Ki Kua-nda Kala Dingi Mavuua!

SE MUTHU u kuambela kuila, “ki kua-nda kala dingi mavuua” ihi i ueji zuela? Nange u zuela kuila, ua mu lota nzoji. O mavuua ene mu bhita kiá tundé ukulu.” Anga u zuela: ‘Ua fika ua mu tonoka ni nanhi?’

Sumbala o mavuua ene hanji mu bhita, maji tua dielela kuila saí kizuua o ima íii ki ia-nda kala-ku dingi. Maji ko athu a-nda zubha o ima íii. Mukonda o athu kejiia se mukonda diahi o ima íii iene mu bhita, né muene ka tena ku i fidisa, mba ku i zubha. O Sobha Solomá ia Izalaiele iokulu, mu unjimu uê ua soneka: “Kiene ki nga mono o ibhangelu ioso ia Nzambi, eme nga tale kuila o ibhangelu ioso bhoxi’abha muthu ka tena ku i tongolola; né-mbe u kalakala muene kia vulu phala o ku ijiia, né ngó, ka tena ku i tongolola; o njimu né uila uixi ngi sota ku ijiia, ki kiene ue ki mu bhekesa o ku ijiia.”​—⁠Ndongixi 8:⁠17.

Se o athu ka tena ku fidisa o mavuua, nanhi-phe u tena kua a fidisa? O Bibidia izuela kuila o Mubhangi uetu muéne ua-nda zubha o mavuua. Muéne ua bhange o ima ioso mu ngongo, kála o menha bhu kididi kiê. (Ndongixi 1:⁠7) Nzambi ka difu ni athu, mukonda muéne uala ni kutena sé mbambe. Mukonda dia kuijiia o kidi kiki, o polofeta Jelemiia uambe: “Auá! Jihova, tata! Eie ua iudika o maúlu ni ixi, ni kutena kuoso kua nguzu ié, ni lukuaku lué ua sununuka; kana-ku kima ki u mona kuma kisunji ku mesu mé.” (Jelemiia 32:​17) Mukonda Nzambi muéne ua bhange o ima ioso mu ngongo, muéne uejiia kiebhi kia tokala ku kala o ima, phala o athu ku tunga ni ku tululuka ni ku kondama.​—⁠Jisálamu 37:11; 115:⁠16.

Kiebhi Nzambi kia-nda bhanga kiki? O ima ioso ia iibha iene mu bhita mu ngongo “kijimbuete” kia “dizubhilu dia mundu.” Jezú uambe: “Ki mu mona im’íi ia-la kubhita kiá, ijienu-kiu kuma Utuminu ua Nzambi ua zukama.” (Matesu 24:3; Luka 21:​31) O Utuminu ua Nzambi, o nguvulu ua diulu ua-nda bhanga ima iavulu, katé ni ku fidisa o mavuua. Sumbala Jihova uala ni kutena kua ku bhanga o ima íii, muéne ua solo Mon’ê, phala ku i bhanga. O polofeta Daniiele uambe: “Anga a mu bhana o kutumina, ni kijingo, ni ungana, phala miji ioso, ni ifuxi, ni madimi moso ende ni ku mu bhikila muene.”​—⁠Daniiele 7:⁠14.

O Mon’â Nzambi, Jezú Kristu, a mu bhana o kutena kua ku bhangesa o ixi ku kala kididi kia iuka kiambote. Mu midi jiiadi ja mivu ku dima kioso kia kexile mu ixi, Jezú ua londekesa bhofele o kutena kuê kua ku tululukisa o mavuua. Saí kizuua kioso muéne ni maxibulu mê kia kexile mu ulungu mu Kalunga ka Ngalileia, “ku balumuka kitembu kia suina, mabhuku ma kala mu ku di lukula mu bote, o iene i sota kuizala ni menha.” O maxibulu akexile ni uôma. Mu kiki, ene a lengela kua Jezú. Ihi ia bhange Jezú? Muéne “u ambela o menha, uixi: ‘Batamenu mu dixibhe!’ Kitembu anga ki batama, kuma ku kala kutululuka kua nzungule.” O maxibulu a diuanene, ia di ebhudisa: “Mukua-hi muene u kala kiki, u bhinga ni kitembu ni mabhuku ma mu belesela?”​—⁠Marku 4:​37-41.

Tundé ukulu, Jezú a mu zangeleka ku diulu, a mu bhana dingi kutena kuavulu. Mukonda dia ku kala Sobha ia Utuminu ua Nzambi, muéne uala ni kikalakalu kia ku bhanga o ima ioso ia mesena phala ku bhana ku athu o ku tululuka ni muenhu ua kondama mu ixi.

Maji kála ki tua mono kiá, mu ngongo kuene maka avulu, ni mavuua ijila mukonda dia ima ia iibha iene mu bhanga o athu mu luímbi luâ. Ihi ia-nda bhanga o Utuminu ua Nzambi ku athu enhá ene mu kolokota o ku bhanga o ima íii, ka mesena ku lungulula o ukexilu uâ ua iibha? O Bibidia izuela ia lungu ni kuíza kua Ngana Jezú u tunda “ku diulu ni ji-anju jê ja nguzu. Muène uà kèjila mu tubhia tu bhana milengu, mu ku a bhesa kaxtiku, oso kejiia Nzambi, ni ió nguauâ kutumaka o Njimbu Iambote ia Ngana ietu Jezú Kristu.” Kienhiki, muéne ua-nda ‘buikisa ió a zanga o ixi.’​—⁠2 Tesalonika 1:​7, 8; Dijingunuinu 11:⁠18.

Mu kusuka-ku, “Sobha ia jisobha,” Jezú Kristu, ua-nda langa o ima ioso mu ngongo. (Dijingunuinu 19:​16) Muéne ua-nda langa o athu phala ka tale dingi hadi mukonda dia ima ia iibha. Muéne mu kutena kuê, ua-nda tena ku langa o ima ioso mu ngongo, phala iene ioso i bhanga kiambote ku athu oso mu ngongo. Mu kusuka-ku, o vondadi ia Jihova Nzambi ia kanene ukulu ku mundu uê, ia-nda di kumbidila, iambe: “Eme-phe ue ngenda ni ku mi bhana mvula ienu bhu thembu iê ia tokala; o ixi ienda ni kutubhula muene ima ia ubhe, o ku mikáu mixi ia kuphapha ue ilukula muene ibundu.” (Ijila 26:⁠4) Athu a-nda tunga jinzo sé uôma ua ku ji bula ku mavuua, mba kima kioso-kioso: “Ene-phe a kà tunga jinzo, anga a kala-mu; a kà dima milenga ia mivide, anga a kà dia idima iê.”​—⁠Izaia 65:⁠21.

Ihi i ua Tokala o ku Bhanga?

Sé phata, eie ni athu a mukuá, mua-nda sanguluka kiavulu mu ku tunga ku mundu ki kua-nda kala dingi mavuua. Maji ihi i ua tokala o ku bhanga phala ku kala-mu ué? Mukonda “oso kejiia Nzambi,” ni “ió nguauâ kutumaka o Njimbu Iambote,” ka-nda tena ku kala ku mundu ki kua-nda kala dingi divuua, kiki kilondekesa kuila, muthu ni muthu lelu ua tokala ku di longa ia lungu ni Nzambi, ni ku kuatekesa o unguvulu uê mu ixi. Nzambi ua mesena kuila tu mu ijiia ni ku belesela o njimbu iambote, iene mu bhana bhu kaxi ka Mon’ê.

O ukexilu uambote ua ku bhanga kiki, o ku di longa o Bibidia. Mu Bibidia muala ndunge iavulu i kuatekesa o muthu ku kala bhu kididi kia kondama ku Utuminu ua Nzambi. Mukonda diahi ku bhingi o Jimbangi ja Jihova n’a ku kuatekese kuijiia ihi i longa o Bibidia? Ene ala ni vondadi ia ku ku kuatekesa. Mu kidi​—⁠se u bhanga nguzu phala kuijiia Nzambi, ni ku belesela o njimbu iambote, o izuelu mu divulu dia Jisabhu 1:​33, ia-nda di kumbidila ko kuê: “Maji uoso u ng’ivuidila ki ngi zuela u tunga u soma, kana-ku kia iibha ki mu kuatekesa uoma.”