Di Longe O Mak’â Nzambi

Nzambi Nanhi?

O mbandu íii, ia-nda tambuijila o ibhuidisu nange i ua di bhangele kiá, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. Nzambi nanhi?

O Nzambi ia kidi, muéne o Mubhangi ua ima ioso. O Bibidia i mu ixana “Sobha inangenena,” kiki kilondekesa kuila muéne kene ni dimatekenu, né disukilu. (Dijingunuinu 15:3) Mukonda Nzambi muéne ua tu Bhana o muenhu, etu tua tokala ku mu bheza ngó muéne.—Tanga Dijingunuinu 4:11.

2. Nanhi ua sokela ni Nzambi?

Se-ku muthu ua mono Nzambi, mukonda muéne Nzumbi, kiki kilombolola kuila muéne, ua tundu athu oso ene mu ngongo. (Nzuá 1:18; 4:24) O ídifua ia Nzambi tu i mona mu ima ioso ia bhange. Mu kifika, kioso ki tu mona o ukexilu uoso ua ibundu, ni ithulu, tu mona o henda, ni unjimu ua Nzambi mu ima íii. O ukexilu ua ngongo, ulondekesa kiambote o kutena kua Nzambi.—Tanga Loma 1:20.

Tu tena ku di longa dingi o ídifua ia Nzambi, mu Bibidia. Mu kifika, o Bibidia i zuela o ima ia uabhela Nzambi, ni ima ia mu ibhila, kiebhi muéne kia dibhana ni athu, ni ihi ia bhanga mu ithangana ia mukuá.—Tanga Jisálamu 103:7-10.

3. O kuila Nzambi uala ni dijina?

Jezú uambe: “Tata ietu uene mu diulu, dijina dié a dixile.” (Matesu 6:9) Sumbala Nzambi uala ni majina avulu a ujitu, muéne uala ngó ni dijina dimoxi. Kala dimi di tumbula o dijina didi mu ukexilu uê. Mu Kimbundu amba “Jihova.”—Tanga Jisálamu 83:18.

O dijina dia Nzambi, a di katula mu ji Bibidia, iá a temu majina a ujitu, kála Ngana mba Nzambi. Maji kioso kia soneka o Bibidia, o dijina dia Nzambi dia kexile-mu 7.000 dia ji veji, ndenge. Jezú ua tumbula o dijina dia Nzambi kioso kia kexile mu zuela o Mak’â Nzambi ku athu. Muéne ua kuatekesa athu kuijiia Nzambi.—Tanga Nzuá 17:26.

  4. O kuila Jihova ka tu suu?

Jihova u tu suua mu kuívua o misambu ietu. (Jisálamu 65:2) O kuila o jiphaxi joso jene ku mundu, ji lombolola kuila Nzambi ka tu suu? Saí athu amba kuila, Nzambi uene mu tu talesa hadi phala ku tu polovala, maji kiki, ki kidi kana. O Bibidia izuela: “Mukonda Nzambi kene ku mu diangula ku kima kiaiibha kioso-kioso.”—Jobe 34:10; Tanga Tiiaku 1:13.

Nzambi ua bhange o muthu ni ufolo ua ku sola. Ki tu zolo o ufolo uetu ua ku sola ua ku sidivila Nzambi? (Josuué 24:15) O hadi iene mu dibandekesa dingi mukonda, saí athu a sola ku bhanga ima ia iibha ku akuâ. Jihova u kala ni lamba ku muxima uê mu ku mona o kuiibha kuoso mu ngongo.—Tanga Dimatekenu 6:5, 6.

Kua kambe ngó, Jihova mu kaxi ka Jezú ua-nda zubha o kuiibha kuoso mu ngongo, ni athu oso ene mu bheka o jiphaxi. Mu kiki, saí kima ki bhangesa Jihova kuehela o jiphaxi mu ngongo. O milongi ia mukuá ia-nda londekesa dingi se mukonda diahi Nzambi, uehela o jiphaxi mu ngongo.—Tanga Izaia 11:4.

5. Nzambi ua mesena tu bhanga ihi?

Jihova ua tu bhange ni ukexilu ua ku tena ku mu ijiia, ni ku mu zola. Muéne ua mesena kuila tu di longa o kidi kia lungu ni muéne. (1 Timote 2:4) Se tu di longa o Bibidia, tua-nda kuijiia Nzambi kála Dikamba dietu.—Tanga Jisabhu 2:4, 5.

Mukonda Jihova muéne ua tu bhana o muenhu, tua tokala ku beta o ku mu zola, o ima ia mukuá ndenge. Tu tena kulondekesa kuila Nzambi tua mu zolo mu kuzuela né mu musambu, ni ku bhanga ioso ia mesena muéne. (Jisabhu 15:8) Jihova ua mesena kuila tu londekesa o henda ku athu oso.—Tanga Marku 12:29, 30; 1 Nzuá 5:3.

Phala kuijiia dingi, tanga o kibatulu 1 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?

[Foto ku mbandu 23]

O kuila saí kima ki bhangesa kuila o jiphaxi ji kala mu ngongo?