Di Longe o Mak’â Nzambi

Ihi Ia-nda Bhita mu Kizuua kia Kufundisa?

O mbandu íii, ia-nda tambuijila o ibhuidisu i ua mesena o kuijiia, ia-nda londekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Ihi Ilombolola o Kizuua kia Kufundisa?

Kala ki tua mu mona o foto ku mbandu ia kadilu, athu avulu a banza kuila mu Kizuua kia Kufundisa, mazunda ni mazunda a athu a-nda kuimana bhu pholo ia Nzambi phala ku a fundisa mu ima ia bhange—saí iá a-nda tambula o muenhu ku diulu, a kamúkua a-nda tala hadi mu ifernu. Maji o Bibidia ilondekesa kuila o Kizuua kia Kufundisa kia-nda sidivila phala ku bhulula o athu ku hadi ioso iene mu bhita. (Jisálamu 96:13) Nzambi ua solo Jezú phala ku kala o Mufundixi ua-nda bheka o ku bhanduluka kua ku iuka o ixi. —Tanga Izaia 11:1-5; Ikalakalu 17:31.

2. Kiebhi o Kizuua kia Kufundisa kia-nda bheka o ku iuka?

Kioso o diiala dia dianga, Adá, kia bhukumukina Nzambi, muéne ua bheka o kituxi, o hadi, ni kufuá ku tuana tuê tuoso. (Loma 5:12) Phala ku zubha o maka enhá, Jezú ua-nda fukununa mazunda ni mazunda a athu afú. O divulu dia Dijingunuinu dilondekesa kuila, kiki kia-nda bhita mu midi ia mivu mu utuminu ua Kristu Jezú.—Tanga Dijingunuinu 20:4, 11, 12.

O athu a-nda ku a fukununa, ka-nda ku a fundisa mu ima ia bhangele ande dia ene kufuá, maji a-nda ku a fundisa mu ima ia-nda bhanga kioso kia-nda jikula o “madivulu” kala ki tanga o divulu dia Dijingunuinu mu kibatulu 20. (Loma 6:7) Phaulu ua tumbula ió a-nda ku vutuka ku muenhu, a-nda kala ni kithangna kia ku di longa ia lungu ni Nzambi, iá “athu aiuka ni athu abhukumuka.”—Tanga Ikalakalu 24:15.

  3. Ihi ia-nda bhita mu Kizuua kia Kufundisa?

O ió afú sé kuijiia Jihova Nzambi ni ku mu sidivila, a-nda kala ni kithangana kia ku lungulula o ukexilu uâ ni ku bhanga o ima iambote. Se ene a bhanga kiki, a-nda kala ni “muenhu ki uábhua.” Maji saí athu a-nda ku a fukununa, ka-nda mesena ku bhanga o vondadi ia Jihova. Ene a-nda ku a ‘fukununa phala ku a fundisa.’—Tanga Nzuá 5:28, 29; Izaia 26:10; 65:20.

Ku disukilu dia midi ia mivu mu Kizuua kia Kufundisa, Jihova ua-nda bhangesa o athu a belesela ku kala dingi athu a iuka. (1 Kolindo 15:24-28) Mabesá a dikota phala athu oso a belesela! Mu polova ia sukina, Nzambi ua-nda jituna Satanaji o Diabhu ku dikungu ki di moneka hole mua-nda kala-mu midi ia mivu. Satanaji, ua-nda nganala dingi o athu phala ku a katula mu njila ia Jihova, maji o ió a-nda dituna Satanaji, a-nda tambula o muenhu ua kalelaku mu ixi.—Tanga Izaia 25:8; Dijingunuinu 20:7-9.

4. Kizuua kiebhi kia mukuá kia kifundisu kia-nda bheka mabesá ku mundu?

O Bibidia i tumbula ué o kizuuelu “Kizuua kia Kufundisa” phala kulondekesa o kizulukutu kia-nda bheka o dizubhilu dia mundu iú ua iibha. O kizuua kiki kia kufundisa, kia-nda tukumukisa athu oso, kala o Diluviu dia bhiti mu izuua ia Noué dia jibha o athu oso a iibha. O kibuikilu kia “athu abhumu,” kia-nda sidivila phala ku bheka o ixi ia ubhe kua-nda kala o “ubatuilu ua kuiuka.”—Tanga 2 Phetele 3:6, 7, 13.

Phala kuijiia dingi, tanga o jimbandu ja 213-215 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?

[Foto ku mbandu 16]

“O Kifundisu Kia Suku-ku,” Kia Gustave Doré, a mu Vuala ku Muvu ua 1832 iu Uafú ku Muvu ua 1883

[Muxinda ua tokala]

Foto ia Doré