Zukama Kua Nzambi

Kikuatekesu Phala ió a Toloka o Mixima

PHANGE ia muhatu ua bhânge ni muxima ua mu suku ku muenhu uê, uambe: ‘Jihova nuka dingi ueji ngi zola.’ Muéne ua banzele kuila Jihova ua mu kalele dikanga. O kuila Jihova uala muene dikanga dia abhezi iê a toloka o mixima? O kitambuijilu kia kibhuidisu kiki, tu ki sanga mu izuelu ia mukua jisalamu, Davidi, mu divulu dia Jisálamu 34:18.

Davidi uejidile kiambote kiebhi kia kala o selevende ia fiiele ia Jihova ua toloka o muxima. Kioso Davidi kiexile munzangala, ua lengele mukonda dia difuba dia sobha Saúlu, ua mesenene ku mu jibha. Davidi ua sota kididi phala ku di sueka, muéne ua banzele kuila Saúlu keji tena ku mu sanga—mu mbanza ia jinguma jâ mu Ngata, ku akua Fidíxia. Kioso kia mu tungununa, Davidi ua di bhangesa kuila ua salukile. Davidi ua dielele kuila Nzambi ueji mu bhulula, mu ku xinganeka mu ima ioso ia bhiti, ia mu bhangesa ku soneka o divulu dia Jisálamu 34.

O kuila Davidi ua xikinine kuila Nzambi u kala dikanga dia ió uala ni kikoto, u divua kála kale ni valolo, mba Nzambi ka tena ku mu zukama? Davidi ua soneka: “Jihova ua zukama kua iá a toloka mixima, u bhulula oso a talamana mu nzumbi.” (Velusu 18) Tua-nda di longa se kiebhi o izuelu íii i kuatekesa, i bhana ué kidielelu.

“Jihova ua zukama.” Saí divulu diambe kuila, o izuelu íii “ilondekesa kuila Ngana ua mu mona ioso, uala polondo phala ku kuatekesa ni ku bhulula o mundu uê.” Kima kiambote kuijiia kuila Jihova u langa o mundu uê. Muéne uejiia o ibhidi ioso iene mu bhita na-iu athu mu ‘izuua íii isukidila-ku,’ uejiia ué o ibanzelu ia mixima iâ.—2 Timote 3:1; Ikalakalu 17:27.

“Kua iá a toloka mixima.” Saí madiembu, o kizuelu ‘ku toloka muxima’ kulombolola muthu u zola, maji muene ka mu zolo kua mukuá. Saí diiala ua di longo kiavulu uambe: O izuelu ia mukua jisalamu ilombolola “ku kala kikoto, mba ku toloka o muxima mu ukexilu uoso.” Kienhiki né muene o jiselevende ja fiiele ja Nzambi, saí ithangana a bhita mu ibhidi iavulu ia bhangesa ku toloka o mixima.

“Oso a talamana mu nzumbi.” O athu ala ni kikoto kiavulu, a di mona kuila kala ni valolo, kala dingi ni kidielelu. Saí divulu dia alombolodi a Bibidia, diambe kuila, o kizuelu kiki kilombolola ué “oso kene ni ukexilu uambote.”

Kiebhi Jihova kia kuatekesa o athu “a toloka mixima,” a “talamana mu nzumbi?” O kuila muéne u kala dikanga dia athu enhá, mu ku banza kuila ene ka tokala dingi ku a zola ni ku a xikina? Kana! Kála o tata ia henda u kuata, u kuatekesa o mona uala ni kikoto, Jihova ua zukamena o abhezi’ê a bhinga o kikuatekesu kiê. Muéne ua mesena ku a kuatekesa, ni ku tululukisa o mixima iâ ia toloka, ni ku a talamanesa mu nzumbi. Muéne u tena ku a bhana o unjimu, ni nguzu ia bhindamena phala ku dibhana kiambote ni ibhidi ioso ia bhita na-iu.—2 Kolindo 4:7; Tiiaku 1:5.

Mukonda diahi ki u di longe se kiebhi ki u tena o ku zukama kua Jihova? O Nzambi ia henda, u tu kanena: “Nga tunga . . . ni uoso mukua muxima ua toloka, ua batama, phala kuphaphumuna muxima ua oso a batama, ni kuphaphumuna muxima ua oso a toloka.”—Isaia 57:15.