Mixela: Lelu nga mu londekesa o kamukanda kaka ku athu oso ku diembu. Kambe: Ua Mesena Kuijiia o Kidi? Phala eie.

Sofia: Ka mu zuela maka alungu ni ngeleja?

Mixela: Kiene muene. Tala o ibhuidisu isamanu mu kapa. Kibhuidisu kiebhi ki—

Sofia: Dixibh’iê. Ua mu zanga ngó o kithangana kiê mu kuzuela n’eme.

Mixela: Mukonda diahi ua mu zuela kiki?

Sofia: Mukonda ki ngejiia kiambote se ngi xikina muene kua Nzambi mba kana.

Mixela: Kia uabha, nga ku sakidila mu ku ngi zuela o kidi. O kuila kiene ki uene mu banza tundé ukulu?

Sofia: Kana, nga kudila mu ngeleja. Maji nuka dingi nga ile-mu.

Mixela: Kua bhu. Ngi loloke. Dijina diami Mixela.

Sofia: Eme Sofia.

Mixela: Nga sanguluka mu ku kuijiia, Sofia.

Sofia: N’eme uami.

Mixela: Sofia, ki ngeza bhabha ku ku jijidika ku xikina o ilongesu iami. Maji nga mesena kuijiia kima. O kuila saí kima ki ku bhangesa ku kala ni phata se kuene muene Nzambi?

Sofia: Xe saí. Mam’etu ua luezele ni dikalu ku 17 dia mivu ku dima.

Mixela: Kima kia iibha. Ua di kuamene kiavulu?

Sofia: Tundé o kizuua kieniókio, muéne ka mu kuenda dingi.

Mixela: Kima kia iibha. Kia bhonzo kiavulu phala eie.

Sofia: Kiene muene, kia bhonzo. Ki ngi tena ku bhanga kima phala ku mu kuatekesa, maji ngene mu dibhudisa kuila, se kuene Nzambi, mukonda diahi muéne uehela o kima kiki o ku bhita? Mukonda diahi Nzambi u tuehela ku tala hadi?

Mixela: Ki kima kia iibha ku divua kiki, kana. Kioso ki tu tala hadi, kima kiambote ku dibhudisa se mukonda diahi. Mu kidi, katé muene ni maiala ni ahatu a fiiele m’ukulu, akexile uá mu dibhudisa kiki!

Sofia: Manhi?

Mixela: Kiene muene. Ngi tena ku kulondekesa phangu mu Bibidia?

Sofia: Kia uabha.

Mixela: Tala o kibhuidisu kia bhange o polofeta Habakuke kua Nzambi, kala kia ki soneka mu divulu dia Habakuke, kibatulu 1, mu velusu 2 ni 3: “Ngi dikola katé bhebhi, [Jihova] eie ki ua mu fula ku ngivua? Ngi ta mutendu, ngixi: Usué’iê: Eie-phe u kamba ku bhulula? Phalahi u ngi muesa o ufusa ni lusebu, anga u ngi bhangesa kutala ungulungumba?” O kuila o ibhuidisu íii ia difu ni ibhuidisu i uene mu bhanga?

Sofia: Ia difu muene.

Mixela: Nzambi ka bazela Habakuke mu ku bhanga o ibhuidisu íii, ka zuela ué kuila Habakuke ua tokalele ku kala dingi ni kixikanu.

Sofia: Kima kiambote.

Mixela: O Bibidia i longa kuila Nzambi u mona o hadi ietu, anga u bhanga kima phala ku tu kuatekesa.

Sofia: Ihi i ua mu zuela?

 Mixela: Nga-nda kulondekesa phangu bhabha mu divulu dia Makatukilu 3:7. Ua mesena o ku tanga?

Sofia: Kia uabha. Di zuela: “Jihova anga u zuela dingi uixi: ‘Nga mono kidi muene o phaxi ia ifuxi iami iala mu Ijitu, ngevu o ku dikola kuâ, mukonda dia ió a a jijidika ni ku a bhikisa kiavulu; mukonda eme ngejiia o malamba mâ.’”

Mixela: Nga sakidila. Kala ki tua mono mu kibatulu kiki, o kuila Nzambi u tala kioso o mundu uê kia mu tala hadi?

Sofia: Kiene.

Mixela: Muéne kene mu mona ngó o ima i bhita. Tanga dingi o mbandu ia sukina mu velusu íii. Nzambi uambe: “Eme ngejiia o malamba mâ.” O kuila o izuelu íii ilondekesa kuila Nzambi ka tu suu?

Sofia: Kana.

Mixela: Kiene muene, kima kimoxi o ku mona, maji o ku bhanga kima—phala ku tu kuatekesa—kima kiéngi.

Sofia: Kidi muene.

Mixela: Kienhiki, tu tange phangu ia mukuá kioso o mundu ua Nzambi ua kexile mu tala hadi. Mu divulu dia Izaia 63:9. O mbandu ia dianga ia velusu íii i zuela: “Mu lamba diâ dioso ni muene uevuile dilamba.” O kuila Nzambi ua kexile ué ni dilamba mu ku mona o mundu uê ku tala hadi?

Sofia: Kiene muene.

Mixela: Sofia, mu kidi, Nzambi u tu suua kiavulu, anga u luuala kia tu mona ku tala hadi. Kioso ki tu luuala, muéne u luuala ué.

Mixela: Ande dia ku iami kiá, ngala ni njimbu iéngi i nga mesena o ku kuidikisa.

Sofia: Kiambote.

Mixela: Xinganeka mu milongi i zuela o Bibidia ia lungu ni kutena kua Nzambi. O velusu i nga mesena o ku kuidikisa, iala mu divulu dia Jelemiia 10:12. Ua mesena o ku tanga?

Sofia: Nga mesena. I zuela: “Jihova ua bhange [o ixi] ni kutena kuê; muene ua xikika o ngongo mu kuijiia kuê; o diulu ua di zale ni [ku tongoloka] kuê.”

Mixela: Nga sakidila. Tu xinganeke hanji mu velusu íii. O kuila Nzambi ua bhingi kutena kuavulu phala ku bhanga o ngongo ni ioso iala-mu?

Sofia: Xé, ua bhingi.

Mixela: Kienhiki-phe, se Nzambi uala ni kutena kua ku bhanga o ima ioso mu ngongo, ki tu tokala ku dielela kuila uala ué ni kutena kua ku langa o ibhangelu iê?

Sofia: Kiene muene.

Mixela: Xinganeka dingi mam’enu. Mukonda diahi u luuala mu ku mu mona ku tala hadi?

Sofia: Mukonda nga mu zolo. Muéne mam’etu.

Mixela: Abha se ua kexile ni kutena kua ku zubha o hadi iê lelu, ueji i zubha?

Sofia: Kiene.

Mixela: Xinganeka se íii ilombolola ihi. O Bibidia i longa kuila Nzambi u mona o hadi ietu, muéne uivua o ndolo ietu, muéne uala ni kutena kuavulu. U tena ku xinganeka o nguzu i bhanga Nzambi mu ku kamba ku zubha ni lusolo o jiphaxi?

Sofia: O kiki, nuka kia ngi bandele ku muxima.

Mixela: Kiki ki kilondekesa kuila Nzambi uejiia kiambote se mukonda diahi ka zubhu luua o ibhidi ietu? *

Sofia: Kiene, muéne uejiia.

Mixela: O mutelembe uê ua kafuetele iu xika, kienhiki nga-nda vutuka mu kizuua kiéngi phala ni tu zuele dingi o maka enhá.

Sofia: Nga sakidila. Nga-nda ku kingila. *