TATA jami, a dijiia ku muvu ua 1919, mu kiônge kia Dikota kia mundu uoso kia Adilongi a Bibidia, kia bhitile ku mbanza ia Cedar Point, Ohio, ku Estados Unidos ia América. Ene a kazala ku muvu uenhó. A ngi vuala ku muvu ua 1922, mu bhita mivu iiadi, o phang’iami Phaulu a mu vuala. O muhatu’ami a mu vuala ku muvu ua 1930. O jitata jê Roy ni Ruth Howell, a kexile Adilongi a Bibidia, o jikuku jê akexile ué Adilongi a Bibidia, ene exile makamba a Phange Charles Taze Russell.

Eme nga disange ni Grace ku muvu ua 1947, etu tua kazala ku mbeji ia Kavua mu kizuua kia 16 kia 1949. Ande dia ku kazala, tua zuela ia lungu ni ihi i tueji bhanga kioso ki tueji kazala. Tua banze o ku suua mbambe ia ku kala tu akunji a thembu ioso, mu veji dia ku kala ni kikalakalu kia ku sasa tuana. Mu kizuua kia 1 kia Kamusasadi ka 1950, tua mateka kumoxi o sidivisu ia thembu ioso. Ku muvu ua 1952, a tu ixana phala ku bhanga o sidivisu ia kafunga ka ilunga.

Etu tua bhingile ku tu kuatekesa phala o ku bhanga o kikalakalu ki tua tambuile kindala. Kioso ki nga kexile mu mona o phangu ia jiphange ejiia kiá o sidivisu íii, eme ué ngexile mu sota muthu phala ku kuatekesa Grace. Nga zukama kua Marvin Holien, dikamba dio kulu dia muiji, ua kexile kiá mu kunda o ilunga mu thembu iavulu, eme nga muibhudisa: “O Grace munzangala hanji, kala luua ni uhete mu sidivisu íii. Eie u tena ku sota muthu phala ku kalakala né mu thembu ia soko?” Muéne uambe, “ngi tena ku mu sotela muthu.” “Edna Winkle muboki uambote, u tena ku mu kuatekesa.” Mu ku bhita kithangana Grace ua zuela ia lungu ni Edna, uixi: “Muéne ua ngi kuatekesa ku divua kiambote kioso ki tuia mu zuela ni athu bhu mabhitu mâ, muéne uejidile ku tambuijia ni uhete kioso o muthu kia dituna i tua mu zuela, iu ua ngi longo o kuivua kiambote o mukua dibhata, phala ngi tena ku tambuijia ni uhete. Kiki kiene muene o kikuatekesu ki nga mesenene!”

 Grace n’eme tua sidivila mu ku kunda ibuka iiadi ia ilunga ku mbonge ia Iowa, ni ku mbanza ia Minnesota ni ku Dakota ia Sulu. Mu suluka, a tu tumikisa ku Nova York mu kibuka kia 1 kia ilunga, kumoxi ni jimbonge ja Brooklyn ni Queens. Etu nuka tua-nda dijimba mu tua bhitile, o ku kamba o kuijiia kiambote o kikalakalu, kioso ki tua matekene. O kibuka kia ilunga, kiexile o dinake dia ilunga ia Brooklyn akexile mu diongeka mu Kididi kia Ubhezelu mu Betele, mua kexile ué phange javulu ja muiji ua Betele, akexile ni uhete ua kikalakalu kiki. Kioso ki nga bhange o diskursu dia dianga dia sidivisu mu kilunga, o Phange Nathan Knorr ua ngambela uixi: “Malcolm, eie ua tu bhana milongi phala o ikalakalu ietu, iene muene i tu mesenene. Kana ku dijimba, mukonda se eie ku tu kuatekesa ni milongi ia henda ni kutululuka, eie kua-nda kala ni valolo mu kilunga. Kolokota mu bhanga o kikalakalu kiki kiambote.” Kioso kiabhu o kiônge, nga ki tangela Grace. Mu suluka tuai mu xilu dietu mu Betele, mukonda tua kexile mu zeka mu Betele. Tua sanguluka kiavulu etu tua mateka o kudila.

Mu ku bhita tu mbeji, tua tambula mukanda phala kuia mu Xikola ia 24 a ibuka ia Ngiliiade, ieji mateka ku mbeji ia Katatu ka 1955. A tu tangela ande dia kuia, kuma o milongi i tua-nda tambula ku Ngiliade, ki phala ku kala akunji phala kuia mu jixi jengi. Maji phala ku tu pelapalala phala ku bhanga kiambote o sidivisu ietu ia ku kunda o ilunga. O ku bhita mu Xikola íii, kima kiambote, a tu longo phangu iambote ia ku ditulula.

Kioso ki tua zubha o Xikola, a tu tumikisa kala tua abhidi a tu funga tua ilunga. O mbandu ia tufunga tua ilunga, iexile o mboge ia Indiana, Michigan, ni Ohio. Nga sasumuka, kioso ki tua tambula o mukanda ua tundu kua Phange Knorr uambe: “Zuelenu i mua banze, ngi tangelienu o kidi. Se enu mua-ndala kuíza mu Betele phala ku kala bhabha. Mba mua-ndala ku kala bhabha mu ithangana iofele phala kuia ixi jengi, ngi tangelienu. Se mua-ndala ku kunda ilunga mba ku kunda tufunga tua ilunga, ngi tangelienu uê.” Etu tua tambuijila kuila ioso ia tu tumina o ku bhanga, tu i bhanga. A tu tangela phala kuzuela ku Betele, i tua banze!

O mivu ioso i nga bhitile mu Betele, o ikalakalu iami ia lungile uê ni ku bhanga madiskursu, ni ku longa mu ilunga ni mu iônge ia makota mu mbanza ia Estados Unidos. Nga longo ué minzangala iavulu, ene uê mu suluka mu ku bhanga ikalakalu ia unene mu kilunga kia Jihova. Nga kalakala ué kala seketa ia Phange Knorr, mu ku sokejeka o sidivisu ia ku boka ku mundu uoso.

Nga uabhele kiavulu o ku kalakala mu sokejeka o sidivisu ia kuboka. Eme nga kexile mu kalakala ni  phange T. J. (Bud Sullivan. Muéne ua kexile ku pholo ia kikalakalu kiki ku mivu iavulu. Maji kua kexile dingi ni phange jengi ja ngi longo. Mu kifika, o Phange Fred Rusk muene a mu solo phala ku ngi longa. Eme nga dilembalala kiambote, kioso ki nga muibhula ni henda, “manu Fred mukonda diahi ua lungulula o mikanda iami?” Muéne uelela, anga u zuela ni kidi kioso mu ku mu dimuna: “Malcolm, se ua mu zuele ngó, u tena ku bandekesa-ko dingi ima iavulu, maji se kima ki ua mu soneka, ku tokala kuzuela kiavulu bhenge-bhenge, se kia mu tunda kuku. Muéne ua ngambela dingi uixi, ximbakata—eie ua mu bhanga ima iambote, mu ku bhita ithangana eie ua-nda i bhanga kiambote dingi.”

O thembu ioso i tua bhitile mu Betele, Grace ua tambula ikalakalu iavulu, kála o ku lumala, ku xixila o maxilu. O salu íii, ua i uabhele kiavulu. Katé lelu, kioso ki tu di sanga ni jiphange exile hanji minzangala kioso ki tua kexile mu sidivila mu Betele, ene a zuela ni Grace ni ngalasa, ene amba kuila, eie ua ngi longo o ku lumala o hâma, ngi ku tangela dingi kuma, o mam’etu kia mu uabhela o ku ngi longa.” Grace ua uabhele ué o ku kalakala mu kididi muexile mu pelepalala o madivulu, ku tumikisa mikanda, ni mu kididi kia ku bhanga o jividiu. O ku bhanga o ikalakalu ioso ioso mu kilunga kia Jihova, tu ki mona kuila dibesá ni ujitu ua dikota. Saí izuua Grace uene mu divua kienhiki.

Mu kaxi ka muvu ua 1970, tua mono kuma o jitata jetu a kukile kiá kiavulu a tokelele ku a tambula konda. Mu kiki, tua bhingile ku bhanga kima kia bhonzele. Etu ki tu mesenene ku tunda mu Betele ni ku xa o makamba metu a sidivisu mu Betele, u tua zolele kiavulu. Né muene kiki, tua mono kuila tua kexile ué ni kikalakalu kia dikota kia ku kuatekesa o jitata jetu. Mu kiki, mu bhita thembu, tuaxi Betele, maji tua dielele kuila kioso kia-nda bhita o ima, tu tena ku vutuka dingi mu Betele.

Phala ku dikila o ibhindamu ietu, nga kexile mu bhanga salu ia ku kuatekesa athu phala ku a langa ku ibhindamu iâ ku muenhu. Eme nga dilembala o ndunge ia ngi bhanene o ngeji, kioso ki nga di longo o ufunu iú: “O kikalakalu kiki, kienda dingi kiambote, se u xinda o athu mu usuku. Kiene ki u sanga o athu mu jinzo já. Mukonda ki kuala dingi ni kima kia beta-o-kota, kála o ku xinda o athu mu usuku.” Eme nga tambuijila: “Eme ngejiia kuila eie ua mu zuela kima ki uejiia, eme ngi xila o kibanzelu kiê.” Maji eme uami ngala ni kikalalu mu nzumbi, nuka nga ki xile se ku ki kumbidila, lelu ué ki nga-nda ki xa. Nga-nda xinda jinga mu mausuku amukuá, maji mu ji tersa ni mu kinda mu usuku, eme nga tokala kuia mu ionge ia beta-o-kota ku muenhu uami. Jihova ua ngi besoala, mukonda ki ngi fongo mu iônge mukonda dia salu.

Kioso mam’etu kiafu, tua kexile bhu mbandu ia hama iê, mu kididi kia ku nhoha mua tula o akulakaji, ku muvu ua 1987. O musaki a mauhaxi uambela Grace: “Grace Allen, ndé ku bhata mu nhoha. Ene oso a kijiia kuila eie uexile bhabha ithangana  ioso mu kuatekesa ukoué. Tululuka o muxima, mukonda eie ua bhange ioso phala ku kuatekesa ukoué.”

Ku mbeji ia Kaiadi ka 1987, tua soneka dingi phala ku vutuka mu Betele o kididi ki tua zolele jinga. Maji mu ku bhita ithangana, Grace a mu mono kuila uala ni uhaxi. A mu pelala, o uhaxi ua bhiti. Mu ithangana ienió, Betele ua tu tambuijila kuila kalenu muene mu kilunga mu muala, phala ku kuatekesa mu sidivisu ia ukunji. Etu tua banze ku suluka mu sidivisu ietu ia ukunji.

Mu ku bhita kithangana kua moneka kibhindamu mu mbonge ia Texa. Tua mono kuila o thembu iexile iambote phala etu ku kala-ko, kiene muene thembu iambote. Ku 25 a mivu u tuala kuku ku Texa, tuala ni jiphange ja mala ni ja ahatu u tua zolo kiavulu ene uâ a tu zolo kiavulu.

Grace uene hanji mu bhânga ni uhaxi uene nau, maji kua moneka dingi uhaxi ua mele. Maji muéne kene mu dikola ia lungu ni uhaxi ué, uene mu kuatekesa muadi uê mu íii ia bhanga. Kioso kia muibhula, se “kiebhi o kikutu kia ku sanguluka mu ukaza ué ni kisangusangu ki uene mu londekesa?” Muéne ua londekesa ima iuana: “Etu tu makamba. Tu di zuelesa mu ithangana ioso mu kizuua. Etu tu bhita ithangana iavulu kumoxi. Ki tu zeka, se tua di zangala mu dietu.” Mu kidi, sai ithangana ki tu dizuelesa kiambote, maji tu di loloka ni ku jimba ia bhiti—o ku bhanga kiki, ki bhanga kiambote ku makaza.

O ima ioso i tua bhiti na-iu, ia tu longo madisá ambote kála iá:

1. Tua di longo o ku dielela kua Jihova, ni ku xikina ioso ia tu tangela. Nuka tua dielele mu kilunji kietu.—Jisa. 3:5, 6; Jel. 17:7.

2. Tua dielele mu Mak’â Nzambi, phala ku tuendesa mu maka oso a moneka. O ku belesela Jihova ni Ijila iê, kuene kua betele-kota phala etu. Ki kuala kima kia dikota ki tena ku tu fidisa—kala muthu mudietu u tena ku sola se ua-nda belesela mba kana—Loma 6:16; Jihe. 4:12.

3. Ki kuala kima kia beta-o-kota ku muenhu kála o ku bhanga dijina diambote ku pholo dia Jihova.—Jisa. 28:20; Ndo. 7:1; Mat. 6:33, 34.

4. Samba phala u kale u kidimakaji mu sidivisu ia Jihova. Bhanga ioio i u tena o ku bhanga, kana ku bhinga kima ku tena ku ki bhanga.—Mat. 22:37; 2 Tim. 4:2.

5. Ejiia ué kuila ki kuala dingi kilunga kiengi kiala ni dibesa dia Jihova.—Nzuá 6:68.

Grace, neme tuala kia mu sidivisu ia Jihova mu 75 a mivu ndenge, maji kala tu makaza tua mu sidivila mu 65 a mivu. Mu kidi tua sidivila kumoxi Jihova mu thembu ioso íii ni ku sanguluka kuavulu. Tua mu samba phala o jiphange jetu joso a fikisa uá ku di bhakula, phala ku mona kiebhi o kisangusangu kijila, kioso kia dielela kua Jihova.