1. Poxolo Nzuá ua tu suínisa kubhanga ihi, ni mukonda diahi?

POXOLO NZUÁ ua tu suínisa kuxinganeka mu henda ia dikota, iene mu tu londekesa Jihova. O divulu dia 1 Nzuá 3:1, di zuela: ‘Talese-nu kia kulu o henda ia tu idikisa Tata!’ Kioso ki tu xinganeka mu henda ia Jihova kokuetu, ni mu ukexilu uene mu tu londekesa o henda iê, tu mu zukama dingi, tu mu zola dingi.

2. Mukonda diahi athu avulu ka xikina kuila, Nzambi ua a zolo?

² Maji athu avulu ka xikina kuila, Nzambi ua a zolo. Ene a banza kuila, Nzambi ka suu o athu. Nange ene a banza kuila, Nzambi u bhanga ngó o itumu, ni ku kaxtikala o athu a xibhaka o itumu iê. Mukonda dia milongi ia makutu, saí iâ a banza kuila, Nzambi muthu ua iibha, mukonda dia kiki, o athu ka tena ku mu zola. Amukuá a banza kuila, Nzambi ua zolo o athu oso, katé muéne ni ió a bhanga o ima ia iibha. Maji o milongi ia Bibidia ia ku kuatekesa kuijiia o kidi kia lungu ni  Jihova. Ua di longo kuila, o henda iene o kídifua kia beta kota kia Jihova, ni kuila, muéne ua bhana Mon’ê kala sata, phala ku kubhulula. (Nzuá 3:16; 1 Nzuá 4:8) Maji né kiki, mukonda dia ibhidi i uene mu dibhana na-iu, nange ki bhonza kuxikina kuila, Jihova ua ku zolo kiavulu.

3. Ihi ia-nda tu kuatekesa ku xikina kuila, Jihova ua tu zolo?

³ Phala ku xikina kuila Jihova ua tu zolo, tua tokala ku xikina kuila, Jihova muene ua tu bhange. Muéne ua tu bhana o muenhu. (Tanga Jisálamu 100:3-5.) Mukonda dia kiki, o Bibidia i zuela kuila, o muthu ua dianga ku mu bhanga mu ngongo, ‘mon’a Nzambi.’ (Luka 3:38) Jezú ua tu longo ué kuila, kioso ki tu mesena kuixana Jihova, tua tokala kuzuela: “Tata ietu uene mu diulu.” (Matesu 6:9) Mu kiki, Jihova Tata ietu. Muéne ua tu zolo, kála o tata ua zolo an’ê.

4. (a) Jihova Tata ia kídifua kiahi? (b) Ihi i tua-nda di longa mu milongi íii, ni mu milongi ia-nda kaiela?

⁴ Ki bhonza kiavulu phala o athu amukuá kuxikina kuila, o jitata jâ ja a zolo. Nange kiki ki bhita, mukonda o jitata jâ ja a zukutisa mu undenge uâ. Maji Jihova ka tena kuzukutisa o an’ê. Sé-ku Tata ia di sokela ni muéne. (Jisálamu 27:10) Muéne ua tu zolo kiavulu, mukonda dia kiki, muéne u tu langa mu maukexilu avulu. Kioso ki tuia ni kumona o henda ia Jihova, tua-nda mu zola dingi. (Tiiaku 4:8) Mu milongi íii, tua-nda di longa ima iuana iene mu bhanga Jihova, ilondekesa o henda iê kokuetu. Mu milongi ia-nda kaiela, tua-nda di longa maukexilu atatu u tu tena ku mu kulondekesa o henda ietu.

5. Ihi i bhana Nzambi ku athu oso?

⁵ Kioso kiexile mu mbanza ia Atena, mu ixi ia Ngeléxia, poxolo Phaulu ua mono iteka iavulu. Muéne ua mono ué kuila, o athu akexile mu bheza iteka iavulu, ni kuila, ene a xikinine kuila, o jinzambi jâ jene ja a bhanene o muenhu. Mukonda dia kiki, muéne ua a tangela o ima ia lungu ni ‘Nzambi ia bhange o ixi, ni ima ioso iala-mu.’ Muéne uambe kuila, Nzambi ua bhana ku athu oso, ‘o kukola o muenhu ni kubhuima, ni kumona ima ioso.’ Muéne uambe dingi kuila, “mua muène ngó mu tu muena o kulâia ni kuzamba, ni kukala.” (Ikalakalu 17:24, 25, 28) Jihova ua tu bhana o ima ioso i tua bhindamena, phala kuzediua ni kukala ku muenhu. Xinganeka mu ima ia tu bhana, mukonda dia henda iê kokuetu.

6. Dibhata diahi dia tu bhana Jihova? (Tala o foto ia dianga.)

⁶ Mu kifika, Jihova ua tu tungila dibhata dia iuka. (Jisálamu 115:15, 16) Ku ima ioso ia bhange Jihova mu ngongo, sé-ku kima kia sokela ni ixi. O Jingijiie a tokuesa o ima mu ngongo, ende mu ididi ioso, katé muéne ni bhulu, maji ka sange kididi kiala ni ima ioso ia bhindamena o athu phala kukala ku muenhu, kála o ixi. Jihova ka tu bhana ngó o ima ioso i tua bhindamena phala kukala ku muenhu, maji muéne ua bhange ué o ixi mu ukexilu ua iuka, phala ku tu zediuisa. (Izaia 45:18) Kioso ki tu xinganeka mu inzo ia tu bhana Tata ietu Jihova, tu mona kuila, muéne ua tu zolo kiavulu.—Tanga Jobe 38:4, 7; Jisálamu 8:3-5.

7. Mukonda diahi o ukexilu ua tu bhange Jihova, ulondekesa kuila, muéne ua tu zolo kiavulu?

 ⁷ Jihova ua londekesa ué o henda iê kokuetu, mu ukexilu ua tu bhange. Muéne ua tu bhange ni kutena kua kulondekesa o ídifua iê. (Dimatekenu 1:27) Kiki kilombolola kuila, tu tena kumona o henda iê kokuetu, ni ku mu londekesa ué o henda. Muéne uejiia kuila, o kubhanga kiki, ku tu bhekela o kuzediua kua kidi. Mu kidi, o an’a sanguluka, kioso kia mona kuila, tata iâ ua a zolo. Lembalala kuila, Jezú ua tu longo kuila, se tu zukama kua Tata ietu Jihova, tua-nda zediua ku muenhu. (Matesu 5:3) Muéne u tu bhana “o ima ioso ia kuzediua phala o mbote ietu.” Sé phata, muéne mukua kubhana, ua tu zolo kiavulu.​—1 Timote 6:17; Jisálamu 145:16.

8. Mukonda diahi tua mesena kuila, Jihova u tu longa?

⁸ O jitata ja zolo o an’â, mukonda dia kiki,  ene ka mesena kuila a a nganala. Maji jitata javulu lelu, ka xikina o itumu ia Nzambi ia lungu ni ima iambote, ni ia iibha. Mu kiki, ene ka tena kuendesa kiambote o tuana tuâ. Mukonda dia kukamba ku a endesa kiambote, bhu kala kavuanza kavulu, o muiji ki u tena kuzediua. (Jisabhu 14:12) Maji Jihova uendesa kiambote o an’ê, mukonda muene o “Nzambi ia kidi.” (Jisálamu 31:5) Muéne u sanguluka mu ku tu longa o kidi kia lungu ni muéne. Muéne u tu longa ué o ukexilu ua beta kota ua ku mu bheza, ni ku tu londekesa o ukexilu ua beta kota ua muenhu. (Tanga Jisálamu 43:3.) Ihi iene mu tu longa Jihova, ilondekesa kuila, muéne ua tu zolo kiavulu?

9, 10. (a) Mukonda diahi Jihova u tu tangela o ima ia lungu ni muéne? (b) Ihi iene mu tu longa ia lungu ni ima i kingila muéne ko kuetu?

⁹ Kia dianga, Jihova u tu longa o ima ia lungu ni muéne. Muéne ua mesena kuila, tu muijiia. (Tiiaku 4:8) Mu kiki, muéne u tu tangela o dijina diê. Mu kidi, o dijina dia beta kota ku di tumbula mu Bibidia, o dijina diê. Jihova u tu tangela ué o ídifua Iê. Kioso ki tu tonginina o ibhangelu iê, tu mona kuila muéne uala ni kutena, muéne njimu. (Loma 1:20) Kioso ki tu tanga o Bibidia, tu mona kuila muéne muthu ua iuka, ni kuila, ua tu zolo kiavulu. Kioso ki tuia ni kuijiia o ídifua ia iuka ia Jihova, tu mu zukama dingi.

¹⁰ Jihova u tu tangela ué o vondadi iê. Muéne u tu tangela kuila, tua tokala ku muiji uê. Muéne u tu jimbuluila ué o ima ia kingila kokuetu, phala ku tu kuatekesa kukalakala ku paze ni athu oso a tokala ku muiji uê. O Bibidia ilondekesa kiambote kuila, Nzambi ka tu bhange ni kutena kua kusola o ima iambote, mu íii ia iibha. (Jelemiia 10:23) Jihova uejiia o kima kia beta kota phala etu. Tu tena ngó kukala ku paze ni kuzediua ku muenhu, se tu xikina o ungana uê, ni kubelesela o itumu iê. Jihova uene mu tu longa o kidi kiki, mukonda ua tu zolo.

11. Ihi ia tu kanena Tat’etu?

¹¹ O tata ia henda, u banza o muenhu ua tuana tuê, ku hádia. Muéne u mesena kuila, ene a zediua ku muenhu. Maji lelu, athu avulu a thandanganha ni ima ia-nda bhita ku hádia, a mukuá, a kalakala kiavulu phala ku nganhala ima, sumbala o ima íii ki i nangenena. (Jisálamu 90:10) Tu sakidila kiavulu Tata ietu Jihova, mukonda muéne ka tu longo ngó kiebhi ki tu tena kuzediua ku muenhu, maji ua tu kanena ué ima iambote!

12. Kiebhi Jihova kia kuatekesa Kaini ni Mbaluke?

¹² Kioso kia mono kuila, Kaini ua mesenene kubhanga kima kia iibha, Jihova ua kuatekesa Kaini mu ku mu ibhula: “Eie njinda iahi i uala na-iu? ua sonokena-hi o pholo? Se u bhanga kiambote, manhi ka ku xikina?” (Dimatekenu 4:6, 7) Kaini ua ditunu o  kikuatekesu kia Jihova, mukonda dia kiki, muéne ua tale hadi iavulu. (Dimatekenu 4:11-13) Mu kithangana kia mukuá Jihova ua mono kuila, Mbaluke ua kexile mu bhuila ni kuluuala mukonda dia ukexilu uê ua iibha. Mu kiki, Jihova ua tangela Mbaluke kuila, o ima ia kexile mu banza, ima ia iibha, ni kuila, ua tokalele kulungulula o ibanzelu iê. Mbaluke uevu o kitendelesu kia Jihova, mukonda dia kiki, muéne ua bhuluka.​—Jelemiia 45:2-5.

13. Ihi ia di longo o jiselevende ja fiiele ja Jihova, kioso kia dibhana ni ibhidi?

¹³ Jihova u tuendesa ni ku tu bazela, mukonda muéne ua tu zolo. Muéne ka tu bazela ngó, u tu longa ué. (Jihebeleu 12:6) Mu Bibidia tu sanga-mu phangu ia jiselevende ja fiiele, a a longo kua Jihova phala kukituka athu ambote. Mu kifika, Zuze, ni Mozé, ni Davidi, a di bhanene ni ibhidi iavulu. Jihova ua a kuatekesa ku dibhana ni ibhidi íii. O ima ia di longo mu ithangana ia ibhidi, ia a kuatekesa kubhanga o kikalakalu kia dikota kia a bhana Jihova ku pholo. Kioso ki tu di longa kiebhi Jihova kia kuatekesa ni ku longa o mundu uê, tu divua kuma, Jihova ua tu zolo ni kidi kioso.​—Tanga Jisabhu 3:11, 12.

14. Kiebhi Jihova kia tu londekesa o henda iê, kioso ki tu ta kituxi?

¹⁴ Né muene kioso ki tu ta kituxi, Jihova u kolokota mu ku tu zola. Se tu xikina o kibazelu kiê, anga tu diela o ituxi ietu, muéne ua-nda tu loloka “kiavulu.” (Izaia 55:7) Ihi ilombolola o kuloloka kuku? O izuelu ia Davidi ia lungu ni ukexilu ua Jihova ua kuloloka, ulondekesa kuila, Tata ietu, mukua henda. Muéne uambe: “Muene u ku loloka ituxi ié ioso; hé u saka mahaxi mé moso; u kula muenhu ué mu diela; hé u ku zuika kiadi ni henda kala kitundu. Tunde kuthund’èlele katé ku mazanga, mukuâ ni dikanga dia texe o ikuma ietu.” (Jisálamu 103:3, 4, 12) Jihova u tu bazela mu maukexilu avulu, u tu endesa ué mu maukexilu avulu. O kuila uene mu lungulula o ukexilu uê ni lusolo luoso? Kana ku jimba kuila, Jihova u tu bazela, mukonda muéne ua tu zolo.​—Jisálamu 30:5.

15. Ihi dingi i bhanga Jihova, phala ku tu londekesa o henda?

¹⁵ O tata ia henda, u langa o muiji uê ku iluezu. Kiene ué ki bhanga o Tata ietu ia henda, Jihova. Ia lungu ni Jihova, o mukua jisalamu ua zuela: “Muene u bhaka o mienhu ia jifiiele jê; hé u a kudila bhu maku a kisuéia.” (Jisálamu 97:10) Xinganeka: Phala kulanga o mesu mê ku kiluezu, eie u a potela ni lusolo luoso, mukonda ene ala ni valolo iavulu phala eie. Kiene ué ki bhanga Jihova, muéne u bhanga lusolo phala kulanga o mundu uê, mukonda ene ala ni valolo iavulu ku mesu mê.​—Tanga Zakadiia 2:8.

16, 17. Kiebhi Jihova kiene mu langa o jiselevende jê, tundé ukulu katé lelu?

 ¹⁶ Tundé ukulu, Jihova uene mu langa o mundu uê bhu kaxi ka ji-anju. (Jisálamu 91:11) Saí anju, ia jibha 185.000 a masoladi akua Asídia mu usuku umoxi, anga u bhulula o mundu ua Nzambi. (2 Jisobha 19:35) Ku hama ia dianga, o ji-anju ja bhulula Phetele, ni Phaulu, ni athu amukuá mu kaleia. (Ikalakalu 5:18-20; 12:6-11) Saí ita ia dikota ia bhiti mu ixi ia África. Mu ixi mua kexile maka a dikota, mukonda dia athu akexile mu bhânga, ni kunhana, ni kujijidika o ahatu kuzeka nau, ni kujibha akuâ. Sumbala se-ku phange uafu, avulu a xala sé kima. Maji ene a mono o henda ia Jihova, ejidile kuila, muéne ua kexile mu ku a kuatekesa. Sumbala a dibhanene ni ibhidi iavulu, ene a sangulukile. Kioso kia a kundu ku mujitu ua tundile ku mbonge ia Jimbangi ja Jihova, mu ku a ebhula se akexile kiebhi, ene a tambuijila: “Mu henda ia Jihova, etu enioso tuala kiambote!”

¹⁷ Mu kidi, saí jiselevende ja Jihova, kála o dixibulu Xitevá ni amukuá, afu mukonda dia ufiiele uâ. Saí bhabha, Jihova uehela o ima íii kubhita. Maji muéne u langa o mundu uê uoso, mu ku a dimuna ku ibhetu ia Satanaji. (Efezo 6:10-12) Tu sanga o milongi íii i tu dimuna, mu Bibidia, ni mu madivulu a bhanga o kilunga kia Jihova. Mu kifika, a tu dimuna ku iluezu ia Internet, ia kuzola kiavulu o kitadi, ia kumona o ufusa, ni iluezu ia kumona jifilme, ji joko mba kutanga madivulu a suínisa o usuéia. Sé phata, Jihova ua tu zolo, muéne ua mesena ku tu langa.

18. Kiebhi ki u divua mu kuijiia kuila, Jihova ua kuzolo kiavulu?

¹⁸ Kioso kia xinganeka mu mivu ioso ia sidivile Jihova, Mozé ua xikina ni kidi kioso kuila, Jihova ua mu zolele. Mukonda dia kiki, Mozé uambe: “Tu ikutise mu kimene ni kiadi kié; phala tu sanzuke, tu sanguluke jinge izuua ioso ia muenhu uetu.” (Jisálamu 90:14) O kutendela ni kumona o henda ia Jihova, dibesá dia dikota. Ujitu ua dikota kukala an’a a kazola a Jihova! Tu divua kala poxolo Nzuá uambe: ‘Talese-nu kia kulu o henda ia tu idikisa Tata!’​—1 Nzuá 3:1.