IBHWIDISU IBHANGA O MINZANGALA
Kutangesa—Mbandu 1: O Kwila Ngala Kya Pholondo Phala Kutangesa?
Mu milongi yiyi
O kutangesa ihi?
Amoxi amona kwila o kutangesa kutonoka ngo. Maji mu milongi yiyi, “o kutangesa” kifwa o kithangana kya kwila o diyala ni muhatu andala kukazala, amona se anda tena kudibhana kyambote mu ukaza mba kana. Kifwa o kuditangesa ki kithangana kya kutonoka, kana. Ki ukexilu ngo wa kwila atuwabhela kwala diyala mba kwala muhatu.
Mukubhita thembu, o diyala ni muhatu amuditangesa atokala kusola se andakazala mba andadixisa. Se wamateka kutangesa, watokala kukala pholondo phala kudibhana ni njila jiyadi jiji.
Ijiya-kyu kwila: Se wamudivwa kwila wala kya pholondo phala kutangesa, watokalaphe ukala we pholondo phala kukazala.
O kuditangesa sé kumesena kukazala, kwadifu ni muthu uya kubhinga salu maji mbe mu kidi ngwaye kukalakala
O kwila wala kya pholondo phala kutangesa?
Se wamutangesa kiki kilombolola kwila wamesena kukazala, mukiki kima kyambote kutonginina se idifwa yebhi iwala nayu. Mukifika, tala o jipondo jiji:
Ukamba ku mwiji. Kyebhi ki wene mutalatala o jitata ni jiphange jé—bengebenge kyoso ki ukala ni njinda. Kiki kyanda kukwatekesa kumona se kyebhi kiwanda talatala kaza dyé kuhádya.
Ihi izwela o Bibidya: “Ehenu o unguma woso, o kutema, o njinda, o kudikolakola, ni jindaka, ni kuyibha kwoso.”—Efezu 4:31.
Dibhwidise: ‘O kwila o jitata jami ni jiphange jami ejiya kwila ngene mu atalatala kyambote ni kuxila kwoso? Se kingixikina ku ima yamuzwela ene, o kwila ngilenduka mu kuzwela inga ngifutuluka?’
Se kwamutena kubatula maka ni mwiji wé, o kwila wanda tena kubatula o maka ni kaza dyé
Kuta o vondadi ya akwetu kupholo. Kyoso kiwanda kazala, wanda bhinga kuxinganeka se ihi yamesena kaza dyê, mu ithangana yavulu wanda bhinga kuta o vondadi ya kaza dyé kupholo.
Ihi izwela o Bibidya: “Kala muthu ka suluke mu kusota o mbote yê, maji asote o mbote ya akwâ.”—1 Kolindu 10:24.
Dibhwidise: ‘O kwila ithangana yoso ngene mujijidika kwila o ima ibhita ngo kala kingamesena? O kwila akwetu angimona kwila ngabhonzo kyavulu? Mu mawukexilu ebhi ungene mulondekesa kwila ngene muta o vondadi yakwetu kupholo?’
Kulenduka. Makaza ambote axikina kwila alweza anga adiloloka.
Ihi izwela o Bibidya: “Etu enyoso twene mulweza.”—Tiyaku 3:2, nota.
Dibhwidise: ‘O kwila ngene muxikina kwila ngalweza inga ngene mudizokela? O kwila ngene muluwala kyoso kya ngibazela kwala akwetu?’
Kitadi. Se ungastala o kitadi ni unjimu ki wanda dibhana ni maka avulu kala kyene mudibhana nau makaza avulu, mukonda dya kukamba kungastala kyambote o kitadi.
Ihi izwela o Bibidya: “Nanyi mudyenu mu kumesena kutunga sabhalalu, kaxikama hanji phala kuxinganeka, n’a mone se wala ni kitadi kyasoko phala ku izubha?”—Luka 14:28.
Dibhwidise: ‘O kwila ngene mungastala kyambote o kitadi, inga ngene mudita mu makongo avulu? Kyebhi kingene mulondekesa kwila ngitena kungastala o kitadi ni unjimu?’
Sawidi mu nzumbi. Se u Mbangi ya Jihova, okwila wene muya ku Yônge ya Jikidistã ni kudilonga o Bibidya kizuwa ni kizuwa.
Ihi izwela o Bibidya: “Azediwa yó ejiya kwila abhindamena Nzambi.”—Matesu 5:3.
Dibhwidise: ‘O kwila ngene mubhanga nguzu phala kukolesa o kixikanu kyami? O kwila o ubhezelu wami kyene o kima kyabeta dingi kota ku mwenyu wami inga ngene muta ima yengi kupholo?’
Ijiya-kyu kwila: O muthu u wanda kazala nê watokala kukala ni diyala mba muhatu wambote. Se u bhanga nguzu phala kukala u muthu wambote, wanda tena kusanga we muthu wambote kala eye.