Kuatekesa o Maiala ku Kula mu Nzumbi
Kuatekesa o Maiala ku Kula mu Nzumbi
‘Tundé lelu katé ku pholo ua-ndu tamba athu.’—LUK. 5:10.
1, 2. (a) Ihi ia bhange o maiala kioso kiévu o njimbu iambote, ia boko Jezú? (b) Ihi i tua-nda di longa mu milongi íii?
KIOSO kia zubha o ku boka mu Ngalileia ioso, Jezú ni maxibulu mê, a sambela mu ulungu a kenga kididi phala ku nhoha. Maji o mundu uendele bhoxi mu ku a kaiela. O athu enhá a sokele ‘midi jitanu ja maiala; o ahatu ni ana-ndenge engi.’ (Mat. 14:21) Mu kithangana kia mukuá o athu a kenga Jezú, a mesenene ku a saka, ni kuívua o milongi iê. Ene a tena ‘midi jiuana ja maiala; ahatu ni ana-ndenge engi.’ (Mat. 15:38) Bhu axaxi ka athu kuexile ué maiala avulu akexile mu sota Jezú, a mesenene ku di longa o mak’â Nzambi. Jezú ua mesenene kuila athu avulu a xikina o milongi iê, kioso kia bhange o madiuanu a ku tamba o jimbiji, muéne uambe ku maxibulu mê: ‘Tundé lelu katé ku pholo, mua-ndu tamba athu.’ (Luk. 5:10) O maxibulu mê, a tokalele kuboka ku mundu uoso, phala ku ‘sanga’ athu avulu, kála o ku ta o uanda mu kalunga.
2 Lelu kuene ué maiala avulu a mesena kuívua o njimbu ia Bibidia i tuene mu boka. (Mat. 5:3) Maji saí maxibulu a maiala, a kamba o ku kula mu nzumbi. Kiebhi ki tu tena ku a kuatekesa? Sumbala Jezú ka bhana milongi phala ku longa o maiala, muéne ua tumbula o maka enhá a bhindamene o maiala mu izuua iê. Mu ku xinganeka mu phangu iê, tua-nda di longa se kiebhi ki tu tena ku kuatekesa o maxibulu a maiala ku dibhana ni maka ene mu thandanganhesa o maiala lelu: (1) o ibhindamu ia muenhu, (2) uôma ua ima ia-nda zuela o athu, ni (3) ukexilu ua ku di tolesa.
O Ibhindamu ia Muenhu
3, 4. (a) O maiala a thandanganha dingi ni ima iahi? (b) Mukonda diahi saí maiala ene mu ta o jimbote ku pholo, mu veji dia ku ta o utuminu ua Nzambi?
3 O musoneki uambe kua Jezú, “mesene eme ngi ku kaiela kuoso-kuoso ku uia.” Maji kioso Jezú kia mu tangela kuila “o Mon’a Muthu-phe kala ni kididi bhua zekesa o mútue uê,” o musoneki ua lungulula o ibanzelu iê. Mu ku kamba kuijiia kuebhi kueji sanga o kudia, mba kuebhi kueji zeka, nange iene ia bhangesa o musoneki ku vutuka ku dima, o Bibidia ki zuela se muéne ua kexile ué mu kaiela Kristu.—Mat. 8:19, 20.
4 O maiala ene mu ta ku pholo o jimbote jâ, mu veji dia ku ta o utuminu ua Nzambi. Ene a suua dingi kuia mu ji xikola ja katunda, ni ku kala ni sidivisu ia fuma phala ku nganhala kitadi kiavulu. Ene a banza kuila o ku kala ni kitadi kiavulu, ku bheka mabesá o ku di longa o Bibidia, ni ku kala ni ukamba ni Nzambi ndenge. Nange o alongexi a Bibidia a bhanga ioso phala ku a kuatekesa, maji “o jihele ja mundu iú, ni músendu ua jimbôngo” ji tena ku a fidisa ku kula mu nzumbi. (Mar. 4:18, 19) Xinganeka kiebhi Jezú kia kuatekesa o maxibulu mê, ku ta o utuminu ua Nzambi ku pholo.
5, 6. Ihi ia kuatekesa Mandele, Tiiaku, ni Nzuá ku sola o sidivisu ia ukunji, ni ku nganhala o muenhu?
5 Mandele ni phang’ê Ximá Phetele, akexile mu tamba kumoxi. Nzuá ni phang’ê Tiiaku, ni tat’â Zebedeu exile uâ atambi a jimbiji. Ene akexile mu bhanga uenji uambote, maji a tokalele ku kenga maiala phala ku a longa. (Mar. 1:16-20) Kioso Mandele ni Nzuá, kia di longo ia lungu ni Jezú, kua Nzuá dia Batizu, ene a xikinine kuila Jezú muene o Mexiia. Mandele ua tula o njimbu kua phang’ê Ximá Phetele, nange Nzuá ua tudile ué o njimbu kua phang’ê Tiiaku. (Nzu. 1:29, 35-41) Ku jimbeji ja kaiela, o kiuana kiâ a kaiela Jezú mu kuboka mu Ngalileia, mu Juda, ni mu Samádia. O kiuana kia maxibulu, a vutuka ku ufunu uâ, ua ku tamba o jimbiji. Ene a zolele o mak’â Nzambi, maji ka mesenene ku ta o utuminu ua Nzambi ku pholo.
6 Mu ku bhita kithangana, Jezú uexana Phetele, ni Mandele phala ku kala ‘atambi a athu.’ O kuila ene a xikina? O Bibidia izuela: “Anga a xa manda-mâ bhenhobho, hé a mu kaiela.” Tiiaku ni Nzuá, kiene kia bhange ué. ‘Ene kithangan’okio a xa o ulungu ni tat’â, hé a mu kaiela.’ (Mat. 4:18-22) Ihi ia kuatekesa o maiala iá, ku sola o sidivisu ia ukunji? O kuila ene a solo o sidivisu íii ni lusolo luoso, sé ku xinganeka? Kana! Ku jimbeji ja bhitile, o maiala enhá evuidile o mak’â Nzambi kua Jezú, a mono kioso kia bhange o madiuanu, ni henda iê ia londekesa, a mono ué athu avulu a xikina o ilongesu ia Jezú. Mukonda dia kiki, ene a kolesa o kixikanu kiâ ni kidielelu kiâ kua Jihova.
7. Kiebhi ki tu tena ku kuatekesa o maxibulu, ku dielela kuila Jihova u dikila o mundu uê?
7 Kiebhi ki tu tena ku kaiela o phangu ia Jezú, phala ku kuatekesa o maxibulu metu a maiala, ku dielela kua Jihova? (Jisa. 3:5, 6) O ukexilu uetu ua ku longa, u tena ku kuatekesa o muthu ku kula mu nzumbi. Kioso ki tu longa, tu tena ku jimbulula o kikanenu kia Nzambi, kia ku tu bhana mabesá, se tu dianga ku sota o Utuminu uê. (Tanga Malakiia 3:10; Matesu 6:33.) Sumbala tu tena ku tanga o Bibidia, phala kulondekesa kiebhi Jihova kia kuatekesa o mundu uê, ki tu tokala ku di jimba kuila o ukexilu ua muenhu uetu, u tena ué ku longa kima. Tu tena ku jimbulula o misoso ia bhiti ku muenhu uetu, phala ku kuatekesa o maxibulu metu ku dielela kua Jihova. Tu tena ué ku a tangela o misoso i tu sanga mu madivulu metu. *
8. (a) Mukonda diahi kima kiambote o dixibulu ku ‘mona kuma Jihova uene ni mbote?’ (b) Kiebhi ki tu tena ku kuatekesa o dixibulu dietu, ku mona kuila Jihova uene ni mbote?
8 Phala ku kolesa o kixikanu, ki ku bhingi ngó ku tanga, mba kuívua o misoso ia akuâ, ia lungu ni mabesá a tambula kua Jihova. O dixibulu u tena ué ku tambula o mabesá a Jihova. O mukua jisalamu, uembi: “Lolenu, mu mone kuma Jihova uene ni mbote; muthu ió u [langa] uoso ua mu dielela muene.” (Jisá. 34:8) Kiebhi ki tu tena ku kuatekesa o dixibulu, ku mona kuila Jihova uene ni mbote? Xinganeka kuila o dixibulu ua thandanganha mukonda dia ku kamba o kitadi, ua mu bhanga ué ioso phala ka xibhe dingi makanha, ku jokala ji joko phala ku nganhala kitadi, mba kúnua kiavulu. (Jisa. 23:20, 21; 2 Kol. 7:1; 1 Tim. 6:10) Ki tu tokala ku kuatekesa o dixibulu, ku samba kua Nzambi, phala ku mu kuatekesa kueha ukexilu ua iibha, ni ku tambula o mabesá a Jihova? Ejiia kuila tu tena ku kuatekesa se tu suínisa o dixibulu ku dianga ku sota o utuminu ua Nzambi, mu ku kala ni kithangana phala ku tanga o ibatulu ia Bibidia ia-nda di longa mu kiônge, ni kuia mu iônge. Kioso kiaia ni ku di suínisa ni ku tambula o mabesá a Jihova, o kixikanu kiê kia-nda kola dingi!
O Uôma ua Ima Ia-nda Zuela o Athu
9, 10. (a) Mukonda diahi Nikodemu, ni Zuze mukua Limateia, ka mesenene ku dilondekesa kuila exile maxibulu a Jezú? (b) Mukonda diahi saí maiala a kala ni uôma ua ku kaiela Kristu?
9 Saí maiala a dituna ku kaiela Kristu, mukonda dia kizukutisu. Nikodemu, ni Zuze mukua Limateia, ka mesenene ku dilondekesa kuila exile maxibulu a Jezú, mukonda ene exile ni uôma, ua ima ieji zuela o Jijudé, se a a sangele ni Jezú. (Nzu. 3:1, 2; 19:38) Kiki kiene kia a bhangesa ku kala ni uôma. O atuameni a jingeleja a zembele Jezú, ia bhange kikutu kuila muthu uoso u xikina Jezú, a tokalele ku mu kaia m’onzo ia ku sambela Nzambi.—Nzu. 9:22.
10 Saí ididi lelu, se o diiala u dianga ku sota o utuminu ua Nzambi, ni ku di longa o Bibidia, nange a mu zukutisa ku jikoleka jê, ku makamba, mba ku jindandu jê. Saí ididi, nange ki kala kiluezu kia dikota se o diiala u zuela ia lungu ni ku sola o ubhezelu uéngi. Nange ki bhonza ku dibhana ni kizukutisu, se o diiala disoladi, mba u bhanga sidivisu ia unguvulu, ki i tokala phala o jikidistá. Mu kifika, saí diiala mu ixi ia Alemanha uambe: “O njimbu ia Bibidia, i uene mu boka ia kidi. Maji se ngi kala Mbangi ia Jihova lelu, mungu athu oso a-nda kijiia. O athu a-nda banza ihi mu sidivisu, mu sanzala, ni ku muiji uami? Kia-nda ngi bhonza kiavulu, ku dibhana ni kizukutisu.”
11. Kiebhi Jezú kia kuatekesa o maxibulu mê, ku dibhana ni uôma ua athu?
11 Sumbala o jipoxolo ja Jezú, a suínine, maji né kiki ene oso akexile ni uôma ua athu. (Mar. 14:50, 66-72) Kiebhi Jezú kia kuatekesa o maxibulu mê ku kula mu nzumbi, sumbala ni kizukutisu kia jinguma jê? Jezú ua dianga ku pelepalala o maxibulu mê, phala ku tena ku dibhana ni kizukutisu kieji bhita na-kiu ku pholo. Muéne uambe: “Mua zediua, se athu a mi zembe, a mi katula mu ukamba uâ, a mi lebhula, a mi texi dijina dienu kuma exi mu athu aiibha, mukonda dia Mon’a Muthu.” (Luk. 6:22) Jezú ua dimuna o akaiedi’ê, kuila eji ku a zemba kuala o athu. Eji ku a zemba “mukonda dia Mon’a Muthu.” Jezú ua a kanena ué kuila Nzambi ueji ku a kuatekesa, ni ku a kolokotesa, se ene a dielele kua Muéne. (Luk. 12:4-12) Jezú uexana ué o athu a di bundu ni ene, phala ku kala kumoxi ni maxibulu mê, ni ku kala ni ukamba ni ene.—Mar. 10:29, 30.
12. Kiebhi ki tu tena ku kuatekesa o dixibulu ua mateka kindala, ku dibhana ni uôma ua athu?
12 Tua tokala ku kuatekesa o maxibulu metu, ku dibhana ni uôma ua athu. Kima kiambote ku dianga ku pelepalala o dixibulu ande dia ku dibhana ni kijijidiku. (Nzu. 15:19) Mukonda diahi ki u longo o dixibulu, mu ukexilu ki u bhonzo ku u tendela, ku sota o kibatulu kia Bibidia phala ku tambuijila o ibhuidisu, ia bhange o koleka iê ia sidivisu, ni i bhanga athu a mukuá? Sé muéne kamba dietu kia, tua tokala ué ku mu londekesa ku jiphange mu kilunga, bhenge-bhenge ió ene mu dibhana ué ni maka, a difu ni a mu dibhana nau muéne. Tua tokala ué ku mu kuatekesa ku samba izuua ioso, ni muxima uoso. Se tu bhanga kiki, kia-nda mu kuatekesa ku zukama kua Nzambi, ni ku bhanga Jihova Dilengelu diê, Mbonge iê.—Tanga Jisálamu 94:21-23; Tiiaku 4:8.
Ukexilu ua ku di Tolesa
13. Kiebhi o ukexilu ua ku di tolesa, ku tena ku fidisa o muthu ku suua mbambe mu kilunga?
13 Saí maiala a dituna ku di longa o Bibidia, mukonda ene kejiia ku tanga kiambote, a kala ni uôma ua kuzuela, mba ka uabhela kuzuela kiavulu. Saí maiala a kala ni jisonhi ja kuzuela o ibanzelu iâ, bhu kaxi ka athu avulu. Kioso kiaia ni ku di longa o Bibidia, o ku tambuijila mu iônge, mba ku longa akuâ ia lungu ni kixikanu kiâ, nange kia a bhonza kiavulu. Saí phang’etu uambe: “Kioso ki nga kexile munzangala, nga kexile múia mu boka mu jinzo, nga kexile mu dilondekesa kála nga phuphu ku dibhitu, anga ngi tunda ni ku diomba phala ka ngi mone. . . . Ki ki ngi uabhele kuia mu boka mu inzo, ni inzo.”
14. Ihi ia fidisa o maxibulu a Jezú, ku saka o mona ua kexile ni dimonho?
14 O ku kamba o kixikanu kia fidisa o maxibulu a Jezú ku saka o mona ua kexile ni dimonho. O tata ia mona uambe kua Jezú: “Ngana, mon’ami mu kuatele henda! Kuma muène uene ni kikonha, ua kate kiaiibha, kua bhingi ua di bhale kiá luavulu mu túbhia, ua di bhale ue kiá luavulu mu menha. Nga mu bheka ku jixibulu jé, maji ene-phe ka tena ku mu saka.” Jezú ua kaie o dimonho, o mona iu ua disanza. Mu ku bhita kithangana o jixibulu anga jiza kua Jezú ku ubheka, exi: “Etu dimónho diódio, tua lembuela-hi ku di kaia?” Jezú ua ambela, uixi: “Mukonda o kuxikana kuenu kua tolo. Kuma ngi mi ambela kidi, se mu kala ni kuxikana né kua soko’é ngó ni lumbundu lua mbutu ia mustarda, mua k’àmbela mulundu iú, muixi: ‘Sondoloka Bhabha, uie bhaná! Uene ua kà sondoloka. Enu mu kala ni kutena, kana kima ki mu lémbua.” (Mat.17:14-20) Phala ku dibhana kiambote ni ibhidi, ku bhinga ku kala ni kixikanu kua Jihova. Ihi i bhita ni muthu, se u kamba unjimu, u dielela ngó mu uhete ué? Ka-nda tena ku di tunda kiambote, mukonda dia ku kamba ku kolesa o kixikanu.
15, 16. Kiebhi ki tu tena ku kuatekesa o dixibulu ku dibhana ni ukexilu ua ku di tolesa?
15 Tu tena ku kuatekesa o muthu, ku dibhana ni ukexilu ua ku di tolesa mu ku mu kolokotesa ku dielela kua Jihova, mu veji dia ku dielela ku ngunzu iê. Phetele ua soneka: “Uila kiki, batâmenu bhoxi dia lukuaku lua Nzambi lua suina, muène a mi zangeleke bhu kitangana kiatokala. Héle ienu ioso xilenu-u Nzambi.” (1 Phe. 5:6, 7) Phala ku bhanga kiki, tua tokala ku kuatekesa o maxibulu metu, ku kula mu nzumbi. O muthu ua kulu mu nzumbi, u bhana valolo ku kudia kuoso mu nzumbi. U zola ué o Mak’â Nzambi, ulondekesa o ‘ídifua ia Nzambi,’ ku muenhu uê. (Nga. 5:22, 23) Muthu u uabhela o ku samba. (Fil. 4:6, 7) Muéne u sota o kikuatekesu kua Nzambi, phala ku dibhana ni ibhidi ioso, mba ku bhanga sidivisu ioso-ioso mu kilunga.—Tanga 2 Timote 1:7, 8.
16 Sai maxibulu, tua tokala ku a kuatekesa ku tanga kiambote, mba ku a katula o uôma ua kuzuela. A mukuá nange a di tolesa mukonda dia ku xinganeka mu ima ia iibha, ia kexile mu bhanga ande dia kuijiia Jihova. Mu kiki, nange ene a mesena ngó kuila tu alondekesa o henda ietu, ni muanhu. Jezú uambe: ‘Oso a disanze ka bhindamena dotolo, ki kale iá a kate.’—Mat. 9:12.
Ku ‘Sota’ ku Tamba Dingi Maiala
17, 18. (a) Kiebhi ki tu tena ku sanga maxibulu a maiala mu sidivisu ia kuboka? (b) Ihi i tua-nda di longa mu milongi ia-nda kaiela?
17 Tua mesena kuila o maiala a xikina o njimbu iambote, iala mu Bibidia. (2 Tim. 3:16, 17) Kienhiki, kiebhi ki tu tena ku sanga dingi maiala mu ukunji uetu? Mu ku bandekesa dingi o kikalakalu kietu, mu ku boka mu ngoloxi, mu usuku, ni mu izuua ia ku nhoha, kioso o maiala kia kala ku mabhata. Tu tena kuzuela nau ku mabhata mâ. Tua tokala ku bhanga ioso, phala ku longa o koleka ia sidivisu, bhenge-bhenge se diiala, ni ku longa o anumi a jiphange jetu, ka kituka luua jikidistá.
18 Tu tena ku bokela athu oso, ni ku dielela kuila ene a-nda xikina ni muxima uoso o njimbu i tua a tudila. Tua tokala kulondekesa muanhu mu ku kuatekesa oso a mesena kuijiia o kidi. Kienhiki, kiebhi ki tu tena ku kuatekesa o maiala a di batizala kiá, ku suua sidivisu iéngi mu kilunga kia Nzambi? O milongi ia-nda kaiela ia-nda tambuijila o kibhuidisu kiki.
[Tanga mu luji]
^ kax. 7 Tanga o Anuário das Testemunhas de Jeová, ni misoso iala mu Mulangidi, ni mu Despertai!
Kiebhi ki Ueji Tambuijila?
• Kiebhi o maiala, kia tena ku a kuatekesa ku dianga ku sota o utuminu ua Nzambi?
• Kiebhi ki tu tena ku kuatekesa o maxibulu a mateka kindala, ku dibhana ni kizukutisu?
• Ihi i tena ku kuatekesa o muthu, uala ni ukexilu ua ku di tolesa?
[Ibhuidisu ia ku dilonga]
[Foto ku mbandu 25]
O kuila uene mu bhanga ioso, phala ku tula o njimbu iambote ku maiala?
[Foto ku mbandu 26]
Kiebhi ki u tena ku pelepalala o dixibulu diê, ku dibhana ni ibhidi?
