka. Kyoso Jihova kya moneka kwa Mozé ku Mulundu wa Sinayi, bhukaxi ka anju mwene wambe: “Jihova, Nzambi ya jihenda ni kyadi, wa lenduka, u kokoloka mu kuthathamana, u kôla mu kukwatela henda, ufiyele u vula. Jihenda jê ji nangenena ku jimidi ja miji, hé u loloka o kubhukumuka, ni kuxibhaka, ni ituxi.” (Mak. 34:6, 7) Jihova Nzambi ya henda, walenduka, wala jinga polondo phala kuloloka yó adyela o ituxi yâ.—Neh. 9:17; Jisá. 86:15.

5. Kala kilondekesa Jisálamu 103:13, 14, o kwijiya kwala naku Jihova kwalungu n’etu ku mubhangesa ku tutalatala mu ukexilu webhi?

⁵ Kuma Mubhangi wetu, Jihova wejiya yoso yalungu n’etu. O kwijiya kwila Jihova wejiya yoso yalungu ni athu mu ixi, kutubhangesa kudiwana. (Jisá. 139:15-17) Kyenyiki mwene utena kumona o ituxi yoso itwalundula ku jitata jetu. Mwene wejiya katé mwene o ima yabhiti kumwenyu wetu yatubhangesa kukala ni idifwa itwala nayu. O kwijiya kwala naku Jihova kwalungu n’etu ku mubhangesa ku tutalatala mu ukexilu webhi? Ku mubhangesa ku tutalatala ni henda.—Jisá. 78:39; tanga Jisálamu 103:13, 14.

6. Kyebhi Jihova kyalondekesa kwila wamesena kyavulu kutuloloka?

⁶ Jihova walondekesa kyá kwila wamesena kyavulu kutuloloka. Mwene wejiya kwila mukonda dya ima yabhange o diyala dya dyanga Adá, etwenyoso twalundula o ituxi ni kalunga. (Lom. 5:12) Etu kitwala ni kutena kwa kudibhulula mudyetu. (Jisá. 49:7-9) Maji Nzambi yetu walondekesa henda yu wasokejeka o ima phala kutubhulula. Ihi yabhange? Kala kilondekesa Nzwá 3:16, Jihova watumikisa mon’ê umoxelele phala kutufwila bhukididi. (Mat. 20:28; Lom. 5:19) Jezú watale hadi yu wafu phala kubhulula woso umuxikina. (Jih. 2:9) Kumona Mon’ê wakazola kufwa ni lusebhu, kwabhekela ndolo yavulu kwa Jihova! Sé phata, Jihova keji kwehela Mon’ê kufwa se Mwene kamesenene kutuloloka.

7. Ananyi a atumbula mu Bibidya a aloloka kwa Jihova?

⁷ Mu Bibidya mwala phangu ja athu a aloloka kwa Jihova. (Efe. 4:32) Waxinganeka kwa nanyi? Nange eye waxinganeka Sobha  Manasa. O diyala didi dyayibha dyate ituxi yavulu bhupholo ya Jihova. Mwene wabheza jinzambi ja makutu, waswinisa we akwâ kubhanga kiki. Mwene wajibha o twana twê, mukwa asatela ku jinzambi ja makutu. Katé wabhange kiteka kya nzambi ya makutu yu wakite mu tembulu ikôla ya Jihova. Yalungu ni mwene o Bibidya yamba: “Anga u bhanga mwene kyayibha kyavulu bhu pholo ya Jihova, mbé o ku mu lokalala o njinda yê.” (2 Mal. 33:2-7) Maji kyoso Manasa kyadyela ni muxima woso, Jihova wamuloloka. Nzambi katé mwene wamubhana dingi o ujitu wakutumina kala sobha. (2 Mal. 33:12, 13) Nange waxinganeka we kwa Sobha Davidi, watele ituxi yamakota bhupholo ya Jihova kala ujibhangânga ni kuta phanda. Né kiki, kyoso Davidi kyaxikina kwila watele kituxi yu wadyela ni muxima woso, Jihova wamuloloka we. (2 Sam. 12:9, 10, 13, 14) Kyene, tutena kuxikina kwila Jihova wamesena kyavulu kutuloloka. Kala ki twandadilonga, o muloloki wa Jihova kiwadifu ni muloloki wa athu.

8. Ima yahi ibhangesa Jihova kukala o Mufundixi Wabetakota?

⁸ Jihova mwéne o ‘Mufundixi ufundisa o ngongo yoso.’ (Dim. 18:25) O mufundixi wambote watokala kwijiya kyambote o ijila. Kiki kidi mukonda Jihova mwéne o Mufundixi wetu, wejiya kyambote o ijila mukonda mwene o Mubhani wa ngonge yetu. (Iza. 33:22) Séku muthu watúndu Jihova mukutena kwa kwijiya kyawabha ni kyayibha. Ihi dingi yabhingi phala kukala mufundixi wambote? Ande dya kusola kima, mwene watokala kwijiya o ima yoso yalungu ni maka amubatula mwene. Kyenyiki, Jihova mwéne o Mufundixi Wabetakota mukonda ithangana yoso wejiya o ima yoso yabhiti.

9. Ihi ibhangesa Jihova kuloloka o muthu?

⁹ Mu kufundisa, Jihova kadifu ni athu mu xitu, mukonda mwene mu ithangana yoso ufundisa ni kuyuka, wejiya yoso yabhita. (Dim. 18:20, 21; Jisá. 90:8) Mwene ka kayela o ima yene mu kwivwa ni kumona o athu. Maji utendela kyambote kyebhi o ukexilu wa jitata wa kusasa o twana utena kufunyisa o ibhangelu ni ixinganeku ya muthu. Jihova wejiya we yala ku muxima wa muthu. Mwene wejiya o ixinganeku, o ibanzelu ni jihanji ja athu oso. Séku kima kyadisweka ku mesu ma Jihova. (Jih. 4:13) Kyenyikiphe, Jihova uloloka o muthu mukonda wejiya yoso ibhita.

10. Mukonda dyahi tutena kuzwela kwila, mu ithangana yoso Jihova ufundisa ni kuyuka? (Matendelelu 32:4)

¹⁰ Mu ithangana yoso, Jihova ufundisa ni kuyuka. Mwene kimukwa katungu. Mwene kaloloka o muthu mukonda ngó dya kuwabha o pholo, kukala mvwama, kufumana mba kukala ni mauhete avulu. (1 Sam. 16:7; Tiy. 2:1-4) Séku muthu utena kudyodya Jihova mba ku mujijidika kubhanga kima. (2 Mal. 19:7) Jihova kabatula o maka mukonda dya kusandanganya mba kubhomba kwa muxima. (Mak. 34:7) Sé phata, o unjimu ni kutetuluka kwa Jihova, ku mubhangesa kukala o Mufundixi Wabetakota.—Tanga Matendelelu 32:4.

11. Mu ukexilu webhi o muloloki wa Jihova kiwadifu ni wa athu?

¹¹ O asoneki a Madivulu a Hebalayiku axikinine kwila, o muloloki wa Jihova kiwadifu ni wa athu. Sayi divulu dyambe kwila, sayi ithangana, o asoneki atumbula kizwelu  mu dimi dya Hebalayiku, “kyalungu ngó ni ukexilu wa Nzambi wa kuloloka oso ate o ituxi. O kizwelu kiki, ki kyalungu ni ukexilu wa muthu kuloloka muthu ni mukwa.” Jihova mwéne ngó wala ni kutena kwa kuloloka mu ukexilu watenena, woso wate o kituxi. O muloloki wa Jihova utubhekela mbote yahi?

12-13. (a) Mbote yahi ikatula o muthu kyoso Jihova kyamuloloka? (b) O muloloki wa Jihova unangenena thembu kuxi?

¹² Kyoso kituxikina kuma Jihova watuloloka, tukala ni “kubhanduluka,” tukala we ni kutululuka kwa muxima ni kitongolwelu kyazele kitubhana Jihova. (Ika. 3:19) Kyoso Jihova kyatuloloka, o ukamba wetu ni mwene utenena dingi, wedi kala nuka twatele kituxi.

¹³ Kyoso kyatuloloka, Jihova katubazela dingi mba ku tutatela mukonda dya kituxi ki twatele. (Iza. 43:25; Jel. 31:34) Jihova uta “o ituxi yetu dikanga dyetu.” * (Jisá. 103:12) Kyoso ki tuxinganeka mu ukexilu wa Jihova wa kutuloloka, tumusakidila kyavulu, tumuxila dingi. (Jisá. 130:4) Majiphe, Jihova uloloka ananyi?

14. Katé bhabha, ihi itwadilongo yalungu ni muloloki wa Jihova?

¹⁴ Kala kitwadilongo, Jihova kasolo kuloloka o muthu, mukusokesa se wate kituxi kyadikota mba kyofele. Twadilongo we kwila, Jihova usola kuloloka bhukaxi ka kwijiya kwê kala Mubhangi wetu, Mubhani a ngonge ni Mufundixi. Ihi ixinganeka Jihova ande dya kusola kuloloka o muthu?

15. Kala kilondekesa Luka 12:47, 48, ihi itala Jihova ande dya kusola kuloloka o muthu?

¹⁵ Kima kimoxi kitala Jihova, kyenyiki: Se o muthu wejidile kuma, o kima kyamubhanga kituxi. Jezú wajimbulula kyambote o maka yá, kala kya kisoneka mu divulu dya Luka 12:47, 48. (Tanga.) Se muthu usola ku muxima wê kubhanga kima, kyejiya kwila, kumesu ma Jihova, kituxi, anga ukibhanga mwene mu lwelu, wate kituxi kyadikota. Jihova utena kusola kukamba kuloloka o muthu yú. (Mál. 3:29; Nzw. 9:41) Maji twatokala kuxikina kwila, sayi bhabha  tubhanga ima itwejiya kwila, kituxi. Se kiki kibhita n’etu, o kwila Jihova utena hanji kutuloloka? Xe, utena! Sayi dingi kima kyengi kitala Jihova ande dya kutuloloka.

16. O kudyela ihi? Mukonda dyahi twabhingi kudyela phala Jihova n’a tuloloka?

¹⁶ O kima kyamukwa kitala Jihova, kyenyiki: O kutonginina se o muthu wate o kituxi, wadyela ni muxima woso. O kudyela kulombolola ihi? O kudyela kulombolola “kulungulula o kilunji, o ibanzelu ni kweha o ima ya mubhangesa kuta kituxi.” Kiki kyalungu we ni muthu kudyela ni muxima woso ni kuluwala mukonda dya ima yayibha yabhange mba ima yambote ya kambe o kubhanga. O muthu wadyela uluwala mukonda dya ima yayibha yabhange, uluwala we mukonda dya kuzoza kwê munzumbi, kwa mubhangesa kuta o kituxi. Lembalala kuma, Sobha Manasa ni Sobha Davidi, atele ituxi yamakota. Né kiki, Jihova wa aloloka mukonda adyela ni muxima woso. (1 Jis. 14:8) Kyene mwene, Jihova utuloloka ngó kyoso kyamona kwila twa dyela ni kidi kyoso. Maji o kuluwala ngó mukonda dya kituxi kitwate, kikusoko. Twatokala kubhanga kima. * Kiki kyene o kima kya katatu kitala Jihova ande dya kuloloka muthu.

17. O kubhiluka kulombolola ihi, ni mukonda dyahi kyene kima kyatokala se twamesena kukamba kuta o ituxi itwatele kyá? (Izaya 55:7)

¹⁷ Kima kya mukwá kitala Jihova kyala we valolo yadikota, o kubhiluka. O kubhiluka kulombolola “kulunguluka.” Mu izwelu yamukwá, o muthu watokala kulungulula o ukexilu wê mu kweha o ima yayibha, n’abhange o vondadi ya Jihova. (Tanga Izaya 55:7.) O muthu watokala kulungulula o ixinganeku yê phala ilunge ni ixinganeku ya Jihova. (Lom. 12:2; Efe. 4:23) Ni kuswina kwoso, mwene watokala kukala polondo phala kuxisa o ibhangelu ni ixinganeku yayibha. (Kol. 3:7-10) Mu kidi, o kixikanu kyetu mu sata ya kukúla ya Kidistu kyene kibhangesa Jihova kutuloloka ni kujima o  ituxi yetu. Jihova wanda tuloloka bhukaxi ka sata yiyi, kyoso kyamona kwila twamubhanga yoso itutena phala kulungulula o ukexilu wetu.—1 Nz. 1:7.

18. Ihi itwadilongo yalungu ni muloloki wa Jihova?

¹⁸ Tubhitulule o ima yabetakota itwadilongo. Jihova mwéne o Muthu Wabetakota mu kuloloka. Mukonda dyahi tuzwela kiki? Kya dyanga, ithangana yoso mwene wala polondo phala kutuloloka. Kya kayadi, mwene watwijiya kyambote. Wejiya yoso yalungu netu, mwéne ngó utena kumona se twadyela mwene ni muxima woso mba kana. Kya katatu, kyoso Jihova kyatuloloka, utumona kala nuka twatele kituxi. Kiki kitubhangesa kukala ni kitongolwelu kyazele ni kutuxikina kwa mwene.

19. Mukonda dyahi tutena kusanguluka ku mwenyu, sumbala tu akwa ituxi ni kwila twandasuluka hanji ni kutondala?

¹⁹ Mukonda dya kukala tu akwa ituxi twandasuluka hanji ni kutondala. Maji, o izwelu yala mu divulu Estudo Perspicaz das Escrituras, Volume 1, difwe 210, ituswinisa kyavulu. Yene yamba: “Jihova mukwa henda, wejiya kwila o jiselevende jê akwa ituxi. Kyenyiki, ene kabhingi kukala ni kikote ku muxima ithangana yoso, mu itondalu yene muta mukonda dya kukala akwa ituxi. (Jisá. 103:8-14; 130:3) Ene atena kusanguluka ku mwenyu, se abhanga yoso yatena phala kubelesela o itumu ya Nzambi. (Fil. 4:4-6; 1 Nz. 3:19-22).” O izwelu yiyi ituswinisa kyavulu!

20. Ihi itwandadilonga mu milongi yakayela?

²⁰ Tusanguluka kyavulu mu kwijiya kwila Jihova wala polondo phala kutuloloka kyoso kituta kituxi. Kyebhi kitutena kukayela o phangu ya Jihova ya kuloloka? Mu maukexilu ebhi o muloloki wetu wadifu ni wa Jihova, majiphe mu maukexilu ebhi kiwadifu? Mukonda dyahi kima kyambote kwijiya o maka yá? O milongi yakayela yandatambwijila o ibhwidisu yiyi.