1. Kiônge kiebhi kia bhitile ku mundu ua Nzambi, ki tua tokala o ku xinganeka, ni ibhuidisu iebhi i moneka?

‘FUNDUMUKENU, mu ximane Jihova Nzambi ienu, katé ku hádia ni hádia.’ Ni izuelu íii, Nzambi uexana o mundu ué phala ku diongeka phala kusamba, o musambu iú, uene o musambu ua beta-o-kota mu ku lebha, u tu sanga mu Bibidia. (Neh. 9:4, 5) O kiônge kiki kia bhitile mu Jeluzaleme mu kizuua kia 24, ku mbeji ia Tishri ia Jijudé, phala etu Katutu/Kamusasadi, ku muvu ua 455 A.K.K. Tua-nda di longa kiavulu ia lungu ni kiônge kiki, se tu xinganeka mu ibhuidisu íii: ‘Ihi ia kuatekesa akua Izalaiele ku bhanga o kiônge kieniókio, kiambote? Ihi i tu longa o musambu uo pelepalale kiambote ku Jilevita?’—Jisá. 141:2.

2. Phangu iahi ia tu xíla o akua Izalaiele kia diongekele ni miji iâ, kioso kia zubhile o ku tunga o ilumbu ia Jeluzaleme?

² O Jijudé a zubhile ku tunga o ilumbu ia Jeluzaleme ku mbeji ia bhitile. (Neh. 6:15) O mundu ua Nzambi ua zubha o kikalakalu mu 52 a izuua, anga a suluka mu langa o ibhindamu iâ mu nzumbi. Kienhiki mu kizuua kia dianga ku mbeji ia Tishri, ene kumoxi ni Jilevita ni akuâ, a diongekele bhu kanga ni kanga, phala kuívua Ejidala ku tanga ni dízui dia suína o Kitumu kia Nzambi ni ku kijimbulula. O miji ioso, ni an’a-ndenge oso a diongekele kizuua kia muvimba, “oso a tetulukila o kuívua,” oso emanene, “tundé mu kimene kia tundu o dikumbi katé mu kaxi ka kizuua ku mediia.” Phangu ia dikota phala etu, tuala ni Ididi iambote ia Ubhezelu! O kuila mu ithangana íii, tu landuka mu ku xinganeka mu ima ki iala ni valolo? Se kiene, xinganeka mu phangu ia akua Izalaiele, ene kevu ngó, maji a xinganeka mu maka evuile, anga a mateka ku dila kioso kia mono kuila ka kexile mu belesela o Kitumu kia Nzambi.—Neh. 8:1-9.

3. Itendelesu iahi ia belesele o akua Izalaiele?

 ³ O kithangana kieniokio, ki kiexile kithangana kia ku fisala o ituxi iâ. Kiexile kithangana kia ku sanguluka, ni ku bheza Jihova. (Dia. 29:1) Kienhiki, Nehemiia ua mbela o mundu: ‘Ndenu, mua kà die ima ia nete, ni kúnua ima ia touala, anga akuenu a kambe ku iudika kima mua kà a tumikise ue kia kúdia; mbata kizuua kiki kia dikota kiolumbile kua Nzambi ietu; uila kiki, ki mu disuate, mukonda o ku sanguluka mua Jihova iene o nguzu ienu.’ O mundu ua belesela o itendelesu íii, o kizuua kieniókio kia kituka kizuua kia ‘ku sanguluka kuonene.’—Neh. 8:10-12.

4. Ihi ia bhangele o atuameni a muijii akua Izalaiele, ni ihi ia bhangele o Jilevita mu Fesa íii ia Jibalaka?

⁴ Mu kizuua kia kaiela, o atuameni a miji a diongekele phala ku di longa ni kuijiia se ene akexile mu belesela muene o Kitumu kia Nzambi. Kioso kia kexile mu di longa, ene a mono kuila o mbeji ia kasambuadi ia tokalele ué ku Fesa ia Jibalaka, mu kiki ene a zumbuka mu fesa íii ia mateka mu kizuua kia 15 katé ku kizuua kia 22, ku kizuua kia Tishri, Katutu Kamusasadi, kienhiki ene eji mateka o ku iudika kiá o imbamba. Tundé mu izuua ia Josuue, o fesa íii, ia betele-o-kota, mukonda ia bhekela ‘kusanguluka kuonene.’ O kima kia betele-o-kota mu fesa íii, o kumona o athu oso ku tanga o Kitumu kia Nzambi, ‘kizuua ni kizuua tundé mu kizuua kia dianga katé kia sukidila-ku.’—Neh. 8:13-18.

5. Ihi ia bhangele o mundu ua Nzambi ande dia Jilevita ku a bhingila kua Jihova mu musambu?

⁵ Mu ku bhita izuua iiadi, kiexile o kithangana kia tokalele o akua Izalaiele ku fisala o ituxi iâ, mukonda dia ituxi ia kexile mu ta ku Itumu ia Nzambi. O kizuua kiki, ki kiexile kizuua kia fesa. Maji kiexile kizuua kia mundu ua Nzambi ku jijuala, anga a zuata ji saku, kiki kilombolola kuila, a diela o ituxi iâ mukonda dia ku bhukumukina o Kitumu kia Nzambi. Mu kamene mu ola jitatu, o kitumu kia Nzambi a ki tange dingi. Mu ngoloxi ‘anga a di fisala ni kutukulula o ituxi iâ ni ku bheza Jihova, Nzambi iâ’. O Jilevita akexile mu sambela bhu kididi kia mundu ni misambu ia palepalala kiambote. —(Neh. 9:1-4)

6. Ihi ia kuatekesa o Jilevita ku bhanga misambu iambote, ni phangu iahi ia tu longo?

⁶ Se-ku phata kuila o ku tanga o Kitumu kia Nzambi izuua ioso, kia kuatekesa o Jilevita ku bhanga o musambu uambote. O dikuinhi dia jivelusu ja dianga, ja kexile mu zuela ngó o ikalakalu ia Jihova ni idifuá iê. O mbandu ia sukina ia musambu, ia zuela kiavulu o “nzungule ia jihenda,” ja Nzambi, ja londekesa ué kiambote kuma o akua Izalaiele ka tokelele ku a talatala ni henda. (Neh. 9:19, 27, 28, 31) Phangu iahi i tu katula ku Jilevita? Etu ué tua tokala ku tanga ni  ku xinganeka mu Mak’â Nzambi izuua ioso. Se tu bhanga kiki, tua-nda kuehela Jihova kuzuela n’etu. Kioso ki tua-nda samba kua Jihova, tua-nda kala ni ima iavulu phala ku mu tangela, mu kiki o misambu ietu ia-nda kala misambu iambote.—Jisá. 1:1, 2.

7. Ihi ia tokalele o ku bhanga o Jilevita ande dia ku bhinga kima kua Nzambi, ni ihi i tua di longo mu phangu íii?

⁷ Mu musambu ua bhangele o Jilevita, ka bhingile kima kia bhonzo. O kima kia bhingile, tu ki sanga mu velusu ia 32 iambe: “O kiki-phe, eie o Nzambi ietu, eie u Nzambi Ionéne, Nzambi ia kutena, u kuatesa uoma, u bhaka o kikutu ni ufiiele uoso, hé ujiza ni kubhanga o mbote, kumone kutola o dilamba dioso lelu dia tu kuata etu, ni jisobha jetu, ni ilamba ietu, ni jinganga jetu, ni misesedi, ni jitata jetu, ni kifuxi kié kioso, tunde mu izuua ia jisobha ja Asídia, katé mu kizuua kia lelu.” O Jilevita a tu xíla phangu iambote ia ku sakidila Jihova ni ku mu ximana ande dia ku mu bhinga kima ki tu mesena.

8, 9. (a) Kiebhi kia mateka o Jiilevita o musambu uâ? (b) Ifuxi iebhi iiadi ia diulu ia tumbula o Jilevita?

⁸ O Jilevita exile athu a lenduka. Sumbala o misambu iâ iexile iambote, ene ka kexile mu mona kuila o izuelu iâ ia kexile mu bhana o kiximanu kia tokala kua Jihova. Kienhiki, ene a mateka o ku bhingila o akua Izalaiele oso ni kulenduka kua Jihova, mu musambu: ‘Ndokuenu mu ximane o dijina dia fuma iê, dia tundu o dibesá dioso ni kiximanu.’—Neh. 9:5.

⁹ O musambu u suluka: ‘Eie Jihova, eie muene ubheka ué, eie ua bhange o diulu, ni diulu dia madiulu, ni kifuxi kiê kioso; ni oxi ni ima ioso iala-mu; o misanza ia kalunga ni ima ioso iala-mu; eie Ngana anga enioso u a bhana o muenhu, anga kifuxi kia diulu ki kala mu ku ku bheza.’ (Neh. 9:6) Kidi muene, Jihova Nzambi, muéne ua bhange o ngongo ioso ni ibuka ia jithéthembua. Muéne ué ua bhange ioso mu ixi, o ixi ua i bhange ni uhete ua ku dikila o ima ioso ia muenhu—ua bhangesa ué kuila o ima iala ku muenhu i di vuala mu ídifua ídifua. O musambu ua bhangele o Jilevita, u tumbula ué o ji-anju kala “kifuxi kioso kia diulu.” (1 Jis. 22:19; Jobe 38:4, 7) O ji-anju ja lenduka ja Nzambi, a bhanga o vondadi ia Nzambi mu ku kuatekesa o athu a ituxi, ‘a tokala o ku bhuluka.’ (Jihe. 1:14) Etu lelu ué tua mu sidivila Jihova kala kifuxi. Tua tokala ué ku kaiela o phangu ia ji-anju mu ku sidivila Nzambi ni kulenduka.—1 Kol. 14:33, 40.

10. Ihi i tu longa o ukexilu ua Nzambi ua ku di bhana ni Mbalahamu?

¹⁰ Mu ku suluka, o Jilevita a tange ué ia bhangele Nzambi kua Mbalahamu. Jihova ua lungulula o dijina dia Mbalamu phala ku muixana Mbalahamu, di lombolola ‘Tata ia miji,’ sumbala muéne ua kexile ni 99 a mivu, ka kexile ni mona. (Dim. 17:1-6, 15, 16)  Nzambi ua kanena ué kua Mbalahamu kuila, o mbutu iê ieji lundula o Ixi ia Kanana. O athu a jimbi o kikanenu kiki, maji Jihova ka ki jimbi. Kála kia tangele o Jilevita mu musambu: ‘Eie muène u Jihova, u Nzambi, ua tunguile Mbalamu, anga u mu katula mu ixi ia Ule ku Kaladeia, anga u mu luka dijina dia Mbalahamu. Anga u mu mona ni muxima ua iuka bhu pholo ié, hé u ta-nê kikutu, kuila ua-nda ku mu bhana o ixi ia akua Kanana. . . nda u i bhana o mbutu iê; eie anga u tenesa ki ua zuela kuambe eie Ngana ua iuka.’ (Neh. 9:7, 8) Etu ué tu tena ku kaiela o phangu ia Nzambi ietu ia iuka, se tu kumbidila o ikanenu i tu bhanga.—Mat. 5:37.

11, 12. Jimbulula ihi ilombolola o dijina Jihova, ni kiebhi kiki a kilondekesa ku muiji ua Mbalahamu?

¹¹ O dijina Jihova di lombolola: “Muéne u Bheka Ia-ndala o ku Bheka,” kilombolola kuila ioso i kanena Nzambi i di kumbidila mu kithangana kia soko. Kiki tu ki mona mu ukexilu ua di bhana ni mbutu ia Mbalahamu, kioso kia kexile mu Ijitu. Mu kithangana kieniokio, kia monekene kuila kieji bhonza phala o kifuxi kia Izalaiele ku tunda mu ixi ia Ijitu phala kuia mu Ixi ia a Kanene. Maji Nzambi ua bhangele ioso ia bhingile phala o kikanenu kia bhangele ki di kumbila, mu ku bheka o ima iavulu. Mu ku bhanga kiki, o dijina, Jihova ki di moneka muthu, dia mu fuama.

¹² O musambu mu divulu dia Nehemiia, u zuela ia lungu ni Jihova: ‘Anga u mona dilamba dia jitata jetu mu Ijitu, anga uivua o ku dikolakola kuâ ku mbandu’a Kalunga Ka Kusuka. Anga uidikisa kua Falaó ijimbuete ni madiuanu, ni akua mbèle iê oso, ni akua ixi iê ioso; mukonda eie uejidile kuma ene a bhangele phulu iavulu ku jitata jetu; eie mu ku bhanga kienhiki ua di bhekela dijina dinangenena, kala ki tua mu ki mona lelu’iki. Eie anga u bula o musanza ua kalunga bhu pholo iâ, ene hé a bhita mu kaxi ka kalunga, bhoxi diòkukutu; akexile mu kuiza ni ku akaiela, anga u a bobesa mu dikungu dia zongo, mukua ni ditadi dia sonokena mu mafut’a menha.’ O musambu u suluka mu zuela ima ia bhangele Jihova ku mundu uê: “Anga eie u tolola akua Kanana, a tungile-mu hé u a bhana-nâ bhu maku . . . Anga a tolola o jisanzala ja suína ni ixi ia nete ibhana idima kiambote, anga a bokona jinzo jezala ni jimbote joso ni ixima iòkande kiá, ni mividi, ni midiva, ni mixi ia ibundu ia kúdia, iandumba. Anga a dia ekuta, a neta ni ene, hé a kala mu nanga mu jimbote, mukonda dia kulenduka kué kuavulu.”—Neh. 9:9-11, 24, 25.

13. Kioso akua Izalaiele kia tundu mu Ijitu, ihi ia a bhangela Jihova, maji ene a bhangele ihi?

¹³ Jihova ua bhangele dingi ima ia mukua phala ku kumbidila o kikanenu kiê. Mu kifika, kioso o akua Izalaiele kia tundu mu Ijitu, Jihova ua bhana itumu phala ene ku mu bheza. Ku musambu uâ, o Jilevita ambe: “Anga u tuluka ku mulundu ua Sinai hé u a zuelela tundé ku diulu; anga u a bhana mabatuilu ma iúku, ni itumu ia kidi, ni matendelelu ni ijila iambote.” (Neh. 9:13) Jihova ua solele akua Izalaiele phala ku kala mundu uê, iu a a bhanene o Ixi ia Kanana, kienhiki muéne ua longo ukexilu ua tokalele ku kala nau phala ku ximana o dijina diê, maji ene ka nangenena mu ku belesela o itumu ia Jihova.—Tanga Nehemiia 9:16-18.

14, 15. (a) Kiebhi Jihova kia lendukila akua Izalaiele? (b) Ihi i tu longa o ukexilu ua Jihova ua ku dibhana ni akua Izalaiele?

¹⁴ O musambu ua bhangele o Jilevita, ua tange ituxi iiadi ia tale akua Izalaiele, maji ene a kanene ku belesela o Itumu ia Nzambi, ku Mulundu ua Sinai. Mukonda dia ituxi íii, o akua Izalaiele a tokalele kufuá mu kikangalakata. O musambu u ximana Jihova: ‘Eie mu nzungule ia jihenda jé, ku a ehela  mu kikangalakata . . . hé u kuata ku a disa kienhiki mu makunh’auana a mivu . . . Kana kima kia a kambele; o izuatu iâ ki i kukile, o inama iâ ki i jimbile ni kuenda.’ (Neh. 9:19, 21) Lelu ué Jihova uene mu tu bhana o ima ioso i tua bhindamena, phala tu kolokote ku mu bheza. Etu ki tu mesene ku texi o kixikanu kietu kua Jihova, mu ku kamba ku mu belesela phala ni tu fué kála o nzungule ia akua Izalaiele a fuila mu kikangalakata. Mu kidi o ima íii, “a isoneka phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.”—1 Kol. 10:1-11.

¹⁵ Kima kia iibha, kioso akua Izalaiele kia bokona mu Ixi ia Kanana ene a texi o kixikanu kiá kua Jihova, a mateka ku bheza jinzambi ja akua Kanana, ni ku bhanga undumbu, ni ku satela o tuana ku jinzambi ja makutu. Mukonda dia kiki, Jihova ua ehela ku a tatesa ku ifuxi ia mukuá. Kioso kia diela o kituxi kiá, Jihova mu henda iê ua a bhulula bhu maku a jinguma jê. “Aton’â dingi” o ku bhanga kia iibha bhu pholo iê. (Tanga Nehemiia 9:26-28, 31.) O Jilevita ja fisala: “Eie-phe ua a vungina ni kilendu kié mu mivu iavulu, anga u kuata ku a bazela ni Nzumbi ié, mu ukunji ua jipolofeta jé; maji ene-phe ngua’uâ ku ku bhana mátui má; kia ku bhangesa ku a bhana bhu lukuaku lua ifuxi ia akua jixi.”—Neh. 9:30.

16, 17. (a) Ihi ia bhitile kioso akua Izalaiele kia tona dingi ku bhukumukina Jihova? (b) Ni ihi ia fisala ene?

¹⁶ Né kioso kia tundu ku ubhika mu Babilonha, o akua Izalaiele a mateka ku bhukumukina dingi o itumu ia Jihova. Ihi ia bhiti-phe? O Jilevita a suluka mu ku samba: “O kiki lelu ua tu mono, tuala tu a bhika; kate ni mu ixi i ua bhele o jitata jetu, uixi a die-mu o ibundu iê, tuala-mu-phe tu a bhika. O ibundu ia mu bhakuila o ixi iii, ia ngene ia jisobha, ji ua tuika o ku tu bhikisa, mukonda dia ituxi ietu . . . etu tuala mu kubhondalala kua dikota.”—Neh. 9:36, 37.

¹⁷ O kuila o Jilevita akexile mu zuela kuila Jihova ua kexile mu kaxtikala o mundu uê? Kana! Ene a di fisala: “Maji, eie-phe Ngana, mu ima ioso iala kuiza ku thandu dietu, ualungu’ê mukonda o kuika kuê kuene kua ku bhangesa-kiu, etu o kubhuma kuetu kuoso kuene kua tu bhangesa o ima íii.” (Neh. 9:33) Mu musambu ua bhangele, a kanena kuila tundé o kizuu’okio katé ku hádia, o kifuxi kioso kia Izalaiele kieji belesela o Itumu ia Nzambi. (Tanga Nehemiia 9:38; 10:29.) Mu kusuka-ku, o kikanenu kiâ a ki soneka mu mukanda, uote ji selu, iá a u sinala ku 84 a tuameni a Jijudé.—Nehemiia 10:1-27.

18, 19. (a) Ihi i tua tokala o ku bhanga phala tu bokone ku mundu uobhe ua Nzambi? (b) Ihi i tua tokala o ku bhinga mu musambu, ni mukonda diahi?

¹⁸ Se tua mesena ku bhuluka phala ku bokona ku mundu uobhe ua Nzambi, tua tokala ku xikina ku tu bazela kua Jihova mba ku tu longa. O poxolo Phaulu ua soneka: ‘Mon’ahi tat’â u kamba ku mu longa?’ (Jihe. 12:7) Tu tena kulondekesa kuila tua xikina o itendelesu ia Nzambi ku muenhu uetu, mu ku kolokota mu sidivisu iê, ni kuehela o nzumbi ikôla ku tu longa. Se tu ta kituxi, tu tena ku dielela kuila Jihova ua-nda tu loloka, se tu xikina ni kulenduka kuoso o ku tu bazela.

¹⁹ Ku hádia Jihova ua-nda bhanga ima ia makota, o ima ia bhangela akua Izalaiele kioso kia a bhulula ku ubhika mu Ijitu ndenge. (Ize. 38:23) Kála o mundu ua Nzambi m’ukulu, ua bokonene mu Ixi ia Kanene, o Jikidistá joso a kolokota mu kubheza Nzambi, a-nda tambula o muenhu ua kalela-ku ku mundu uobhe ua Nzambi. (2 Phe. 3:13) Ni kidielelu kiki, ki tu tokala ku fula o kusamba, mu ku bhinga kuila o dijina dia Nzambi a di ximane. O milongi ia kaiela ia-nda zuela musambu u tena ku tu kuatekesaku o ku belesela, phala ku tambula o mabesá a Nzambi lelu ni ku hádia.