1-3. (a) Kiebhi o Jikidistá kiene mu londekesa kuila, a uabhela kudiongeka kumoxi? (Tala o foto ia dianga.) (b) Ihi i tua-nda di longa mu milongi íii?

KIOSO Corinna kiexile ni 17 dia mivu, a kase manh’â, anga a mu tumikisa dikanga phala kukalakala mu kibende. Mu kubhita thembu, Corinna a mu tumikisa ué dikanga, ku ixi ia Sibéria. Kioso kia bhixila mu ixi ienióio, muéne ua kexile mu kalakala mu díbhia kala mubhika. Saí ithangana, akexile mu mu tumina kukalakala bhu kanga ni mbambi iavulu, maji ka kexile ku mu bhana izuatu ia soko, phala ku di langa ku mbambi. Maji né kiki, Corinna ni phange ia mukuá, a bhange ioso phala kuia mu iônge.

² Corinna uambe: “Tua tundu mu díbhia mu usuku, tuende 25 ia ji kilómetulu phala kubhixila bhu kididi kia kukuata komboio. O komboio kua tundu ku makolombolo. Phala kubhixila, tua bhange ola ji samanu mu njila. Kioso ki tua tuluka mu komboio, tuende dingi dikuinhi dia ji kilómetulu phala kubhixila bhu kididi kia ubhezelu.” Corinna ua  sangulukile kiavulu ni njila ia bhangele. Muéne uambe: “Mu kiônge, tua di longo O Mulangidi, anga tuembi ué o mimbu ia Utuminu. O kiônge kia tu suínisa kiavulu. O kixikanu kietu kia kolo dingi.” O jiphange jiiadi a vutuka ku díbhia mu kubhita izuua itatu. Maji ngana iâ ka mono kuila, ene a tundile.

³ Tundé ukulu, o mundu ua Jihova a uabhela kudiongeka. Mu kifika, o Jikidistá ja dianga a uabhele kudiongeka phala kubheza Jihova, ni ku di longa o maka a lungu ni muéne. (Ikalakalu 2:42) Mu kidi, nange eie u kala ué ni vondadi ia kuia mu iônge. Maji kála ki bhita ni jiphange joso, nange ki ku bhonza kuia mu iônge. Nange u kalakala kiavulu, uala ni ima iavulu phala kubhanga, mba ithangana ioso u divua kuma, ua bhuila. Mu kiki, ihi ia-nda tu kuatekesa kubhanga ioso phala kuia mu iônge? ^[1] (Tala ku disukilu dia milongi.) Kiebhi ki tu tena kusuínisa o maxibulu metu a Bibidia ni athu a mukuá, kuia mu iônge ithangana ioso? O milongi íii, ia-nda jimbulula se mukonda diahi o kuia mu iônge (1) ku tu kuatekesa, (2) ku kuatekesa akuetu, ni (3) kusangulukisa Jihova. ^[2]​—Tala ku disukilu dia milongi.

4. Kiebhi o kudiongeka kumoxi ku tu kuatekesa ku di longa o maka a lungu ni Jihova?

⁴ O iônge i tu longa. O iônge i tu kuatekesa ku di longa o maka a lungu ni Jihova. Mu kifika, ilunga iavulu ia di longo o divulu ‘Kala mu Henda ia Nzambi,’ mu Milongi ia Bibidia mu Kilunga. Kiebhi ki ua divu kioso ki tua di longo o ídifua ia Jihova, ni kioso ki uevu kiebhi ki divua o jiphange jê ia lungu ni muéne? Sé phata, kiki kia kubhangesa kuzola dingi Jihova. Mu iônge, tu di longa dingi ia lungu ni Bibidia, mu kuívua kiambote o madiskursu, o kitangelu kia Bibidia, ni kumona o ifika. (Nehemiia 8:8) Xinganeka o ima iavulu i tu di longa kioso ki tu di pelepalala phala o kitangelu kia Bibidia, ni kioso ki tuívua o itambuijilu ia akuetu mu semana joso.

5. Kiebhi o iônge ia ku kuatekesa kubelesela o itumu ia Bibidia, ni kuboka kiambote?

⁵ O milongi i tu di longa mu iônge, i tu suínisa kukaiela o ima i tu di longa mu Bibidia. (1 Tesalonika 4:9, 10) Mu kifika, o kuila mu iônge, eie ua di longele kiá milongi mu Mulangidi, ia kusuínisa kubhanga dingi mu sidivisu ia Jihova, kusamba kiambote, mba kuloloka o jiphange jê? O iônge i tu bhanga mu kaxi ka semana, i tena ku tu kuatekesa kuboka kiambote o njimbu iambote, ni kukuatekesa akuetu kuijiia o kidi kia Bibidia.​—Matesu 28:19, 20.

6. Kiebhi o iônge, i tu kuatekesa kusuína ni kukala ni nguzu?

⁶ O iônge i tu suínisa. O mundu ua Satanaji u bhanga ioso phala kuzozesa o kixikanu kietu. Uene, u tena ku tu bhangesa kuluuala. Maji o iônge ietu, i tu suínisa. I  tu bhana o nguzu i tua bhindamena phala kukolokota mu sidivisu ia Jihova. (Tanga Ikalakalu 15:30-32.) Ithangana ioso, tu di longa kiebhi kiene mu dikumbidila o ikanenu ia Bibidia. Kiki, ki tena ku tu kuatekesa kudielela dingi kuila, o ikanenu ia mukuá ia Jihova, ia-nda dikumbidila. O jiphange jetu kene mu tu suínisa ngó kioso kia bhanga madiskursu. Ene a tu suínisa ué kioso kia bhana itambuijilu, ni kioso kia ximana Jihova mu kuimba ni muxima uoso. (1 Kolindo 14:26) Kioso ki tu zuela na-u ande dia kumateka o iônge, ni kioso ki bhua o iônge, tu divua kiambote mukonda tuala ni makamba avulu a mesena o mbote ietu.​—1 Kolindo 16:17, 18.

7. Mukonda diahi tua tokala kuia mu iônge?

⁷ Mu iônge, tu tambula o kikuatekesu kia nzumbi ikola ia Nzambi. Jezú uendesa o kilunga bhu kaxi ka nzumbi ikola. Mu kidi, muéne ua zuela kuila, tua tokala kuívua ‘o ima i zuela o nzumbi ikola phala o ilunga.’ (Dijingunuinu 2:7) O nzumbi ikola i tena ku tu kuatekesa kudibhana ni jitendasá, ni kuboka ni kusuína kuoso. Iene i tena ku tu kuatekesa kusola kiambote o ima. Mukonda dia kiki, tua tokala kubhanga ioso phala kuia mu iônge, ni tu tambule o kikuatekesu kia nzumbi ikola ia Nzambi.

8. Kiebhi o kuia mu iônge, kubhana itambuijilu, ni kuimba, ku kuatekesa o jiphange jetu? (Tala o kaxa, “ Kioso ki Bhua o Iônge, Muéne u Divua Kiambote.”)

⁸ Mu iônge, tu tena kulondekesa ku jiphange jetu kuila, tua a zolo. Jiphange javulu mu kilunga, a mu dibhana ni ibhidi ia makota. Poxolo Phaulu ua soneka: “Tu di xinganekienu mudietu.” (Jihebeleu 10:24, 25) Tu tena kulondekesa kuila, tua mesena o mbote ia jiphange jetu, mu ku diongeka nau phala ku di suínisa. Kioso ki tuia mu iônge, tu londekesa ku jiphange jetu kuila, tua mesena kukala nau ni kuzuela nau, ni kuila, tua mesena kuijiia kiebhi kia mu divua. Tu a suínisa ué kioso ki  tu bhana itambuijilu, ni kioso ki tuimba ni muxima uoso.​—Kolose 3:16.

9, 10. (a) Jimbulula kiebhi o izuelu ia Jezú mu divulu dia Nzuá 10:16, i tu kuatekesa kutendela se mukonda diahi kima kiambote kudiongeka ni jiphange. (b) Se tuia mu iônge, kiebhi ki divua o athu kala ni ndandu u sidivila Jihova?

⁹ Kioso ki tuia mu iônge, tu kuatekesa o jiphange mu kilunga ku dizola. (Tanga Nzuá 10:16.) Jezú ua di sokesa ni mubhidi, anga u sokesa o akaiedi’ê ni kilunga kia jimbudi. Xinganeka mu maka iá: Se mbudi jiiadi jala ku mulundu, jiiadi jala mu honga, imoxi iala kuengi, o kuila o jimbudi jitanu jiji, ja tokala mu kilunga kimoxi? Kana. Mukonda o kilunga kia jimbudi ki kala kumoxi, anga ki kaiela o mubhidi. Kiene kimoxi ué, ki tu tokala kusondoloka o jiphange jetu, mu ku fonga mu iônge. Tua tokala ku diongeka, phala kukala “kilunga kimoxi” ni kukaiela ‘mubhidi umoxi.’

¹⁰ O iônge ietu, i tu kuatekesa ku dibunda kumoxi kala ki bhanga o muiji ua di zolo. (Jisálamu 133:1) Avulu mu kilunga, a texi o ukamba uâ ni jindandu jâ, kala o jitata jâ ni jiphange jâ, mukonda dia kusidivila Nzambi. Maji Jezú ua kanena ku a bhana muiji ueji ku a zola ni ku a langa. (Marku 10:29, 30) Se uia mu iônge ithangana ioso, u tena ku dibhanga kala tata, mama, mba phange ia muthu mu kilunga. Kioso ki tu xinganeka mu maka iá, tu mesena kubhanga nguzu phala kuia mu iônge ioso.

11. Kiebhi o kuia mu iônge ku tu kuatekesa kubhanga o ima ia Jihova?

¹¹ Mu iônge, tu bhanga o ima ia Jihova.  Kuma muene o Mubhangi ua ima ioso, tua tokala ku mu sakidila, ku mu bhana kijingu, ni ku mu ximana. (Tanga Dijingunuinu 7:12.) Tu tena kubhanga o ima íii mu iônge, mu kusamba kua Jihova, mu kuimba ni kuzuela ia lungu ni muéne. Semana joso, tuala ni ujitu ua dikota ua kubheza Jihova!

12. Kiebhi ki divua Jihova, kioso ki tu belesela o kitumu kiê kia kuia mu iônge?

¹² Kuma Jihova muene ua tu bhange, tua tokala ku mu belesela. Muéne ua tu tendelesa kukolokota kudiongeka ni jiphange, benge benge kioso ki tuia ni kuzukama ku dizubhilu dia mundu iú. Mu kiki, kioso ki tu belesela o kitumu kiki, Jihova u sanguluka. (1 Nzuá 3:22) Muéne u mona kuila, tua mesena kuia mu iônge. Muéne u bhana valolo ku nguzu i tu bhanga phala kuia mu iônge.—Jihebeleu 6:10.

13, 14. Kiebhi ki tu zukama kua Jihova ni Jezú mu iônge?

¹³ Kioso ki tuia mu iônge, tu londekesa kuila, tua mesena kuzukama kua Jihova ni kua Mon’ê. Mu iônge, tu di longa o Bibidia phala kuijiia o ima i kingila Jihova kokuetu, kala o ima i tua tokala kubhanga ni kiebhi ki tua tokala o kuenda ku muenhu. (Izaia 30:20, 21) Né muene kioso kia tu kunda ku athu ka mu sidivila Jihova, ene a tena kumona kuila, Nzambi ua mu tuendesa. (1 Kolindo 14:23-25) Jihova uendesa o iônge ietu bhu kaxi ka nzumbi ikola. Mu kiki, o milongi i tu di longa mu iônge, i tunda kua muéne. Kioso ki tuia mu iônge, tuívua o ima i zuela Jihova, tu mona kuila, muéne ua tu zolo kiavulu, tu mu zukama dingi.

¹⁴ Jezú, o Mutuameni ua kilunga, uambe: “Bhuoso bhu bhongoloka kiiadi mba kitatu mu dijina diami, eme bhene bhu ngi kala mu’axaxi-kâ.” (Matesu 18:20) O Bibidia i zuela kuila, Jezú ‘u nhunga mu’axaxe’ ka kilunga. (Dijingunuinu 1:20–2:1) Sé phata, Jihova ni Jezú ala kumoxi n’etu. Mu iônge, ene a tu suínisa. Mu diê, kiebhi ki divua Jihova kioso kia mona kuila, ua mu bhanga ioso phala kuzukama kua muéne ni Mon’ê?

15. Kiebhi o kuia mu iônge, kulondekesa kuila, tua mesena kubelesela Nzambi?

¹⁵ Kioso ki tuia mu iônge, tu londekesa kuila, tua mesena kubelesela Jihova. Jihova ka tu jijidika kubhanga o ima kala kia mesena muéne. (Izaia 43:23) Mu kiki, kioso ki tu sola kubelesela o kitumu kiê kia kuia mu iônge, tu londekesa kuila, tua mu zolo, ni kuila, tuejiia kuma, muéne ua tokala ku tu tangela o ima i tua tokala o kubhanga. (Loma 6:17) Mu kifika, ihi i tua tokala o kubhanga, se o xefe ietu u mesena kuila, tu kalakala katé ki tu kamba o nguzu phala kuia mu iônge? Mba nange o nguvulu i tu tangela kuila, se bhu kala muthu u diongeka phala kubheza Jihova,  muéne ua-nda futa kitadi, ua-ndaia mu kaleia, mba a-nda mu bhana kaxtiku ka dikota. Mba nange tu mesena kubhanga kima kiéngi, mu veji dia kuia mu iônge. Mu ithangana íii, tua tokala kusola o kima ki tua mesena. (Ikalakalu 5:29) Maji kioso ki tu sola kubelesela Jihova, muéne u sanguluka.​—Jisabhu 27:11.

16, 17. (a) Kiebhi ki tuejiia kuila, o Jikidistá ja dianga a bhanene valolo mu iônge? (b) Kiebhi kia kexile mu divua Phange George Gangas, ia lungu ni iônge?

¹⁶ Tundé o kithangana kia diongekele mu Pendekoxi ku muvu ua 33, o Jikidistá a suluka ni ku diongeka phala kubheza Jihova mu ithangana ioso. Ene “a kolokota mu ulongelu ua jipoxolo, ni mu ukamba mudiâ.” (Ikalakalu 2:42) Né muene kioso kia a zukutisa ku nguvulu ia Loma ni atuameni a jingeleja ja Jijudé, ene a kolokotele mu kudiongeka. Sumbala kia bhonzele, maji ene a bhangele ioso phala kudiongeka.

¹⁷ Lelu, o jiselevende ja Jihova a bhana ué valolo iavulu mu iônge. Ene a uabhela kuia mu iônge. George Gangas, ua bhangele mbandu ku Kibuka Kia Utuminu mu 22 a mivu ndenge, uambe: “O iônge, iene mu ngi suínisa ni ku ngi sangulukisa kiavulu. Nga uabhela kubhixila selu bhu Kididi Kia Ubhezelu. Se ki bhana, kioso ki bhua o kiônge, ngi laleka ué phala ku tunda. Kioso ki ngi zuela ni mundu ua Nzambi, o muxima uami u sanguluka. Kioso ki ngi kala kumoxi ni ene, ngi divua kuma, ngala bhu bhata kumoxi ni muiji uami mu palaízu mu nzumbi.” Muéne uambe dingi: “O vondadi iami, o kuia mu iônge.”

18. Kiebhi ki u mona o iônge ietu, ni ihi i ua mesena kubhanga?

¹⁸ O kuila kiene ki u mona ué o ubhezelu ua Jihova? Se kiene, bhanga ioso phala ku diongeka ni jiphange jê, né muene mu ithangana ia bhonzo. Londekesa kua Jihova kuila, u divua kála Sobha Davidi, uambe: “Jihova, inzo ié ia ngi uabhela muene.”​—Jisálamu 26:8.