1, 2. Ihi ia bhangele Nzambi m’ukulu, ni ihi i tena ku dibhudisa o athu a kata lelu?

SE UA kumbamene kiá, nange eie ua dibhuidisa: ‘O kuila nga-nda disanza?’ Nange saí muthu ku muiji uê mba dikamba ua kate kiavulu, eie nange u dibhuidisa se muéne ua-nda disanza dingi mba kana. Ki kima kia iibha kumesena sauidi iambote, ni kumesena kuila, o athu u ua zolo a kala ni sauidi iambote. O Bibidia i tu tangela misoso ia athu a katele iá a mesenene kuijiia se eji disanza, mba kana. Mu kifika, kioso o Sobha Azadiia, mon’â Akabe ni Jezabele kia di kuamene, muéne ua mesenene kuijiia se ueji disanza inga kana. Mu kubhita thembu, Benehadade, o Sobha ia Sídia, ua katele. Mu kiki, muéne ua mesenene kuijiia se ueji disanza mba kana.—2 Jisobha 1:2; 8:7, 8.

² O Bibidia i tu tangela ué kuila, m’ukulu, Jihova ua sakele athu mu madiuanu, katé muene ni kufukununa athu bhu kaxi ka ji polofeta jê. (1 Jisobha 17:17-24; 2 Jisobha 4:17-20, 32-35) Lelu, saí athu a kate, nange a dibhuidisa se Nzambi  ua-nda bhanga ué kima phala ku a kuatekesa ku disanza.

3-5. Ihi i tena kubhanga Jihova ni Jezú, ni ibhuidisu iebhi i tua-nda di longa?

³ Jihova uala ni kutena kua kubhanga kima kia lungu ni sauidi ia athu. Muéne ua bhekesa mauhaxi ku athu, kala Falaó mu izuua ia Mbalahamu, ni Midiiana phange ia Mozé. (Dimatekenu 12:17; Dialuilu 12:8-10; 2 Samuuele 24:15) Muéne ua kuamene akua Izalaiele ni ‘mauhaxi, ni mabhebhu,’ mukonda dia kubhukumuka kuâ. (Matendelelu 28:58-61) Mu ithangana ia mukuá, Jihova ua lange o mundu uê ku mauhaxi. (Makatukilu 23:25; Matendelelu 7:15) Saí a mukuá, muéne ua a sakele. Mu kifika, kioso Jobe kia katele, iú ua mesenene kufua, Nzambi ua mu sake.—Jobe 2:7; 3:11-13; 42:10, 16.

⁴ Etu tuejiia ni kidi kioso kuila, Jihova uala ni kutena kua kusaka o athu a mu kata. Jezú uala ué ni kutena kua kusaka o jihaxi. Kioso kia kexile mu ixi, muéne ua sakele athu avulu a katele. Muéne ua sakele akuá dibhute, ni athu a katele o uhaxi ua kikonha, ifofo ni inema. (Tanga Matesu 4:23, 24; Nzuá 9:1-7) O madiuanu iá, a tu kuatekesa kukingila ni hanji ioso o madiuanu a-nda bhanga Jezú ku mundu uobhe. Mu kithangana kieniókio, “ki bhua kà kala mukua-bhata . . . uila: Nga kata.”—Izaia 33:24.

⁵ O kuila se tu kata, tua tokala kukingila kuila, Jihova mba Jezú u tu saka mu madiuanu? Ihi i tua tokala o kubanza kioso ki tu sola ukexilu ua ku tu saka?

6. Ihi i zuela o Bibidia ia lungu ni madiuanu a bhangele o Jikidistá ku hama ia dianga?

⁶ Ku hama ia dianga, Jihova ua undu o Jikidistá ni nzumbi ikola. A mukuá a a bhanene o kutena kua kubhanga madiuanu. (Ikalakalu 3:2-7; 9:36-42) Mu kifika, ene a tenene kusaka o jihaxi ni kuzuela madimi avulu. (1 Kolindo 12:4-11) Maji, mu kubhita thembu, o Jikidistá ka kexile dingi ni kutena kua kubhanga o madiuanu, kala kia ki kanene kiá mu Bibidia. (1 Kolindo 13:8) Mu kiki, lelu ki tu tokala kukingila Nzambi kubhanga madiuanu phala ku tu saka ni kusaka o athu u tua zolo.

7. Mu ukexilu uebhi o divulu dia Jisálamu 41:3, di tu suínisa?

⁷ Maji se ua mu kata, Jihova ua-nda ku kuatekesa ué kála kia kuatekesele o jiselevende jê m’ukulu. Sobha Davidi ua soneka: “U zediua o muthu ió uoso u xinganeka ngadiama; kuma mu kizuua kia dilamba, Jihova u mu kudila ue bhuoso bhua tatela. Jihova u mu kondeka, u mu bhana muenhu.” (Jisálamu 41:1, 2) Mu kidi, Davidi ka kexile mu zuela kuila, o muthu uambote ulondekesa o henda ku jingadiama, keji fua dingi. Mu kiki, kiebhi Jihova kieji kuatekesa o muthu ió uambote? Davidi ua jimbulula: “Jihova u mu bhana nguzu bhoxi dia kukata;  anga u mu balumuna-bhu, na disanze dingi.” (Jisálamu 41:3) Jihova uejiia kiambote o hadi iene mu tala o jiselevende jê, muéne u lembalala o ufiiele uene mu londekesa. Muéne u tena ku a bhana o kusuína ni unjimu. Jihova ua bhange o mukutu ua athu mu ukexilu u tena kudisanza mudiê.

8. Kala ki londekesa o divulu dia Jisálamu 41:4, ihi ia bhingi Davidi kua Jihova kioso muéne kia katele?

⁸ Mu divulu dia Jisálamu 41, Davidi ua zuela ué ia lungu ni kithangana kioso muéne kia kumbamene, anga ua zozele, iú ua kexile ni hele iavulu. Nange mu kithangana kieniókio, o mon’ê Abisalone ua mesenene ku mu katula ku usobha. Davidi ua kumbamene, mu kiki, muéne ka kexile ni nguzu phala kufidisa Abisalone. Muéne uejidile kuila, o muiji uê ua kexile mu bhita mu ibhidi ienioió, mukonda dia kituxi kia tele ni Bate-Seba. (2 Samuuele 12:7-14) Mu kiki, ihi ia bhangele Davidi? Muéne ua sambe kua Nzambi, iú uambe: “Eie u Jihova ngi kuatele henda; ngi sake o muenhu uami kuma nga te ituxi ko kué.” (Jisálamu 41:4) Davidi uejidile kuila, Jihova ua mu lolokele o kituxi kiê, mu kiki, muéne ua dielele kuila, Nzambi ueji mu kuatekesa o ku disanza. Maji o kuila Davidi ua kexile mu kingila kuila, Jihova u mu saka mu madiuanu?

9. (a) Kiebhi Jihova kia kuatekesele o Sobha Ezekiia? (b) Kikuatekesu kiebhi kia kexile mu kingila Davidi kua Jihova?

⁹ Mu kidi, saí ithangana Nzambi ua sake athu. Mu kifika, kioso o Sobha Ezekiia kia katele, Jihova ua mu sake. Ezekiia ua kolokotele dingi ku muenhu mu 15 kia mivu. (2 Jisobha 20:1-6) Maji Davidi ka kingile madiuanu. Mu veji dia kiki, muéne ua mesenene o kikuatekesu kia Nzambi, kala kieji bhanga ni muthu “uoso u xinganeka ngadiama.” Davidi ua kexile ni ukamba uambote ni Jihova, mu kiki, muéne ua bhingile kua Jihova phala ku mu langa ni ku mu kuatekesa mu kukata kuê. Muéne ua bhingile ué kua Nzambi, phala ku disanza, n’a kale ni nguzu mu mukutu. Tu tena ué kubhinga kua Jihova phala ku tu kuatekesa mu ukexilu iú.—Jisálamu 103:3.

10. Ihi ia bhitile ni Tolofimo ni Epafrodito, ni ihi i tu di longa mu phangu íii?

¹⁰ Sumbala ku hama ia dianga poxolo Phaulu ni jipoxolo ja mukuá, akexile ni kutena kua kusaka o jihaxi, maji ko Jikidistá joso akexile mu a saka mu madiuanu. (Tanga Ikalakalu 14:8-10.) O poxolo Phaulu ua sakele tat’â Pubilo ua kexile ni febele ni kabhualala. Phaulu anga “u samba, u mu tula maku mê, hé u mu [saka].” (Ikalakalu 28:8) Maji Phaulu ka sake o athu oso ejidile. Phaulu uendele njila kumoxi ni dikamba diê a mu ixana Tolofimo. (Ikalakalu 20:3-5, 22; 21:29) Kioso Tolofimo kia katele, Phaulu ka mu sake. Mukonda dia kiki, Tolofimo ka tenene dingi kuenda kumoxi ni Phaulu mu ukunji, mu kiki muéne ua xala mu mbanza ia Mileto katé kieji disanza. (2 Timote 4:20) O dikamba dia mukuá dia Phaulu a mu ixanene Epafrodito, ua kumbamene, kua kambele ngó phala kufua. Maji o Bibidia ki i tu tangela se Phaulu ua mu sakele mba kana.—Filipe 2:25-27, 30.

11, 12. Ihi i tuejiia ia lungu ni Luka? Nange kiebhi muéne kia kuatekesele Phaulu?

¹¹ Luka uexile musaki, muéne uendele njila kumoxi ni Phaulu. (Ikalakalu 16:10-12; 20:5, 6; Kolose 4:14) Nange kioso Phaulu ni  jipoxolo ja mukuá kia katele mu ukunji uâ, muéne ua a kuatekesa. (Ngalásia 4:13) Jezú uambe: “Ió a kate” a bhindamena musaki.—Luka 5:31.

¹² Luka kexile ngó mukuá kubhana jindunge ja lungu ni milongo i bhangesa ku disanza. Muéne uexile dotolo, mukonda a mu longele o ufunu ua kusaka o jihaxi. O Bibidia ki i tu tangela se Luka ua di longele kuebhi. Maji o Bibidia i tu tangela kuila, Phaulu ua tumikisa o umenekenu ua Luka, ku jiphange a tungile mu mbanza ia Kolose. Mu kiki, nange Luka ua di longele o ufunu ua dotolo mu mbanza ia Laodiseia. O mbanza íii, ia zukamene ni mbanza ia Kolose. Kioso Luka kia soneka o divulu dia Luka, ni divulu dia Ikalakalu ia Jipoxolo, muéne ua tumbula izuelu iavulu i zuela o akua kusaka mba ji dotolo. Kuma muéne uexile dotolo, muéne ua soneka misoso iavulu ia lungu ni athu a a sakele kua Jezú.

13. Ihi i tua tokala kulembalala kioso ki tua mesena kubhana jindunge, mba kia tu bhana jindunge ja lungu ni sauidi?

¹³ Lelu, sé-ku phange u tena kusaka o athu mu madiuanu. Kuma o jiphange a mesena ku tu kuatekesa, saí a mukuá nange a tu bhana jindunge ja lungu ni sauidi, né muene se ki tu bhingi kikuatekesu. Mu kidi, saí jindunge ji tu kuatekesa. Mu kifika, Phaulu uambe kua Timote phala kúnua tuvinhu. Nange Timote ua nuine menha ka tokalele, iú ua kexile ni uhaxi ua di bhuka. * (Tala ku luiji.) (Tanga 1 Timote 5:23.) Maji tua tokala ku di langa. Nange ku moneka phange u xikinisa kúnua milongo ia kimbundu, mba kúdia kima kioso-kioso, mba kueha o kudia. Muéne nange u tu tangela kuila, kiki kia kuatekesele kiá muthu ku muiji uê, uexile ué ni maka u tuala nau. Maji kiki, ki kilombolola kuila, o kubhanga kiki kua-nda ku kuatekesa ué. Tua tokala kuijiia kuila, né muene se athu avulu a di tunda kiambote mu kunuá o milongo, maji né kiki, o milongo ienioió i tena ku tu bhekela ibhidi iavulu.—Tanga Jisabhu 27:12.

14, 15. (a) Tua tokala ku di langa ni athu a ukexilu uebhi? (b) Ihi i tu tena o ku di longa mu divulu dia Jisabhu 14:15?

¹⁴ Etu enioso tua mesena kukala ni sauidi iambote phala kukatula mbote ku muenhu, ni kusidivila Jihova ni kusuína kuoso. Maji kuma tu akua ituxi, ki tu tena kulenga o mauhaxi. Kioso ki tu kata, nange kukala maukexilu avulu a ku tu saka, mu kiki, etu tuala ni ufolo ua kusola o ukexilu u tua-nda xikina. Saí athu ni matenda a kusaka amba kuila, ala ni milongo iambote ia-nda saka o uhaxi u tuala na-u. Ene a zuela kiki mukonda a mesena ngó ku nganhala kitadi. Ene nange a zuela kuila, saí athu avulu a disanze kiá mukonda dia kutambula o milongo ienioió. Mu kiki, se tua kate, nange tu mesena kufikisa o milongo ioso-ioso i tena ku tu kuatekesa ku disanza mba ku nangenena  ku muenhu. Maji ki tu tokala ku jimba o kitendelesu ki tu sanga mu Mak’â Nzambi: “Kilalu maka oso a zuela kuala athu, muene u a xikina; maji ió ua sunguluka-phe, u zonga kiambote kioso kienda.”—Jisabhu 14:15.

¹⁵ Se tu londekesa o unjimu, ki tua-nda xikina mu ima ioso i tuívua, benge benge se o muthu ua mu tu bhana o milongi ki musaki. Tua tokala ku di ibhuidisa: ‘Muéne ua ngi tangela kuila, o inuinu íii, mafué mba kudia, kua kuatekesa athu avulu ku disanza, maji o kuila kiki, kidi muéne? Sumbala o milongo íii ia kuatekesa akuetu, o kuila ia-nda ngi kuatekesa ué ku disanza? O kuila nga tokala kutokuesa dingi ni kuzuela ni ji dotolo mba asaki ejiia kiambote o maka enhá phala ku ngi kuatekesa kusaka o uhaxi uami?—Matendelelu 17:6.

16. Ihi i tua tokala kuijiia ia lungu ni ukexilu ua ku tu saka?

¹⁶ Mu kusola o ukexilu ua ku tu saka, tua tokala kulondekesa “kilunji,” mba unjimu. (Tito 2:12) Kima kiambote kulondekesa o ídifua íii, benge benge, se o ukexilu ua kusaka u tua-nda sola, kene mu u bhanga kiavulu. O kuila o muthu u tua mu bhingi o kikuatekesu u tena ku tu jimbulula kiambote o ukexilu iú ua kusaka? O kuila o ima ia tu tangela i tu bhekela jiphata? O kuila saí ji dotolo ji xikina kuila, o ukexilu iú u tena kukuatekesa o muthu ku disanza? (Jisabhu 22:29) Nange kuíza muthu u tu tangela kuila, a bhange milongo ia ubhe ku jixi ja makanga  mba ukexilu ua kusaka, maji o ji dotolo ka ijiia luua. Maji o kuila saí ima i tena ku tu bhangesa kuxikina kuila, kuene muene o milongo íii? Saí athu nange a tena ku kubhana milongo iene mu nua, mba milongi ia jiphata. Kiki ki tena kukala kiluezu kia dikota. Lembalala kuila, Nzambi u tu dimuna phala ki tu di te mu maka a lungu ni uanga ni kuzambula.—Matendelelu 18:10-12; Ijila 19:26.

17. Ihi i tua mesena phala o mbote ietu?

¹⁷ O kibuka kia utuminu ku hama ia dianga, kia tumikisine mukanda ku jiphange ja ilunga, phala ku a tangela o ima ia tokalele o kulenga. Ku disukilu dia mukanda o kibuka kia utuminu kia soneka: “Ima ieni’ii se enu muenda ni ku i lenga, mua bhange kiambote Tua mi menekena! Mahezu.” (Ikalakalu 15:29) Mu madimi a mukuá, o izuelu ia sukina i tu sanga mu velusu íii, a i lungulula “kalenu ni sauidi iambote.” O izuelu íii, i tena ué kulombolola, “suinenu.” Mu kidi, etu tua mesena kukala ni “sauidi iambote,” ni kulondekesa o kusuína kuetu.

18, 19. Ihi i tua mu kingila ku mundu uobhe?

¹⁸ Kuma tu akua ituxi, ki tu tena kulenga o mauhaxi. Kioso ki tu kata, ki tuene mu kingila kuila, Jihova u tu saka mu madiuanu. Maji tu tena kudielela kuila, ku hádia Nzambi ua-nda saka o mauhaxi metu moso. Mu divulu dia Dijingunuinu 22:1, 2, poxolo Nzuá ua zuela ia lungu ni “menha ma muenhu,” ni “mixi ia muenhu” ia-nda saka o athu oso. Ki kilombolola o milongo ioso-ioso i tu tena ku nua lelu, mba ku mundu uobhe, phala ku tu saka. Mu veji dia kiki, kilombolola o ima ioso ia-nda bhanga Jihova ni Jezú, phala tu kale ku muenhu katé ku hádia ni hádia.—Izaia 35:5, 6.

¹⁹ Tua mu kingila ni hanji ioso, o kithangana kiki kia uabha. Maji lelu, etu tuejiia kiá ni kidi kioso kuila, Jihova ua tu zolo, ni kuila, muéne uejiia kiambote o jiphaxi jetu. Kála Davidi, tuejiia kuila, né muene se tu kata, Jihova ka-nda tu xisa ubheka. Muéne ua-nda kolokota kulanga o athu oso ene mu londekesa o ufiiele uâ kua muéne.—Jisálamu 41:12.