Пьрсед Хԝәндәвана
Ишайа 60:1 бәʹса кʹе дькә, у әԝ чаԝа ‹рʹадьбә› у ‹дьбьрьԛә›?
Ишайа 60:1 ӧса дьбежә: «Рʹабә, бьбьрьԛә! Чьмки рʹонайа тә һат. Рʹумәта Хӧдан сәр тәва һьлат, ИМ». Бь зьмане Ибрани, әв гьли дьбәкә жьнькәкерʹа тенә готьне. Рʹезед дьн нишан дькьн кӧ жьнька симболик әв һәйә бажаре Сийон йан жи Оршәлиме, йа кӧ ԝи чахи пʹайтәхта Щьһудайе бу (Ишайа 60:14; 62:1, 2). Бажар те һʹәсабе тʹәмамийа мьләт. Дәрһәԛа ве рʹезе дӧ пьрс пешда тен: Йа пешьн, кʹәнге Оршәлим ‹рʹабу› у рʹонайа рʹӧһʹани да? Йа дӧда жи, гәло гьлийед Ишайа рʹожед мәда ԝе бь щурʹәки дьһа мәзьн бенә сери?
Оршәлим кʹәнге у чаԝа ‹рʹабу› у рʹонайа рʹӧһʹани да? Гава Щьһу 70 сал дилтийа Бабилонеда бун, бажаре Оршәлиме у пʹарьстгәһ ԝеранкьри мабун. Ле чахе Бабилон кʹәтә дәсте Мәда-Фарьса, Исраелийед жь тʹәмамийа Имперйа Бабилоне ида дькарьбун вәгәрʹьн ԝәлате хԝә у ԝедәре тʹәзәда Йаһоԝа бьһʹәбиньн (Әзра 1:1-4). Жь сала 537 Б.Д.М. һьнә мәрьвед жь 12 әʹшира вәгәрʹийанә ԝәлате хԝә (Ишайа 60:4). Ԝедәре ԝана диса Йаһоԝарʹа ԛӧрбан дьанин у щәжьн дәрбаз дькьрьн. Ӧса жи, ԝана дәстпекьр пʹарьстгәһе ава кьн (Әзра 3:1-4, 7-11; 6:16-22). Рʹумәта Йаһоԝа диса сәр Оршәлимерʹа һьлат, демәк сәр хьзмәткʹаред ԝива. Бь ви щурʹәйи, әԝана бона мьләтед кӧ рʹӧһʹанида тәʹрийеда бун, дьбьрьԛин.
Ле ԝи чахи тʹәне пʹарәкә пʹехәмбәртийа Ишайа һатә сери. Һʹәчʹи зәʹф Исраели гӧһ нәдьданә Хԝәде (Нәһәмийа 13:27; Малахи 1:6-8; 2:13, 14; Мәтта 15:7-9). Сәрда жи, чәнд ԛьрʹнә шунда, ԝана Иса Мәсиһ жи инкʹар кьр (Мәтта 27:1, 2). Сала 70 Д.М.-да, Оршәлим у пʹарьстгәһ диса һатьнә ԝеранкьрьне.
Йаһоԝа пешда дәрһәԛа ве йәке пʹехәмбәрти кьрьбу (Данийел 9:24-27). Әшкәрә йә, кӧ нета Йаһоԝа әв нибу ԝәки һʹәму гьлийед жь Ишайа сәре 60, сәр Оршәлима кӧ сәр әʹрде бу бьһатана сери.
Гәло гьлийед Ишайа рʹожед мәда бь щурʹед дьһа мәзьн ԝе бенә сери? Бәле, ле ижар, гьлийед Ишайа сәр жьнькәкә симболикә дьн, демәк сәр «Оршәлима жорьн», һатьнә сери. Паԝлосе шанди дәрһәԛа ԝе ӧса ньвиси: «Әԝ дийа мә һʹәмуйа йә» (Галати 4:26). «Оршәлима жорьн» пʹара әʹзмани йа тʹәшкиләта Хԝәде йә, йа кӧ жь әʹфринед рʹӧһʹанийә амьн ә. Иса Мәсиһ у 144 000 кәсед бь рʹӧһʹ кʹьфшкьри, йед кӧ мина Паԝлосе шанди бона жийина ль әʹзмана һатьнә бьжартьне, зарʹед ве жьньке нә. Кәсед бьжарти «мьләте бӧһӧрти» йә, кӧ те навкьрьне «Исраела Хԝәде» (1 Пәтрус 2:9; Галати 6:16).
«Оршәлима жорьн» бь сайа зарʹед хԝәйә бьжарти, йед кӧ сәр әʹрде нә, ‹рʹадьбә› у ‹дьбьрьԛә›. Ԝәрә әм тьштед кӧ һатьнә сәре ԝан, бәрамбәри гьлийед кʹьтеба жь Ишайа сәре 60 бькьн.
Гәло Мәсиһийед бьжарти ча ‹рʹабун›? Ԛьрʹна дӧда Д.М.-да, әԝана нава зиԝанед дьжмьнед рʹастийеда хәньԛи бун у кʹәтьбунә тәʹрийа рʹӧһʹани (Мәтта 13:37-43). Бь ви щурʹәйи, әԝана кʹәтьнә дилтийа Бабилона Мәзьн, демәк империйа һʹәмдьнйайе йа религийа ԛәлп. Кәсед бьжарти гьрти ман һʹәта «рʹожед хьлазийа ве дьнйайе», кʹижан кӧ сала 1914-да дәстпебун (Мәтта 13:39, 40). Сала 1919-да, чахе әԝана аза бун, ԝана дәстпекьр мьзгинийе бәла кьн у бь ви щурʹәйи рʹонайа рʹӧһʹани дәстпекьр шәԝԛ бьдә a. Бь сала, мәрьвед жь һʹәму мьләта бәрбь ве рʹонайе дьһатьн. Нав ԝанда кәсед бьжарти жь Исраела Хԝәде жи һәнә, демәк ‹пʹадшед› кӧ Ишайа 60:3 бәʹса ԝан дькә (Әʹйанти 5:9, 10).
Ахьрийеда кәсед бьжарти ԝе бь щурʹе дьһа мәзьн бь сайа рʹонайа Хԝәде бьбьрьԛьн. Гәло чь щурʹәйи? Гава әԝана сәр әʹрде бьмьрьн, сәр әʹзмана әԝана ԝе бьбьнә пʹара «Оршәлима ну», демәк бука Иса Мәсиһ, йа кӧ жь 144 000 кәсед бьжарти йә. У әԝана ԝе тʹәви Иса пʹадшати у кʹаһинтийе бькьн (Әʹйанти 14:1; 21:1, 2, 24; 22:3-5).
«Оршәлима ну» ве роләкә фәрз бьлизә ве йәкеда, кӧ Ишайа 60:1 бе сери (Бәрамбәр кә Ишайа 60:1, 3, 5, 11, 19, 20 у Әʹйанти 21:2, 9-11, 22-26). Чаԝа кӧ бажаре Оршәлиме щийе сәрԝертийе бу у сәр Исраеле сәрԝертийе дькьр, бь ԝи щурʹәйи «Оршәлима ну» у Иса Мәсиһ жи ԝе сәр тʹәмамийа әʹрде сәрԝертийе бькьн. Гәло чь щурʹәйи Оршәлима ну «жь әʹзмен Хԝәдеда дьһатә хԝаре»? Бь ве йәке, кӧ «Оршәлима ну» ԝе бона тʹәмамийа дьнйайе хәм бькә. Мәрьвед хԝәдехоф жь һʹәму мьләта, ԝе «рʹонайа ԝида бьгәрʹьн» у жь гӧнә у мьрьне хьлаз бьн (Әʹйанти 21:3, 4, 24). Чаԝа кӧ Ишайа у пʹехәмбәред дьн готьбун, һәр тьшт ԝе бе тʹәзәкьрьне (Кʹаред Шандийа 3:21). Гава Иса Мәсиһ бу Пʹадша, әԝи дәстпекьр «һәр тьшти ну чекә», у әв шьхӧл ԝе һʹәта хьлазийа Сәрԝертийа Һʹәзарсали бәрдәԝам бә.
a Һәзәԛел 37:1-14 у Әʹйанти 11:7-12 жи бәʹса тʹәзәкьрьна һʹәбандьна рʹаст дькьн. Әв йәк сала 1919-да ԛәԝьми. Һәзәԛел пʹехәмбәрти кьрьбу, кӧ паши дәмәкә дьреж, һʹәму Мәсиһийед бьжарти ԝе жь дилтийа симболик бенә азакьрьне у диса рʹӧһʹанида бьшьдьн. Ӧса жи, Кʹьтеба Әʹйантида һатийә пʹехәмбәртикьрьне дәрһәԛа кʹомәкә бьчʹук йа бьред бьжарти, йед кӧ дәстпекьрьн рʹебәрийа хьзмәткʹаред Хԝәде бькьн паше ве йәке, кӧ жь кәле һатьнә азакьрьне. Сала 1919-да, әԝана ча «хӧламе амьн у сәрԝахт» һатьнә кʹьфшкьрьне (Мәтта 24:45; бьньһерʹә кʹьтеба бь наве Һʹәбандьна Тʹәмьз Йаһоԝарʹа: Шькьр Һатә Вәгәрʹандьн!, рʹупʹ. 118).
