O kaxa ia jimbongo ja tembulu ia kexile mu Kithadi kia Ahatu. O divulu, o Templo—Seu Ministério e Serviços, di zuela: “Athu oso akexile múia kumoxi ku jiphiladi, muenhomo, ku palelu, kuene kua kexile dikuinhi ni itatu dia itutu, mba ‘jikoloneta,’ [muene] mua kexile mu ta o jimbongo ja kexile mu sangela.”

O itutu íii a i xanene jikoloneta mukonda ja kexile kala kabasa. Kala kitutu kia kexile ni ima iê phala ku ta-mu, o kitadi kia kexile mu katula mu itutu íii ia kexile ni njila iê. Jezú ua kexile mu Kithadi kia Ahatu kia mono athu avulu, katé muene ni muthu uexile ngadiama, ku sangela kitadi mu tembulu.—Luka 21:1, 2.

Itutu iiadi ia sidivile phala ku ta-mu lubhaku lua tembulu. Kitutu kimoxi kia sidivile phala ku ta-mu lubhaku lua muvu ua bhitile, o kia mukuá phala o muvu uenhó. Itutu 5 ia sidivile phala ku ta-mu kitadi phala ku sumba tuphomba, mixi, dixi dia dizumba, ni itutu ia ulu. Se o muthu ka bhakele ngó o kitadi kia mu bhingile, o kitadi kia subhukile ua tokalele ku ki ta mu itatu ia mukuá ia kexile mu tembulu. O kitutu 8, kia sidivile phala ku ta-mu o kitadi kia sata ia muloloki ua ituxi. O kitutu 9 ndu 12 kia sidivile phala ku ta-mu o kitadi kia sata ia kikuma, phala ku satela jinjila, phala o Nazilé ni akua dibhute ku ta-mu o sata iâ. O kitutu 13 kia sidivile phala o athu a mesenene ku sangela kitadi mu vondadi iâ.

Luka muéne ua soneka o divulu dia Luka ni divulu dia Ikalakalu ia Jipoxolo. Luka ua zuela kuila muéne ua “zubha ku ibhuidisa kiambote tunde ku ia tundile,” maji saí akua ku tokuesa o Bibidia, ka xikina mu misoso ia soneka Luka. (Luka 1:3) Kienhiki, o kuila o misoso ia soneka muéne, ia kidi muene?

O misoso ia soneka Luka a tena ku i tokuesa phala ku mona se ia kidi muene mba kana. Mu kifika, muéne ua soneka majina a athu exile kabhitangu ni jinguvulu akua Loma, kala, o jixefe, mu Filepe; afundixi a mbonge, ku Tesalonika; ni makota ma athu, ku Efezo. (Ikalakalu 16:20, 17:6; 19:31) Luka ua tumbula Helode dia Antipa, kála tetalaku ni Serju Phaulu, o nguvulu ia Xipele.—Ikalakalu 13:1, 7.

O majina a ujitu a tumbula Luka, a tokala muene, mukonda kioso o dijina dia kibatu, dia lungulukile, o dijina dia ujitu dia sobha dia kexile mu lunguluka ué. Maji o mukua ku tokuesa o Bibidia, Bruce Metzger, uambe: “O majina enhá a ujitu mu divulu dia Ikalakalu, alondekesa kuila a kidi, mukonda dia ididi ni thembu mua soneka o divulu.” O mukua ku tokuesa o Bibidia, William Ramsay, uambe: “Luka ua tange o misoso ni kidi kioso.”