1-3. а) Мәсиһийа ча данә кʹьфше кӧ әԝана гәләк дьхԝазьн тʹәвайи тʹоп бьн? (Бьньһерʹьн шькьле әʹԝльн.) б) Әме чь шеԝьр кьн ԝе тʹемайеда?

ЧАХЕ Корина 17 сали бу, дийа ԝе аксор кьрьн у шандьнә лагере у ԝедәре хәбата гьран ԝе дьданә кьрьне. Һьнә ԝәʹдә шунда Корина жи жь мала ԝе һʹәзара километра дур шандьн Сибире. Ԝедәре әԝ чаԝа дил бу, у щара зоре ԝе дькьрьн кӧ багәра ԛайимда бь кʹьнще тәньк бьхәбьтә. Рʹаст ә һʹал гәләк чәтьн бу, ле йәкә Корина у хушкәкә дьн сафи кьрьн һәрʹьн щьвине.

² Корина гьли дькә: «Еваре мә хәбата хԝә һишт, у чунә щийе сәкьнандьна трене, кʹижан кӧ 25 километра дур бу. Трен рʹедькʹәт шәв сьһʹәта дӧда у әм шәш сьһʹәта рʹеда бун. Паши ԝе йәке әм 10 километр ньга чун гьһиштьнә щьвине». Ле гәло һежа бу кӧ һаԛас щәфа бькʹьшиньн? Корина гьли дькә: «Сәр щьвине әм «Бьрща Ԛәрәԝьлийе» дәрбаз бун у мә кʹьламед Пʹадшатийе стьра. Әԝе йәке әм гәләк гәш кьрьн у баԝәрийа мә ԛәԝи кьр». Рʹаст ә әԝ дӧ хушк се рʹожа сәр щийе хәбате нибун, ле йәкә менещера ве кʹархане нә жи тʹәхмин кьр.

 ³ Щьмәʹта Йаһоԝа һәртʹьм ԛимәт дькьр әԝ мәщал, кӧ тʹәви һәв тʹоп бьн. Паши ԝе йәке ча щьват һатә сазкьрьне, пәйчуйед Иса «тʹьме . . . ль һәв дьщьвийан» (Кʹар. Шанд. 2:42). Бәле, тӧ жи дьбәкә ԝәк ԝан дьхԝази тʹьме бейи сәр щьвине. Ле һәр Мәсиһи рʹасти чәтьнайа тен. Жь бо хәбата хԝә, гәләк шьхӧла, у хәмед дьн, дькарә чәтьн бә һәртʹьм бенә щьвине. Ле чь ԝе али мә бькә кӧ ԝан чәтьнайа алт кьн, у һәртʹьм бенә щьвине? ^[1] Чаԝа әм дькарьн али ԝан бькьн тʹәви кʹе әм һинбуна Кʹьтеба Пироз дәрбаз дькьн у ӧса жи али йед майин, сәва бьвиньн чьԛас фәрз ә бенә щьвате? Ве тʹемайеда әме шеԝьр кьн дәрһәԛа һʹәйшт мәʹнийа кӧ чьрʹа әм гәрәке тʹәвайи тʹоп бьн. Әԝан мәʹнийа әм дькарьн пʹарәвәкьн сәр се пʹара: әм чь кʹаре дьстиньн чахе тенә щьвине, ча сәр мәрьвед дьн һʹӧкӧм дьбә чахе әм тенә щьвине, у ӧса жи ча сәр Йаһоԝа һʹӧкӧм дьбә. ^[2]

4. Чаԝа щьвин али мә дькә һе зедә дәрһәԛа Йаһоԝа пебьһʹәсьн?

⁴ Щьвин мә һин дькьн. Һәр щьвин али мә дькә һе зедә пебьһʹәсьн дәрһәԛа Хԝәдейе мә Йаһоԝа. Мәсәлә, ԝан пашԝәхтийа гәләк щьватада кʹьтеба бь наве «Незики Хԝәде бә» дәрбаз дьбун. Һинбуна дәрһәԛа һʹӧнӧред Хԝәде у щабед хушк-бьред мә, һе ԛәԝи дькьн һʹьзкьрьна мә һьндава Баве мәйи әʹзмана. Әм ӧса жи занәбуна хԝә һьндава Хәбәра Хԝәде зедә дькьн, ԝи чахи гава гӧһ дьдьн тʹемайа, тʹәмаша у хԝәндьна Кʹьтеба Пироз (Нәһәм. 8:8). Мәсәлә, бьфькьрә дәрһәԛа ԝан хьзнед рʹӧһʹани, кʹижан тӧ педьһʹәси һәр һʹәфти чахе һазьр дьби бона хԝәндьна Кʹьтеба Пироз щьватеда у сәр щьвате дьбьһейи фькьред жьбарти!

5. Чаԝа щьвина али тә кьрьн кӧ бьди хәбате чь кӧ жь Кʹьтеба Пироз пеһʹәсийайи у хьзмәтийа хԝә һе баш ки?

⁵ Щьвин мә һин дькьн кӧ ча принсипед Кʹьтеба Пироз бьдьнә хәбате әʹмьре хԝәда (1 Тʹеслн. 4:9, 10). Һинбуна «Бьрща Ԛәрәԝьлийе» ԛә һелан дайә тә кӧ хьзмәткьрьнеда һе зедә бона Йаһоԝа бьки, һазьр би бьбахшини хушк-бьра у дӧайед хԝә һе баш ки? Щьвина мәйә һәр һʹәфти «Мина Иса Мәсиһ Бьжин у Хьзмәт кьн», мә һин дькә кӧ чаԝа хьзмәтийа хԝә һе баш кьн. Ӧса жи әм педьһʹәсьн кӧ чаԝа мьзгине бәла кьн, у ча һе керһати йед дьн һин кьн дәрһәԛа принсипед Кʹьтеба Пироз (Мәт. 28:19, 20).

6. Щьвинед мә ча мә гәш дькьн у али мә дькьн кӧ ԛәԝи бьминьн?

⁶ Щьвин мә гәш дькьн. Әԝ дьнйа дькарә мәжуйе мә бьԝәстинә, у емосйалида у рʹӧһʹанида сьст кә. Ле щьват мә ԛәԝи дькьн у мә гәш дькьн. (Бьхунә Кʹаред Шандийа 15:30-32.) Сәр гәләк щьвина әм шеԝьр дькьн дәрһәԛа ԝе йәке, кӧ ча пʹехәмбәртийед жь Кʹьтеба Пироз тенә сери. Әԝ йәк баԝәрийа мә ԛәԝи дькә, кӧ Йаһоԝа чь соз дайә мә бона ахьрийе, әԝ соз жи ԝе әʹсә бенә сери. Бәле, әм ӧса жи гәләк ԛәԝи дьбьн чахе бьра пе готара дәртен. Ле щьватеда диса хушкбьред дьн жи мә дьшьдиньн, мәсәлә пе щабед хԝә, йан чахе пе дәрса дәртен, у чахе бь дьл кʹьлама дьстьрен (1 Корн. 14:26). У ӧса жи чахе әм тʹәви хушк-бьра хәбәрдьдьн пешийа у паши щьвине, әм тʹәхмин дькьн кӧ әԝана бона мә хәм дькьн у әм гәш дьбьн (1 Корн. 16:17, 18).

7. Чьрʹа гәләк фәрз ә бенә сәр щьвина?

⁷ Сәр щьвина әм бьн рʹӧһʹе пирозда ньн. Иса Мәсиһ гот: «Әԝе кӧ гӧһед ԝи һәнә, бьра бьбьһе кӧ рʹӧһʹ чь дьбежә щьвина» (Әʹйан. 2:7). Бәле, Иса бь рʹӧһʹе пироз рʹебәрийа щьвата Мәсиһийа дькә. Мәрʹа рʹӧһʹе пироз лазьм ә, сәва әм  бькарьбьн щерʹьбандьнада тәйах кьн, бь мерхаси хьзмәт кьн, у ӧса жи сәва сафикьрьнед рʹаст бькьн. Ләма жи әм гәрәке һәр тьшти бькьн, ԝәки һәртʹьм һәрʹьнә щьвине, сәва кӧ рʹӧһʹе пироз бьстиньн.

8. Чахе хушк-бьред мә дьвиньн кӧ әм тенә щьвина, у ча щабед хԝә дьдьн, у дьстьрен, әԝ йәк чьда али ԝан дькә? (Ӧса жи бьньһерʹә чаргошә бь наве «Әԝ Тʹьме Паши Щьвате Хԝә Баш Тʹәхмин Дькә».)

⁸ Щьвин мәщале дьдьнә мә, сәва кӧ әм хушк-бьрарʹа һʹьзкьрьна хԝә бьдьнә кʹьфше. Бьфькьрә дәрһәԛа чәтьнайед хушк-бьред щьвата хԝәда. Паԝлосе шанди гот: «Бьра әм бона һәвдӧ хәм бькьн». Паши ԝе йәке Паԝлос шьровәдькә, кӧ әм дькарьн дьлбинийе бьдьн хушк-бьра, һәрге әм «дәст жь льһәвщьвине нәкʹьшиньн» (Ибрн. 10:24, 25). Һатьна тә ль сәр щьвине дьдә кʹьфше кӧ тӧ дәрһәԛа хушк-бьра дьшьрмиш дьби у һазьр и ԝәʹде хԝә бона ԝан хәрщ ки, гӧһ бьди ԝан у бона ԝан хәм ки. У ӧса жи чахе тӧ бь дьл у щан щаба хԝә дьди у кʹьлама дьстьрейи, бь ԝе йәке тӧ хушк-бьра ԛәԝи дьки (Колс. 3:16).

9, 10. а) Шьровәкьн кӧ ча гьлийед Иса Йуһʹәнна 10:16-да, али мә дькьн фәʹм кьн кӧ чьԛас фәрз ә тʹәви хушк-бьра тʹоп бьн. б) Һәрге әм тʹьме тенә сәр щьвине, бь ве йәке әм ча дькарьн али ԝан бькьн, йед кӧ алийе нәфәре хԝәда һатьнә инкʹаркьрьне?

⁹ Щьвин мә хушк-бьра тʹәвайи дькә йәктийе. (Бьхунә Йуһʹәнна 10:16.) Иса хԝә бәрамбәри шьван кьр, ле шагьртед хԝә бәрамбәри кәрийед пез кьр. Һәла дьшьрмиш бә дәрһәԛа ԝе йәке: Һәгәр дӧ пәз сәр тʹәпә нә, дӧдӧ чоле нә, йәк жи щики дьн ә, гәло әм әван пенщ пәза дькарьн һʹәсаб кьн ча кәрийе пез? Тʹәбийәти йә ԝәки кәрийе пез гәрәке тʹәви һәв бьн, бьн рʹебәрийа шьванда. Бь ԝи щурʹәйи һәрге әм жи хԝә жь хушк-бьра дур дьгьрьн, әме нькарьбьн пәй Шьване хԝә һәрʹьн. Әм гәрәке тʹәви Мәсиһийа тʹәвайи тʹоп бьн, сәва бьбьнә пʹара «кәрик» пез, бьн рʹебәрийа «шьванәки».

¹⁰ Чахе әм тенә щьвине, бь ԝе йәке әм йәктийе тʹәви хушк-бьра хԝәй дькьн (Зәб. 133:1). Һьнә хушк-бьред мә сәва рʹастийе һатьнә инкʹаркьрьне жь де-баве хԝә, йан жь хушк-бьред хԝәйи һәлал. Ле Иса соз дайә ԝан, кӧ малбәта рʹӧһʹани бьдә ԝан, кʹижан кӧ ԝе ԝана һʹьз кә у бона ԝан хәм кә (Марԛ. 10:29, 30). Демәк чахе һун һәртʹьм тенә щьвине, һун дькарьн бона ԝан хушкбьред дәлал бьбьнә де, бав, хушк, йан бьра! Чахе әм дәрһәԛа ԝе йәке дьфькьрьн, гәло әм һелан набьн кӧ тʹьме бенә щьвине?

11. Чаԝа һатьна мә сәр щьвине мәщале дьдә мә бьдьнә Йаһоԝа чь кӧ әԝ һежа йә?

¹¹ Чахе әм тенә щьвине, әм дьдьнә Йаһоԝа әԝе йәке чь кӧ әԝ һежа йә. Чаԝа Әʹфьрандаре мә, Йаһоԝа һежайи пәсьна, һӧрмәте, рʹумәте у рʹазибуне йә. (Бьхунә Әʹйанти 7:12.) Гава әм щьвинеда дӧа дькьн, кʹьлама дьстьрен, у дәрһәԛа Йаһоԝа хәбәрдьдьн, әм дьдьнә ԝи әԝе йәке чь кӧ һежайи ԝи йә, демәк әм ԝи дьһʹәбиньн. Әм гәләк ԛимәт дькьн ԝи ԛәдьри, кӧ дькарьн пәсьна бьдьнә Ԝи, кʹижан кӧ гәләк тьшт кьрийә бона мә.

12. Йаһоԝа ча дьньһерʹә сәр мә, чахе дьвинә кӧ әм гӧрʹа тʹәмийа ԝи дькьн у дьчьнә щьвине?

¹² Йаһоԝа ӧса жи һежа йә кӧ әм гӧрʹа ԝи бькьн. Әԝи тʹәми дайә мә, кӧ щьвине бәрнәдьн, илаһи ԝан рʹожед хьлазийеда. Чахе әм бь һазьрбуне гӧһ дьдьнә ԝе тʹәмийе, Йаһоԝа ша дьбә (1 Йуһʹн. 3:22). Әԝ дьвинә у ԛимәт дькә ԛәԝата мә, йа кӧ әм дьдьн хәбате сәва тʹьме һәрʹьн щьвине (Ибрн. 6:10).

13, 14. Чахе әм тенә щьвина, әм ча незики Йаһоԝа у Иса дьбьн?

¹³ Чахе әм тенә сәр щьвате бь ве йәке әм нишан дькьн, кӧ дьхԝазьн незики Йаһоԝа у Кӧрʹе ԝи бьн. Щьвинеда Һинкʹаре мәйи гьринг бь сайа Хәбәра хԝә мә һин дькә (Иша. 30:20, 21). Һәла һе йед нәбаԝәрмәнд жи, кӧ тенә сәр щьвине дьбежьн кӧ «Хԝәде нав ԝәда йә!» (1 Корн. 14:23-25). Йаһоԝа бь рʹӧһʹе хԝәйи пироз щьвине кʹәрәм дькә у әԝ һинкьрьна кӧ әм дьстиньн жь Хәбәра ԝийә. Ль сәр щьвине әм гӧһ дьдьнә хәбәред Йаһоԝа у тʹәхмин дькьн һʹьзкьрьна ԝи. Бь ԝи щурʹәйи әм незики ԝи дьбьн.

¹⁴ Иса гот: «Кʹидәре дӧ йан се мәрьв бь наве мьн бьщьвьн, әз ль ԝьр нава ԝанда мә» (Мәт. 18:20). Әԝ йәк Иса дәрһәԛа щьвате гот. Сәре щьвине Мәсиһ нава щьвата щьмәʹта Хԝәдеда «дьгәрʹә» (Әʹйан. 1:20–2:1). Дәрһәԛа ԝе йәке бьфькьрә! Йаһоԝа у Иса мә ԛәԝи дькьн бь сайа щьвина. Ча тӧ дьшьрмиш дьби, Йаһоԝа чь тʹәхмин дькә чахе дьвинә, кӧ әм дьхԝазьн незики ԝи у Кӧрʹе ԝи бьн?

15. Ча һатьна мә сәр щьвате дьдә кʹьфше, кӧ әм дьхԝазьн гӧрʹа Хԝәде бькьн?

¹⁵ Һатьна мә ль сәр щьвине нишан дькә, кӧ әм пьштгьрийа һʹӧкӧмәтийа Хԝәде дькьн. Рʹаст ә Йаһоԝа тʹәмийе дьдә мә кӧ әм һәрʹьн щьвине, ле әԝ тʹӧ щар зоре мә накә (Иша. 43:23). Ләма жи әм чахе әм сафи дькьн кӧ гӧрʹа ԝи бькьн, демәк бенә сәр щьвине, әм дьдьнә кʹьфше кӧ Йаһоԝа бь дьл у щан һʹьз дькьн, ԛәдьре һʹӧкӧмәтийа ԝи дьгьрьн (Рʹом. 6:17). Мәсәлә, мәзьне хәбате дькарә жь мә дәʹԝа кә, ԝәки дәԝса кӧ әм һәрʹьнә щьвине, әԝи ԝәʹдәйи хәрщ кьн сәва хәбате. Йан дьбәкә һʹӧкӧмәтийа ԝәлат мә бьдә тьрсандьне, кӧ һәгәр әм тʹәви һәв тʹоп бьн сәва хьзмәт кьн, әме йан щьрме бьдьн, йан һәрʹьнә кәле, йан жи тьштед ԝан хьрабтьр. Йан жи дьбәкә дәԝса кӧ һәрʹьнә щьвате, әм дьхԝазьн һеса бьн кӧ ԝәʹдә дәрбаз кьн. Ԝан һәр дәрәщада, әм бәр бьжартьне нә гӧрʹа кʹе бькьн (Кʹар. Шанд. 5:29). Чахе әм дьжберьн кӧ гӧрʹа Йаһоԝа бькьн, әм дьле ԝи ша дькьн (Мәтʹлк. 27:11).

16, 17. а) Әм жь кʹӧ заньн кӧ щьвин бона Мәсиһийед ԛьрʹна йәкеда гәләк фәрз бу? б) Бьре мәйи Щорщ Гангас ча дьньһерʹи сәр щьвине?

¹⁶ Мәсиһийед ԛьрʹна йәкеда, паши ве кʹәрәмәта кӧ сала 33 Д.М. рʹожа Пенщийе Һʹәсабе ԛәԝьми, диса бәрдәԝам дькьрьн дьщьвийан. Ԝана «тʹьме хԝә ль һинкьрьна шандийа дьгьрт, ль һәв дьщьвийан» (Кʹар. Шанд. 2:42).  Ԝи чахи Мәсиһи дьжитьн бьн һʹӧкӧме Рʹоме у сәрԝеред религийа Щьһуйада, у ԝанрʹа нәһеса бу кӧ һәрʹьнә щьвине. Ле йәкә, әԝана тʹьме дьчунә щьвине.

¹⁷ Иро жи гәләк хьзмәткʹаред Йаһоԝа рʹазибуна хԝә дьдьнә кʹьфше бона щьвата. Щорщ Гангас, кʹижан кӧ 22 сала хьзмәт дькьр Кʹома Рʹебәрийеда, гот: «Әʹмьре мьнда тʹопбуйина тʹәви хушкбьра шабун у ԛәԝикьрьна гәләк мәзьн ә бона мьн. Әз һʹьз дькьм зу бемә Ода Щьвате у дәрәнг һәрʹьм, һәрге те сьтандьн. Әз шабунәкә мәзьн дьстиньм, чахе тʹәви щьмәʹта Хԝәде хәбәрдьдьм. Чахе әз нав ԝанда мә, әз тʹәхмин дькьм те бежи әз нав нәфәре хԝәда мә, щьнәта рʹӧһʹанида». Әԝ зедә дькә: «Чаԝа кӧ компос һәртʹьм алийе бакʹуре нишан дькә, бь ԝи щурʹәйи тʹьме фькьр у хԝәстьна мьн ԝи алида йә кӧ һәрʹьмә щьвате».

18. Тӧ чь дьфькьри дәрһәԛа щьвинед мә, у тӧ чь сафи дьки кӧ бьки?

¹⁸ Тӧ жи әԝе йәке сәр хԝә тʹәхмин дьки, чахе әм тʹәвайи тʹоп дьбьн кӧ Йаһоԝарʹа хьзмәт кьн? Һәрге әре, һәр тьшти бькә сәва һәртʹьм бейи сәр щьвине. Бь ԝи щурʹәйи те нишан ки, кӧ тӧ тʹәви гьлийед Даԝьд Пʹадша ԛайил и, кӧ гот: «Әз һʹьз дькьм йа Хӧдан жь мала тә» (Зәб. 26:8, ИМ).