ELIJA ua kexile mu bhita mu Honga ia Njolodá. Ua kexile mu kuenda njila semana javulu, mu ku tunda ku Mulundu ua Holebe, ni kuia ku mbandu ia thunda. Kia vutuka mu Izalaiele, ua mono kuila ima iavulu mu ixi iê ia lungulukile. O kithangana kia bhitile sé mvula, kia kexile mu bhua kiá. Kua kexile kiá mu sonoka mbundu, o idimakaji akexile kiá mu dima. Nange kiki kia tululukisile kiavulu o polofeta ku mona o mavu ku kala dingi polondo phala ku a dima, maji o kima kia mu thandanganhesele dingi, o athu mu ixi. Ene ka kexile kiambote mu nzumbi. O ubhezelu ua makutu ua Bahale ua kexile hanji mu kaxi kâ, kienhiki, Elija ua kexile ni kikalakalu kiavulu phala ku ki bhanga. *

Mu ku zukama mu mbanza ia Abele-Meola, Elija ua mono díbhia dia dikota akexile mu di dimina. Mua kexile makuinhi a iiadi ni iuana a jingombe a a kutile mu kiiadi-kiiadi, akexile mu kalakala kumoxi, o 12 didi dia ibuka ia jingombe akexile mu sunga o jimakina akexile mu dima o mavu. O diiala ua kexile mu kuendesa o kibuka kia suku-ku, o diiala dia kexile mu sota Elija. O diiala didi, Ilizeu, o muthu a mu solele kua Jihova phala ku bhingana Elija. Elija ua kexile mu banza kuila muéne ngó ua kexile fiiele kua Nzambi, kienhiki muéne ua sangulukile kiavulu ku di sanga ni diiala didi.—1 Jisobha 18:22; 19:14-19.

O kuila Elija ua kexile ni hele ia ku bhana kikalakalu mba kijingu ku diiala didi, ni ku banza kuila ua-nda kala mu kididi kiê? Ki tuejiia kiambote; maji tu tena kuijiia kuila, muéne ua thandanganhele ni maka enhá. Mukonda muéne uexile, “muthu ni mukuetu, o jihânji jene jimoxi ni etu.” (Tiiaku 5:17) Maji o Bibidia i zuela: “Elija, mu ku mu somboka u mu takuila o divunga diê ku thandu.” (1 Jisobha 19:19) O divunga dia kexile mu zuata Elija—nange a di bhangele ni kikonda kia jimbudi mba kia jihombo—kia kexile mu lombolola o kikalakalu kia katunda kia tambuile kua Jihova. O ku takula o divunga diê ku thandu dia Ilizeu, kia lombolola kima kia dikota. Elija ni vondadi ioso ua belesela o kitumu kia Jihova kia lungile ni ku unda Ilizeu phala ku mu bhingana. Elija ua dielele kua Nzambi iê iu ua kexile ku mu belesela.

O munzangala, Ilizeu, ua mesenene kiavulu ku kuatekesa o polofeta, kuma ua kukile kiá. Ilizeu keji bhingana kiá Elija mu kithangana kieniókio, kana. Ku mbeji jisamanu, muéne ua kaiela ni ku lenduka kuoso, ua kuatekesa o polofeta, katé kia beta ku muijiia kala o muthu “ua kexi mu kulunduluila o menha ku maku’a Elija.” (2 Jisobha 3:11) Elija ua sangulukile kiavulu mu ku kala ni múkuatekexi uambote! Kiiadi kiâ a kituka makamba ambote. Sé phata, o ukamba uâ uambote ua a kuatekesa kiavulu o ku kolokota né muene ni kuiibha kuezalele mu ixi. O kuiibha kua sobha Akabe, kua kexile mu di bandekesa kiavulu izuua ioso.

A ku bhangele kiá ima ia iibha? Avulu mu ngongo mumu, a a bhange kiá ima ia iibha. O ku kala ni dikamba dia zolo kiavulu Nzambi, di tena ku kuatekesa o ku kolokota. U tena ué ku di longa kiavulu ku phangu ia kixikanu kia Elija mu ku dibhana ni kuiibha.

Elija ni Ilizeu a kalakala kiavulu phala ku suínisa o ukamba ua athu ni Nzambi. Ene akexile ku pholo mu ku longa o polofeta ja mukuá, nange a iudika xikola phala ku bhanga kiki. Maji Elija a mu bhanene kikalakalu kia ubhe kua Jihova: “Balumuka, u kulumuke ua kà takane ni Akabe, o sobha ia Izalaiele.” (1 Jisobha 21:18) Ihi ia bhangele Akabe?

O sobha ua lungulukile kiá ku ubhezelu ua kidi, ua betele o kuiibha, jisobha ja mukuá ja Izalaiele ndenge. Muéne ua kazele ni Jezabele iu ua bhangesele o ubhezelu ua Bahale ku di bandekesa dingi mu ixi, ni kikuatekesu kiê. (1 Jisobha 16:31-33) O ubhezelu ua Bahale, ua lungile ni ku kaiela o ijila ia ku vuala, ni ku satela tuana, ni undumbu. Maji, Akabe ua bhukumukine o kitumu kia Jihova kia ku jibha o Sobha ua iibha ua akua Sídia, Bene-hadade. Akabe nange ua ditunu ku belesela mukonda ua mesenene ku nganhala dingi kitadi. (1 Jisobha, kibatulu 20) Maji, o luímbi, o ku mesena o jimbote, ni ukexilu ua ujibhangânga ua Akabe ni ua Jezabele, ua di bandekesele dingi.

Akabe ua kexile ni sabhalalu mu ixi ia Samádia—iexile ia dikota! Muéne ua kexile ué ni sabhalalu mu ixi ia Jizeleele, phala ku bhixila-ku kua bhingile kuenda 37 a kilómetulu. Ku mbandu ia dibhata diê dia kaiiadi, mua kexile díbhia dia mividi. Akabe ua mesenene o díbhia didi diofele, dia tokalele kua Nabote. Akabe uexana Nabote, iu ua mesenene ku mu bhana kitadi phala ku mu sumbisa o díbhia dia mividi. Maji Nabote, uambe: “Jihova a ngi lange; ka ng’ehele, kuila eme ngi ku bhana o undundu ua ngi xila jitata jami.” (1 Jisobha 21:3) O kuila Nabote uexile muthu ua iibha? Mukua ukumbu? Athu avulu amba kuila kiene muene. Mu kidi, muéne ua kexile mu belesela o Kitumu kia Jihova, kia kuila o akua Izalaiele ka tokalele ku sumbisa o ixi iexile undundu ua muiji uâ. (Ijila 25:23-28) Kua Nabote, kiexile kituxi ku xibhaka o Kitumu kia Nzambi. Muéne uexile diiala dia kixikanu ni ku suína, mukonda uejidile kuila kiluezu kia dikota ku xibhaka o kizuelu kia Akabe.

Nange Akabe, ka xinganeka mu Kitumu kia Jihova. Muéne ua vutuka kubhata diê, ni ku “luuala, ni ku thathamana” mukonda ka mu bhanene ia mesenene. O Bibidia i zuela: “U zeka mu hama iê, ni pholo ia biluila ku mutôto, anga u dituna o kudia.” (1 Jisobha 21:4) Jezebele kia mono kuila muadi uê ua luuala kiavulu ni pholo bhoxi kala mona-ndenge, sé ku laleka ua soto ndunge phala ku bhana kua muadi uê ioso ia mesenene—ni ku jibha ué o muiji uê uoso.

Mu ku di longa o ndunge ja soto phala ku jibha Nabote, tu tena ku mona o kuiibha kuê. O mvuale Jezabele uejidile kiambote kuila o Kitumu kia zuelele kuila phala o maka ku kala a kidi, kua bhingile mbangi jiiadi. (Matendelelu 19:15) Kienhiki, muéne ua soneka mikanda mu dijina dia Akabe, iu ua i tumikisa ku adiakimi a Jezeleiele phala n’a sote mala kiiadi a fuma phala ku tatela umbangi ua makutu kua Nabote—ua kuila ua xonguena Nzambi ni Sobha, phala ku mu jibha. O ndunge iê ia kuata. O ‘mala kiiadi a kadiaphemba’ a tatela umbangi ua makutu kua Nabote, mukonda dia kiki, a mu tutujula ni matadi, iu uafú. Maji ki Nabote ngó uafú—ni an’ê ué a a jibha! * (1 Jisobha 21:5-14; Ijila 24:16;  2 Jisobha 9:26) Akabe uehela muhatu’ê ku bhanga ioso ia mesenene ni ku jibha athu a ngene ka bhangele kima kioso-kioso kia iibha.

Xinganeka kiebhi kia kexile mu divua Elija kioso Jihova kia mu londekesa ihi ia kexile mu bhanga o sobha ni muhatu’ê. Kima kia iibha kioso ki tu mona athu a iibha ku bhanga kia iibha ku athu a mukuá ka bhange kima kia iibha. (Jisálamu 73:3-5, 12, 13) Lelu tuene mu mona kuiibha kuavulu ku mundu—saí ithangana, o athu amba kuila a mu bhanga o vondadi ia Nzambi, ene a bhanga kiki. O musoso u tena ku tu suínisa kiavulu. O musoso iú, u tu londekesa kuila Jihova u mona ioso ia mu bhita ku mundu. (Jihebeleu 4:13) Maji ihi i bhanga muéne kioso kia mona o ima ia iibha?

Jihova ua tumikisine Elija kua Akabe. Nzambi uambe: “Muene uala mu díbhia dia mivide dia Nabote.” (1 Jisobha 21:18) Kioso Jezabele kia zuela kua Akabe kuila o díbhia dia mividi dia mu tokalele kiá, Akabe ua balumuka iu ua mu kemba mukonda dia díbhia. Muéne ka banzele né veji imoxi kuila, Jihova ua kexile mu mona ioso ia kexile mu bhanga. Xinganeka kiebhi kia kexile kioso kia bhixila mu díbhia, muxima uê ua sanguluka ni ku banza mu jaludim ieji kuna mu díbhia. Maji, Elija ua bhixila! O ku sanguluka kua Akabe kua bhu, anga u zuela ni njinda, uixi: ‘Kiebhi nguma iami, ua ngi sange kiá?’—1 Jisobha 21:20.

O izuelu ia Akabe ia londekesa kuila muéne uexile kióua mu ima iiadi. Kia dianga, mu kuzuela: ‘Ua ngi sange kiá’ kua Elija, Akabe ua londekesa kuila muéne uexile kifôfo mu ukexilu ua nzumbi. Jihova ua mu ‘sangele’ kiá. Muéne ua muene kiá Akabe ku zanga o ujitu uê ua ku sola kia uabha mu kiki kia iibha ni ku sanguluka ni ndunge ia iibha ia tele Jezabele. Nzambi ua mono ku muxima ua Akabe, kuila muéne ua betele ku zola o jimbongo, o kulondekesa henda, mba ku batula mu kidi, ndenge. Kia kaiiadi, mu kuixana Elija: “Kiebhi nguma iami?” Akabe ua londekesa o unguma uê ku muthu uexile kamba dia Jihova Nzambi, ueji tena ku mu kuatekesa ku vutuka ku dima, ni ku bhanga o kima kia tokala.

Tu tena ku di longa madisá avulu mu phangu ia Akabe. Tua tokala ku di lembalala kuila Jihova Nzambi, u mona ioso i tu bhanga. Mukonda dia ku kala Tata ietu ia henda, muéne u mona kioso ki tua mu kaiela o njila ia iibha, iu ua mesena kuila tu kaiela o njila ia tokala. Phala ku tu kuatekesa,  saí ithangana muéne u tuma o makamba mê—athu a fiiele, kala Elija, ku ambata o Mak’â Nzambi ku akuâ. Kiluezu kia dikota ku banza kuila o makamba a Nzambi, nguma jetu!—Jisálamu 141:5.

Xinganeka Elija ku tambuijila Akabe: ‘Nga ku sange muene.’ Muéne uejidile se Akabe uexile muthu ua kídifua kiahi—muéne uexile muii, kijibhangânga, mukua ku bhukumukina Jihova Nzambi. Elija ua suínine kiavulu phala kuzuela ni diiala diodio dia iibhile! Elija ua zuela ihi ieji bhanga Nzambi kua Akabe. Jihova uejidile ioso ia kexile mu bhita—o kuiibha kua kexile mu di muanga ku muiji uoso ua Akabe ni ku tula ué ku athu a mukuá. Kienhiki Elija ua zuela Akabe kuila Nzambi ua mu tumu ku “vuza,” mba ku jibha o mbutu iê ioso. Jezebele eji mu jibha uê.—1 Jisobha 21:20-26.

Elija ua kexile mu londekesa kuila uoso u bhanga o ima ia iibha, a mu fundisa. Maji athu avulu lelu ki kiene kia banza. O musoso iú ua Bibidia u tu lembalesa kuila Jihova Nzambi ka mona ngó ioso ia mu bhita, maji muéne u fundisa mu kithangana kiê kia tokala. Muéne u tu kanena mu Mak’â mê kuila, kua kambe ngó bhofele, o kizuua ki kiza kia muéne ku zubha o kuiibha kuoso ku mundu! (Jisálamu 37:10, 11) Maji nange u dibhudisa: ‘O kuila o kufundisa kua Nzambi, ku kaxtikala ngó? Ki kua lungu ué ni kulondekesa henda?’

Nange Elija ua diuanene kiavulu mu ku mona o ukexilu ua Akabe kioso kiévu o kifundisu kia Nzambi. O Bibidia i zuela: ‘Kia zubha Akabe kuívua o maka enhá, u tandujula o izuatu iê anga u zuata dikuba ku mukutu uê, anga u jila; anga u zeka jinga ni dikuba, ni kuenda ni ku tululuka kuoso, ni ku dijingununa.’ (1 Jisobha 21:27) O kuila Akabe ua diele o ukexilu uê ua iibha?

Ki tuejiia kiambote se muéne ua lungulula bhofele o ukexilu uê ua iibha. Akabe ua di tuluile bhu pholo ia Nzambi—sumbala kima kia bhonzo phala muthu mukua ku di zangeleka ni mukuá undanda. Maji o kuila muéne ua diele muene ni kidi kioso? Tu xinganeke o sobha ua betele mu kuiibha Akabe ndenge—Manasa. Kioso Jihova kia kaxtikala Manasa, muéne ua di tulula bhu pholo ia Nzambi, ua di kola kua Jihova phala ku mu kuatekesa. Maji ua bhange dingi kima kiéngi. Muéne ua lungulula o muenhu uê mu ku bula o iteka ioso ia bhangele, ua bhange nguzu phala ku sidivila Jihova iu ua suínisa o mundu ku bhanga ué kiki. (2 Malunda 33:1-17) O kuila Akabe ua bhange o ima íii? Kana.

O kuila Jihova ua mono o ku luuala kua Akabe? Jihova uambela Elija: “Eie Akabe kua mu mono kuila uala ku ditululula bhu pholo iami, mukonda-phe ua di tululula bhu pholo iami, uíndua iú u nga tange ku mu bhanga ki nga-nda ku u bheka mu izuua iê, kana; nga kà u bheka-phe mu izuua ia mon’ê ku thandu dia dibhata diê.” (1 Jisobha 21:29) O kuila Jihova ua kexile mu loloka Akabe? Kana, mukonda Nzambi u loloka ngó o muthu ua diela ni muxima uoso o ituxi ia te. (Izekiiele 33:14-16) Maji kuma Akabe ua londekesa bhofele kuila ua diele o ituxi ia tele, Jihova ua mu londekesa ué henda. Akabe keji mona o muiji uê uoso o ku u buika.

Maji Jihova ka lungulula o kibanzelu kiê kia ku fundisa Akabe. Mu ku bhita thembu, Jihova ua di bhongolola ni ji-anju jê mu ku sota ndunge iambote ia ku kuata Akabe mu ita ni ku mu jibha. Kienhiki, Jihova ua fundisa Akabe. Akabe a mu kuama kiavulu mu ita, anga u kala mu mbomba manhinga avulu iu uafú mu dikalu diê. O Bibidia i zuela: Kioso o dikalu dia sobha kia di sukula, o jímbua ja lese o manhinga a sobha. Mu kiki, o izuelu ia Jihova ia tange kua Elija ia dikumbidila: “Bhu kididi bhua lesela jímbua o manhinga ma Nabote, jímbua ué bhene bhu ja kà lesela o manhinga mé!”—1 Jisobha 21:19; 22:19-22, 34-38.

Phala Elija, Ilizeu ni selevende ja mukuá ja Nzambi, o kufuá kua Akabe kua londekesa kuila Jihova ka jimbile o ku suína ni kixikanu kia londekesele Nabote. Mu ku iuka kuê, Jihova nuka u kamba ku fundisa o athu a iibha mu kithangana kia tokala ni kuila se ku bhinga muéne ulondekesa henda mu kufundisa o athu. (Dialuilu 14:18) Kiki kia suínisa kiavulu Elija ua kolokotele mu mivu iavulu mu utuminu ua sobha ia iibha! A ku bhangele kiá ima ia iibha? Ua mesenene kuila Nzambi u batula o maka mu ukexilu ua tokala? Kima kiambote ku kaiela o phangu ia kixikanu kia Elija. Ni múkuatekexi uê Ilizeu, muéne ua suluka mu ku boka o njimbu ia Nzambi ni ku kolokota sumbala ni kuiibha!