ЧАХЕ Иса шагьртед хԝә һин дькьр кӧ ча мьзгинийе бәла кьн, әԝи ԝанрʹа пешда гот, ԝәки нә һʹәму мәрьв ԝе гӧһ бьдьнә ԝан (Луԛа 10:3, 5, 6). Хьзмәтийа мәда жи әм дькарьн рʹасти мәрьвед ӧса бен, йед кӧ сар у сәрт ьн һьндава мә у һәла һе жи тʹәви мә шәрʹа дькьн. Һьнге мәрʹа дьбәкә чәтьн бә һьндава ԝанда дьлшәԝат бьн.

Мәрьве дьлшәԝат дьвинә чәтьнайи у һʹәԝщед мәрьвед майин, дьле ԝи бона ԝан дьшәԝьтә у дьхԝазә али ԝан бькә. Ле һәрге әм һьндава мәрьва дьле хԝә сар кьн, дьԛәԝьмә әм ӧса жи хьзмәтийеда хирәта хԝә ӧнда кьн у ида нькарьбьн али ԝан бькьн. Чаԝа кӧ дар агьр хԝәй дькә ԝәки венәсә, ӧса жи дьлшәԝати али мә дькә ԝәки әм хирәта хԝә хьзмәтийеда ӧнда нәкьн (1 Тʹеслн. 5:19).

Ле әм ча дькарьн дьлшәԝатийе нав хԝәда пешда биньн, һәла һе жи гава мәрʹа чәтьн ә ве йәке бькьн? Ԝәрә әм шеԝьр кьн мәсәла Йаһоԝа, Иса у Паԝлосе шанди, у пебьһʹәсьн кӧ ча әм дькарьн чʹәʹв бьдьнә ԝан.

Бь һʹәзара сала Йаһоԝа тәйах дькә кӧ мәрьв наве ԝи беһӧрмәт дькьн. Ле йәкә әԝ «бона бешекьра жи, нәрʹаста жи ԛәнщ ә» (Луԛа 6:35). Әв ԛәнщийа ԝи те кʹьфше ве йәкеда, кӧ әԝ һьндава ԝанда бь сәбьр ә. Ле чьрʹа? Чьмки Йаһоԝа дьхԝазә «һʹәму мәрьв» хьлаз бьн (1 Тимтʹ. 2:3, 4). Рʹаст ә хьраби бәр чʹәʹве Хԝәде рʹәш ә, ле мәрьв бона ԝи ԛимәт ьн у әԝ нахԝазә тʹӧ кәс әʹмьре хԝә ӧнда кә (2 Пәт. 3:9).

Йаһоԝа занә ԝәки Шәйтʹан гәләк бь һостәти мәрьва дьхальфинә (2 Корн. 4:3, 4). Гәләк мәрьв жь заротийеда тьштед ԛәлп у дәрәԝ һин дьбьн, у паше әԝ йәк һʹӧкӧм дьбә сәр ԝан у ԝанрʹа чәтьн дьбә рʹастийе ԛәбул кьн. Йаһоԝа гәләк дьхԝазә али ԝан мәрьва бькә. Ле әм жь кʹӧ заньн?

Дина хԝә бьдьне, Йаһоԝа ча дьньһерʹи сәр щьмәʹта Нинәԝайа бәре. Әԝана мәрьвнә гәләк хьраб бун, ле йәкә Йаһоԝа готә Уньс: «Һʹәйфа мьн чаԝа жь ԝи бажаре Нинәԝайа мәзьн нәйе, кӧ нав ԝеда сәд бист һʹәзар мәрьви зедәтьр һәнә, кӧ дәсте чʹәп у рʹасте жь һәв дәрнахьн» (Унс. 4:11). Йаһоԝа заньбу ԝәки әԝана дәрһәԛа ԝи рʹастийе ньзаньн, ләма әԝи Уньс шанд сәва пешда әʹлами ԝан кә.

Әм жи мина Йаһоԝа мәрьва ԛимәт дькьн. Әм дькарьн чʹәʹв бьдьнә ԝи, һәрге бь дьл у щан дьхԝазьн али мәрьва бькьн сәва рʹастийе пебьһʹәсьн һьнге жи, гава әм тʹәхмин дькьн кӧ нахԝазьн гӧһ бьдьнә мә.

Чахе мәрьв мьзгинийа мә ԛәбул накьн, әм жи гәрәке сәр ве дәрәще кʹур бьньһерʹьн у фәʹм кьн чьрʹа әԝана ӧса хԝә дьдьнә кʹьфше.  Һьнәк дьбәкә дәрһәԛа Кʹьтеба Пироз йан жи дәрһәԛа Мәсиһийа нәрʹаст дьфькьрьн, чьмки дьвиньн ԝәки һьнә мәрьвед кӧ хԝә дәԝса Мәсиһийа датиньн, чьԛас тьштед хьраб дькьн. Дьԛәԝьмә һьнәк жи дәрһәԛа баԝәрийа мә тьштед дәрәԝ сә дькьн. Һьнәк жи дьтьрсьн кӧ нәфәред ԝан йан жи мәрьвед дьн, ԝе ԝана бькʹәньн һәрге бьвиньн кӧ әԝана тʹәви мә хәбәр дьдьн.

Һьнә мәрьв йед кӧ хьзмәтийеда рʹасти мә тен, әʹмьре хԝәда дәрд-кӧлед ӧса дитьнә, кӧ гәләк хьраб сәр ԝан һʹӧкӧм буйә. Мисйонерәкә бь наве Ким гьли дькә: «Мьһаләкә мәда гәләк мәрьва шәрʹ дитьнә у һʹәму һәбука хԝә ӧнда кьрьнә. Баԝәрийа ԝан бона ахьрийе тʹӧнә. Әԝана дьлшкәсти нә, тьрседа ньн у итʹбарийа хԝә тʹӧ кәси найньн. Ве мьһаледа, әм тʹьме рʹасти мәрьвед ӧса тен, йед кӧ мьԛабьли мьзгинийа мә нә. Щарәке ԝәʹде хьзмәтийе һәла һе жи мьн данә тьрсандьне кӧ ԝе мьн бькӧжьн».

Ле гәло чаԝа Ким һьндава ԝан мәрьвада диса жи дьлшәԝат дьминә? Әԝ дьбежә: «Чахе тʹәви мьн гәләк һерс ьн, әз Мәтʹәлок 19:11 дькьмә бира хԝә, кʹидәре те готьне: ‹Фәʹме ԛәнщ мерьв жь һерсе пашда дехә›. Әз тиньм бира хԝә ԝәки әԝан мәрьва әʹмьре хԝәда чь дитьнә, у әԝ йәк али мьн дькә дьлшәԝат бьм һьндава ԝан. У бь рʹасти нә һʹәму мәрьв ӧса хьраб ьн. Ве мьһаледа әм сәрледанед дӧбарә дькьн».

Әм дькарьн пьрсе бьдьнә хԝә: «Мьне ча мьзгини ԛәбул кьра һәрге әз дәԝса ԝан бума?» Мәсәлә, дьбәкә мә гәләк щар дәрһәԛа Шәʹдед Йаһоԝа тьштед дәрәԝ бьһистийә. Ԝан дәрәщада дьбәкә мә жи хԝә нәбаш бьда кʹьфше һьндава ԝанда у нә жи лазьм буйа дьлшәԝатийе мәрʹа бьдьнә кʹьфше. Әм гәрәке гьлийед Иса бир нәкьн чахе әԝи гот, кӧ чь кӧ әм дьхԝазьн мәрьв бона мә бькьн, әм жи бона ԝан бькьн. Ԝи щурʹәйи әме мәрьва фәʹм кьн у тʹәви ԝан бь сәбьр бьн һьнге жи, чахе нәһеса йә (Мәт. 7:12).

Паԝлосе шанди һәла һе жи һьндава мәрьвед ӧса кӧ мьԛабьли ԝи дәрдькʹәтьн, дьлшәԝат бу. Ле чьрʹа? Әԝи бир нәдькьр ԝәки бәре әԝ хԝәха ча бу. Әԝи гот: «Әз . . . бәре ль ԝи дькʹьфьрим, әԝ дьзеранд у нәйарти ль ԝи дькьр, ле рʹәʹм ль мьн бу, чьмки мьн нәбаԝәрийеда бь нәзанийа хԝә кьрьн» (1 Тимтʹ. 1:13). Әԝи фәʹм дькьр ԝәки Йаһоԝа у Иса һьндава ԝида рʹәʹмтийа мәзьн данә кʹьфше. Дьбәкә чахе әԝи мәрьвед мьԛабьл дьдитьн, һьнге дьани бира хԝә кӧ әԝ жи бәре ӧса бу.

Щара Паԝлос рʹасти ԝан мәрьва дьһат, йед кӧ һинкьрьнед ԛәлп ԛәԝи баԝәр дькьрьн. Ле  гәло әԝи ча хԝә дьда кʹьфше һьндава ԝан? Кʹаред Шандийа 17:16-да те готьне, ԝәки чахе Паԝлос Атʹинайеда бу, «дьле ԝи нә рʹьһʹәт бу, чьмки дит бажар нава пʹутпʹарьстийеда бу». Ле әԝе йәке рʹе ԝи нәгьрт кӧ ԝанрʹа шәʹдәтийе бьдә (Кʹар. Шанд. 17:22, 23). Әԝи һәр тьшт һьлдьда һʹәсаб у чахе лазьм бу щурʹе һинкьрьна хԝә дьгӧһаст, сәва кӧ һәр дәрәщада бькарьбә һьнәка хьлаз кә (1 Корн. 9:20-23).

Әм жи дькарьн чʹәʹв бьдьнә Паԝлос кӧ ньһерʹандьна мәрьва фәʹм кьн. Демәк дәрһәԛа ԝана чь кӧ әм заньн, бьдьнә хәбате сәва бь һостәти мьзгинийе ԝанрʹа гьли кьн (Иша. 52:7). Хушкәк бь наве Дороти дьбежә: «Мьһала мәда, гәләк мәрьв ӧса тенә һинкьрьне, ԝәки Хԝәде берʹәʹм ә у тʹәне сущдар дькә. Ԝәʹде хьзмәтийе әз пʹайе ԝан мәрьва дьдьм кӧ әԝана Хԝәде баԝәр дькьн, паше дина ԝан дькʹьшиньм сәр Кʹьтеба Пироз кʹидәре те готьне, ԝәки Йаһоԝа чьԛас бь һʹьзкьрьн ә у чь соз дьдә дәрһәԛа ахьрийе».

Әм гәрәке ӧса жи ԝәʹде хьзмәтийе хушк-бьра дьлгәрм кьн. Щесика дьбежә: «Чахе хьзмәтийеда ԛәԝьмандьнәкә хьраб дьԛәԝьмә тʹәви мьн йан жи тʹәви һәвалхьзмәткʹаре мьн, әз дәрһәԛа ве йәке гәләк хәбәр надьм. Дәԝсе, әз хәбәрдана хԝә дьгӧһезьм сәр тьштед позитив, мәсәлә дьбежьм кӧ хьзмәтийа мә чь кʹаре тинә һәрге жи мәрьв мьԛабьли мә нә».

Йаһоԝа һаш жь һʹәму ԝан чәтьнайа һәйә йед кӧ хьзмәтийеда рʹасти мә тен. Әԝ чьԛас ша дьбә чахе дьвинә, кӧ әм дьлрʹәʹмтийеда чʹәʹв дьдьнә ԝи (Луԛа 6:36). Ле әԝ дьлшәԝатийа Йаһоԝа ԝе һәртʹьм нәкʹьшинә. Әм баԝәр ьн ԝәки әԝ занә кʹәнге кʹӧтасийа ве дьнйайе бинә. Ле һʹәта һьнге, гәләк фәрз ә әм хьзмәтийа хԝә дайньн щийе пешьн (2 Тимтʹ. 4:2). Ԝәрә әм бәрдәԝам кьн шьхӧле хԝә биньн сери, кӧ бь хирәт хьзмәт кьн у һьндава һʹәму мәрьва дьлшәԝат бьн.