Мәрьв тʹьме итʹбарийа хԝә ԝан кәса тиньн, йед кӧ щабдарийед хԝә тʹиньн сери, чьмки әԝана шьхӧле хԝәда хирәт ьн.

Һәрге зарʹ бьчʹук ә жи, әԝ дькарә һин бә щабдар бә. Кʹьтеба «Parenting Without Borders» ӧса дьбежә: «Зарʹа йәк-сали ида дькарә гӧрʹа де-баве хԝә бькә. Ле щәм зарʹед һʹәта дӧ сали, хԝәстьн пешда те кӧ чʹәʹв бьдьнә де-бавед хԝә. Гәләк ԝәлатада де-бав шьхӧле мале дьдьнә зарʹа, гава әԝана ида пенщ сали нә. Зарʹед ӧса бьчʹук жи, дькарьн шьхӧлед хԝә рʹьнд биньн сери».

Гәләк щаһьл рʹасти чәтьнайа тен, чахе жь де-бава щьһе дьбьн. Ле дәрәщед ӧсада әԝана нькарьн чәтьнайа сафи кьн у пашда вәдьгәрʹьн мал. Мәʹни ве йәкеда нә, ԝәки де-бав ԝәʹдәда әԝана һин нәкьрьнә, кӧ чь щурʹәйи гәрәке пʹәра хәрщ кьн, чаԝа шьхӧле мале бькьн у әԝана нә жи һин бунә бьбьнә мәрьвнә щабдар.

Хенщи ԝе йәке, ԝе баш бә жь бьчʹуктайе зарʹед хԝә һин кьн щабдар бьн. Кʹьтеба «How to Raise an Adult» ӧса дьбежә: «Баш нинә кӧ де-бав дәԝса зарʹа һʹәму тьшти сафи кьн һʹәта һʹәйждәһ салийа ԝи, у паше ньшкева щьһе бьн».

Шьхӧлед мале бьдьнә ԝан.

ПРИНСИПА КʹЬТЕБА ПИРОЗ: «Һәр шьхӧлида кʹар һәйә, ле пʹучʹхәбәрдан дьбә тʹӧнәбуне» (Мәтʹәлок 14:23).

Зарʹ һʹьз дькьн тʹәви де-баве хԝә шьхӧл бькьн. Әве мәщале бьдьнә хәбате кӧ һьнә шьхӧле мале бьдьнә дәсте ԝан.

Һьнә де-бав нахԝазьн кӧ зарʹед ԝан шьхӧл бькьн. Әԝана дьбежьн кӧ дәрсед зарʹа дь мәкʹтәбеда ӧса жи зәʹф ә, ләма жи нәлазьм ә шьхӧле мале жи ԝәк барәки гьран бькьнә стийе ԝан.

Ле бь рʹасти әԝ зарʹед кӧ шьхӧлед мале дькьн, дь мәкʹтәбеда дьһа сәрфьраз ьн у рʹьнд дәрсед хԝә дькьн, чьмки малда һин дьбьн кӧ чаԝа шьхӧлед гьран жи һьлдьн сәр хԝә. Хенщи ԝе йәке, дь кʹьтебәкида «Parenting Without Borders» һатьбу готьне: «Һәрге бьчʹуктайеда мәщале надьнә зарʹе, кӧ әԝ шьхӧле мале бькә, әԝ дькарә бьфькьрә ԝәки нә жи лазьм ә али мәрийа бькә . . . Сәрда жи әԝана дькарьн бьфькьрьн, ԝәки йед майин дькарьн дәԝса ԝи, шьхӧл бькьн».

 Гава һәр рʹож зарʹ шьхӧлед малева мьжул дьбә, әԝ һин дьбә аликʹарийе бьдә йед дьн у хԝәһʹьз нибә. Һьм жи ӧса зарʹ тʹәхмин дькьн, ԝәки әԝана роләкә фәрз дьлизьн малбәтеда, у ԝе фәʹм бькьн кӧ щабдарийа ԝан жи һәйә.

Али зарʹед хԝә бькә, ԝәки хԝәха щабдар бьн бона шашийед хԝә.

ПРИНСИПА КʹЬТЕБА ПИРОЗ: «Гӧһ бьдә ширәте у һинкьрьне ԛәбул кә, ԝәки ахьрийеда тӧ бьби билан» (Мәтʹәлок 19:20, ДТʹ).

Гава зарʹа ԝә шашийе дькә, мәсәлә тьштәки мәрьве дьн дьшкенә, һьнге пьшта зарʹе нәгьрьн. Зарʹ гәрәке щаба кьред хԝә бьдә, демәк бахшандьне бьхԝазә у һәрге лазьм ә һәԛе тьште зийанкьри бьдә.

Чахе зарʹ фәʹм дькә кӧ сәва кьред хԝә щабдар ә, әв йәк али ԝи дькә . . .

• кӧ дәрәԝа нәкә у шашийед хԝә вәнәшерә

• ԝәки йед дьнена нәһәԛ нәкә

• ԝәки дәстпенәкә хԝә рʹаст дәрхә

• чахе лазьм бә, бахшандьне бьхԝазә