Di Longe o Mak’â Nzambi

Mukonda Diahi Nzambi Uala ni Kilunga?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Mukonda diahi Nzambi ua sokejeka akua Izalaiele?

Nzambi ua sokejeka o mbutu ia Mbalahamu mu kifuxi, iú ua a bhana itumu. Muéne ua bhana o kikalakalu ku kifuxi kia Izalaiele, kia ku bhanga o ubhezelu ua kidi, ni ku belesela o Maka mê, o Mikanda Ikola. (Jisálamu 147:19, 20) Mu ku bhanga kiki, o kifuxi kioso kieji katula o mbote.—Tanga Dimatekenu 22:18.

Nzambi ua solo akua Izalaiele, phala ku kala jimbangi jê. Kioso ene kia kexile mu belesela, akexile mu katula mbote mu itumu ia Nzambi. (Matendelelu 4:6) Mu ku di longa o musoso ua akua Izalaiele tu tena kuijiia dingi o Nzambi ia kidi.—Tanga Izaia 43:10, 12.

2. Mukonda diahi o Jikidistá ja kidi a di sokejeka?

Mu ku bhita thembu, akua Izalaiele a texi o ukamba ua ni Nzambi, Jihova ua solo o kilunga kia Jikidistá phala ku bhingana o kifuxi kiki. (Matesu 21:43; 23:37, 38) M’ukulu akua Izalaiele exile jimbangi ja Nzambi. Lelu o Jikidistá ja kidi, ene o Jimbangi ja Jihova.—Tanga Ikalakalu 15:14, 17.

Jezú ua sokejeka akaiedi’ê oso, phala ku longa o maka a Jihova, ni ku bhanga maxibulu ku ifuxi ioso. (Matesu 10:7, 11; 24:14; 28:19, 20) O kikalakalu kiki, kiala bhu disukilu diê. Tundé ukulu Jihova uene mu kuongeka athu a ifuxi ioso phala o ubhezelu ua kidi. (Dijingunuinu 7:9, 10) O Jikidistá ja kidi a di sokejeka ué, phala ku di suínisa, ni ku di kuatekesa mudiâ. Ku mundu uoso o Jimbangi ja Jihova, ene mu tambula o milongi imoxi ia Bibidia mu semana joso mu iônge iâ.—Tanga Jihebeleu 10:24, 25.

  3. Kiebhi kia mateka o Jimbangi ja Jihova mu izuua ietu?

O Jimbangi ja Jihova, a mateka o kikalakalu kiâ ku muvu ua 1870. O kibuka kófele kia Adilongi a Bibidia, a mateka ku tungununa o kidi kia Bibidia. Ene ejidile kuila Jezú ua tumina o Jikidistá ku boka. Kienhiki, ene a mateka o kikalakalu kia ku boka o njimbu ia Utuminu ku mundu uoso. Ku muvu ua 1931, a tambula o dijina Jimbangi ja Jihova.—Tanga Ikalakalu 1:8; 2:1, 4; 5:42.

4. Kiebhi o Jimbangi ja Jihova kia di sokejeka lelu?

Ku hama ia dianga, o ilunga ia Jikidistá, mu jixi javulu akexile ni kibuka kia utuminu, ejidile kuila Jezú muéne o Mutuameni ua kilunga. (Ikalakalu 16:4, 5) Lelu o Jimbangi ja Jihova, ejiia kuila Jezú muéne o Mutuameni uâ. (Matesu 23:9, 10) Ene a katula ué mbote mu itendelesu ia Kibuka kia Utuminu, tufunga ala ni uhete ua ku bhana itendelesu mu 100.000 a ilunga ndenge. Mu ilunga ioso, o maiala ala ni uhete a sidivila kala tufunga. O jiphange jiji, a langa o kilunga kia Nzambi.—Tanga Phetele 5:2, 3.

O Jimbangi ja Jihova, a di sokejeka mu kikalakalu kia ku boka, ni kia ku bhanga maxibulu. Phala ku longa athu a ukexilu uoso ku mundu, ene a bhanga madivulu avulu a longa o Bibidia, mu 500 a madimi ndenge. Kála kia bhangele o jipoxolo, ene a boka uá mu inzo ni inzo. (Ikalakalu 20:20) Ene a longa o Bibidia ku athu ni henda ioso. Mukonda dia Jimbangi ja Jihova ku mesena ku bhanga o vondadi ia Nzambi, ni ku kuatekesa akuâ, ene a bhanga mbandu ia kilunga kia mundu ua zediua.—Tanga Jisálamu 33:12; Ikalakalu 20:35.

Phala kuijiia dingi, tanga o kibatulu 19 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?