Kaiela o Phangu ia Jezú ia ku Dilanga
Kaiela o Phangu ia Jezú ia ku Dilanga
‘Dilangienu, mu sambe.’—MAT. 26:41.
KIEBHI KI UEJI TAMBUIJILA?
Kiebhi o misambu ietu i tena kulondekesa kuila tua mu dilanga?
Kiebhi ki tu tena kulondekesa kuila tua mu dilanga mu kuboka?
Mukonda diahi kima kiambote ku kolokota o ku dilanga kioso ki tu dibhana ni jiphaxi, ni kiebhi ki tu tena ku bhanga kiki?
1, 2. (a) Ibhuidisu iahi nange i moneka ia lungu ni phangu ia Jezú ia ku dilanga? (b) O kuila o phangu ia Jezú, i kuatekesa ué o athu akua ituxi? Bhana kifika.
NANGE u dibhula: ‘O kuila tu tena ku kaiela o phangu ia Jezú ia ku dilanga? Muéne uexile muthu ua iuka! Saí ithangana Jezú uejidile o ima ieji bhita ku hádia—ko ima ngó ieji bhita mu izuua iê! O kuila muéne ua tokalele ku dilanga?’ (Mat. 24:37-39; Jihe. 4:15) Tua-nda di longa o itambuijilu ia ibhuidisu íii, phala tu mone kiebhi o maka enhá, maka a dikota.
2 O kuila o phangu ia muthu ua iuka, i kuatekesa o athu akua ituxi? I tena ku kuatekesa, mukonda o muthu u tena ku di longa ni mulongexi uambote, ku kaiela o phangu iê. Mu kifika, xinganeka diiala u mateka o ku di longa ku takula o sosa. Mu dimatekenu muéne ka tena ku takula kiambote o sosa ku kima kia mesena, maji muéne a tokala ku mu longa veji javulu, phala na tene ku takula kiambote o sosa. Kienhiki, muéne u kaiela o phangu ia mulongexi uê uala ni uhete ua ku takula o sosa. O dixibulu u mona kiambote kiebhi kiala o mesene iê, o maku mê, ni kiebhi kia kuata o ngoji phala ku takula o sosa. Bhofele-bhofele, o dixibulu u kala ni vondadi ia ku di longa, ni nguzu ia tokala ku ta ku ngoji; muéne u tala o mulenge, u kolokota ku bhanga nguzu. Mukonda dia ku kaiela iala mu bhanga o mulongexi uê, muéne ua-nda tena bhofele-bhofele ku takula o sosa ku kima kia mesena. Kiene kimoxi ué etu tua mu suína phala ku kala tu Jikidistá jambote mu ku belesela o itendelesu ia Jezú, ni ku kaiela o phangu iê.
3. (a) Kiebhi kia londekesa Jezú kuila ua tokalele ku dilanga? (b) Ihi i tua-nda di longa mu milongi íii?
3 Ihi i tu zuela ia lungu ni ku dilanga? O kuila Jezú ua tokalele muene ku dilanga? Ua tokalele. Mu kifika mu usuku ua sukina mu ixi, Jezú ua tendelesa o jipoxolo jê ja fiiele: “Mu ngi langidise.” Muéne uambe ué: ‘Dilangienu, mu sambe, phala ki mu dibhale mu jitendasá.’ (Mat. 26:38, 41) Sumbala muéne ua dilangele mu ithangana ioso. Bhenge-bhenge mu kithangana kieniókio kia jiphaxi, Jezú ua mesenene ku dilanga, ni ku zukama dingi kua Tat’ê ia diulu. Muéne uejidile kuila o akaiedi’ê a tokalele ué ku dilanga kála muéne—ki mu kithangana kieniókio ngó, maji ni ku pholo ué. Kienhiki, tua-nda di longa se mukonda diahi Jezú ua mesena kuila tu dilanga. Tua-nda di longa ué maukexilu atatu a tu kuatekesa ku kaiela o phangu ia Jezú ia ku dilanga ku muenhu uetu.
MUKONDA DIAHI JEZÚ UA MESENA KUILA TU DILANGA
4. Mukonda diahi o ku kamba kuijiia o ima ia-nda bhita ku hádia, ki tu bhangesa ku dilanga?
4 Jezú ua mesena kuila tu kolokota o ku dilanga, mukonda dia ima i tua kambe o kuijiia, ni ima i tuejiia. Kioso Jezú kia kexile mu ixi, o kuila muéne uejidile ioso ieji bhita ku hádia? Kana, muéne ni ku lenduka kuoso ua zuela: “Kizuu’okio-phe ni kithangana kiê, kana [muthu] ua k’ijiia, né ji-anju mu diulu, né o Mona, kikale Tata muène ngó.” (Mat. 24:36) Mu kithangana kiki, Jezú “o Mona,” kejidile o kithangana kieji kuíza o dizubhilu dia mundu iú ua iibha. O kuila etu tua k’ijiia? O kuila tuejiia o ima ia-nda bhita ku hádia? Ki tuejiia ioso! Ki tuejiia o kithangana kia Jihova kia-nda tumikisa Mon’ê ku zubha o kuiibha kuoso mu ngongo. Se tu kijidile, o kuila tueji dilanga? Kala kiambe Jezú, o dizubhilu dia-nda bhixila mu kithangana ki tua ki fika; kienhiki tua tokala tu dilanga.—Tanga Matesu 24:43.
5, 6. (a) Kiebhi o kuijiia o ima ia-nda bhita ku hádia, ni vondadi ia Nzambi, i tu bhangesa ku dilanga? (b) Mukonda diahi o kuijiia Satanaji, ku tu bhangesa ku kolokota o ku dilanga?
5 Jezú uejidile ima iavulu ieji bhita ku hádia—o athu akexile mu thembu iê ka ijidile. O kuijiia kuetu ki kua soko ni kuijiia kua Jezú, maji tu mu sakidila, mukonda bhu kaxi kê, etu tuejiia o kidi kia lungu ni Utuminu ua Nzambi, ni ihi ia-nda bhanga ku hádia. Kala ki tua mu mona, ki kale mu xikola, ku salu, mba mu ididi ioso-ioso, mu tuene mu boka o njimbu, ki tuene mu mona athu avulu ala mua vundu, kejiia o kidi? Kiki ki tu bhangesa ué ku dilanga. Kála Jezú, tua tokala ku dilanga, ku sota ithangana phala ku zuelela o athu o ima i tuejiia ia lungu ni Utuminu ua Nzambi. O ithangana ioso, ithangana ikola, tua tokala ku bhanga ioso phala ku longa athu. Mukonda o mienhu ia athu iala mu iluezu!—1 Tim. 4:16.
6 Jezú uejidile ué kima kia mukuá kia mu bhangesa ku kolokota o ku dilanga. Muéne uejidile kuila Satanaji, ua mesenene ku mu tendala, ni ku mu zukutisa, phala ku zozesa o kixikanu kiê. O nguma íii, ua sotele “kithangana kiengi” phala ku tendala Jezú. (Luk. 4:13) Jezú ka bhuile mu ku dilanga. Muéne ua mesenene ku kala polondo phala ku dibhana ni ibhidi ioso, ni jitendasá, ni izukutisu. O kuila kiki ki tena ku bhita ué n’etu? Tuejiia kuila Satanaji uala kála “hoji iala mu zuma u nhunga jinga mu [jimbandu] mu ku sota uoso a mu dia.” Mukonda dia kiki, o Mak’â Nzambi a dimuna o Jikidistá joso, kuila: “Kalenu ku mesu azele, mu di lange!” (1 Phe. 5:8) Kiebhi ki tu tena ku bhanga kiki?
KIEBHI KI TU TENA KU DILANGA MU KU SAMBA
7, 8. Kitendelesu kiahi kia bhana Jezú kia lungu ni ku samba, ni phangu iahi ia bhana?
7 O Bibidia i tendelesa o ku dilanga mu nzumbi ni ku samba. (Kol. 4:2; 1 Phe. 4:7) Ki kua bhitile ithangana iavulu, kioso kia tendelesa o akaiedi’ê ku mu langidisa, Jezú uambe: ‘Dilangienu, mu sambe, phala ki mu dibhale mu jitendasá.’ (Mat. 26:41) O kuila muéne ua kexile mu zuela kuila ene a tokalele ngó ku dilanga mu kithangana kieniókio? Kana, o kitendelesu kiki tua tokala ku ki belesela izuua ioso ku muenhu uetu.
8 Jezú ua tu xila phangu ia dikota, ia ku samba. Nange u di lembalala o kithangana kia bhange mu ku samba kua Tat’ê. Tu xinganeke ihi ia bhiti. (Tanga Luka 6:12, 13.) Kiexile kithangana kia mvula, nange o mbanza ia Kafanau ia zukamene, iexile mbanza ia athambi a jimbiji, muene mua kexile o dibhata dia Jezú. Kuma kua vundu, ngoloxi kiá, Jezú u banda ku mulundu, u kuata ku tala o Kalunga ka Ngalileia. U mona o mbanza mu usuku, o tundeia tua mu muika mu Kafanau, ni mu jisanzala ja zukamene. Kioso Jezú kia sambe kua Jihova, muéne u xinganeka mu musambu uê. Ku bhita ithangana—ji ola. Muéne u mona mukengeji mu honga, u mona ué o dieji ku diulu, ni iama ia mu sota makúdia. O musambu ua bhange, nange ua mu kuatekesele ku bhanga o kima kia kexile mu kingila—o ku sola o 12 dia jipoxolo jê. Tu tena ku xinganeka Jezú kuzuela kua Tat’ê, o ibanzelu iê ioso, ni ibhindamu iê ia lungu ni maxibulu, kioso kiaia ni ku bhinga kitendelesu ni unjimu kua tat’ê!
9. Ihi i tu longa o phangu ia Jezú ia ku samba usuku uoso?
9 Ihi i tu longa o phangu ia Jezú? O kuila tua tokala ku bhanga ithangana iavulu mu ku samba? Kana, muéne uambela akaiedi’ê: “Nzumbi ia xikina kidi o kùlua ni jitendasá, maji o xitu-phe ia bhuila.” (Mat. 26:41) Sumbala ni ukexilu iú, tu tena ku kaiela o phangu ia Jezú. Mu kifika, o kuila tu samba kua Tata ietu ia diulu, ande dia ku sola ku bhanga kima ki tena ku tu bhekela ibhidi, mba ku muiji uetu, mba ku jiphange jetu mu nzumbi? O kuila kioso ki tu samba, tuene mu bhingila ué o jiphange mu nzumbi? O kuila tuene mu samba ni muxima uoso, mu veji dia ku tumbula izuua ioso o kima kimoxi mu musambu? Jezú ua uabhele kiavulu kuzuela ni Tat’ê mu ubheka. Ku mundu iú, a tena ku tu kuata mu ibhindamu ia muenhu, ni ku jimba o ku bhanga o ima ia beta-kota. Se tu kala ni kithangana phala ku samba mu ubheka uetu, tua-nda kolokota dingi o ku dilanga mu nzumbi. (Mat. 6:6, 7) Tua-nda zukama dingi kua Jihova, o ukamba uetu ua-nda kola dingi, ki tua-nda bhanga ima i bhangesa ku zozesa o ukamba uetu ni muéne.—Jisá. 25:14.
KIEBHI KI TU TENA KU DILANGA MU SIDIVISU IA KUBOKA
10. Phangu iahi ia tu londekesa Jezú, ni kiebhi ki tu tena ku kaiela o phangu iê ia ku sota ithangana ia ku bhana umbangi?
10 Jezú ua dilangele mu kikalakalu kia mu bhele Jihova. Nange ku kala salu i bhangesa o kilunji kia mukalakadi ku banza mu ima ia mukuá, ni ku mu bhekela maka avulu. Saí ué salu i bhinga kuila o muthu u bhanga u i bhanga ni lusolo, ni ku dilanga, kiki kia difu ué ni kikalakalu kia Kidistá kia ku boka. Jezú ua dilangele, ua kexile mu mona o ithangana ioso ia tokalele phala ku boka o njimbu iambote. Mu kifika, kioso muéne ni maxibulu mê kia bhixile mu mbanza ia Sikale, kioso kiende kimene kia muvimba, o maxibulu anga aia mu sota kúdia. Jezú ua xala bhua zukamene o mbanza mu nhoha, mu kithangana kieniókio kua moneka muthu, iu ua mu bhana umbangi. O muhatu mukua Samádia uejile mu teka menha. Nange Jezú ueji sola ku zeka bhofele. Muéne keji mesena kuzuela ni muhatu, mba ku banza kima kioso-kioso phala ka mu bhane umbangi. Maji muéne ua zuela ni muhatu, iu ua bhana umbangi ua dikota, ua bhangesa athu avulu ku lungulula o ibanzelu iâ mu mbanza ienioió. (Nzu. 4:4-26, 39-42) O kuila tu tena ku kaiela o phangu ia Jezú ia ku dilanga, mu ku suína mu ku bhana umbangi ua njimbu iambote ku athu u tu sanga izuua ioso?
11, 12. (a) Ihi ia bhangele Jezú kioso athu kia mesenene ku mu landukisa mu kikalakalu kiê? (b) Kiebhi Jezú kia kexile mu bhanga o kikalakalu kiê?
11 Saí ithangana, o athu a mesenene o mbote ia Jezú, a mesenene ku mu landukisa mu kikalakalu kia kexile mu bhanga. Mu mbanza ia Kafanau, athu a diuanene kiavulu mu ku mona o madiuanu akexile mu bhanga Jezú a ku saka o athu, a mesenene kuila Jezú u kala nau. Kiexile kima kiambote. Maji o kikalakalu kia Jezú kiexile kia ku bokela o “jimbudi ja jimbidila ja dibhata dia Izalaiele,” kana ngó mu mbanza imoxi. (Mat. 15:24) Kienhiki muéne ua zuelela o athu: “Kua ngi bhingi ué ngia ku kola o Njimbu Iambote ia Utuminu ua Nzambi mu jisanzala jamukuá, kiene kia ngi bheka.” (Luk. 4:40-44) Mu kidi, Jezú ua di bhakuile ngó mu ku tula o njimbu. Muéne kehele kuila kima kioso-kioso ki mu landukisa.
12 O kuila Jezú ua banzele kia ngó mu ku bhanga o kikalakalu kiê? O kuila muéne ua bhangele kia ngó o ukunji uê, ka banzele dingi mu ibhindamu ia muiji uê? Kana, Jezú ua xisa phangu iambote ia lungu ni kikalakalu kia ku boka. Muéne ua kexile ué ni kithangana kia ku tonoka ni makamba mê. Muéne ua bhanene valolo ku miji, mu ku a kuatela henda, ni ku zola ué o tuana.—Tanga Marku 10:13-16.
13. Kiebhi ki tu tena ku kaiela o phangu ia Jezú ia ku dilanga mu kikalakalu kietu kia ku boka o Utuminu?
13 Kioso ki tu kaiela o phangu ia Jezú ia ku dilanga, kiebhi ki tu tena ku suína mu ku kaiela o phangu iê? Ki tu ehele o mundu iú ku tu landukisa mu kikalakalu kietu. Katé muene ni makamba metu, ni muiji uetu, a mesena o mbote ietu, a tena ku tu zozesa mu kikalakalu kietu kia ku boka, mba ku sota o ima ia sota ene ku muenhu uâ. Kienhiki, se tu kaiela o phangu ia Jezú, tua-nda mona o kikalakalu kietu kia ku boka, kála kúdia. (Nzu. 4:34) O kikalakalu kietu ki tu bhana nguzu mu nzumbi, ki tu bhana ué kisangusangu kiavulu. Kienhiki ki tu tokala kulondekesa kuila kiene ngó ki tua tokala o ku bhanga, mba ku kala muthu ua iuka kinene. Kála kia bhangele Jezú, tua mesena ku kaiela o phangu iê, mukonda tu jiselevende ia ‘Nzambi ia sanguluka.’—1 Tim. 1:11.
KIEBHI KI TU TENA KU DILANGA MU ITHANGANA IA JIPHAXI
14. Mu ithangana ia jiphaxi, ihi ki tu tokala o ku jimba, ni mukonda diahi?
14 Kála ki tua mono kiá, saí itendelesu ia Jezú ia lungu ni ku dilanga, ua i bhana kioso muéne kia kexile mu jiphaxi. (Tanga Marku 14:37.) Kioso ki tu dibhana ni jiphaxi, tu bhindamena ku kaiela o phangu iê. Mu ithangana ia jiphaxi athu avulu a di jimba o kidi ki tu sanga mu divulu dia Jisabhu a ki tumbula mu veji jiiadi, kuila: “Sai njila, muthu u i mona kuiuka; maji o ku dizubhilu diê-phe, ikoka ia kalunga.” (Jisa. 14:12; 16:25) Se tu dielela mu kilunji kietu, bhenge-bhenge kioso ki tu kala ni jiphaxi, tu kala mu iluezu, ni athu oso u tua zolo tu a ta ué mu iluezu.
15. Tendasá iahi o mutuameni ua muiji u tena ku dibhana na-iu se u kamba salu phala ku dikila o ibhindamu ia muiji?
15 Mu kifika, o mutuameni ku muiji nange u kala ni maka alungu ni ku dikila o ibhindamu ia ‘muiji uê.’ (1 Tim. 5:8) Muéne nange u sanga salu i mu bhangesa ku fonga mu iônge, mba ku kamba ku bhanga o ubhezelu ku muiji, mba ku fonga mu sidivisu ia ku boka. Se muéne u dielela ngó mu kilunji kiê, o ukexilu iú nange u moneka kála ukexilu uambote. Maji u tena ku mu bhangesa ku kata mba kufuá mu nzumbi. Kima kiambote ku belesela o kitendelesu kia divulu dia Jisabhu 3:5, 6! Solomá uambe: “Dielela kua Jihova ni muxima ué uoso; kana kudielela ngó o kilunji kié. Mu suue muene ngó mu mauendelu mé moso, muene a iukise o njila jé joso.”
16. (a) Phangu iahi ia xisa Jezú ia lungu ni ku dielela mu unjimu ua Jihova? (b) Kiebhi atuameni avulu a miji kiene mu kaiela o phangu ia Jezú ia ku dielela kua Jihova, mu ithangana ia jiphaxi?
16 Kioso Jezú kia kexile mu dibhana ni jiphaxi, muéne ua ditunu o ku dielela mu kilunji kiê. Xinganeka ngó! O muthu ua unjimu ua kexile mu ngongo mumu, ka solo ku dielela mu kilunji kiê phala ku batula o maka. Mu kifika, kioso kia mu tendala kua Satanaji, Jezú mu ithangana ioso ua tambuijila ni kizuelu kiki: “Kiòsoneke.” (Mat. 4:4, 7, 10) Muéne ua dielele ku unjimu ua Tat’ê phala ku dilanga ku jitendasá, mu kulondekesa o ku lenduka kua ditunu Satanaji. O kuila kiene ué ki tuene mu bhanga? O mutuameni ku muiji u kaiela o phangu ia Jezú ia ku dilanga, uehela o Mak’â Nzambi ku mu endesa, bhenge-bhenge mu ithangana ia bhonzo. Ku mundu uoso, atuameni avulu a miji ene mu bhanga ué kienhiki. Ene, ene mu dianga ku ta ku pholo o Utuminu ua Nzambi, ni ubhezelu ua kidi, o jimbongo ndenge. Kienhiki ene a langa kiambote o miji iâ. Jihova u a kuatekesa, mu ku besoala o nguzu ia bhanga ia ku dikila o miji, kala kia ki kanena mu Maka mê, o Bibidia.—Mat. 6:33.
17. Ihi i ku suínisa ku kaiela o phangu ia Jezú ia ku dilanga?
17 Sé phata, Jezú ua tu xila phangu ia dikota ia ku dilanga. O phangu iê i langa o muenhu ua athu a belesela. Lembalala kuila Satanaji ua mesena ku ku bhangesa ku zeka mu nzumbi—mu ku zozesa o kixikanu kiê, ku kamba ku bheza ni muiji mu kizuua kia ubhezelu ku muiji, ni ku zoza mu kixikanu. (1 Tes. 5:6) Kana ku mu ehela ku nganhala! Kolokota o ku dilanga kála kia bhange Jezú—mu ku samba, mu ku boka, ni kioso ki u dibhana ni jiphaxi. Se u kaiela o ukexilu iú, ua-nda tambula mabesá avulu, ua-nda zediua ku muenhu né muene ku mundu iú ua iibha. O ukexilu ua ku dilanga, ua-nda ku bhana ué kidielelu kia kuila, kioso kia-nda bhixila o Mesene iê phala ku zubha o kuiibha kuoso ku mundu iú ua iibha, u ku sanga ua dilange, ua mu bhanga o vondadi ia Tat’ê. Jihova ua-nda sanguluka kiavulu, ua-nda besoala o ukexilu uê ua fiiele!—Dij. 16:15.
[Ibhuidisu ia ku dilonga]
[Foto ku mbandu 16]
Jezú ua bokela o muhatu bhu fixi. Ithangana iahi i u sota phala ku boka izuua ioso?
[Foto ku mbandu 17]
O ku dikila o ibhindamu ia muiji uê mu nzumbi, kilondekesa kuila eie ua mu dilanga mu nzumbi
