DIAMBU DIA KAPA: IHI I TU LONGA O PHANGU IA MOZÉ
Nanhi Uexile Mozé?
Ihi i u banza kioso ki uivua o dijina dia Mozé? O kuila u mu banza kuila . . .
-
kabuetele a mu suekele kua manh’â mu kinda mu Ngiji ia Nilu?
-
munzangala a mu sasele ku Ijitu kuala o mon’a Falaó uexile mvuama—maji ka di jimbile kuila uexile mukuá Izalaiele?
-
diiala diexile mubhidi ua jimbudi mu ixi ia Midiiana mu 40 a mivu?
-
diiala dia zuelele ni Jihova * bhu pholo ia kisasa kia uamene túbhia?
-
diiala dia bhingile ni ku suína kuoso kua sobha ia Ijitu phala ku katula o mundu ua Izalaiele mu ubhika?
-
diiala ia mu tumine kua Nzambi ku kola o dikuinhi dia mabhebhu ku thandu dia akua Ijitu kioso o sobha iâ kia xingile o Nzambi ia kidi?
-
diiala dia bhuluile o mundu ua Izalaiele bhu maku a Ijitu?
-
diiala a mu tumine ku jikula o Kalunga ka Kusuka?
-
diiala dia bhanene ku akua Izalaiele o Dikuinhi dia Ijila ia ngene ia Nzambi?
MOZÉ ua bhangele o ima ioso íii ni ima ia mukuá dingi. Mukonda dia kiki o diiala didi dia fiiele, a mu xila kiavulu ku Jikidistá, ku Jijudé ni ku akua muxulumanu!
Sé phata, Mozé uexile polofeta ia bhangele “madiuanu m’ònene.” (Matendelelu 34:10-12) Muéne uehela Nzambi ku bhanga madiuanu bhu kaxi kê. Maji Mozé uexile diiala kála etu. Kála o polofeta Elija—ua monekene ku mbandu ia Mozé mu kisuma kioso Jezú kia kexile mu ixi—Mozé ‘uexile muthu kála etu.’ (Tiiaku 5:17; Matesu 17:1-9) Mozé ua dibhanene ué ni maka u tuene mu dibhana nau lelu, maji ua di tundile kiambote.
Ua mesena kuijiia ihi ia mu kuatekesa ku di tunda kiambote? Tua-nda di longa ídifua itatu ia londekesa Mozé, ni ihi i tu tena o ku di longa ku phangu iê.
^ kax. 7 Jihova, diene o dijina dia Nzambi kala ki tanga o Bibidia.
