«Һәр дайина ԛәнщ у һәр пʹешкʹеша кʹамьл жь жор ә, жь Бав, жь Әʹфьрандаре рʹонайа те хԝаре» (Аԛуб 1:17). Әв рʹез дина мә дьдә сәр дьлрʹәмйа Баве мәйи әʹзмана, демәк Йаһоԝа Хԝәде. Нава гәләк пʹешкʹешада кӧ Хԝәде дайә инсанәте, һәйә пʹешкʹешәкә лап муһим. Гәло әԝ чь йә? Дь Йуһʹәнна 3:16-да Иса дьбежә: «Чьмки Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә».

Пʹешкʹеша Хԝәдейи пʹьрʹ ԛимәт бона мә һʹәмуйа, әԝ һәйә Кӧрʹе Ԝийи тайе тʹәне. Бь ве пʹешкʹеше әм дькарьн аза бьн жь дилтйа гӧнә, калбун-пирбуне, у мьрьне (Зәбур 51:5; Йуһʹәнна 8:34). Һәрге әм гәләк ԛәԝате дьдьнә хәбате жи, бь хԝә әме нькарьбьн жь ве дилтийе аза бьн. Жь һʹьзкьрьна хԝәйә мәзьн Хԝәде пʹешкʹеши мә кьр әԝ, чь кӧ мә аза дькә. Йаһоԝа Хԝәде сәва инсанәте кӧрʹе хԝә Иса Мәсиһ ԝәк кʹьрин да, чь кӧ мәщал да мәрьвед гӧһдар жийина һʹәта-һʹәтайе бьстиньн. Ле кʹьрин бь рʹасти чь йә? Чьма әԝ гьринг ә? У чаԝа әм дькарьн жь ԝе кʹаре бьстиньн?

Кʹьрин әԝ һәԛ ә, кӧ дьдьн сәва тьштәки ӧндакьри пашда ԝәгәрʹиньн, йан кәсәки жь дилтийе аза кьн. Кʹьтеба Пироз шьровәдькә кӧ де-баве мәйи пешьн, Адәм у Һеԝа бе гӧнә һатьбун әʹфьрандьне, у дькарьбун ль сәр әʹрде щьнәт һʹәта-һʹәтайе бьжитана тʹәви зӧрʹәтед хԝә йед кӧ ль ахьрийе ԝанрʹа бьбуна (Дәстпебун 1:26-28). Йазьх ле ԝана бьжарт гӧрʹа Хԝәде нәкьн, у ӧса бунә гӧнәкʹар. Ахьрийе чь бу? Кʹьтеба Пироз щаба ԝе пьрсе дьдә: «Аԝа чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12). Адәм дәԝса кӧ жийина кʹамьл дәрбази зӧрʹәтед хԝә бькә, гӧнә у мьрьн дәрбаз кьр.

Ԝе дәрәщеда кʹьрин гәрәке анәгори тьште ӧндабуйи буйа, демәк ԝәк һәв буна. Адәм бь нәгӧһдарийа хԝә, гӧнә кьр у жийина кʹамьл ӧнда кьр. Кʹьтеба Пироз дьбежә кӧ жь бо ԝе йәке Адәм зӧрʹәтед хԝә кьрә диле гӧнә у мьрьне. Ләма жи жийина кәсәки дьн лазьм бу йе кӧ кʹамьл бу, демәк жийина Иса, чь кӧ ԝәк ԛӧрбан һатә дайине ԝәки мәрьва жь дилтийе аза кә (Рʹомайи 5:19; Әфәси 1:7). Хԝәде жь бо һʹьзкьрьна хԝә кʹьрин да инсанәте, сәва әм бьстиньн әԝ, чь кӧ Адәм у Һеԝайе ӧнда кьрьн, демәк жийина һәрһәйи сәр әʹрде щьнәт (Әʹйанти 21:3-5).

Бе шьк пʹешкʹеша кʹьрине мәщале дьдә, кӧ жийина һәрһәйи бьстиньн, у әв һәйә пʹешкʹешәкә лапә ԛимәт сәва мә һʹәмуйа. Чаԝа кӧ готара дьнда һатьбу готьне, сәва кӧ «пʹешкʹеша кʹамьл» ԛимәт кьн, ԝәрә әм шеԝьр кьн чаԝа әԝ сәр мә һʹӧкӧм дькә у али мә дькә кʹаре бьстиньн.

Хԝәстьна мәва гьредайи йә. Хԝәстьна мәйә ԛәԝи һәйә, кӧ тʹьме бьжин (Ԝаиз 3:11). Һәмьки бь ԛәԝата хԝә әм нькарьн әв хԝәстьна хԝә биньн сери, ле бь сайа кʹьрине дьбә. Кʹьтеба Пироз дьбежә: «Чьмки маше гӧнә мьрьн ә, ле  пʹешкʹеша Хԝәде жийина һʹәта-һʹәтайе йә, бь сайа Хӧдане мә Мәсиһ Иса» (Рʹомайи 6:23).

Һʹәԝщед мәва гьредайи йә. Мәрьва нькарьбун кʹьрин бьдана. Кʹьтеба Пироз шьроԝәдькә «Чьмки бьһа йә ԛимәте хьлазбуна ԝан, тʹӧ щар әв йәк набә кӧ бе дайин» (Зәбур 49:8). Ләма жи мәрʹа аликʹарйа Хԝәде лазьм бу, сәва кӧ жь дилтйа гӧнә у мьрьне аза бьн. Ле «бь азакьрьна Мәсиһ Иса» Хԝәде да мә әԝ, чьда әм һʹәԝщә бун (Рʹомайи 3:23, 24).

Ԝәʹде лайиԛ. Кʹьтеба Пироз дьбежә: «Гава әмә һе гӧнәкʹар бун, Мәсиһ бона мә мьр» (Рʹомайи 5:8). Әва йәка мә дьдә баԝәркьрьне, ԝәки Хԝәде зәʹф мә һʹьз дькә, һәла һе чахе әм нава гӧнада бун жи. Рʹаст ә әм жь бо гӧнә пʹьрʹ дьчәрчьрьн, ле әв кʹьрин, мә һелан дькә ль ахьрийе бьньһерʹьн.

Нетед тʹәмьз әʹйан дькә. Кʹьтеба Пироз әʹйан дькә, кӧ чьма Хԝәде, Кӧрʹе хԝә ԝәк кʹьрин да: «Бь ве йәке һʹьзкьрьна Хԝәде һьндава мәда хӧйа бу, гава кӧ әԝи Кӧрʹе хԝәйи Тайе Тʹәне шандә дьнйайе, ԝәки әм бь ԝи бьжин. Һʹьзкьрьн әв ә, нә кӧ мә Хԝәде һʹьз кьр, ле әԝи әм һʹьз кьрьн» (1 Йуһʹәнна 4:9, 10).

Чаԝа тӧ дькари нишан ки, кӧ дьшекьринь ве пʹешкʹеша лапә ԛимәт? Бинә бира хԝә гьлийе Иса жь Йуһʹәнна 3:16, кʹидәре кӧ те готьне ԝәки тʹәне әԝе кӧ ԝи «баԝәр бькә» ԝе бе хьлазкьрьне. Ль гора Кʹьтеба Пироз «баԝәри әԝ ә, чахе әм дӧдьли ниньн, ԝәки чь кӧ әм һивийе нә, ԝе бе сери» (Ибрани 11:1). Сәва кӧ баԝәрийа ӧса һәбә, занәбуна рʹаст гәләк фәрз ә. Ләма жи әм ԝә һелан дькьн ԝәʹдә бьвиньн у дәрһәԛа Йаһоԝа Хԝәде һе зедә пебьһʹәсьн, чьмки Әԝи әв «пʹешкʹеша кʹамьл» дайә мә. Ӧса жи пебьһʹәсьн кӧ чь гәрәке бькьн сәва кӧ жийина һәрһәйи бьстиньн у ләзәте бьвиньн жь ԝе йәке, чь кӧ бь ԛӧрбанбуна Иса әм дькарьн ԛазанч кьн.

Тӧ дькари әԝан һʹәму тьшта пебьһʹәси һәрге леколин ки әʹламәтйа дәрһәԛа Ньвисаред Пироз жь малпәра www.ps8318.com. Шәʹдед Йаһоԝа һазьр ьн али тә бькьн. Әм баԝәр ьн, кӧ чахе тӧ һе зедә пебьһʹәси дәрһәԛа ве пʹешкʹеша ԛимәт у кʹара ԝе, һьнге те һелан би бежи: «Шькьр жь Хԝәдерʹа, бь сайа Хӧдане мә Иса Мәсиһ» (Рʹомайи 7:25).