Nga kudila ku ixi ia Santiago, mu mbanza ia Chile, mu sanzala mua kexile jibandi javulu, ujibhangânga, ni ji droja. Tat’etu a mu jibha kioso ki nga kexile ni mivu i uana. Mam’etu anga u sokana diiala dia iibha, iu ua kexile mu tu beta kiavulu. Katé lelu ngene hanji mu lembalala o izuua iná.

Kioso ki nga kexile mu kula, nga kexile mu kaiela ué o ukexilu ua iibha ua athu, eme nga kituka mukua njinda. Nga uabhele kiavulu kuívua o muimbu ua heavy-metal, kúnua kiavulu, ni ku tambula ji droga. Izuua ioso nga kexile mu dita mu jinvunda, ni athu akexile mu sumbisa o ji droga, ia a mesenene ku ngi jibha. Saí kizuua kibuka kia jibandi, a futu kitadi ku diiala dia iibha, kifumbe phala ku ngi jibha, maji eme nga tena o ku lenga, a ngi kuama ngó bhofele. Mu ku bhita izuua, kibuka kia athu a sumbixi a ji droga, a ngi oleka uta ku mutué uami, ia mesenene ku ngi nhenga.

Ku muvu ua 1996, nga zolele kiavulu kilumba, dijina diê, Carolina, etu tua kazala ku muvu 1998. Kioso ki tua vuala mon’etu ua dianga, nga kexile ni uôma ua kuila mukonda dia ukexilu uami ua iibha, ngeji kala kála tat’etu ni ku beta o muiji uami. Kienhiki, eme nga soto kikuatekesu ku inzo ia ku saka ió ala ni kifua kia ku tambula ji droga. A bhange ioso phala ku ngi kuatekesa, maji ki nga di sanze kana. Eme nga suluka ni ku kala ni njinda kabasa kima; ki ngi tenene ku langa o ji hanji jami. Phala ki ngi te o muenhu ua muiji uami mu iluezu, nga soto o ku di jibha. Maji ki ngi tenene ku di jibha.

Eme ki ngi xikinine kua Nzambi ku mivu iavulu, maji nga mesenene o ku mu xikina. Kienhiki, nga mateka o ku dilunga ni ngeleja evangelica. Mu kithangana kieniókio, o muhatu uami ua mateka o ku di longa o Bibidia ni Jimbangi ja Jihova. Nga zembele kiavulu o Jimbangi ja Jihova katé muene saí ithangana, nga kexile mu a xinga. Maji ene, mu veji dia ku ngi vutuila phonzo a tululukile n’eme, nga diuana kiavulu mu ku mona o ukexilu ua muenhu uâ.

Saí kizuua, Carolina ua ngi bhingi phala ku tanga o divulu dia Jisálamu 83:18 mu Bibidia iami. O velusu íii ilondekesa kuila o dijina dia Nzambi, Jihova. Eme nga diuanene kiavulu  mukonda mu ngeleja iami a ngi longele ngó, Nzambi, kana Jihova. Ku muvu ua 2000, nga mateka uami ku di longa o Bibidia ni Jimbangi ja Jihova.

Kioso ki nga kexile mu kula mu nzumbi, nga kexile mu divua kiambote mu kuijiia kuila Nzambi, muthu ua henda, u loloka o athu. Mu kifika, mu divulu dia Makatukilu 34:6, 7, NW, o Bibidia i zuela kuila, “Jihova kia kexile mu bhita bhu pholo iê, ni ku kola: Jihova, Jihova, Nzambi ia jihenda, ua lenduka, u kokoloka mu ku kuatela njinda, u kola mu ku kuatela henda, ni mu kidi.”

Né kiki, kia ngi bhonzele kiavulu ku belesela o ima i nga kexile mu di longa. Ngejidile kuila ki ngeji tena kueha o ukexilu uami ua njinda. Kabasa kithangana ki ngi tenene ku langa o njinda iami, Carolina ni henda ioso ua kexile mu ngi suínisa. Muéne ua kexile mu ngi lembalesa kuila, Jihova ua kexile mu mona o nguzu i nga kexile mu bhanga phala ku lungulula o ukexilu uami. O nguzu ia muhatu’ami ia ngi bhana nguzu ia ku kolokota ku bhanga ioso phala ku sangulukisa Jihova né muene kioso ki nga kexile mu divua kuila ki ngeji tena ku bhanga kiki.

Saí kizuua, o muthu ua kexile mu ngi longa o Bibidia, Alejandro, ua ngi bhingi ku tanga o divulu dia Ngalásia 5:22, 23. O velusu jiji, ji zuela kuila o kibundu kia nzumbi ikôla, ‘henda, ngalasa, kutululuka, ku xididika, ku lenduka, ku bhanga mbote, ku kala fiiele, ku belesela, ni ku di tumina jihanji.’ Alejandro ua jimbulula kuila, o ku kala ni ídifua íii, ki ieji kala mu nguzu iami kana, mu veji dia kiki, kieji kuíza bhu kaxi ka nzumbi ikôla ia Nzambi. O kidi kiki kia lungulula o ukexilu uami ua ku banza!

Mu ku bhita thembu, ngai mu kiônge kia dikota kia Jimbangi ja Jihova. O ukexilu uâ, o ku zela kuâ, ni ukamba uâ i nga mono kua ene, ia ngi bhangesa ku xikina kuila nga sangele o ubhezelu ua kidi. (Nzuá 13:34, 35) Kienhiki, a ngi batizala ku mbeji ia Kauana ua muvu ua 2001.

Jihova uene mu ngi kuatekesa ku lungulula o ukexilu ua muenhu uami, mu ku ngi katula o kifua kia iibha kia ku kala mukua njinda ni ku kala muthu ua henda. Ngi mona kuila muéne ua ngi katula ku maloua ku nga kexile. Athu avulu a ngi zembele, maji ki ngi tokala ku a tatela mu ku ngi zemba. Maji lelu, ngi divua kuila ngala ni ku tululuka mu ku sidivila Jihova kumoxi ni muhatu’ami ni an’ami a iiadi.

O jindandu jami ni makamba’mi okulu ka tena ku xikina mu ku ngi mona kuila, nga lungulula o ukexilu ua muenhu uami. Mukonda dia kiki, athu avulu, a xikina uá ku di longa o kidi kia Bibidia. Ngala ué ni ujitu ua ku kuatekesa athu a mukuá kuijiia Jihova. Kisangusangu kia dikota ku mona kuila o kidi kia Bibidia ki lungulula ué o ukexilu ua mienhu iâ!