Әз бажарәки бьчʹукда Уориалда (Штата Ԝелса Башурейә Ну) мәзьн бумә. Ви щийида мәрьва шьхӧле щоткʹарийе дькьрьн у фермайеда дьхәбьтин. Әԝана пәз у дәԝар хԝәй дькьрьн, ӧса жи гәньм у щурʹә-щурʹә сәбзә дьчандьн. Бажаре мә тʹәмьз бу, ԛачахти жи һьндьк бу.

Малбәтеда әм дәһә зарʹ бун у жь ԝана әз йе мәзьн бум. Сездәһ салийа хԝәда мьн дәстпекьр бьхәбьтьм, сәва кӧ али малбәта хԝә бькьм. Әз нәхԝәнди бум, ләма жи әз фермайеда дьхәбьтим у мьн 15 салийа хԝәда, һәспед бәйани зәфт дькьрьн.

Фермайеда һьнә тьшт мьн хԝәш дьһатьн, ле чәтьнайи жи һәбун. Аликива мьн хԝәш дьһат хәбат у тʹәбийәта бәдәԝ. Шәв әз дькарьбум бәр кӧчʹьк рʹунем у әʹзмане бь стәйрка тʹьжә, бьньһерʹьм. Мьн ӧса жи ләзәт дьстанд жь бина хԝәш, кʹижан кӧ ба жь чоле дьани. Те бира мьн һьнге әз дьфькьрим, кӧ гәрәке Кәсәки әв һʹәму тьштед ӧса бәдәԝ әʹфьрандьбә. Алийе дьнва жи, хофийа хәбата фермайеда әԝ бу, кӧ мәрьв дькарьбу һини хәйсәте хьраб буйа. Хәбатчийа тʹьме чʹерʹ дькьрьн у гәләк щьхарә дькʹьшандьн. Зутьрәке мьн хԝәха жи дәстпекьр щьхаре бькʹьшиньм у гьлийе нәщайиз бьдьмә хәбате.

Чахе әз 18 сали бум әз дәрбази Сиднәйе бум. Мьн дьхԝәст һәрʹьмә әскәрийе, ле әз һьлнәдам, чьмки әз нәхԝәнди бум. Сиднәйеда мьн хԝәрʹа хәбат дит у әз саләке ԝедәре мам. Һәма һьнге щара пешьн әз рʹасти Шәʹдед Йаһоԝа һатьм. Әз ԛайил бум һәрʹьм сәр щьватед ԝан у дәрберʹа мьн фәʹм кьр, кӧ һинкьрьнед ԝан рʹаст ьн.

Ле зутьрәке мьн сафи кьр жь бажаре мәзьн һәрʹьм. Әз бажара бьчʹукда, Гундивиндида (Штата Квинсленд) щиԝар бум. Ԝедәре мьн хәбат хԝәрʹа дит у әз зәԝьщим. Ле йазьх, мьн дәстпекьр гәләк ичʹке вәхԝьм.

Дӧ кӧрʹ мәрʹа бун. Паши буйина зарʹа, мьн дәстпекьр кʹур бьфькьрьм дәрһәԛа нета жийине. Һьнге кʹәтә бира мьн, кӧ сәр щьватед Шәʹдед Йаһоԝа Сиднәйеда чь дьһатә готьне. Мьн сафи кьр тьштәки бькьм, кӧ рʹасти ԝан бем.

Мьн журналәкә кәвьн йа «Бьрща Ԛәрәԝьлийе» дит, кʹижанеда адреса филиала Шәʹдед Йаһоԝайә Австралйайе һәбу. Мьн нәʹмә ньвиси у аликʹари хԝәст. Зутьрәке Шәʹдеки Йаһоԝа һатә бал мьн. Әԝ йәки мәʹрифәт у бь ԛәдьр бу. Әԝи һинбуна Кʹьтеба Пироз тʹәви мьн дәстпекьр.

Бь сайа һинбуна Кʹьтеба Пироз мьн тедәрхьст, ԝәки әз гәрәке гӧһастьнед мәзьн бькьм. Рʹезәкә жь Кʹьтеба Пироз гәләк дьле мьн гьрт. Әв һәбу 2 Корьнтʹи 7:1, кʹидәре кӧ те готьне: «Дә әм хԝә жь һʹәму кʹьретийа ԛальб у рʹӧһʹе хԝә паԛьж кьн у бь хофа Хԝәде лап бӧһӧрти-жьбарә бьн».

Мьн сафи кьр тʹәрка щьхаре у ичʹке бьдьм. Һеса нибу ԝе йәке бькьм, чьмки әз гәләк сал ԝанва һатьбум гьредане. Ле мьн сафи кьрьбу, ԝәки ль гора нормед Хԝәде бьжим. Принсипа жь Рʹомайи 12:2 гәләк али мьн кьр, ԝедәре ньвисар ә: «Нәкʹәвьнә кьрасе бәнде ве дьнйайе, ле сәр һʹьше хԝәда ԝәрьн, нет-фькьред ԝә бьра ну бьн». Мьн фәʹм кьр, ԝәки сәва кӧ тʹәрка хәйсәтед хьраб бьдьм, пешийе әз гәрәке фькьред хԝә бьгӧһезьм, демәк сәр ԝан хәйсәта ӧса бьньһерʹьм, ча Хԝәде дьньһерʹә. Ле бь ньһерʹандьна Хԝәде әԝ хәйсәт хьраб ьн. Бь сайа аликʹарийа Хԝәде мьн карьбу тʹәрка щьхаре у ичʹке бьдьм.

Йа лапә чәтьн сәва мьн әԝ бу, кӧ чʹерʹа нәкьм. Мьн ширәта Кʹьтеба Пироз жь Әфәси 4:29 заньбу, кʹидәре кӧ те готьне: «Тʹӧ щар бьра жь дәве ԝә хәбәрәкә хьраб дәрнәйе». Ле диса жи мьнрʹа ԝәʹдә лазьм бу, сәва кӧ жь ԝи хәйсәте хьраб аза бьм. Фькьрандьна сәр гьлийе жь Ишайа 40:26 гәләк али мьн кьр. Ԝедәре дәрһәԛа әʹзмане бь стәйрка тʹьжә, ӧса те готьне: «Чʹәʹвед хԝә бәрбь жорва рʹакьн у бьбиньн, кʹа кʹи вана әʹфьранд; әԝ кӧ, артешед вана бь һәжмарава дәрдьхә; бь навед ԝан банги гьшка дькә; жь бәрйа мәзьнийа ԛӧдрәта хԝә у бь зора һеза хԝә йәк жи жь ԝан ԛәт кем набә». Мьн фәʹм кьр, кӧ һәрге ԛәԝата Хԝәде һаԛас мәзьн ә, кӧ карьбуйә гәрдуна бе синор чекә, кʹижанирʹа кӧ һʹәԝаса мьн те, һьлбәт әԝе ԛәԝате бьдә мьн, ԝәки әз бемә гӧһастьне у дьле ԝи ша кьм. Мьн епʹещә ԛәԝат да хәбате у гәләк дӧа кьр, у ӧса һеди-һеди мьн карьбу зьмане хԝә тʹәмьз кьм.

Чахе әз фермеда дьхәбьтим, мәщал тʹӧнә бу кӧ тʹәви гәләк мәрьва бькʹәвьмә хәбәрдане, чьмки ԝедәре мәрьв һьндьк бун. Ле бь сайа һинкьрьне кӧ мьн сәр щьватед Шәʹдед Йаһоԝа дьстанд, мьнрʹа ида һеса бу тʹәви мәрьва хәбәр дьм у фькьред хԝә зәлал бежьм. Әве һинкьрьне ӧса жи али мьн кьр, кӧ мәрьварʹа мьзгинийе дәрһәԛа Пʹадшатийа Хԝәде гьли кьм (Мәтта 6:9, 10; 24:14).

Ида чәнд сал ә әз щьватеда ча рʹуспи хьзмәт дькьм. Әз гәләк ԛимәт дькьм әԝе мәщале кӧ али хушк-бьра бькьм. Ле кʹәрәма лапә мәзьн бона мьн әв ә, кӧ әз дькарьм тʹәви жьна хԝәйә амьн у һʹьзкьри у ӧса жи тʹәви зарʹед мә Йаһоԝарʹа хьзмәт кьм.

Әз гәләк жь Йаһоԝа рʹази мә, ԝәки мәщал да мьн, мәрьвәки нәхԝәнди, жь ԝи һин бьм (Ишайа 54:13). Әз бь тʹәмами ԛайил ьм тʹәви гьлийе жь Мәтʹәлок 10:22, кʹидәре кӧ ньвисар ә: «Дӧайе Хӧдан һәбуке дьдә у кʹәдәре сәрда зедә накә». Әз малбәта хԝәва дьхԝазьн һе зедә дәрһәԛа Йаһоԝа пебьһʹәсьн у һʹәта-һʹәтайе ԝирʹа хьзмәт кьн.