Наве Хԝәде Чь йә? Бь Кʹьтеба Пироз, Хԝәде хԝәха наве хԝә мәрʹа әʹйан дькә у дьбежә кӧ наве ԝи Йаһоԝа йә (Ишайа 42:8). Әв наве Хԝәде ԝәкә 7 000 щара дь Кʹьтеба Пирозда дькарьн бьвиньн. Ле гәләк ԝәлгәрʹандьнед Кʹьтеба Пирозда дәԝса наве Йаһоԝа сәрнаве ӧса һатьнә хәбьтандьне, ча «Хӧдан». Хԝәде дьхԝазә кӧ әм бьбьнә достед ԝи, ләма жи әԝ мә һелан дькә «наве Ԝи һьлдьн» (Зәбур 105:1).

Сәрнавед Йаһоԝа. Кʹьтеба Пироз сәр Йаһоԝа сәрнавед ӧса дьдә хәбате ча, «Хԝәде», «Һьмзор», «Әʹфьрандар», «Бав», «Хӧдан», у «Һәри Жорьн». Гәләк дӧайед Кʹьтеба Пирозда, Йаһоԝа бь сәрнавед ӧса һатийә навкьрьне, кӧ ԛәдьр у наве ԝийи шәхси әʹйан дькьн (Данийел 9:4).

 Хԝәде Йәки Ча нә. Хԝәде кәсе рʹӧһʹани йә (Йуһʹәнна 4:24). Кʹьтеба Пироз дьбежә, ԝәки «т′ӧ кәси т′ӧ щар Хԝәде нәдитийә» (Йуһʹәнна 1:18). Кʹьтеба Пироз ӧса жи һәстед ԝи мәрʹа әʹйан дькә. Мәрьв бь кьред хԝә дькарьн дьле ԝи йан бешиньн йан жи ша кьн (Мәтʹәлок 11:20; Зәбур 78:40, 41).

Һӧнӧред Хԝәде. Хԝәде фьрԛийе накә ортʹа мәрьва (Кʹаред Шандийа 10:34, 35). Әԝ «Хԝәдейе р′ә′м у к′әрәме, сәбьр-ськ′ане, бь һ′ӧб у амьнийеда хьнейо» (Дәркʹәтьн 34:6, 7). Хенщи ԝе йәке, чар һӧнӧред Хԝәдейи сәрәкә һәнә.

Ԛәԝат. Әԝ «Хԝәдайе Һьмзор ә», у ԛәԝата ԝи бесинор ә. Әԝ һʹәму созед хԝә тинә сери (Дәстпебун 17:1).

Билани. Биланийа Хԝәде бесинор ә. Кʹьтеба Пироз дьбежә, ԝәки тʹәне әԝ ә йе һәри билан у сәрԝахт (Рʹомайи 16:27).

Һәԛи. Хԝәде тʹьме ԝе йәке дькә, чь кӧ рʹаст ә. Кьред ԝи «кʹамьл» ьн, у «нәһәԛи щәм ԝи т′ӧнәйә» (Ԛануна Дӧщари 32:4).

Һʹьзкьрьн. Кʹьтеба Пироз дьбежә, ԝәки «Хԝәде һ′ьзкьрьн ә» (1 Йуһʹәнна 4:8). Хԝәде нә тʹәне һʹьзкьрьне дьдә кʹьфше, ле Әԝ хԝәха канийа һʹьзкьрьне йә. Һʹьзкьрьна ԝи һʹӧкӧм дьбә ль сәр һʹәму кьред ԝи, у әв йәк һʹәму алийава мәрʹа кʹар ә.

Достийа Хԝәде Тʹәви Мәрийа. Хԝәде Баве мәйи әʹзмана йә (Мәтта 6:9). Һәрге әм баԝәрийа хԝә һьндава ԝида дьдьнә кʹьфше, әм дькарьн бьбьнә достед ԝи (Зәбур 25:14). Бь рʹасти, Хԝәде мә тʹәглиф дькә кӧ незики ԝи бьн, дӧа бькьн у «һәму хәмед хԝә бавежьн сәр ԝи, чьмки әԝ бона» мә «хәм дькә» (1 Пәтрус 5:7; Аԛуб 4:8).

Иса Кӧрʹе Хԝәде йә. Хԝәде хԝәха Иса әʹфьрандийә, у Иса тʹӧ щар нәдьфькьри кӧ әԝ у Хԝәде йәк ьн. Әԝ йәки мәхсус ә, чьмки бь дәсте Хԝәде һатийә әʹфьрандьне. Ләма жи Кʹьтеба Пироз сәр ԝи дьбежә, Кӧрʹе Хԝәде (Йуһʹәнна 1:14). Паши әʹфьрандьна Иса, Йаһоԝа бь аликʹарийа ԝи чаԝа һостә, һәр тьштед дьн әʹфьрандьн (Мәтʹәлок 8:30, 31; Колоси 1:15, 16).

 Иса тʹӧ щара нәдьгот кӧ әԝ Хԝәде йә. Иса гот: «Чьмки әз жь ԝи [жь Хԝәде] мә у әԝи, әз шандьмә» (Йуһʹәнна 7:29). Чахе Иса тʹәви шагьртәки хԝә хәбәр дьда, әԝи гот, дьчьм щәм «Баве хԝә у щәм Баве ԝә, щәм Хԝәдейе хԝә у щәм Хԝәдейе ԝә» (Йуһʹәнна 20:17). Паши мьрьна Иса, Йаһоԝа әԝ сах кьр бона жийина ль әʹзмен, у һʹӧкӧмтийа мәзьн да дәсте ԝи, алийе Хԝәйи рʹасте (Мәтта 28:18; Кʹаред Шандийа 2:32, 33).

Иса Дькарә Али Тә Бькә, Незики Хԝәде би

Иса һатә сәр әʹрде, сәва кӧ мә дәрһәԛа Баве хԝә һин кә. Йаһоԝа хԝәха дәрһәԛа Иса гот: «Әв ә Кӧр′е мьни дәлал! Гӧһдарийа ԝи бькьн!» (Марԛос 9:7). Иса жь һʹәмушка баштьр Хԝәде нас дькә. Әԝи гот: «Кәсәк ньзанә Кӧр′ к′и йә, пештьри Баве у кәсәк ньзанә Бав к′и йә, пештьри Кӧр′ у йед кӧ Кӧр′ бьхԝазә ԝанва Баве бьдә наскьрьне» (Луԛа 10:22).

Иса бь кʹамьли һӧнӧред Хԝәде әʹйан дькә. Иса гәләк рʹьнд чʹәʹв дьда һӧнӧред Баве хԝә. Әԝи гот: «Йе кӧ әз дитьмә, Бав дитийә» (Йуһʹәнна 14:9). Иса мәрьв бәрбь Хԝәде дьани, бь ве йәке кӧ һʹьзкьрьна Баве хԝә бь гьли у кьред хԝә әʹйан дькьр. Әԝи гот: «Т′әне пе мьн йәк дькарә бе щәм Баве» (Йуһʹәнна 14:6). Әԝи ӧса жи гот: «Йед р′аст дьһ′әбиньн ԝе бь р′ӧһ′ у р′астийе Баве бьһ′әбиньн, чьмки Бав йед аһа дьһ′әбиньн дьгәр′ә» (Йуһʹәнна 4:23). Дә бьдә һʹәсабе хԝә, ԝәки Йаһоԝа мина тә дьгәрʹә ԝан мәрийа, кʹижан кӧ дьхԝазьн рʹастийе дәрһәԛа ԝи пебьһʹәсьн.